21/06/2022
جه الوقت الي حابب اتكلم فيه بخصوص خناقة "عام/خاص"
أنا عارف و فاهم إن معظم طلبة المعهد دخلته إضطرار "بمعني لو مجموعك يدخلك حكومة أكيد مكنتش هتختار المعهد و لو فلوس أهلك تسمحلك تدخل الجامعة البريطانية بردو مكنتش هتختاره" فانت اضطريت تجيه يا اما بسبب مادة من المواد الادبية او حصلك ظرف ما ووقعت في مادة نزلت مجموعك في الثانوية العامة و هكذا من القصص البائسة الي كنا بنواسي بيها بعض و نحكيها في مبني اعدادي و كأن لسان حال كل واحد فينا شايف نفسه انه الوحيد الي إتظلم و إنه كان أحق بكرسي في مدرج جامعة ما من الجامعات الحكومية
و بيفضل جواك كطالب shame و عدم إقتناع إنك بقيت طالب و بتدرس في كلية هندسة بسبب اسم المكان و بسبب اماكن متشابهه في نفس الاسم و اقل في الجودة "إحنا منسوبين لنفس الفئة في النهاية", ممكن الإحساس ده يستمر لبعد التخرج
و لكن في حالتي أنا الشخصية انتهي مع بدايه إنتاجي لمشاريع جوه المعهد و براه و ابتديت احس إني مهندس زي زي أي حد
و إنتهي الإحساس ده بنسبه كبيرة
نصيحتي لطلبة المعهد و الي هعتبرها نصيحة ذهبية ليهم
أنا لما دخلت المعهد كان مجهود سنة إعدادي كلها في إني بقنع الناس الي بره إن معهد العاشر مكان قوي جدا "رغم إختلافي الشديد مع المقوله دي حاليا و هشرح ليه في الآخر" و اقعد احكي عن إنجازات الطلبة جواه و المسابقات و مشاريع التخرج الحلوة
و رغم مجهودي إلا إني مقدرتش أغير فكرة الناس غير بعد ما اتخرجت و اشتغلت "أنا ديزاينر معماري و بنشر شغلي بإستمرار" فالمنتج و الشغل الي بنزله هوه الي كسبني إحترام زمايلي, طبعا انا وصلت لحالة ذهنية ان تقييم الناس ميفرقش معايا خالص أهم حاجة ان الكارير بتاعي ماشي بسهم طالع لفوق و خلاص
وقت الدراسة صاحبك الي اهله مش معاهم فلوس و دخل علوم او تجارة شايفك إشتريت شهادة و ان انت بتنجح بفلوسك و صاحبك الي دخل هندسة حكومة شايفك فاشل هتاكل حقه و عايز تبقي زيك زيه ازاي و انت مجبتش 97 زيه في الثانوية و ان امتحانات معهد هوه بيحلها بصباع رجله الصغير و ان الامتياز عندك بمقبول عنده و ان المقبول عنده بامتياز عندك
حتي اهلك مش هيفرحو بيك و مش هتحس انهم مقتنعين بيك بردو لحد لما يشوفوك بتنتج شىء و ناجح فيه و متميز علي عكس زميلك بتاع الحكومه مجرد ما يحضر اول محاضرة إسقاط بيسلموه كارنيه إستشاري في البيت
"حطو في إعتباركم إن دكاتره الحكومة الي بتدرس في المعاهد الخاصة بتدخل تقول للعيال في محاضرات الجامعة الحكومية اننا فشلة و لو اشتكو من صعوبة امتحان ولا حاجة يقولولهم هو انا حاطت امتحان لمعهد كذا
رغم إن الدكتور عارف ان مفيش فرق في المستوي أحيانا و ان العملية كلها خربانة لكن جري العرف إن الكلام ده يتقال
*خليك متأكد إن معظم الدكاتره الي جاية تدرسلك جاية تاكل عيش مش أكتر
هنستفيد إيه من القصة الي فوق
-بلاش كومنتات تشرح فيها قد إيه إنت بتتعب في الدراسة "طبيعي هيرد عليك يقولك طبيعي تتعب ماانت بتدرس حاجة فوق إمكانياتك العادية و ان امتحاناتك سهلة و انت الي مبتفهمش"
-بطل تستعطف الناس ان انت مجموعك كان 93.99 و هندسة اخدت 94 فانت يا حرام مظلوم و نفسك تبقي مهندس فدخلت خاص
"شوف و الله لو صاحبك الي كان معاك في اللجنة و انت الي مغششه و جاب 95 و دخل هندسة علي ايدك انت مش هيتعاطف معاك ولا كلامك هيأثر بل بالعكس انت بتاكد عنده إحساسك إنك مش مقتنع بنفسك اصلا فهو هيقتنع بيك إزاي
-بلاش لبانه مشاريع المعهد و المسابقات ما في النهاية عدد طلبة المسابقات بعدد طلبة المعهد كلهم مش نسبه يعتمد عليها خصوصا ان الناس دي بتشتغل ذاتي يعني صدقوني يا جماعة قلتها و لسه هقولها المعهد و الله ككيان تعليمي عادي و متواضع بكل هيئة تدريسه بمعيدينه المكان و الله عادي جدا طاب ليه بقي العاشر مميزه ؟؟!
الإجابة ببساطة إنت عندك طالب مقفل فيزيا و رياضة اتنين و فاتته كليه حكومه علشان جاب في علم النفس 21 مثلا فتخيل ده هيدخل يعمل ايه
أكيد كرد فعل هياكل نفسه علشان يعمل حاجة فتلاقيه بيذاكر و يدخل مسابقات و يتعلم و يروح ياخد مركز اول علشان هوه عنده دافع قوي انه يحقق ده و ما اكثر النماذج دي في معهدنا و الموضوع بردو بيفضل مكمل للشغل هتلاقيه بيتعلم برامج اكتر بيتعب في الشغل و عايز يكون احسن واحد في المكان علي عكس معظم خريجين حكومه الي نتيجه الثانوية بتديله اشباع نفسي لحد ما يدخل تربته و يقابل وجه كريم
فطبيعي إن المعهد بتاعنا قوي لكنه مش قوي بنفسه هوه قوي بماتريال الطلبة الي بتدخله
طبعا كلامي ده ميمشيش علي كل الناس جواه عادي معانا فشلة كتير بردو
بنصح الصغيرين انهم يتعلمو إزاي ميستناش تقييم من الناس
إنت بتتعب لنفسك و بتتعلم علشان نفسك فذاكر و إجتهد علشان تلاقي فرصة مناسبة لما تتخرج " و ارجوكم بلاش تسوقو للمعهد لقرايبكم نهائيا كفاية"
أنا معماري و بشتغل ديزاينر مبعتبرش نفسي قوي أوي أنا ممكن أكون شايف نفسي فوق المتوسط فيه ناس زمايلي من دفعتي في المعهد أفضل مني بمراحل و ناس زيهم حكومي و في ناس أقل دي الدنيا و طبيعي نكون مختلفين و بمستويات مختلفة و الي بيأكد علي كلامي
إن انا متعود كل سنة أنزل إعلان ما لوظيفة مهندس معماري بموصفاتي أنا يعني نفس البرامج الي بشتغل بيها بنفس المهام الوظيفية الي بقدر اعملها
علشان ادرس مستوايا و اقارن شغل الناس الي بنفس خبرتي امكانياتهم عاملة إزاي بيجيلي مثلا 500 مهندس و مهندسة بيقدمو علي الشغلانة الي مش حقيقية دي مش هبالغ لو قولت ان فيه ناس خريجه من معاهد اول مره اسمع عنها و شغلها جميل جدا و ناس خريجه حكومي و شغلها متواضع جدا و العكس فابتديت اقتنع ان المفتاح
انك تطور نفسك و تتعلم دايما و تسعي انك تكون افضل هي الهندسة كده عموما محتاجه حزق 24 ساعة علشان تفضل موجود فيها
طبعا الضغوط الي البلد فيها و قلة فرص العمل و تدني المرتبات و عدد الخريجين الزيادة هما السبب في المشكلة لكن مش هو كل المشكلة لان الحل متواضع و بسيط مجرد بس لو الحكومه اجبرت الشركات ان حجم المشروع يكون مرتبط معاه عدد من المهندسين يتعينو بدل ما بنلاقي مهندس ماسكله 15 عماره لوحده و المرتبات حسب الدفعة و تتحط نسبة من مكسب المشروع هتلاقي البلد عايزالها مليون مهندس كمان بس نقول لمين و نشرح فين
الحلول اللطيفة العملية كتيرة لكن للاسف إحنا بلد بضان و شعب أبضن
الحال لو فضل علي كده و الخناقة دي فضلت مكمله هتكون نتيجتها ان خلال اربع خمس سنين اول ما عينة من الناس دي تمسك مشاريع اي اعلان شغل بعد كده هتلاقيه بيطلب خريجين حكومه بس فاجتهدو انتو كمان علشان تترقو و تمسكو مشاريع و تعينو زمايلكو خريجين الخاص
* صديقي طالب و خريج الحكومي إنت مجرد كسبت مجانية التعليم فوق لنفسك و بطل تتعامل كانك صاحب الشغلانة و توهم نفسك بان ليك الحق انك تحط قوانين ليها , لو كلامك صح فعلا فوجودي في السوق من المفترض انه ميسببش ليك مشاكل ما انت جامد بقي و مفيش منك اتنين في البلد
