07/05/2026
Ikasgelak kalera, Ikastolak herrira
Gaur karrikara atra gara Nafarroako ikastolak. Karrikara atra gara eta gure ikasgelak karrikara atra ditugu gure seme-alaben etorkizunean eta Nafarroako hezkuntzan atzerapausorik onartzen ez dugula errateko. Ikastolak herritik sortuak eta herriarendako lanean ari garelako sortu ginen lehen egunetik, egun bakotxean eta egun guzietan, eta horretan jarraitzen dugula adierazteko atra gara karrikera. Gure sare osoa, Ikastola bat duen herri bakoitza, karrikan d**o gaur. Sakanatik Baztanera, Beratik eta Bortzirietatik Hegoaldera eta Erriberara, Zangozatik Iruñerrira, Lizarratik Tafallara.
Gure sareari ezezik, Nafarroa euskaraz josteari eta hezkuntzari murrizketak aplikatu nahi dizkiote. Eta gu haserre gaude. Haserre egoteko motiboak ditugu. Lehenbizikoa, gure seme-alabendako etorkizun onena nahi dugu, eta, horregatik, Nafarroako haurrek ikastolan ikasteko eskubidea dutela aldarrikatzen dugu. Bigarrena, Nafarroa osoko hezkuntzak kezkatzen gaitu: aitzinet egin beharrean, murrizketa hauekin gibelat gazileko. Hirugarrena euskara da. Hezkuntza Departamentuak kontrakoa erraten badu ere, euskarari gelak murriztuko dizkiote. Hori arras larria da Nafarroan, hori arras larria da Nafarroa euskaraz josten duen Ikastolen sarearendako. Laugarrena, erabakia arbitrarioki, elkarrizketarik gabe eta irizpideak bat-batean aldatuz hartu izana da. Horren froga da Hezkuntza Departamentua bere erabaki batzuk zuzentzen gan dela. Ikastolak beti gaude solas egiteko prest. Baina elkarrizketa ukatzen badigute guri eta hezkuntza eragile guziei, joko arauak partiduaren erdian aldatzen badituzte, ez gaude gauzak egiteko modu horrekin ados. Ez dugu onartzen begirune falta hori. Azkenik, auzolanean eraikitako komunitate oso bati bizkar emateak kezkatzen daku. Herrigintza lan oso bat da zigortzen dena. Berdintasuna eskatzen dugu, gure sarearendako eta sare guztiendako. Hori da bidezkoa, hori da beharrezkoa, hori da aldarrikatzen duguna.
Bertze behin, eta behar den guzietan, Hezkuntza Departamentuari bere erabaki arbitrarioa gibelat bota dezala eskatzen diogu. Nafarroaren onerako, hezkuntzaren onerako, guzien onerako.
Atzerapausorik ez!
