Eng / Adham Elsharkawy

تلت خطوات بس هتخلي الفيزياء سهلة وفي جيبك 🔥
1- ذاكر الفصل كويس قبل ما تدخل الميتنج
2- بعد الميتنج حل الكويز اللي هبعتهولك
3- التزم بالمواعيد ونفّذ كل المطلوب منك 💪

🚀 رحلة التميز مستمرة.. من نجاح لنجاح بفضل الله!
الحمد لله الذي بنعمته تتم الصالحات، انتهينا من محطة هامة وبدأنا في الأصعب والأمتع. إليكم جرد سريع لما تم إنجازه وما نحن بصدد البدء فيه:
​✅ ماذا قدمنا في الترم الأول؟
​إنهاء أول 3 فصول من المنهج شرحاً وتفصيلاً.
​حل كافة أسئلة كتاب الامتحان لضمان التمكن من كل أفكار النظام الجديد.
​المجموعة الجديدة (مجموعة المراجعة): انتهينا بفضل الله من الفصل الأول كاملاً مع حل جميع أسئلة كتاب نيوتن، بالإضافة إلى الامتحان الشهري والمراجعات الدورية لضمان تثبيت المعلومة.
​🎯 خطتنا للترم الثاني (بداية الانطلاق):
​استكمال المنهج: نبدأ معاً من الفصل الرابع بكل تفاصيله.
​خطة المراجعة المتوازية: سنبدأ مراجعة المنهج من البداية (بداية من الفصل الثاني) جنباً إلى جنب مع شرح الجديد.
​تثبيت دائم: لن نترك القديم يُنسى؛ فكل حصة ستتضمن أسئلة تراكمية على كل ما تم شرحه سابقاً.
​الفيزياء فهم مش حفظ، ومعانا التميز مضمون بإذن الله.

💡 الدرس التاني في الفيزياء جه في الجول! ⚡
مش هتحتاج تمسك الكتاب وتلف، أنا جمعتلك الزتونة: أهم القوانين، المفاهيم، والتريكات اللي ممكن تيجي في الامتحان.
📄 المذكرة جاهزة، سهلة ومنظمة، تقدر تبدأ بيها المذاكرة وانت مطمن.
لو فيه حاجة واقفة معاك؟ تعالى اسألني في الكومنتات أو ابعتلي على طول 💬

💡 خلاصة الدرس الأول في الفيزياء ✨
جمعتلكم أهم النقاط والقوانين بأسلوب بسيط وسهل الفهم علشان تبدأ السنة وانت فاهم مش حافظ!
📥 حمل المذكرة وابدأ تذاكر صح من أول خطوة.
لو عندك أي سؤال، ابعتلي في الكومنتات أو الرسائل 💬

أخيرا المنهج نزل
فيزياء الصف الثاني الثانوي
مزيج بين منهج أولى القديم وثانية ثانوي القديم.

💡 سؤال على الماشي |
عندك موصلين من نفس المادة وبنفس الطول الكلي، بس الأبعاد مختلفة شوية...
تفتكر النسبة V1/V2 هتكون كام؟ ⚡
فاكر إن فرق الجهد بيتأثر بالمقاومة؟ طب افتكر كده إن R = ρL/A، يعني المساحة والطول ليهم دور كبير!
احسبها بعقلك وسيب إجابتك في كومنت 💬
وافتكر إن كل يوم في سؤال جديد على الماشي!

السلام عليكم ورحمة الله وبركاته
لو بدأت فيزياء وحاسس نفسك تايه؟!
لسه مش قادر تستوعب المعلومات؟ مش فاهم الدنيا ماشية إزاي؟

📌 ما تقلقش.. الحل عندي!
إن شاء الله هبدأ مجموعة جديدة من أول الأسبوع الجاي،
وهنمشي فيها خطوة بخطوة لحد ما تفهم كل حاجة وتثبت المعلومة.

💪 بس إنت تبدأ.. وتعمل اللي عليك.
وهنوصل سوا إن شاء الله.

0% اباحية
0% شذوذ
0% تمطيط - لان كل حصة فيها درس جديد
0% ملل - لان كل أسبوع فيه Quiz
100% فيها Plot Twists- لان كل ما هتفتكر أن المادة اتفهمت خلاص بتكتشف أنه لا باردو لسة
100% تشويق - بتبقي داخل الفينال مش عارف الاسئلة هتجيلك من اين

💡 سؤال على الماشى |
لو عندك الرسمة دي اللي بتوضح العلاقة بين شدة التيار والزمن، تقدر تحسب كمية الشحنة اللي عدت في السلك خلال 5 ثواني؟ ⚡
فاكر إن الشحنة = شدة التيار × الزمن؟ بس خد بالك إن هنا محتاج تستخدم *المساحة تحت المنحنى!
سيب إجابتك في كومنت 💬 وافتكر إن كل يوم في
سؤال جديد على الماشي!

🧠 حصة النهاردة

انهاردة راجعنا على اللي خدناه الحصة اللي فاتت، وبدأنا بشدة التيار، وقلنا:

شدة التيار بتساوي:
I = Q ÷ t

وقلنا إن العلاقة بين كمية الشحنة والزمن علاقة طردية

، ودايمًا الميل في العلاقة دي بيديني شدة التيار. 📏 طيب ازاي أحسب الميل؟

عندي طريقتين:

لو مديني أرقام على محور الصادات والسينات ➝ أحسب الميل من
فرق الصادات ÷ فرق السيناتلو مديني زاوية بين الخط المستقيم ومحور السينات ➝ الميل =
Tan الزاوية

بعد كده خدنا العلاقة بين شدة التيار والزمن، وقلنا إن العلاقة دي دايمًا بتكون ثابتة، لأن التيار ده اسمه تيار مستمر، يعني ثابت مع الزمن.

طيب... ممكن يجيلي علاقة مش ثابتة ويقولي احسب كمية الشحنة؟

❗ ساعتها احفظ القاعدة دي:

أول لما تشوف علاقة بين شدة التيار والزمن، وعايز تجيب كمية الشحنة،
روح احسب المساحة تحت المنحنى ➝ وهتكون هي كمية الشحنة.

🔄 مسائل الإلكترون في مسار دائري

بعد كده شرحنا نوع من المسائل، لو مديني إلكترون بيدور في مسار دائري وعايز يحسب شدة التيار.

مادام إلكترون واحد ➝ يبقى n = 1 وشحنة الإلكترون e = 1.6 × 10⁻¹⁹ C لو مديني الزمن الدوري T ➝ يبقى أنا معايا كل حاجة، وأعوض في القانون:

I = (n × e) ÷ T

طب لو مديني التردد؟
أقلبه ➝ أجيب الزمن الدوري، وأعوض برضو في نفس القانون. ⚡ فرق الجهد

خلصنا من شدة التيار، وبدأنا في تاني كمية مهمة في التيار الكهربي، وهي:

فرق الجهد

وشرحنا الفرق بين كلمة "جهد" و**"فرق جهد"**:

الجهد: هو الحالة الكهربية لنقطة، بتوضح اتجاه مرور التيار.
يعني كل حتة في السلك ليها جهد خاص بيها. فرق الجهد: هو الفرق بين جهد نقطتين. 🤔 طب نفهمها إزاي؟

بص يا عم، تخيل إن عندك ترابيزة (الشحنات في السلك)، وطول ما الترابيزة مكانها، يبقى مافيش حاجة اتغيرت = مافيش تيار.

جيت إنت أثرت على الترابيزة بقوة 5 نيوتن (ده جهد النقطة 1)،
وصاحبك أثّر بقوة 2 نيوتن في الاتجاه التاني (ده جهد النقطة 2).
يبقى الترابيزة هتتحرك في اتجاهك إنت ➝ لأنك الأقوى.

يعني الترابيزة (التيار) اتحركت بسبب فرق القوة (فرق الجهد).

التيار دايمًا بيمشي من الجهد الأعلى للجهد الأقل.

ولو جهد النقطتين متساويين ➝ مافيش تيار هيمشي.

📘 قانون فرق الجهد:

V = W ÷ Q

V = فرق الجهد W = الشغل (بيتقاس بالجول) Q = كمية الشحنة (بالكولوم) ⚙️ وحدة قياس الجهد:

الفولت (V)

🧪 جهاز قياس فرق الجهد:

اسمه فولتميتر، وبيتوصّل في الدائرة على التوازي

🌍 جهد الأرض:

الأرض اللي واقف عليها دايمًا جهدها = صفر

🔋 القوة الدافعة الكهربية (VB):

ودي اسمها الجهد الكلي للدائرة كلها.

ما يغركش اسمها!
هي في الآخر جهد عادي خالص ➝ ووحدة قياسها الفولت مش النيوتن.

ملحوظة مهمة:
أي بطارية بتشتريها ليها قوة دافعة كهربية ثابتة
ما بتتغيرش إلا لو غيرت البطارية نفسها،
يعني حتى لو المقاومة أو شدة التيار اتغيروا ➝ VB تفضل ثابتة

✅ وبكده خلصت الحصة

إن شاء الله الحصة الجاية نشرح:

المقاومة وقانون أوم

🎤 أي سؤال... أنا معاكم!