29/04/2026
كنت بفكر من يوم الجمعة ازاى هشرح القصة بشكل احترافى كأنهم اصلا فى مدارس لغات ،كنت عاوزة اطلع برة التقليدي، و ساعتها افتكرت مستر محمد ابراهيم و هو بيشرح ازاى عمل درس literature مع طلاب فى المرحلة الثانوية و كان السيشن عجبنى اووووى ،فقررت احاول اطبق بس مع سنة اولى ابتدائي و كمان عيال فى مدرسة حكومي مش لغات ، و فعلا كانت حصة من أروع الحصص اللى شرحتها فى القصة ،حتى النتيجة ولأول مرة تفوق التوقعات ،كان حاضر النهاردة ٣٠ طالب فى الفصل ،و بسم الله ما شاء الله كأنهم خلية نحل ،بيحللوا ويستخرجوا ويفكروا ،وانا واقفة مش مصدقة انهم قدروا ينفذوا بجد ،حتى اللى مستواه مفيش، من كتر التكرار بدأ يلقط كلمات و جمل بسيطة و يجاوب حتى لو بالعربى احيانا ،لأول مرة الوقت يعدى دون ممل من حصة القراءة .
تحية شكر و تقدير واجبة لطلاب الصف ( ١-١) و السادة أولياء أمورهم على التعاون و الالتزام بخطوة التمهيد المنزلى . دى شكل السبورة اللى عرضنها بعد ما الطلاب استخرجوا وحللوا القصة وعناصرها الستة .مرفوع صورة التحليل اللى الطلاب نفذوه خطوة خطوة ،و صورة المناج النهائ اللى أتعرض لهم علشان يثبت معلوماتهم ويكونا مبسوطين وهم بيشوفوا تعبهم بيتحول لشكل بصرى جميل وكله داخل الحصة ،كان نفسى اصورهم وهم فى دهشة لما السبورة اتحولت ومجهودهم اتبروز
