UDC Saudable

ter a nosa universidade nun referente de compromiso coa saúde e a sociedade, o benestar e a calidade de vida individual e comunitaria. Trátase dun proxecto socio-comunitario aberto, dinámico e modificable que integra unidades dependentes organicamente de diversas vicerreitorías, así como novas liñas de actuación asistencial, docente, investigadora e comunitaria. Aposta por fomentar o compromiso e a participación da comunidade universitaria na alfabetización e promoción da saúde; a prevención da enfermidade; os hábitos, rutinas e estilos de vida saudables; as habilidades para a vida; o envellecemento proactivo; o desenvolvemento sostible medio-ambiental, económico, social e político; a integración e inclusión laboral e social: a acción solidaria; a equidade; a igualdade de xénero e polos dereitos humáns. Este proxecto está inspirado no Plan estratéxico da UDC 2013-2020 e nos plans de actuación específicos das distintas unidades e servizos, entre outros a Área de Deportes, a Unidade de Prevención de Riscos Laborais, Unidade de Atención á Diversidade, a Oficina de Medio Ambiente, o Servizo de Arquitectura e Urbanismo, a Oficina de Cooperación e Voluntariado, a Oficina para a Igualdade de Xénero, o Servizo de Atención e Promoción do Estudantado, o Centro Universitario de Formación e Innovación Educativa, a Escola Infantil e a Universidade Sénior, entre outros. A UDC Saudable participou activamente na elaboración das competencias transversais para todas as titulacións UDC, aprobadas no Consello de Goberno UDC de Maio 2017, para proporcionar unha formación integral aos estudantes, entre outras, as seguintes:
- Desenvolverse para o exercicio dunha cidadanía respectuosa coa cultura democrática, os dereitos humanos e a perspectiva de xénero.
- Adquirir habilidades para a vida e hábitos, rutinas e estilos de vida saudables.
- Desenvolver a capacidade de traballar en equipos interdisciplinares ou transdisciplinares, para ofrecer propostas que contribúan a un desenvolvemento sostible ambiental, económico, político e social.
- Valorar a importancia que ten a investigación, a innovación e o desenvolvemento tecnolóxico no avance socioeconómico e cultural da sociedade.
- Ter a capacidade de xestionar tempos e recursos: desenvolver plans, priorizar actividades, identificar as críticas, establecer prazos e cumprilos. O proxecto UDC Saudable quere contribuír ao desenvolvemento científico potenciando a investigación naquelas áreas que contribúen a transformar o contorno universitario e comunitario nun espazo físico e psicosocial saudable, óptimo para o desenvolvemento persoal e social. A UDC Saudable inspírase e fundaméntase nos Obxectivos de Desenvolvemento Sostible (ODS) -Axenda 2030- de Nacións Unidas, as recomendacións da Organización Mundial da Saúde (OMS) e os documentos e propostas dos organismos e universidades que forman parte da "Conferencia de Rectores de Universidades Españolas-Sostenibilidad" (CRUE-Sostenibilidad) e da REUS. A UDC Saudable integrouse en decembro de 2016 na "Estrategia de Promoción de Salud y Prevención del Sistema Nacional de Salud" do "Ministerio de Sanidad, Servicios Sociales e Igualdad".