20/06/2023
نبذة عن نظام التعليم بمدرسة السويس الميكانيكية العسكرية 👇
التخصصات الموجودة بالمدرسة............
1- فنى تركيبات كهربية
2-فنى تكنولوجيا الحاسبات
3- فنى أجهزه الكترونيه
4- فنى تشغيل المعادن
5- فنى لحام وتشكيل المعادن
كل طالب بيتخصص على حسب مجموع الاعداديه والتنسيق الداخلى للاقسام المختلفة... وجميع التخصصات نظام التعليم بها هو النظام القائم على منهجية الجدارات 👇
ما هو نظام الجدارات لدبلوم الثلاث سنوات؟؟
الجدارة : ان الطالب يقوم بتنفيذ المهمة أو التكليف اللي المدرس كلفه بية بنجاح ..
بس خلي بالك لما بنقول نجاح يعني مش اي نجاح لا ( لازم ينجح في المهمة علي اكمل وجة) مش زي النظام القديم لما كان بيحصل علي ٥٠% او 60% وينجح لا لا نظام الجدارات مختلف تماما لازم يكون جدير بالمهارة والمعارف اللي بيتدرب عليها
_ ونظام الجدارات بيعتمد علي التقييم مش علي الدرجات
_ كل اعمال الطالب خلال الثلاث سنين بتكون موجودة في ملف خاص بالطالب اسمة (ملف الانجاز)
🔴 هل الطالب بياخد شهادة مثل النظام القديم؟
🔵 الطالب بياخد شهادتين .شهادة دبلوم حسب تخصصك زي النظام القديم .. والشهادة التانية شهادة إتمام جدارة يثبت انك نجحت واجتازت كل المهارات والمعارف بكفاءة كبيرة
🔴 كيف يتم النجاح والرسوب في نظام الجدارات ؟
_ لما الاستاذ يطلب من الطالب تنفيذ مهمة معينة بيبقي له ٣ محاولات
يعني لو الطالب فشل في أول محاولة بيبقي له محاولة تانية ..بعدها علي الاقل باسبوع.
ولو نجح في اجتياز التكليف في المحاولة التانية يبقي تمام ومفيش اي مشكلة
_ طيب لاقدر الله ومقدرش الطالب يجتاز المهمة في المرة التانية .
- هنا بقي في المحاولة التالتة بيتعمل له حاجة اسمها (برنامج علاجي) لمدة اسبوعين في المهمة اللي الطالب فشل في اجتيازها بس خلي بالك البرنامج العلاجي دة لازم يدفع رسوم عشان يدخله زي ما وزارة التربية والتعليم قالت مبلغ ١٥٠ جنية يورد بالمدرسة وتخد بية وصل
🔴 لو فشل في البرنامج العلاجي يسقط ؟
🔵 لا الطالب بيبقي له دور تاني في نهاية العام الدراسي ودة بيبقي اخر فرصة له
🔴 طب مثلا لو الطالب غاب في الدراسة اية العمل معايا ؟
🔵 منهج الجدارات بيتقسم علي وحدات منفصلة مقسمة علي الترمين
_ كل وحدة بداخلها مجموعة من المخارج ( معني مخارج هي ناتج التعلم اللي المفروض هو المنتج اللي قام بتنفيذه أو المهارة اللي اتعلمها) المخارج دي بقي لازم يجتازها بنجاح كلها تمام كدة
_ طب لو غاب الطالب في وحدة كاملة هنا بقي بيبقي له دور تاني في نهاية العام الدراسي مش هيبقي له برنامج علاجي لأن من شروط البرنامج العلاجي أن الطالب علي الاقل بيكون بيحضر عدد معين من المرافق أثناء التقييم لكنة فشل في اجتياز بعض المهام ( المرافق دي بتبقي داخل المخارج) الاستاذ هيفهمك ويوريك المرافق دي..
_ خلي بالك لو الطالب فشل في اجتياز اكتر من وحدتين كدة ( هيعيد) السنة بالكامل ولكن في الوحدات اللي فشل في اجتيازها فقط
- والمواد الثقافية زي العربي والانجليزي كل مادة فيهم بنتعامل معاها علي انها وحدة منفصلة ..
_ يعني لاقدر الله الطالب اللي يفشل في وحدتين في العملي وفشل مثلا في العربي كدة شال اكتر من وحدتين بالتالي ( هيعيد) السنة .
🔴 بالنسبة لاخر سنة في الجدارات بقي نعمل اية؟
🔵 النظام القديم كان الطالب بيمتحن في كل المواد الثقافية ومواد التخصص وبياخد درجات وبيدخل منها الكلية والمعاهد
🔵 دلوقتي الطلاب في الجدارات بتمتحن بس المواد الثقافية وباقي المواد ( اجتاز) او ( لم يجتاز) يعني مفيش درجات
_ ازاي بقي هدخل كلية وهيحسبوا المجموع ازاي ؟؟
🔴 في نظام الجدارات من حق الطالب يدخل الكلية اللي عايزها علي حسب مجموع درجاتة
_ المجموع بقي بيتحسب ازاي ركز معايا :
- اولا : في امتحان الدبلوم بيتم تشكيل لجنة من رجال الصناعة ووزارة التربية والتعليم
- اللجنة دي بتحول ملف الانجاز بتاعك الي ١٠٠ درجة
- المواد الثقافية بتمتحنها عادي ومجموعها ١٣٠ درجة
- المواد المعرفيه ١٢٠ درجة
- المادة المهاريه ( العملى ) ٣٥٠ درجه
وبكرة المجموع ٧٠٠ درجة
- من خلال تقييم اللجنة دي لشغلك أثناء تنفيذ المهمة بتديلك الدرجة اللي هي شايفة انك تستحقها
- من خلال التكليف داخل الورشة بيتم التميز بين كل طالب بدرجات مش بيبقي هنا ( اجتاز) فقط لا بيبقي فية درجات بتميز كل طالب عن التاني
- هل كل من قدم ملف الانجاز هياخد فية ١٠٠ درجة كاملة اقولك لاء طبعا لان فية طلبة كانوا بيجتازوا من المرة الأولي وناس من المرة التانية وناس اجتازت من خلال برنامج علاجي الدرجات بتتحسب علي أساس أن مستحيل هيتساوي الطالب اللي عدي التقييم من المرة الأولي بالطالب اللي عدي التقييم من المرة التانية أو باللي عدي ببرنامج علاجي.
