https://www.facebook.com/114463221591191/

Shimaa Abdel majeed, Tanta (2026)

24/08/2023

🗣️📣💥♥️
خطوات العلاج ✍️✍️
برنامج تدريبي يساعد علي إخراج الأصوات بطريقه علمية:
البرنامج ده ينفع نطبقه علي كل الأصوات هناخد مثال علي ال " س " .
١)- التدريب السمعي ( التمييز والإدراك السمعي).
عن طريق الاستماع إلى الصوت الصحيح والتفرقة بينه وبين الصوت الخطأ.
٢)- التمييز الحسي :
تدريب الطفل على الشعور بالاهتزازات التي تصاحب نطق الصوت والشعور ب سخونة أو برودة الهواء المندفع ، أو الشعور بحركة عضو من أعضاء النطق عند خروج الصوت ، واستخدام وسائل حسية لشعور الطفل بمكان خروج الصوت كخافض اللسان أو سائل النعناع أو الشوكولاتة.
مثال
ال (س) هوا ساقع
ال (ث) هوا سخن
٣)- التمييز البصري :
تستخدم المرأة لتوضيح أعضاء النطق عند خروج الصوت أو اقتران صوت الحرف بصورته ، أو رؤية المعالج وهو ينطق صوت الحرف ، أو رؤية الأوراق تتطاير نتيجة خروج الهواء المندفع عند نطق الصوت.
٤)- التدريبات النطقية :
يتم في هذه الخطوة تدريب الطفل علي :
• نطق الصوت منفرداً.
• نطق الصوت وقبله ساكن ( أس) ، ( أر).
• نطق الصوت مضافاً له حروف العله أ – و ي في مقاطع أحادية وثنائية وثلاثية :
مثال
الصوت في مقاطع أحادية : سا – سي – سو .
الصوت في مقاطع ثنائية : ساسا – ساسو – ساسي .
الصوت في مقاطع ثلاثية : ساسا سي – ساسا سو .
• نطق الصوت في أول – ووسط – وآخر الكلمه :
مثال
سعيد – أسامة – شمس .
• نطق الصوت متكرر في الكلمة :
مثال
سمسم – بسبوسه – سماسم .
• نطق الصوت في جملة بسيطة :
مثال
سمير راح مع سميرة .
• نطق الصوت في جملة معقدة :
مثال
ستي بسبستلي بسبوسه بالسمنة والسكر والعسل .
• نطق الصوت من خلال إعطاء الطفل صورة من القرآن الكريم فيها صوت ال (س) :
بسم الله الرحمن الرحيم
• قُلۡ أَعُوذُ بِرَبِّ ٱلنَّاسِ (1) مَلِكِ ٱلنَّاسِ (2) إِلَٰهِ ٱلنَّاسِ (3) مِن شَرِّ ٱلۡوَسۡوَاسِ ٱلۡخَنَّاسِ (4) ٱلَّذِي يُوَسۡوِسُ فِي صُدُورِ ٱلنَّاسِ (5) مِنَ ٱلۡجِنَّةِ وَٱلنَّاسِ .
• الكلام المسترسل :
يحكي الطفل كل ما حدث في يومه بطريقة تلقائية تشتمل علي صوت ال (س).
• التعميم :
أخر مرحلة بعد انتهاء البرنامج التدريبي علي الطفل أن ينطق ويكتب الصوت في كل أشكاله في أول الكلمه ووسط وآخر الكلمه .
أ/ شيماء عبد المجيد
أخصائية التخاطب والتربية الخاصة

09/07/2023

😍❤️👇

(1)-العياط ملوش عقاب يعني مينفعش تزعلي منه انه بيعيط ، العقاب ع الخطأ بس والتصرف السليم مع العياط التجاهل مهما كان المكان والناس اللي حواليكي .
يعني يعيط سيبيه يعيط ولا تقولي بس ولا تحاولي تراضيه ولا تسهيه ف حاجه تانيه ولا تقوليله هزعل منك ولا كده عينك هتوجعك مفيش اي كومنت ولما يخلص عياط متلمهوش ع العياط ولا تقولي انا زعلانه انك عيط.. العياط دا تعبير عن الشعور مش خطأ.

(2)-الموبايلات والتاب والتلفزيون ساعه ف اليوم مقسومه علي مرتين لان دا بيأثر ع التركيز مهما كانت الاستفاده.

(3)- ممنوع الاطفال تنام ف نفس الاوضه مع الاب والام بعد سنه

(4)-قبل الخروج لازم يكون فيه اتفاق على اللي هيحصل دا هيقلل المشاكل يعني احنا رايحيين المول النهارده هنجيب حاجات للبيت وانت هتجيب حاجه واحده وهنلعب لعبتين بس ..
لو وافق اوك اعترض يبقى خلاص مش هنخرج واللي اتفقنا عليه مش هيتغير مهما حصل.

(5)-الطفل لو عمل حاجه غلط قدام حد مينفعش توجهه قدام الناس بتاخده علي جنب او في أوضه تانيه وتعرفه غلطه ولو غلط ف حد برضه متزعقلوش قدام الناس ع جنب وتوجهه وبعدين تطلعه يعتذر.

(6)-ممنوع يدخولوا الحمام معانا أو يشوفوا الأم والأب أثناء تغيير الهدووم.

(7)-متعمليش حساب لأي حد ع حساب ولادك قالتلي لو وسط مول وسط اهلك ف تاكسي اي حاجه تعملي الصح بغض النظر عن الناس متقوليش هسكته مثلا بأي حاجه عشان الناس .. الصح يتعمل تحت اي ظرف.

(8)-متخليش ولادك مكتفيين 100%مش كل حاجه عندهم مش كل حاجه عاوزنها يجي لأن ده ممكن يوصلهم للسرقه لانهم لما يشوفوا حاجه مع حد مثلا ومش عندهم هيمدوا أيدهم وياخدوها لانه متعود معاه كل حاجه عاوزها.

(9)-ممنوع ياخدوا أي لعبه من عند حد وهما نازلين وممنوع تدي أي لعبه من لعبهم لحد حتى لو بموافقتهم لانهم بعد كده هيشوفوا ان عادي ياخدوا من عند حد طلاما الناس بتاخد منهم.

(10)-لازم وهما بيلعبوا يعرفوا أن في مكسب وخساره ولو رفضوا متلعبيش معاهم أو وقفي اللعب.

(11)-لما يجيلك حد متطلعيش كل اللعب هتختاري معاه كام لعبه يلعبوا بيها وتشيلي الباقي وهتتقفي معاه انه هيلعب مع الضيوف باللعب ولو رفض يبقى خلاص متلعبش وهما هيلعبوا لوحدهم.

(12)-بالنسبه للشيبسي والبيبسي مهما هتمنعيه وهو صغير مسيره لما يكبر هيطلب ياكله او يشربه.
الحل لما هيطلب كده او لو هو بيحبهم اصلا يبقى نتفق انه مره واحده ف الاسبوع بس و مينفعش احنا ناكل ونشرب قدامه ونقوله انت لا .

(13)-الكلمه اللي تتقال تتنفذ ممكن تديله مهله ينفذها بس لازم تتنفذ يعني مثلا لم اللعب قال لا اقول تاني لم اللعب لو قال لا طب انا هعد من 1 ل 5 تكون لمتها لو متلمتش تحرميه من حاجه معينه بيحبها.
وتخلقى عقاب وهمي وتقولي للطفل قدام انت معملتش الحاجه دي طيب خلاص مش هنعمل سوا الكيك اللي كنا هنعمله سوا انهارده.

(١٤)-مينفعش نقول هقول لبابا لما يجي وبابا هيزعق دا غلط جداً أنتي كده بتلغي شخصيتك معاه لازم يسمع كلامك زي ما بيسمع كلام بابا ويعملك حساب زي بابا.

09/07/2023

أيه الفرق بين التتبع البصري والتتابع البصري؟!!

من مهارات الإنتباه ومعناه تتبع مثير بصرى متحرك يعنى الطفل يفضل متابع المثير اللى بيتحرك قدامه زى مثلا أنى أحرك ليزر على الحيطه وهو يفضل يتابعه بعينه.

من مهارات الإدراك وتحديداً الإدراك البصرى وهو يعنى إكمال النمط
نوضح بمثال👇👇
يعنى مثلا هعمل للطفل دايره حمره ودايره صفره ودايره حمرا واقوله كمل المفروض بقا أن الطفل يحط دايره صفره وهكذا،،
وممكن أعمل للطفل دايره زرقا ودايره برتقالي ودايره صفرا ودايره خضرا واقوله كمل المفروض يكمل بنفس الترتيب ،،
وممكن أصعب الموضوع شويه واعمل سهم لفوق وسهم لتحت وسهم لفوق واخلى الطفل يكمل وهكذا.....

09/07/2023

التبول اللإرادي عند الأطفال
أكتر مشكلة صحية بتسبب عقدة للأم وممكن تخليها تزعق لأبنها خصوصا لو سنه كبر وداخل المدرسة💁
ده غير أنه بيسبب حرج للطفل من اللي حواليه وهو أصلا ملوش ذنب🤷💔
الاول لازم نعرف يعني أيه تبول لإرادي!!
التبول اللإرادي : هو عدم القدرة علي التحكم في البول للأطفال فوق سن الخامسة " مرتين علي الأقل في الأسبوع ولمدة ٣ شهور ورا بعض" ، ولحد الآن مفيش سبب معين له ، إلا أنه بيصيب ٢٠٪ من الأطفال في سن السادسة.

- ( أنواع التبول اللإرادي)
نوعين :
✅ التبول اللإرادي الأولي: وده الطفل من يوم ما أتولد عمره ما أتحكم في البول ، حيث لا يتحكم الطفل في عملية التبول منذ ولادته و حتي سن متأخرة.
✅ التبول اللإرادي الثانوي: وده الطفل كان كويس وقدر يتحكم في البول لمدة ٦ شهور متواصله وبعد كده رجع تاني ميتحكمش في البول أثناء النوم .

-( أسباب التبول اللإرادي)
ليس هناك أسباب معروفة لحدوث المرض ، لكن هناك بعض العوامل التي تزيد من نسبة حدوثه ويمكن تلخيصها بالتالي: لو عرفنا السبب هنعالج المرض ✓✓
✅ الضغوطات والمشاكل النفسية :
مشاكل في البيت أو في المدرسة ، القلق والتوتر والضغوطات النفسية الناتجة عن المشكلات الأسرية، الغيرة من وجود شخص أصغر أو مولود جديد خد كل الاهتمام ، تهميش الطفل وعدم الاهتمام به في حالة ولادة طفل جديد في الأسرة ، عدم شعور الطفل بالثقة في النفس وتعرضه للتوبيخ بأستمرار والعنف في تربية الطفل وضربه .

✅ العوامل الوراثية:
حيث ترتفع نسبة الاصابه بالمرض إذا كان أحد الوالدين قد عاني من هذه المشكله أثناء طفولته.

✅ أمراض وعوامل عضويه :
- ألتهابات مجري البول: يصاحبه أعراض أخري مثل الحرقان أثناء التبول ، ألم أسفل البطن ، لون بول غامق.
- صغر حجم المثانه للطفل: وكل ما يكبر بتكبر وبيزيد قدرتها علي تحمل كمية كبيره من البول فيحدث التبول اللإرادي.
- الإمساك: إذا كان الطفل لديه الكثير من البراز في مستقيمه، فإنه قد يسبب ضغط علي المثانة ، مما يؤدي إلي حالة سلس في البول .
- الجيوب الأنفية: اللحمية والتهاب الجيوب الأنفية .
- مرض السكري: يكون مصاحب له أعراض أخري" شرب سوائل كثيره، الأكل بكميات كثيره، فقدان الوزن رغم الأكل بكميات.
- تضخم اللوزتين أو اللحميه الذي يسبب أنقطاع النفس ويسمي
" الانسدادي النومي" Obstructive sleep apnea

- الاصابه بالدوده الدبوسية، حيث تضع بيضها ليلا أثناء النوم علي فتحة الشرج مما يؤدي إلي تهيج المنطقه وحدوث التبول اللإرادي.

- الاصابه بتشقق العمود الفقري "spina bifida" أو أحد التشوهات العصبية الخلقية الآخري.

- المثانه العصبيه: ده بيظهر عند الأطفال اللي بتعاني من التأخر العام في الإدراك "أطفال متلازمة داون وأطفال الCP الشلل الدماغي.

- حالات توقف التنفس أثناء النوم المصاحبة للسمنة، الإصابة بأمراض الخلايا المنجلية والمشاكل العصبية.

-خلل هرموني.

✅ الطفل اللي بيشرب مشروبات تحتوي علي "ميثيل زانسين " أو مادة الكافيين
زي " الشاي ، القهوه ، المشروبات الغازيه، والشيكولاته " ودا بيحفز ادرار البول عند الطفل.
✅ النوم العميق لدي بعض الأطفال
✅ وجود مرض يؤثر علي النمو الإدراكي للطفل مثل:
- الإصابة بمتلازمة داون.
- الإصابة بمرض فرط الحركة ونقص التركيز.

ما هي الفحوصات اللازمة لمعرفة السبب⁉️
تحليل بول وبراز ووظائف كلي ووظائف كبد

ما هو السن الذي أبدا أقلق فيه لو أبني عنده هذه المشكلة ومتي يجب أن أتوجه الي الطبيب !!🤔
اذا أكمل أبنك عمر ٥ سنوات ومازال يعاني من مشكلة التبول اللإرادي حينها يجب التوجه الي الطبيب لمعرفة سبب التبول ووضع البرنامج العلاجي ✍️

↗️ نصائح مهمة لعلاج التبول اللإرادي عند الأطفال:
- عدم شرب الماء قبل النوم بساعتين.
- دخول الحمام قبل النوم مباشرة
- عدم شرب المياة الغازية والشاي ومدرات البول.
- إيقاظ الطفل بمعدل كل ساعتين أو ثلاثة للحمام.
- الإهتمام بالحالة النفسية للطفل من الأهل ومحاولة تشجيعه وعدم معايرة الطفل بمرضه أمام الآخرين.
- علاج أي مشاكل عضويه " مشاكل المسالك البولية " ان وجدت و إستخدام الأدوية بإشراف الطبيب.

09/07/2023

#الإيكولاليا 🗣️🥀♥️
الإيكولاليا .. المصاداه .. الترديد للكلام
يعنى ايه إيكولاليا ؟!
✅اضطراب في عملية التواصل، يظهر من تكرار الكلام مباشرة بعد سماعه " إيكولاليا فورية "
أو بعد وقت قصير أو طويل " إيكولاليا مؤجلة "
(أي أن الطفل يعيد العبارات كما هي في موقعها غير المناسب خلال الحديث)

👩‍🏫يعنى ببساطه الطفل عامل زى البغبغان
الإخصائي : أزيك يا أحمد
الطفل : أزيك يا أحمد
الإخصائي: عامل ايه
أحمد: عامل ايه
وهكذا .
أو الطفل اللى بيقول كلام في غير موضعه عشان سمعه من شويه أو من فتره .

- ( أنواع الإيكولاليا )

هناك نوعين من الإيكولاليا تظهر علي الطفل
✳️ أولا :( الإيكولاليا الفوريه أو الحالية)
دى بتكون سريعه وفوريه يعني بتحصل في نفس الوقت ، الطفل هنا بيرد الكلام في نفس الوقت.
مثلا
- أسمك أيه
- أسمك أيه

✳️ثانيا :( الإيكولاليا المؤجله )
هنا بيفتكر الطفل الكلام بعد مرور مده من الوقت أو بعد سماعه للكلام ودى بتظهر بعد دقيقتين بعد نص ساعه بعد ساعه من سماع الطفل للكلام .
مثال / بتكون قاعد في جلسه مع طفل توحدى ناطق وفجأه أثناء النشاط تلاقيه ردد كلام حصل من نص ساعه مثلا يفتكر كلام في كارتون شافه ، أو أغنيه لإعلان مثلا شافه في التلفزيون " اتك عليه الأغنية بتاعة لبان ماربيلا مثلا " 😂😂🤷

- (أسباب الإيكولاليا ) 🤔

ببساطه الطفل مش فاهم الكلام مش فاهم يعمل أيه مش فاهم أيه المطلوب منه وفي نفس الوقت عايز يتواصل لفظيًا.
أهم أسبابها :
(١ )- أثناء اكتساب الطفل للغه ف السنوات الأولى ، وممكن تستمر لغايه سن السنتين أحيانا لغايه ما تكتمل الحصيله اللغويه عند الطفل والإيكولاليا في السن ده طبيعي لأن الطفل لسه مكتملتش عنده اللغه فبيردد لأنه مش فاهم .

(٢)- تظهر أكتر مع حالات التاخر العقلى والذهنى بنشوفها بتظهر اكتر مع حالات ( أطفال التوحد) أغلب التوحديين مصاحبهم إيكولاليا.

(٣)- اصرار الأهل بشكل غير مباشر على تكرار كلام الطفل مثلا أقول للطفل
أيه دى !! .. تفاحه بنغمه صوت واحده ، هيرد يقولى أيه دى تفاحه.
علشان كده لازم أغير في نغمة الصوت يعني السؤال يكون بصوت عالي " أيه دي " والإجابة تكون بصوت واطي شويه " تفاحه" والعكس بمعني أن الطفل محتاج يميز بين السؤال والإجابة.

(٤)- التأخر اللغوى عاده بيصاحبه إيكولاليا .

(٥)_ التدريب الخاطىء للطفل علي النطق بيسبب إيكولاليا.
*****

-(بعض الاستراتيجيات المستخدمه في علاج الإيكولاليا )

(١) (أستراتيجية نعم أو لا)
من خلال إعطاء الطفل سؤال ويكون الإجابة عنه ب لا أو نعم .
أنت جميل ؟ أه
أنت وحش ؟ لا

(٢)- ( أستراتيجية حاضر)
من خلال إعطاء الطفل سؤال ويجيب عليه بحاضر .
أفتح الباب " حاضر"

(٣) ( أستراتيجية الإغلاق السمعي أو الحروف الأوليه)
هفكر الطفل بأول حرف من الكلمه .
حا /حاضر

(٤)- ( أستراتيجية معرفش)
هنسأل سؤال والإجابة عليه تكون " معرفش"
مثال : " عدد النجوم في السماء " يجيب الطفل "معرفش" لأن فعلا محدش عارف عدد النجوم في السماء أد أيه .
لكن لا يحبذ أستخدم هذه الطريقه علشان الطفل ممكن يقول علي كل حاجه معرفش😂💁 بس ممكن نعلمه بقي علي نوعية الأسئلة اللي الإجابه عليها بمعرفش.

(٥)- ( أستراتيجية النمذجه أو المحاكاه)
- الاستعانه بأخصائي آخر ويكون معاه بيانات الطفل كلها " الإسم ، العمر ، مكان المعيشه) ويجاوب علي الأسئله كأنه الطفل فالطفل يقلده بعد ذلك.
- الأستعانه بأخصائي آخر لتنفيذ الأوامر ثم بعد ذلك يقوم الطفل بتقليده. " أقفل الباب" مثلا
الاجابه عليها "حاضر"
- الأستعانه بطفل من نفس عمر الطفل .
وهسأل الطفل ده قدامه.
أنا : أزيك
الطفل الثاني :الحمد لله.. أشجعه لانه جاوب صح
أقول للطفل الاول يلا دورك أزيك؟
يجاوب الطفل التاني بسرعه علشان هو يقلده ويقول زيه 👌.. وهكذا لغايه ما المشكله تقل وتختفي ✋🏻 إن شاء الله

(٦)- ( أستراتيجية تغيير نبرة الصوت)
نبرة السؤال وأنا بسأله للطفل تكون أعلي من نبرة نطقي للإجابة ، وذلك ليفرق ويميز الطفل بين السؤال والإجابة من خلال نبرة الصوت.
مثلا
- أزيك يا أحمد " صوت منخفض شويه"
وأرد علي طول الحمدلله " صوت عالى"
الطفل هيرد بأخر حاجه سمعها اللى هى " الحمدلله "
وقتها هعزز وبرافو و شاطر وهكذا 👏🏻👏🏻

(٨)- ( أستراتيجية الريكورد)
نسجل علي الموبيل أسم وعمر الطفل ومكان معيشته في ريكورد ونسمعه للطفل .
طب ازاي بنستخدمها !!
أولا بسجل علي التليفون إجابات الطفل بصوتي أو بصوته مثلا " محمد"
وبعد كده هلبس الطفل السماعه وأقول له " ما أسمك" أول ما أقول للطفل ما أسمك أفتح الريكورد اللي بيقول" محمد " أسم الطفل يعني وهو لابس السماعه هيقول الاسم اللي سمعه ودي طريقه من الطرق اللي بتقلل من عملية ترديد الكلام.

-(طيب أيه علاج الإيكولاليا الفوريه)🤔
✓تغيير نبرة الصوت علشان الطفل يميز بين السؤال والإجابة وأستخدم طريقة المحاكاه بالاستعانة بأخصائي أو طفل .
مثلا
(أيه دى) ؟ " صوت واطي (قطططه) صوت عالى
واجيب حد معاه في الجلسه وليكن طفل في سنه يعرف يرد عليا علشان الأطفال بيتعلموا من بعض بالتقليد.
واسئل الطفل ده قدامه
أنا : أزيك
الطفل الثاني :الحمد لله.. أشجعه لأنه جاوب صح
أقول للطفل الأول يلا دورك أزيك؟
يجاوب الطفل التاني بسرعه علشان هو يقلده ويقول زيه 👌.. وهكذا لغايه ما المشكله تقل وتختفي.

- (طيب علاج الإيكولاليا المؤجله أيه )❓
✓طفل هديله أمر "يحط الكوبايه فوق الترابيزه"
وهو رايح يحطها قاعد يقول "تفاحه , تفاحه , تفاحه "
هنا هنعمل فصل انتباه
هنده عليه واقوله هات ( الكوبايه )
ايه دى ؟ كوبايه
اعمل ايه بالكوبايه ؟ اشررررب
وهكذا
✓ ولما الاقيه بيقول كلام مش فى موضعه
هطلع أى حاجه معايا وأكلمه عليها كتييير علشان ينسي الحاجه اللي بيرددها ومع الوقت وبالتدريج بتقل الإيكولاليا.
ولازم نعزز الأستجابة الصحيحه اللى مفهاش تكررار للطفل ونهمل الخاطئه .
✓تغييير نبرة الصوت مهمه جدا جدا فالعلاج .
✓زياده الحصيله اللغويه للطفل بتساعد ف التخلص من الايكولاليا .
✓أستخدم فتره توقف مؤقت بين المثير ( السؤال ) والاستجابه (الرد) بتساعد جدا في علاج الإيكولاليا.

09/07/2023

👇🗣️♥️
الكلمات الأولى للطفل الرضيع بمثابة الطرب لآذان الآباء. ولكن كيف يمكنك معرفة ما إذا كان تطور نطق طفلك وحديثه على المسار الصحيح؟
هنعرف ازاي إن الطفل متأخر !!
هناك بعض المراحل التي يمر بها الطفل منذ ولادته و هي مراحل تطور اللغة وهناك بعض العلامات التحذيرية إذا وجدت ولاحظتها الأم عند طفلها خاصة في الشهور الأولي دل ذلك علي وجود تأخر.
(منذ الولادة حتي شهرين )
المفروض اللغة في الوقت ده متمثلة عند الطفل الرضيع في البكاء ومن العلامات التحذيرية عدم الإنتباه للأصوات اللي حواليه وأنه دايما ساكت .
( 3-2 أشهر)
البكاء بنغمات متفاوتة حسب الظرف اللي بيتعرضله الطفل ، بمعني وتيرة ونغمة البكاء هتكون مختلفه علي حسب الموقف فالبكاء وهو جعان غير وهو موجوع مثلا
والالتفات عند سماع الأصوات ، والمناغاة ، والتجاوب مع الأم بالحركات من العلامات التحذيرية هنا عدم أستجابة الطفل للأصوات أو لمصدر الصوت.
( 4-3 أشهر)
هيبدء الطفل هنا يصدر الصوت ويثرثر بشكل عشوائي مش مفهوم من العلامات التحذيرية عدم إصدار الطفل للأصوات لأي صوت حتي لو صوت مش مفهوم أو ملوش معني.
(6-5 أشهر)
محاولة جذب الإنتباه ، والثرثرة بشكل إيقاعي. هنا هتختلف بدل ما كانت الثرثرة بشكل عشوائي ومش مفهوم بقت بشكل إيقاعي.
(11-6 أشهر)
تقليد الأصوات بنفس التتابع، وفهم بعض الكلمات الشائعة، و الأستجابة بشكل بسيط من العلامات التحذيرية هنا التهاب الأذن المتكرر وعدم الأستجابة .
طب أيه علاقة التهاب الأذن بتطور اللغة!!
التهاب الأذن بيسبب ضعف السمع خاصة التهاب الأذن الوسطي وبيأثر علي فهم اللغة وتطورها والتعلُّم والسلوك، بمعني أن الطفل مش قادر يسمع كويس علشان يتكلم لأننا بنتكلم علي أد ما بنسمع وضعف السمع في سن مبكر قبل تطور اللغة بتخلي الطفل معندوش حصيله لغوية كفاية علشان يتكلم،
وقد يشعرُ الأطفالُ بالامتلاء أو الضغط أو فرقعة في الأذن عندَ البلع.
(12 شهر )
هنا الطفل يكون تم سنة المفروض أنه يبتدي هنا أستخدام ونطق كلمات مفردة تتراوح بين 5-20 كلمة أكثرها الأسماء
من العلامات التحذيرية هنا عدم القدرة علي النطق والتمييز يعني الطفل مش قادر يميز مثلا بين بابا وماما .
( 18 شهر)
يعني سنة ونص المفروض أن الطفل هنا بدء ينطق جملة مؤلفة من كلمتين ، يميز الأسماء و الأصوات ، وترديد الكلمات التي يسمعها ، وفهم التعليمات البسيطة من العلامات التحذيرية هنا عدم القدرة علي النطق والتفاعل ، وعدم الأستجابة للتعليمات .
(سنة إلي سنتين)
هنا الطفل هيبتدي يكون جمل تتألف الواحدة منها من كلمتين علي الأقل إلي ثلاث كلمات، وتطور مفردات الطفل ومحصوله اللغوي، والإيماء والتلويح باليد عند توديع أحد ، وفهم وتقليد أصوات الحيوانات المألوفة بالنسبة له "الكلب بيعمل أيه هوهو
القطة بتقول أيه نونو" ، وفهم التعليمات " هات ده" وإدراك معني كلمة (لا)
من العلامات التحذيرية هنا أن الطفل بدل ما يتكلم بيشاور بمعني استخدام الإيماءات أكثر من الكلام ، وعدم القدرة علي الكلام والفهم والاستجابة للتعليمات البسيطه زي " هات" مثلا
(2- إلي 3 سنوات)
تكوين جملة بسيطة وقصيرة جملة مكونه من 3 كلمات ، تمييز أجزاء الجسم ، تطور مفردات الطفل حتي تصل إلي 450 كلمة ، وتمييز من 3 إلي 4 ألوان ، و التمييز بين الحجم الكبير والصغير، والرغبة بسماع القصة التي تروي له مرارا، وتجميع بعض الأشكال من العلامات التحذيرية هنا صعوبات في الفهم والنطق ، وصعوبة في تكوين جملة تتألف من 2-3 كلمات.
(4-3 سنوات )
تكوين جملة تتألف الواحدة منها من 4-5 كلمات علي الأقل،
" يا ماما عاوز أكل " " يا ماما هاتي أشرب"
إخبار قصة قصيرة أو أي موقف أتعرضله في الحضانة مثلا، تطور مفردات الطفل حتي تصل إلي 1000 كلمة، ومعرفة اسماء عائلتة ، وحفظ العديد من الاناشيد التي يدرسها في الحضانة من العلامات التحذيرية هنا كلام غير مفهوم ، وإلاصابة بالإحباط عند محاولة التكلم.
(6-5 سنوات )
تكوين جملة تتألف الواحدة منها من 5-6 كلمات علي الأقل، التحدث بطلاقة، وتطور مفردات الطفل حتي تصل إلى2000 كلمة والقدرة علي العد حتي رقم 10 ، وتمييز اليد اليمني من اليسري ، واستخدام أنواع مختلفة من الجمل ، وسرد قصة قصيرة، واستخدام الضمائر من العلامات التحذيرية هنا عدم استخدام الطفل للجمل ، والتأتأة والتلعثم ، وعدم القدرة علي اتباع التعليمات .

11/06/2023

😍😍🌹👌

09/06/2023

🫰❤️🌹
نشاط كل أم ينفع تطبقه في البيت بكل سهولة
الهدف من النشاط زيادة التركيز و تنمية المهارات الحركية الدقيقة عند الأطفال

07/06/2023

🗣️💥🌹
-تمارين للسان وقاعدة اللسان 👅
(التمرين الأول )
١- اخرج اللسان ثم أدفع بطرف لسانك ضد خافض اللسان أو معلقة .
٢- ثبت هذا الوضع لمدة ٥ ثواني.
٣- اجعل الطفل يسترخي .
٤- كرر التمرين ٥ مرات علي الأقل في الجلسة.
(التمرين الثاني) " الحركة الجانبية للسان "
١-اجعل الطفل يحرك لسانه إلي الطرف الأيمن من الشفة لأقصي حد ممكن ، والطرف الأيسر للشفه لأقصي حد ممكن.
٢- تجعل الطفل يدفع بطرف لسانه الخافض بأقصي قوة لمدة ٣ ثواني.
٣- ثم كرر الخطوة مرة أخري علي الجهة اليسري
(التمرين الثالث) " إخراج اللسان خارج الفم "
١-اجعل الطفل يخرج اللسان خارج الفم والشفاة مضمومة بقوة.
٢- ثبت اللسان لمدة خمس ثواني .
٣- اجعل الطفل يسترخي .
٤- كرر التمرين لمدة ٥ مرات داخل الجلسة.
(التمرين الرابع) " حركة اللسان الأمامية والخلفية "
١-اجعل الطفل يخرج لسانه بشكل مستقيم لمدة ٥ ثواني .
٢- ثم اجعل الطفل يسحب اللسان للداخل الي أقصي حد ممكن.
٣- اجعل الطفل يحافظ علي هذا الوضع لمدة ٥ ثواني.
٤- كرر ذلك التمرين ٥ مرات داخل الجلسة.

-تمارين قاعدة اللسان :
(التمرين الأول) : الغرغرة
١-اجعل الطفل ينظر إلى الأعلي بجهة السقف .
٢- تظاهر بأن هناك ماء في فمك ( يمكن استخدام قليل من الماء للغرغرة).
٣- تظاهر بالغرغرة لمدة ٥ ثواني .
٤- كرر التمرين لمدة ٣ مرات علي الأقل داخل الجلسة.
(التمرين الثاني) : التظاهر بالتثاوب
١-اجعل الطفل يفتح فمه لأقصي حد ممكن .
٢- أبدأ بالتثاوب.
٣- كرر التمرين لمدة ٣ دقائق في الجلسة.

30/05/2023

🫰❤️
أنشطه تنمي المهارات الحركية الدقيقة عند الأطفال🗣️👇
المهارات الحركية الدقيقة هي مجموعة من الحركات المعتمدة على العضلات الإرادية الصغيرة في أصابع اليدين، كما توجد أيضا في أصابع القدمين والفم واللسان وحول العينين، ويجب علينا التحلي بالصبر عند تدريب الأطفال على تنمية هذه المهارات، لأنها كغيرها من المهارات تتطلب وقتاً للتدريب عليها.
والمميز بالنسبة لتلك التدريبات أنها يمكن أن تتم خلال الأنشطة الروتينية اليومية التي يقوم بها الطفل في المنزل، والعضلات الدقيقة هي التي تمكن الطفل من إمساك الهاتف وفتح الأبواب والشبابيك واستخدام المفاتيح والقيام بالأعمال اليدوية والمسح والتنظيف وغيرها.
ومن الأنشطة التي تنمي المهارات الحركية الدقيقة:
(١)- (أنشطة الخرز) : ادخال حبات الخرز بأحجامها المختلفة داخل الخيط " نشاط لضم الخيط ".
(٢)- (أنشطة الالتقاط) : يمكن تنفيذها بالكثير من الطرق بتكليف الطفل بالتقاط ألعابه على سبيل المثال ووضعها في الصندوق المخصص لها ، ومن الأنشطة الأخري التي تستخدم في تنمية المهارات الحركية الدقيقة وتستخدم في التصنيف هو أن يستخدم الطفل يديه في نقل الكرات الصغيرة من طبق إلى طبق ثم بعد ذلك ينقلها باستخدام الملقط الكبير أولاً ثم الملقط الصغير ويمكن أن يستخدم هذا النشاط في التصنيف من خلال تصنيف الكرات الملونه ووضع كل لون في الطبق الخاص بها.
(٣)- (أنشطة الصلصال) : تنمي التفكير والإبداع لدى الطفل بالإضافة لوظيفتها الأساسية وهى تنمية العضلات الحركية الدقيقة، ومثلها أيضا المواد الأخرى القابلة للتشكيل كمعجون الرمل وغيرها.
(٤)- (أنشطة القص) : بداية من تكليف الطفل بتمزيق بعض الأوراق إلى قطع أصغر وحتى استخدام المقص في تقطيع أشكال محددة ومرسومة للطفل.
(٥)- (أنشطة القص واللصق) : حين يطلب من الطفل قص بعض الأشكال للصقها في مكان آخر.
(٦)- (أنشطة التلوين) : تنمي العضلات الدقيقة لتحكم الطفل في القلم ومحاولته التلوين بدقة وعدم التلوين خارج الخطوط المحددة.
(٧)- (أنشطة البازل) : استخدم البازل المكون من قطعة واحدة في البداية، ثم تدرج إلى قطعتين وهكذا.
ويوجد العديد من الأنشطة المتاحة التي تنمي عضلات اليد كأن نطلب من الطفل عصر قطعة من الإسفنج مبللة بالماء، أو غلق أزرار قميصه، أو إدخال رباط الحذاء في الثقوب المخصصة له ثم ربطه بعد ذلك، وأيضا التعامل مع سحاب البنطال بمفرده، وفتح وغلق أغطية البرطمانات، وفرد العجين بيديه، وغسل الصحون البلاستيكية، وحمل الأشياء المناسبة له بمهارة.
ويجب على الآباء والأمهات في المنزل مراعاة عوامل الأمن والسلامة للطفل ، واستبدال المقصات المعدنية بمقصات بلاستيكية، ويمكن للأم أيضا عمل الصلصال في المنزل وعجائن الرمل وغيرها من مواد طبيعية وتلوينها بألوان طبيعية أيضا حرصاً على سلامة الأطفال.👼❤️

Shimaa Abdel majeed

24/08/2023

09/07/2023

09/07/2023

09/07/2023

09/07/2023

09/07/2023

11/06/2023

09/06/2023

07/06/2023

30/05/2023

Address

Telephone

Website

Alerts

Shortcuts

Share

Category

Listing takedown request