CEIP de Carnota

20/06/2026

🚣‍♀️ Mentres no cole rematamos o curso, o alumnado de 6º disfruta un curso máis da súa viaxe de fin de etapa a Carucedo, unha actividade organizada e xestionada pola ANPA do CEIP de Carnota.

Están a desfrutar dun programa cheo de experiencias: rutas polas Médulas, piragüismo e outras actividades deportivas no lago, rocódromo, tirolina, talleres, veladas nocturnas e moitos momentos de convivencia que, sen dúbida, quedarán para sempre na memoria.

Polo que nos vai chegando, as novas son inmellorables: están a pasalo en grande! 🌞💚

19/06/2026

🌞 Remata un curso cheo de aprendizaxes, retos compartidos, descubrimentos, risas, esforzo e moitos momentos que levaremos connosco.

Grazas ao alumnado, ás familias, ao profesorado e a toda a comunidade educativa por facer posible este camiño.

Agora toca descansar, xogar, explorar, ler, aburrirse un pouco, medrar moito e encher o verán de recordos felices.

💛 Feliz verán a todas e todos. Vémonos en setembro. 🌊📚☀️



BoDescanso ☀️🌻

19/06/2026

🗿✨ Dar forma ás ideas coas mans

Rematamos o curso cun taller de escultura impartido por Alberto Vilariño, que levou a todas as aulas a explorar o volume, a creatividade e as posibilidades expresivas da arte tridimensional.

Partindo dun sinxelo molde de arame e papel de aluminio, cada alumno e alumna foi creando a súa propia figura humana. Ao longo da mañá, uns arames impersonais e idénticos convertéronse en superheroes, estrelas do mundial, personaxes de cómic, guerreiras K-Pop, mamás, papás e milleiros de personaxes nacidos da imaxinación. ✨

Durante o taller, Alberto compartiu tamén a súa propia historia: como lle gustaba debuxar dende pequeno e como, anos despois, ao descubrir o volume e as súas posibilidades expresivas, sentiu mágoa de que ninguén lle abrise antes esa porta na escola.

Quizais por iso resultou tan especial esta experiencia. Porque a arte non é só unha técnica: tamén é a oportunidade de descubrir novas formas de mirar, crear e contar o mundo.

👏 Grazas, Alberto, por abrir ese camiño aos que veñen detrás e por axudar a que diferentes linguaxes expresivas formen parte da vida dos nenos e nenas dende os seus primeiros anos.

16/06/2026

🚑❤️ Taller de primeiros auxilios e RCP

Todo o alumnado do centro participou nun taller de primeiros auxilios e reanimación cardiopulmonar (RCP) impartido por unha enfermeira da nosa comunidade, María Formoso.

En Educación Infantil aprenderon como actuar ante unha emerxencia cando unha persoa non responde, a importancia de pedir axuda, lembrar o número 112 e achegáronse por primeira vez ás manobras básicas de RCP empregando os seus bonecos de prácticas. Todo isto reforzado cunha canción que lles axudou a lembrar os pasos fundamentais dunha forma lúdica e adaptada á súa idade. 🎶

En Primaria, o alumnado puido practicar as manobras de RCP cun boneco de adestramento, traballar en parellas a posición lateral de seguridade e coñecer de preto o funcionamento dun desfibrilador, descubrindo como actuar nos primeiros momentos dunha emerxencia mentres chegan os servizos sanitarios.

🩺 Unha experiencia práctica e moi valiosa que lles permitiu adquirir coñecementos básicos que poden resultar fundamentais no futuro.

👏 Grazas a María Formoso por compartir co noso alumnado unha aprendizaxe tan importante.

12/06/2026

🎉💦🌞 Xornada de xogos e diversión en Lombáns

Hoxe vivimos unha xornada de convivencia especial para ir despedíndonos deste curso que xa enfía a recta final: unha mañá chea de movemento, risas e moita auga en Lombáns.

O alumnado de todas as aulas foi pasando por diferentes propostas que combinaron xogos, retos e actividades refrescantes. Entre as máis agardadas estiveron o espectacular Eliminator, poñendo a proba reflexos e equilibrio; o inchable acuático e a sempre divertida festa da escuma. 🤸‍♀️🌊

Pero tamén houbo espazo para as cousas máis sinxelas: pistolas de auga, esponxas, vasos e algún que outro mangueirazo despistado 😄💦

Unha mañá de convivencia, xogo compartido e celebración para desfrutar xuntos destas últimas semanas de curso.

👏 Grazas á Anpa Ceip Carnota San Gregorio pola súa colaboración cos inchables e ao Concello de Carnota por cedernos as instalacións. Sen estas colaboracións non sería posible facer unha xornada tan especial.

06/06/2026

https://www.quepasanacosta.gal/articulo/carnota/alumnado-do-ceip-carnota-celebrou-dia-do-medio-ambiente-coidando-praia-pillara-das-dunas/20260606090402174489.html

O alumnado do CEIP de Carnota celebrou este venres o Día Mundial do Medio Ambiente cunha saída á praia de Carnota centrada no coñecemento e coidado do litora...

05/06/2026

🌊🐦♻️ Día Mundial do Medioambiente na praia de Carnota

Hoxe celebramos o Día Mundial do Medioambiente cunha saída á praia de Carnota para coñecer mellor e coidar unha das nosas maiores riquezas: o litoral.

Tras a charla dos últimos días sobre a píllara das dunas, puidemos observar de primeira man os espazos que esta especie utiliza para aniñar e reflexionar sobre a importancia de respectar e protexer estes hábitats tan fráxiles.

Aproveitamos tamén a xornada para participar nunha recollida de lixo, contribuíndo entre todos e todas a manter limpa e coidada a nosa praia. ♻️

E, como toda boa saída, non faltaron a merenda compartida, os xogos e os momentos de convivencia a pé de mar. ☀️🏖️

Porque coidar o medio ambiente comeza por coñecer, valorar e respectar aquilo que temos máis preto. 💙🌍

04/06/2026

📚🌍 Recollida solidaria de material escolar

O alumnado da materia de Formación e Orientación Persoal e Profesional de 4º da ESO do IES Lamas de Castelo, en colaboración coa ONG Nanian, pon en marcha unha campaña de recollida de material escolar destinado a escolas de Guinea Bissau.

✏️ Lápices
🖊️ Bolígrafos
📒 Cadernos
🩹 Gomas
🎨 Pinturas e rotuladores
📐 Material de debuxo e moito máis!

Se tes material en bo estado ao que poidas darlle unha segunda vida, anímate a colaborar. Pequenos xestos poden converterse en grandes oportunidades para outros nenos e nenas.

📅 Do 8 ao 19 de xuño

📍 Puntos de recollida:

IES Lamas de Castelo
CEIP de Carnota
CEIP do Pindo
Libraría Chorima

Parabéns ao alumnado do IES por esta iniciativa solidaria e grazas de antemán a todas as familias que poidan colaborar 💙

GuineaBissau UnPequenoXestoUnGranCambio

29/05/2026

🎒✨ Preparando novos comezos

Dentro do noso Plan de Orientación Académica, acompañamos ao alumnado nos cambios de etapa, axudándolles a mirar ao futuro con información, seguridade e confianza.

O alumnado de 6º de Primaria visitou hoxe o IES de adscrición, Lamas de Castelo, como peche a varias semanas de traballo nas que coñecemos mellor a estrutura do sistema educativo, reflexionamos sobre como afrontar con éxito a vindeira etapa e demos os primeiros pasos para descubrir os distintos itinerarios formativos e profesionais, identificando camiños vinculados aos seus intereses e inquietudes.

Queremos agradecer a magnífica acollida por parte do IES. Fomos recibidos polo equipo de convivencia, a orientadora, a coordinadora de benestar e o alumnado do equipo de mediación (Equipo A).

A visita comezou cunha dinámica de círculo na que puideron expresar ilusións, medos e inquedanzas ante esta nova etapa. Despois, representantes de 4º da ESO fixeron unha presentación do centro e fomos acompañados nun percorrido guiado por unhas instalacións cheas de vida e actividade.

Houbo tamén tempo para desfrutar dunha merenda saudable e saborosa na cafetería, antes de rematar cun espazo máis libre de interacción e convivencia co alumnado do instituto no patio 💛

Pola súa banda, o alumnado de 6º de Infantil achegouse ás aulas de Primaria para asomarse ao que está por vir. Visitaron as aulas de 1º, 5º e 6º, coñecendo de preto novos espazos, horarios, dinámicas e formas de traballo.

Os nenos e nenas de 6º de EP convertéronse en magníficos anfitrións, compartindo mesa cos máis pequenos para ensinarlles de primeira man os seus materiais, arquivadores e traballos de aula.
Pequenos pasos para facer máis amables e ilusionantes os grandes cambios.

29/05/2026

🧘‍♂️✨ Segunda xornada de Movemento e atención corporal no noso PIE de convivencia e xestión emocional, desta vez co alumnado do segundo e terceiro ciclo de Primaria.

A través de diferentes dinámicas seguimos explorando a calma, a atención e a conexión co corpo. Debuxamos coas mans o ritmo da nosa respiración, traballando o autocontrol e tomando conciencia dese movemento que sempre nos acompaña.

Como nos lembrou Ana María García Liñares (Ana Prema), “ioga significa unión”. Unir corpo, mente e emocións para poder aterrar no aquí e no agora, poñendo a atención no propio corpo.

Houbo tamén espazo para a confianza nos compañeiros e compañeiras nun percorrido cos ollos pechados, aprendendo a sosternos no grupo e a crear, entre todos e todas, un espazo seguro e de calma 💛

Seguimos sementando ferramentas para escoitarnos, regularnos e habitar o presente.