25/06/2026
Hai despedidas que se preparan e outras que nunca se chegan a estar preparados para vivir.
Neste final de curso despedimos aos nosos rapaces e rapazas de 6º, que comezan unha nova etapa chea de ilusión, pero tamén tivemos que dicirlle adeus a unha persoa que forma parte da historia, da alma e da vida diaria do noso cole desde hai 24 anos. Xubílase Pili e todavía nos custa dicilo en voz alta.
E dicimos “xubílase”, pero sabemos que hai persoas que nunca marchan de verdade dos lugares que axudaron a construír.
Durante todos estes anos, Pili foi moito máis ca a nosa limpadora. Foi unha presenza constante, discreta e imprescindible. Desas persoas que chegan moi cedo, que están sempre, que coidan cada recuncho sen buscar protagonismo e que conseguen facer sentir aos demais como na casa. Porque limpar tamén é coidar. E Pili coidou do noso cole con entrega, con responsabilidade e, sobre todo, con moitísimo corazón.
Quixemos sorprendela porque sabiamos que, coa súa eterna humildade, non quería actos, nin homenaxes, nin medallas. Pero hai persoas ás que o cariño lles chega igualmente, porque o teñen máis que merecido. E así foi. Recibímola cun corredor de flores e aplausos que falaban por si sós. O ximnasio encheuse de emoción, de sorrisos e de gratitude. Por un intre, todo o cole parou para dicirlle un máis que merecido grazas.
Escoitamos palabras de despedida e de agradecemento, compartimos lembranzas e emocións que foron aparecendo entre risas e bágoas. Houbo agasallos por parte do centro e tamén un fermoso recoñecemento da ANPA, porque cando alguén deixa pegada, esa pegada queda en toda a comunidade educativa.
E como non podía ser doutro xeito, rematamos celebrando. Bailando todos xuntos esa canción que a acompañou durante tantos anos, convertendo o adeus nun momento de festa, deses que quedan gardados para sempre na memoria. Porque hai persoas que non precisan grandes discursos para ser inesquecibles. Persoas que deixan marca nos xestos pequenos, no día a día, na forma de estar e de coidar dos demais.
Grazas, Pili, por cada mañá, por cada conversa, por cada sorriso, por cada detalle e por facer do noso cole un lugar mellor durante estes 24 anos. Desexámosche unha nova etapa chea de descanso, tempo para ti, alegría e moitos momentos fermosos.
As portas do cole quedarán sempre abertas para ti.
Esta foi, é e será sempre a túa casa!
