31/08/2026
الاول کی بابرکت ساعتوں میں منہاج ویمن لیگ، بارسلونا کے زیرِ اہتمام بچوں کے لیے ایک خوبصورت اور روح پرور میلادِ مصطفیٰ ﷺ پروگرام منعقد کیا گیا۔ پروگرام کا بنیادی مقصد دیار غیر میں رہنے والے بچوں کے دلوں میں عشقِ رسولِ اکرم ﷺ کو اجاگر کرنا اور انہیں سیرتِ طیبہ، اسلامی اقدار اور اپنی دینی شناخت سے جوڑے رکھنا تھا۔
پروگرام کا آغاز تلاوتِ قرآنِ پاک سے ہوا، جس کے بعد بچوں نے نہایت عقیدت و محبت کے ساتھ انفرادی اور اجتماعی طور پر حمدِ باری تعالیٰ اور نعتِ رسولِ مقبول ﷺ پیش کیں۔ ننھے بچوں کی خوبصورت آوازوں اور اندازِ عقیدت نے محفل کو نور و محبت سے بھر دیا۔
اس کے بعد محترمہ صفیہ صاحبہ نے بچوں سے آقا کریم ﷺ کے اخلاقِ حسنہ اور آپ ﷺ کی زندگی کے مختلف پہلوؤں پر خصوصی گفتگو فرمائی، اور بچوں کو حضور اکرم ﷺ کے اعلیٰ اخلاق، محبت، شفقت اور اسوۂ حسنہ کو اپنی عملی زندگی میں اپنانے کی ترغیب دی۔
پروگرام میں ربیعُ الاول اور سیرتِ رسول ﷺ سے متعلق ایک دلچسپ کوئز سیشن بھی منعقد کیا گیا، جس میں بچوں نے بھرپور جوش و خروش سے حصہ لیا۔ درست جوابات دینے والے بچوں کی حوصلہ افزائی کے لیے انہیں انعامات بھی دیے گئے۔
بلاشبہ، ایسے پروگراموں کا سب سے خوبصورت مقصد یہ ہے کہ پردیس میں، اپنے وطن اور اسلامی ماحول سے دور رہنے والے ہمارے بچوں کے دلوں میں عشقِ رسول ﷺ کی شمع روشن رکھی جائے اور انہیں حضور نبی کریم ﷺ کی سیرت و تعلیمات سے مضبوطی کے ساتھ وابستہ کیا جائے۔
اس خوبصورت پروگرام کی تیاری اور کامیابی میں منہاج ویمن لیگ کی تمام بہنوں اور سمر کیمپ کی اساتذہ کی محنت، وقت اور خلوص قابلِ تحسین ہے۔ جنہوں نے بچوں کی تیاری کے لیے اپنا قیمتی وقت اور توانائی صرف کی۔
اللہ تعالیٰ ان تمام کاوشوں کو اپنی بارگاہ میں قبول فرمائے اور ہمارے بچوں کے دلوں کو محبت و عشقِ مصطفیٰ ﷺ سے ہمیشہ منور رکھے۔ آمین۔
