Esculca Grupo de Investigación

O pasado 18 de xuño de 2026 tivo lugar o obradoiro «O proceso de Transferencia de Coñecemento en Educación. Elementos clave», impartida por Lidia Fernández Pérez, integrante da área de Valorización, Transferencia e Emprendemento (AVTE) da USC.

Esta actividade enmárcase nas accións promovidas polo proxecto PEDApS(c), Plataforma Educativa ApS(c) para a Mellora da Reciprocidade Universidade-Comunidade, financiado no marco do Proxecto de Proba de Concepto do Plan Estatal de Investigación Científica, Técnica e de Innovación 2024-2027.

A poñente ofreceu unha visión práctica sobre os mecanismos de transferencia de coñecemento no ámbito educativo, destacando os elementos clave para converter os resultados da investigación en recursos, metodoloxías e iniciativas con capacidade de transformación social e educativa.

Últimos días para INSCRIBIRTE ! Toda a Información AQUI:

https://esculca.usc.gal/v-simposio-internacional-de-aprendizaxe-servizo-na-universidade/

Os profesores Miguel A. Santos Rego, Alexandre Sotelino Losada e a profesora Ana Vázquez Rodríguez, membros do GI Esculca, desenvolveron unha visita de traballo a Cabo Verde no marco do proxecto “TRAZAS. Tecendo redes para a cidadanía global: a consolidación dun modelo de aprendizaxe-servizo e cooperación ao desenvolvemento”, financiado pola convocatoria de Proxectos de investigación e para a creación de grupos de investigación en materia de cooperación para o desenvolvemento, no marco da Axenda 2030, da Xunta de Galicia.

Durante a estadía, o equipo mantivo encontros institucionais cos equipos reitoriais da Universidade de Cabo Verde (UNI-CV) e da Universidade Jean Piaget de Cabo Verde, co obxectivo de fortalecer as relacións de colaboración académica e avanzar no desenvolvemento das accións previstas no proxecto.

A visita tamén incluiu actividades de recollida de información e traballo de campo, así como diferentes accións formativas dirixidas á comunidade universitaria caboverdiana, centradas na metodoloxía da aprendizaxe-servizo e no seu potencial para promover a cidadanía global, o compromiso social e a cooperación ao desenvolvemento desde a educación superior.

Esta nova acción internacional contribúe á consolidación das redes de colaboración entre Galicia e Cabo Verde impulsadas polo proxecto TRAZAS, reforzando o intercambio de coñecementos e experiencias orientadas á institucionalización de prácticas educativas comprometidas coa transformación social e cos principios da Axenda 2030.

O doutorando do GI Esculca, David Álvarez-Caneda, participou na ESAI Conference 2026, un dos encontros científicos de referencia no ámbito dos estudos da educación en Irlanda. Baixo o subtítulo, From Legacy to Futures: Celebrating ESAI’s First Meeting of Scholars and 50 Years of Irish Educational Research, o congreso conmemorou os cincuenta anos do primeiro encontro de académicos e académicas que deu lugar á creación da Educational Studies Association of Ireland (ESAI).

O congreso internacional, celebrado na cidade de Galway (Irlanda) entre os días 28 e 30 de maio, reuniu investigadores e investigadoras de distintas universidades e centros de investigación de máís de 20 países para debater sobre os principais retos e tendencias actuais da educación. Neste marco, David Álvarez presentou dúas contribucións como coautor xunto aos profesores Miguel A. Santos Rego e Alexandre Sotelino Losada, membros do GI Esculca, e ao profesor Tony Hall, da School of Education da University of Galway.

A participación neste foro científico favoreceu o intercambio de coñecementos e experiencias con investigadores e investigadoras procedentes de diferentes contextos internacionais, contribuíndo ao fortalecemento de redes de colaboración académica.

Esta actividade enmárcase nas accións de internacionalización e difusión científica vinculadas ao proxecto de tese de doutoramento desenvolvido no seo do GI Esculca, baixo a dirección dos profesores Miguel A. Santos Rego e Alexandre Sotelino Losada, e financiado a través das Axudas para a Formación do Profesorado Universitario (FPU) do Ministerio de Ciencia, Innovación e Universidades.

As profesoras do GI Esculca, Mar Lorenzo Moledo, Bibiana Regueiro Fernández e Iris Estévez, atópanse no Ranking de mulleres investigadoras españolas e en España, elaborado polo CSIC, que reúne a máis de 12.000 científicas cos mellores indicadores de impacto, índice h e número de citas, a partir de perfís en Google Scholar e OpenAlex vinculados a ORCID.

Dende o Grupo de Investigación, dámoslle os nosos parabéns pola consolidación da súa traxectoria académica e investigadora.

https://figshare.com/articles/preprint/Ranking_de_mujeres_investigadoras_espa_olas_y_en_Espa_a_Edici_n_GS-ORCID_OPENALEX_Abril_2026/32063853?file=64480200

As compañeiras Anaïs Quiroga Carrillo, Tania Ramos García, Mar Lorenzo Moledo e Alexandra M. Rodríguez Gil, do GI Esculca, veñen de publicar o artigo “Effectiveness of Parenting Programs in Preventing Child Maltreatment: A Systematic Review of Randomized Controlled Trials” na prestixiosa revista Trauma, Violence, & Abuse, situada no primeiro posto da categoría “Family Studies” do Journal Citation Reports. https://journals.sagepub.com/doi/10.1177/15248380261451837

A integrante do GI Esculca, Fátima García Doval, xunto con José César Perales, veñen de publicar o libro “Ni frágiles ni idiotas. Cómo la mala ciencia ha construido el estereotipo adolescente” na editorial Shackleton books.

O libro propón un exame crítico sobre as afirmacións máis repetidas sobre a saúde mental na era dixital. A través dunha lectura rigorosa da evidencia científica e un repaso histórico dos pánicos morais que acompañaron a cada innovación tecnolóxica, os autores cuestionan os relatos simplistas que atribúen ás pantallas a raíz dos males contemporáneos.

A profesora Iris Estévez, do GI Esculca, xunto con outros colegas do GI GIPED da Universidade da Coruña ven de publicar o artículo titulado “Understanding the Relationship between Parental Involvement and Sudents’ Goal Orientation: A systematic Review 2014-2024", na revista revista Psicología Educativa. O traballo está dispoñible a través da seguinte ligazón:

Understanding the Relationship between Parental Involvement and Sudents’ Goal Orientation: A systematic Review 2014-2024 Comprender cómo las diferentes formas de participación parental influyen en el proceso motivacional del alumnado es crucial para los profesionales educativos. Para abordar esta cuestión, realizamos una revisión sistemática de artículos de investigación publicados entre 2014 y 2024 que explora...

O coordinador do GI-Esculca, Miguel A. Santos Rego, está a participar no XXVI Congreso Internacional sobre Diversidad en Organizaciones, Comunidades y Naciones, que se celebra en Ciudad de México entre os días 27 e 29 de maio de 2026.

Neste encontro internacional presentaranse diversas comunicacións vinculadas ao traballo desenvolvido polo GI-Esculca, nas que se darán a coñecer resultados de teses de doutoramento e proxectos de investigación centrados na diversidade, a inclusión e a educación.

A participación neste congreso constitúe unha nova oportunidade para compartir coñecemento, fortalecer redes de colaboración internacional e seguir avanzando no compromiso do grupo coa investigación educativa de calidade e impacto social.

O doutorando David Álvarez Caneda, membro do Grupo de Investigación ESCULCA, impartiu o pasado 21 de maio un seminario na School of Education da University of Galway (Irlanda), no marco da súa estadía internacional de investigación.

O seminario, titulado Beyond the Classroom: Participation in Extracurricular Activities and Holistic Student Development in Higher Education, abordou o papel da participación en actividades extracurriculares no desenvolvemento persoal, social, académico e profesional do estudantado universitario. O evento estivo dirixido a todo o profesorado e estudantado de diferentes facultades, e contou co patrocinio do Prof. Tony Hall da School of Education.

Durante a sesión, reflexionouse sobre como as universidades afrontan actualmente o reto de recoñecer aprendizaxes que teñen lugar máis alá do currículo formal, abordando cuestións vinculadas ao recoñecemento institucional e ao desenvolvemento integral do estudantado.

Así mesmo, destacouse o interese de iniciativas desenvolvidas na University of Galway, como o University Skills Passport, orientadas ao recoñecemento e articulación de aprendizaxes derivadas de experiencias extracurriculares e co-curriculares.

A actividade enmárcase dentro das accións de internacionalización e difusión científica vinculadas ao proxecto de tese de doutoramento desenvolvido no seo do GI Esculca baixo o financiamento das Axudas para a Formación do Profesorado Universitario (FPU) do Ministerio de Ciencia, Innovación e Universidades.
https://www.universityofgalway.ie/colleges-and-schools/arts-social-sciences-and-celtic-studies/education/news/school-of-education-seminar-with-david-alvarez-caneda-university-of-santiago-de-compostela.html