ProxectoTERRA

ProxectoTERRA Un proxecto de cooperación do mundo da educación na procura de mellorar o noso coñecemento e sentido crítico e propositivo sobre os lugares que habitamos.

Unha inciativa do Colexio Oficial de Arquitectos de Galicia. Un proxecto de cooperación co mundo da educación na procura de mellorar o noso coñecemento e sentido crítico&propositivo sobre os lugares que habitamos.

18/08/2026

Os cadernos de campo do ProxectoTERRA son moito máis ca un material para utilizar durante unha visita. Son unha ferramenta para observar, comprender e ler o territorio, achegándose á arquitectura, á paisaxe e aos espazos que habitamos e descubrindo as relacións entre o construído e a natureza, entre o pasado e o presente e entre os lugares e as persoas que os habitan.

O debuxo e a ilustración axudan tamén a fixar a mirada nos detalles, comprender a escala e identificar aquilo que é esencial en cada espazo.

O seu uso abrangue todo o proceso educativo: permite preparar a actividade, acompañar a experiencia no territorio e continuar o traballo na aula despois da visita.

Os cadernos de campo creáronse de forma experimental durante o curso 2025/2026 e están xa dispoñibles para a súa descarga directa na páxina web do ProxectoTERRA, como recurso aberto para centros e docentes.

03/08/2026

Nos Obradoiros Transdisciplinares do Proxecto Terra, o alumnado non só analiza o territorio: aprende a escoitalo, a identificar as súas fortalezas e necesidades e a formular propostas para melloralo. Porque educar tamén é ofrecer oportunidades para participar, dialogar e imaxinar colectivamente os espazos que habitamos.

Neste vídeo achegámonos a unha sesión desenvolvida por Mar Penela co alumnado do IES Alexandre Bóveda nun proceso de análise e reflexión sobre o seu barrio, demostrando que a escola pode ser un lugar desde o que aprender a exercer unha cidadanía activa, crítica e comprometida.

Porque educar é tamén axudar a formar persoas capaces de mirar o seu territorio con espírito crítico, propoñer cambios e participar activamente na vida da súa comunidade.

vivendainfraestruturas.xunta

06/07/2026

Ao longo do curso, os Obradoiros Transdisciplinares do Proxecto Terra chegaron a numerosos centros educativos, creando espazos nos que experimentar, colaborar e descubrir novas formas de achegarse á arquitectura, á paisaxe e ao territorio.

Da man de especialistas de diferentes ámbitos, o alumnado completa o traballo desenvolvido nas aulas a través do xogo, da experimentación e da manipulación creativa. Estes obradoiros enriquecen o proceso educativo, fomentan a colaboración e axudan a comprender a arquitectura, a paisaxe e o territorio desde unha mirada transversal, participativa e conectada coa contorna.

Este vídeo recolle unha pequena mostra destas experiencias compartidas. Nesta ocasión, acompañamos a Mar Penela durante un dos Obradoiros Transdisciplinares desenvolvidos no CEIP Pazos de Reis, en Tui, un exemplo do traballo realizado ao longo do curso nos centros participantes.

.xunta

02/07/2026

No CEIP Corvillón de Cambados, o alumnado de Primaria puxo a proba a súa capacidade para observar, analizar e comprender o territorio que o rodea.

Da man das inspectoras urbanísticas da APLU, as rapazas e rapaces achegáronse á paisaxe e á ordenación do territorio a través da análise de imaxes, o debate e o traballo en equipo. Compartiron ideas e reflexionaron sobre os retos e oportunidades que presenta a conservación da nosa contorna.

Aprender a mirar e entender o territorio é o primeiro paso para coidalo.

“Eu son Inspect@r Urbanístic@. Coida do territorio. Coida do teu” fomenta a participación activa do alumnado e axúdao a comprender que cada decisión conta á hora de protexer e valorar o territorio que compartimos.



.xunta

29/06/2026

O ProxectoTERRA medra da man dos centros e do profesorado. Neste vídeo, Diego Rincón , do CEIP Pazos de Reis (Tui), comparte a súa experiencia e explica como os recursos do ProxectoTERRA se integran na vida da aula para achegar ao alumnado unha nova mirada sobre a arquitectura, a paisaxe e o territorio.



25/06/2026

Actividade teatralizada:

No CEIP Corvillón de Cambados, as nenas e nenos convertéronse en protagonistas do coidado do territorio galego.

A través dun obradoiro teatralizado e participativo, o alumnado descubriu, xogando, a importancia da paisaxe e do seu contorno máis próximo. Da man das inspectoras urbanísticas da APLU e a compañía Trinke trinke reflexionaron sobre como as nosas accións inflúen no territorio e sobre o papel que todas e todos podemos desempeñar na súa protección.

“Eu son Inspect@r Urbanístic@. Coida do territorio. Coida do teu” é moito máis ca unha actividade educativa: é un convite a coñecer, valorar e coidar o territorio do que formamos parte.

.xunta

Compartimos algunhas imaxes do curso O lugar onde vivimos. O ProxectoTerra en Infantil e Primaria, celebrado os días 20,...
12/06/2026

Compartimos algunhas imaxes do curso O lugar onde vivimos. O ProxectoTerra en Infantil e Primaria, celebrado os días 20, 21 e 22 de maio no CAFI de Santiago de Compostela.

A actividade formativa estivo centrada nos materiais didácticos elaborados por ProxectoTerra para Educación Infantil e Primaria, explorando as súas posibilidades para traballar a percepción da contorna, a paisaxe, o territorio e a identidade desde as primeiras etapas educativas.

Ao longo das sesións abordáronse propostas adaptadas aos diferentes niveis educativos, desde as vivencias ligadas aos espazos máis próximos ata a comprensión das relacións entre as persoas e o territorio. O curso combinou contidos teóricos, análise de materiais e actividades prácticas orientadas á súa aplicación na aula.

Unha proposta formativa que busca facilitar recursos e metodoloxías para incorporar a educación territorial ao currículo, promovendo no alumnado unha maior comprensión e valoración do lugar onde vive.

Grazas a todas as persoas participantes polo seu interese, implicación e contribución ao intercambio de experiencias durante estas xornadas.

.xunta

01/06/2026

Intercambio territorial na Costa da Morte
O alumnado do IES Camilo José Cela (Padrón) e do IES Félix Muriel (Rianxo) e o IES de Ames (Ames) participou, dentro do ProxectoTerra, nun intercambio territorial pola Costa da Morte para descubrir a súa paisaxe, o seu patrimonio e a relación entre as actividades humanas e o medio natural.

Durante a primeira xornada realizaron un roteiro entre Santa Mariña e o Faro de Cabo Vilán, percorrendo espazos como a Duna de Monte Branco, a Praia do Trece e o Cemiterio dos Ingleses, onde coñeceron a formación da paisaxe costeira, a historia dos naufraxios e a identidade deste territorio. A continuación visitaron o Faro de Cabo Vilán, reflexionando sobre a relación entre as actividades económicas actuais e a paisaxe. A xornada completouse coa visita ao Dolmen de Dombate e ao Castro de Borneiro, fundamentais para comprender a historia máis antiga da comarca.

No segundo día visitaron o miradoiro de Santo Hadrián, o Ecomuseo O Forno do Forte, onde descubriron e participaron da tradición oleira de Buño, e o estaleiro O Baladiño, exemplo da carpintería de ribeira tradicional. A actividade rematou cun roteiro pola ría de Corme e Laxe para analizar a súa formación, os seus ecosistemas, as actividades marisqueiras e a relación dos asentamentos humanos coa paisaxe litoral.

Unha experiencia para aprender a interpretar o territorio e descubrir a riqueza natural, cultural e patrimonial da Costa da Morte.

Moi agradecidas aos Concello de Vimianzo e ao Concello de Malpica de Bergantiños pola súa colaboración e apoio loxístico.

28/05/2026

Visita Guiada Arquitectura e Cidade a Ferrol

O alumnado do CEIP de Cervo (Cervo) e do CEIP Rosalía de Castro (Lugo) participou, dentro do ProxectoTerra, nunha visita guiada a Ferrol para descubrir a cidade a través da súa arquitectura, da súa historia e da súa relación co mar.

Ao longo da xornada visitaron o barrio da Magdalena e o Ferrol Vello, coñecendo a evolución urbana da cidade e a importancia da construción naval en Ferrol coa visita á Exposición Nacional da Construción Naval.

A actividade continuou en Mugardos, onde visitaron o Centro de Interpretación de Caldoval, un xacemento que permite coñecer a pegada da antiga ocupación romana na ría e achegarse á vida cotiá da época. Posteriormente realizaron unha travesía en barco pola ría ata o porto exterior e o castelo de San Felipe, descubrindo o patrimonio militar e á paisaxe marítima da contorna.

Unha experiencia para aprender a interpretar o territorio, comprender a evolución das cidades e descubrir a relación entre patrimonio, arquitectura e paisaxe.

Curso de formación do profesorado.Os días 24 e 25 de abril celebrouse no CFR da Coruña o curso PAGUS. Paisaxes e Cartogr...
05/05/2026

Curso de formación do profesorado.

Os días 24 e 25 de abril celebrouse no CFR da Coruña o curso PAGUS. Paisaxes e Cartografías, dentro do ProxectoTerra .

A actividade formativa estivo centrada no uso dos materiais de paisaxe na aula, na súa adaptación aos novos currículos da ESO e do Bacharelato e na incorporación de ferramentas, tanto analóxicas como dixitais, á práctica docente.

Ao longo das sesións abordouse a paisaxe como obxecto de ensino desde unha perspectiva multidimensional, introducindo a cartografía como ferramenta de análise e representación do territorio. O curso combinou contidos teóricos con aplicacións prácticas, incluíndo o traballo con sistemas de información xeográfica (QGIS)

Unha proposta orientada a reforzar o papel da paisaxe na educación e a facilitar recursos e metodoloxías para a súa integración na aula.

Dirección

Praza Da Quintana, 1. 2º
Santiago De Compostela
15704

Página web

,

Notificaciones

Sea el primero en enterarse: le enviaremos un correo electrónico cuando ProxectoTERRA publique novedades y promociones. Su dirección de correo electrónico no se utilizará para ningún otro fin y puede darse de baja en cualquier momento.

Contactar Con La Escuela/facultad

Enviar un mensaje a ProxectoTERRA:

Atajos

Compartir

Categoría