01/09/2023
#الفطام
مساء الخير ..
أولاً دعواتكم ربنا يوفقنا فى طريق العلم ويقدرنا على اننا ننفع الناس ويكتب لنا ثوابه
النهارده انا هتكلم عن موضوع مهم جدا بخصوص سؤال احد الأمهات هنا عن فطام الطفل . معلش هو الموضوع طويل شوية بس اكيد اولادنا يستحقوا اننا نتعب شوية ونقرا وخصوصا لما المعلومة تتقدم لنا على طبق من فضة
*******************************************************************
ياترى فطمتم أو بتفطموا أطفالكم ازاى ؟ طبعا لو رديتم هسمع كوارث زى اللى شوفتها من شوية .. بن وصبار وصلصة عشان الطفل يلاقى طعم مر او يخاف من المنظر ؟ ليه كل ده .. كل ده غلط .. عشان كده لازم نتكلم عن الموضوع بشكل علمى صحيح ونعرف ليه كل ده غلط وايه الطريقة الصح .. اول حاجه فى ناس هترد بيها .. " انا فطمت اولادى كده وماحصلش حاجه " او " انا نفسى اتفطمت كده وماحصلش حاجه " .. طيب هو مين اللى قالك انه ماحصلش حاجه ؟ مين اللى قالك ان ده مش من الحاجات اللى اثرت فيكى لحد دلوقتى .. او اللى اللى هتأثر على طفلك باقى حياته ؟ .. ربنا خلقنا كبشر على سلم الصحة النفسبة فى درجات .. محدش وصل للقمة اللى هى السواء التام .. بالتالى كلنا على درجات بمعنى اصح كلنا عندنا استعدادات للمرض النفسى لكن بدرجات او خلينا نقول الاضطرابات النفسبة .. انتى نفسك ممكن يكون عندك اضطراب او اكتر وانتى ماتعرفيش .. ومش عشان انتى شايفه نفسك كويسة يبقى انتى فعلا كويسة .. ومش عشان انتى شايفه ان محصلش ليكى ضرر من حاجه زى دى يبقى طفلك مش هيحصل له حاجه لما تفطميه بنفس الشكل .. طيب هنخسر ايه لو اتعلمنا نتعامل مع اولادنا بشكل صح فى اهم مرحلة فى حياتهم اللى بتشكل شخصيتهم بجوانبها الاربعة ( النفسى - العقلى - الاجتماعى -الجسمى ) ..
******************************************************************* شخصيا شايفه ان المشكلة الاساسية هى " الكسل " ومن غير زعل .. هو الكسل اللى مخلينا مش بنتعب نفسنا اننا نعرف الصح او اننا ندور مع ان دلوقتى بقت المعلومة بتجى لنا لحد عندنا .. طريقة الفطام اللى بتستخدموها دى مثلا نوع من انواع الاستسهال .. الام مش عايزه تتعب نفسها وبتستهل .. وشايفه ان كده تمام ومفيش مشاكل والموضوع هيعدى زى ما عدى قبل كده .. وهيتكرر تانى وتالت ورابع .. طب تعالى اقولك على مثال صغير اوى للمشكلة اللى ممكن يعملها الفطام بشكل غلط فى فى المستقبل استعداد الطفل لما يكبر للتدخين .. ايوه فعلا ده مرتبط بالفطام بشكل كبير وهفسر لك بالتفصيل بعد كده ايه سبب ده وايه علاقة الفطام بالتدخين .
واسمحوا لى اقول حاجه كمان ان ارتباط الرجل بثدى المرأة او انجذابه الشديد للجزء ده من جسمها ليه علاقة قوية بأجتيازه للمرحلة دى فى نموه فى الطفولة .. وبرضه هنوضح ده بعد كده ..
*********************************************************************
مرحلة البداية فى حياة الطفل من الميلاد وحتى من الحمل وحتى سن 5 سنوات دى بنسميها فى مجالنا " السنوات الذهبية فى حياة الطفل " .. وللاسف الامهات مش عندها وعى كافى بده .. نحاول نغير الفكرة دى .. عشان اولادنا ممكن يبقوا احسن مننا 1000 الف مره لو اهتمينا واتصرفنا صح .. واتعلمنا ازا ى نتعامل معاهم بشكل علمى وازاى نقدم لهم ونصحح كل الأخطاء اللى اتعملت معانا .. انا هتكلم عن الموضوع بشكل تفصيلى وبعدها هردعلى اى سؤال .. اللى مهتم ممكن يعمل منشن لنفسه فى الموضوع واناهضيف المعلومات بشكل تدريجى
أول حاجه لازم اتكلم عنها .. ليه الفطام بالطريقة دى غلط ؟ .. وعشان نعرف ليه غلط لازم نتكلم عن مراحل النمو للطفل .. المراحل دى حددها فرويد فى نظرية التحليل النفسى .. ايه بقى اللى حصل مع فرويد .. فرويد كان طبيب نفسى نمساوى .. بني نظرياته بناءً على مشاهداته المباشرة للمرضى بتوعه .
فرويد كان نابغ جدا .. وفى فترة من فترات حياته كان متخصص فى علاج المسنيين .. وركزوافى الحتة دى كويس عشان هى الدليل الاساسى على كلامى اللى قلته فوق ان مشاكل الطفولة ومشكلة زى الفطام دى ممكن تأثر على الطفل بقية حياته .. اللى حصل ان فرويد خلال جلساته مع مرضاه وفي أثناء علاج مرضاه .. وخلال استدراجهم فى الحكى عن حياتهم .. ومن خلال أبحاثه المتعمقة في النفس البشرية، وقراءاته العميقة للأدب والتراث الإنساني لقى ان الإنسان عنده عقد كتير بتنمو معاه منذ الطفولة وبيفضل تأثيرها عليه حتى وفاته ، والعقد دى غالبا بيكون سببها علاقة الطفل بالأم والأب وتسلسل مراحل النمو اللى بيمر بيها واضطرابات مروا بيها فى المرحلة دى، وبالتالى لو قدر الأهل يدعموا أطفالهم بشكل ايجابي في مرحلة الطفولة المبكرة، ممكن الإنسان يقدر يسيطر على العقد دى ويمنع ظهورها .
********************************************************************
وبناء على تجارب مرضاه وعلمه ودراساته عمل فرويد نظريته الشهيرة التحليل النفسى وكان جزء مهم فيه هو تقسيمه لمراحل نمو الطفل .. وقسمها مراحل واعتمد في تقسيمه بشكل أساسي على نمو الغريزة عند الإنسان " الفمية - الشرجية - القضيبية / الأوديبية - الكمون - المراهقة ) وبناء على دراسة فرويد لمرضاه اكتشف حقيقة مهمة جدا قريبة من الواقع وهى ان اى خلل او اضطراب او نقص يحصل فى اشباع واتزان مرحلة من المراحل دى بيفضل مستمر طول الحياة وبيفضل التطور النفسى الجنسى للشخصية واقف عند المرحلة دى ومش بيتطور للى بعدها
ممكن نبقى نتكلم عن كل واحده فيهم لاحقاً خصوصا ان كل واحده فيهم ليها مشاكلها وخاصة ال 3 الأولانيين ( الفمية والشرجية والأوديبية ) .. لكن اللى يهمنا فى المرحلة دى هو المرحلة الأولى " المرحلة الفمية .. طيب ايه هى المرحلة الفمية ؟
المرحلة دى اول مرحلة من مراحل نمو الطفل وبتبدأ من الولادة وحتى سن سنتين والنشاط الغريزي المهيمن فى المرحلة دى متركز في الفم للحصول على الإشباع واكتشاف العالم تبدأ هذه المرحلة منذ الولادة وحتى مرحلة الفطام، وهنا يستمتع الطفل بالرضاعة ويشبع حاجاته الجسدية والنفسيةوبيشعر بالدفء والأمان وهو قريب من ثدى الأم .. يحس الأطفال الصغار فى المرحلة دى شعور بالمتعة من عملية المص ووضع الأشياء في أفواههم . فنلاقى الأطفال فى السن ده بيمصوا أي شيء يلاقوه ويحطوه فى بقهم على طول حتى لو مكنش اكل او طعمه حلو .
*********************************************************************
فرويد شايف أنه إذا لم يتم إشباع الطفل في المرحلة دى ( الفمية ) ممكن جدا انه ما يتطورش للمراحل الأكثر نضجا اللى بعدها وبالتالى يصبح الشخص ده متوقف النمو من ناحية التطور النفسي الجنسي وهيفضل طول الوقت مش قادر يحقق مشاعر حب حقيقية تجاه العالم المحيط ويفضل مقتصر بثبات على تحقيق المتعة والتعامل مع الناس بطريقة مادية بحتة .
طيب ممكن بالشكل ده نتصور بعض المشاكل اللى ممكن ترتبط بالمرحلة دى وتستمر مدى الحياة .. واللى ابسطها التدخين زى ما قلنا قبل كده وممكن برضه نفسر بيها كتير من تصرفات الرجل تحديداً منها حبه لجزء معين من جسم المرأة وده راجع لأرتباطه بالمرحلة الفمية ومرحلة الرضاعة فى أول سنتين من حياته ..
******************************************************************** بشكل عام لازم نعترف ان الفطام مرحلة صعبة جدا على الأم والطفل وليها اثر نفسى قوى جدا خاصة مع الطفل الأول نتيجة لان الام بتكون متعلقة بيه وملهوفة على بكاءه . الفطام بالنسبة لعلم الصحة النفسية عبارة عن تحول فى اسلوب تعذية الطفل بيعمل تطور نفسى لكل من الأم والطفل .. والتطور ده شئ مهم واساسى لازم يحصل لان مش هينفع الطفل يفضل فى مرحلة الرضاعة طول الوقت .. وكمان لازم يبدأ يعتمد على نفسه .. والأكل هو أول مراحل الأعتماد على النفس
وبصفة عامة الأطباء بينصحوا بعدم فطام الطفل بشكل كامل قبل مايتم سنتين عشان ميكونش ليه تأثير سلبى على مشاعر الطفل وعشان يفضل مستفيد من تغذيتة بالأجسام المضادة الموجودة فى حياتة لبن الام .
ومن الناحية الشرعية ربنا حدد فترة تمام الرضاعة الطبيعية للطفل عند بلوغه السنتين من عمره فى قوله تعالى فى سورة البقرة : (( وَالْوَالِدَاتُ يُرْضِعْنَ أَوْلادَهُنَّ حَوْلَيْنِ كَامِلَيْنِ لِمَنْ أَرَادَ أَن يُتِمَّ الرَّضَاعَةَ((
وفى سورة الأحقاف : (( وَوَصَّيْنَا الإِنسَانَ بِوَالِدَيْهِ إِحْسَانًا حَمَلَتْهُ أُمُّهُ كُرْهًا وَوَضَعَتْهُ كُرْهًا وَحَمْلُهُ وَفِصَالُهُ ثَلاثُونَ شَهْرًا))
) وبما ان الحمل الطبيعي بيكون عادة تسع شهور فيكون موعد فصال الطفل من رضاعها ( الفطام ) بعد 21 شهرًا يعنى تقريبا سنتين
*********************************************************************
نيجى بقى لأهم نقطة اللى كتير من الأمهات بتسأل عنها : طريقة فطام الأطفال الصحيحة ؟ وازاى ممكن نعدى مرحلة الفطام بأمان من غير ما الطفل يتعرض لأى أثار سلبية .
مرحلة فطام الاطفال مرحلة فاصلة فى حياة الطفل .. ليه ؟ .لان فيها بيتم الاستغناء عن حليب الأم والإعتماد على مصادر الغذاء الخارجى يعنى الأكل العادى والمفروض انها تتم بشكل تدريجى لحد ما الطفل يمتنع تماما عن الرضاعة .
لكن اللى بيحصل ان بتلجا كثير من الامهات الى فطام الطفل فجأة وبتمنع الرضاعة الطبيعية او الببرونة فجأة وطبعا ده خطأ كبير جدا لانه بيسبب مشاكل نفسية وجسمانية للطفل شرحنا جزء منها فى الأول .
طيب خلينا نعرف الفطام صح .. الفطام يعني استبدال وجبة جديدة غير الحليب مكان رضعة من الرضعات اللى بياخدها الطفل خلال اليوم .. يعنى اول رضعة هنبدأ نستبدلها يبقى كده بدأنا فى مرحلة الفطام .. وبالتالى نقدر نقول ان الفطام بالمعنى ده بيبدأ من الشهر الرابع الى الشهر السادس من عمر الطفل لما بنبدأ نضيف أول وجبة خارجية .
أحياناً بيحصل حاجه بنسميها الفطام الذاتي .. بعض الأمهات هتلاقيه حصل معاها ده بيكون ان الطفل بأرادته بيمتنع عن الرضاعة لأسباب كثيرة ممكن يكون أهمها انه عجبه الأكل اللى بيتقدم له مكان الرضعات اكتر من طعم اللبن .. او عجبه استخدام الببرونة عشان اسهل واسرع بالنسبة له .. طبعا النوع ده من الفطام مش هنحتاج فيه اى خطوات ومش هيكون فى اى اضرار نفسية على الطفل
***************************************************
لكن لو جينا لطريقة الفطام للطفل العادى ؟
والطريقة المثالية للفطام بشكل عام لازم تعتمد على التدريج، وعلى مدى شهور مش شهر أو اثنين أو يوم أو يومين ، او على الاقل نحاول ندرج فيها بقدر المستطاع على قدر ما يسمح لنا الوقت ده فى حالة اذا كان فى اضطرار لده زى الحمل مثلا اثناء الرضاعة او ظروف صحية معينة للأم بحيث ان الفترة الزمنية لازم تكون كافية لتحويل الرضيع من الاعتماد على حليب الأم أو حتى الرضاعة الصناعية إلى الاعتماد على الطعام العادي وبعدها على حليب غير حليب الأم.
وعشان معدة الطفل الرضيع تتقبل ده بدون مشاكل صحية – فضلا عن المشاكل النفسية – لازم ده يتم بالتدريج . وخلال موضوع تانى هنبقى نتكلم عن اهمية ومزايا الرضاعة الطبيعية بس خلينا هنا ننقول ان من اهم مميزاتها ان كل العناصر الغذائية الموجودة فى لبن الأم ربنا خلقها بشكل قابل للأمتصاص والمعالجة بشكل ميسر بالنسبة لمعدة الرضيع اللى لسه معندهاش القدرة على التعامل مع العناصر الغذائية فى الاكل العادى وخصوصا اللبن العادى ولو حصل ده بيحصل اضطرابات معوية ومشاكل صحية كتير.
كمان من أهم فوائدها الكثيرة أنها بتقوي جهاز مناعته ضد كثير من الأمراض ، بالأضافة إلى أنها تقوي الرابطة العاطفية بين الأم والطفل
********************************************
وقبل ما نتكلم عن الطريقة المثالية للفطام لازم نتكلم عن شوية نقط مهما لازم ناخد بالنا منها عند بداية الفطام :
1- بقدر المستطاع نتجنب ان بداية الفطام تكون فى الصيف عشان نجنب الطفل خطر الإصابة بالنزلات المعوية.
2- لازم الطفل يكون صحته كويسة يعنى مينفعش نبدأ نفطم الطفل وهو عنده اى مشاكل صحية زى الانيميا او سوء التغذية ، أو النزلات المعوية، أو الحمى مثلا.
3- ماينفعش نبدأ الفطام بشكل سريع من غير تدرج عشان نفس السبب فى رقم واحد ده ممكن يعمل للطفل اضطرابات هضمية أو نزلات معوية.
4- لازم ناخد بالنا كويس جداااا من النظافة .. الأكل اللى هنبدأ نعود الطفل على الاعتماد عليه مش زى لبن الأم أبداً .. لبن الأم من مميزاته انه معقم ومش معرض لأى نوع من أنواع التلوث .. او بمعنى اصح يصعب تعرضه للتلوث لانه بيكون من ثدى الأم لفم الطفل مباشرة او حتى من الببرونة المعقمة لفم الطفل مباشرة وفى نفس الوقت الطفل كان معتمد على نوع واحد من التغذية اللى هواللبن فلما هنبدأ الفطام هنبدأ نزود الأنواع وده بيزود فرص التلوث والمشاكل الصحية .. مش محتاجين نقول اننا لازم نغسل ونطهرايدينا كويس قبل وبعد اعداد الطعام للطفل واثناء تغذيته .. وكذلك الأوانى اللى هنجهز فيها الأكل .. وكل احتياطات النظافة والسلامة المعتادة .
5- الدعم النفسى للطفل فى المرحلة دى مهم جدا عشان يقدر يساعده يتجاوز المرحلة دى وفى نفس الوقت الدعم النفسى من الأسرة للأم لانها مرحلة صعبة برضه بالنسبة لها سواء نفسياً من حيث ارتباطها بالرضاعة او حتى من ناحية قلقها وتوترها من توقف الرضاعة
خطوات فطام الطفل بشكل صحيح
- رقم واحد ( تقليل الرضعات ) :
مطلوب من الأم انها تبدأ تقلل من عدد الرضعات للطفل وده هيخلى الطفل يبدأ يفهم بشكل تدريجى او بيمهد له نفسياً للى هيحصل بعد كده .. وفى المرحلة دى الام بتحاول تكون حازمة الى حد ما يعنى لو قللت عدد الرضعات بتحاول تلتزم بده حتى لو الطفل الح عليها .. وطبعا بشكل تدريجى
- رقم 2 ( منع الرضاعة قبل النوم ):
ليه ؟ لان الرضاعة قبل النوم بتبقى عاملة زى المنوم للطفل لدرجة انه ممكن يستغنى عن اى رضعات تانيه اسهل من الاستغناء عنها . وفى المرحلة دى الام لازم تفضل مستمرة فى التدريج فى توقيف الرضاعة وتغيير عادة الطفل فى الرضاعة قبل النوم .. ، مثلا ممكن تعود الطفل على بديل زى حمام دافى قبل النوم او تغنى له أو تحكى له حدوتة قبل النوم لحد مايتعود ان فى حاجه تانيه ممكن تتعمل قبل ماينام غير الرضاعة
******************************************** وعموما السبب الرئيسي لنزول الحليب في الثدى هو الرضاعة نفسها ، يعنى بمجرد ما نبدأ نقلل الرضعات .. كده كده هيبدأ يقل إفراز هرمون الحليب بالتدريج، ومع الوقت بيقل إفراز الحليب بالتدريج لحد مايتوقف تماما، وده فى حد ذاته بيساعد على الفطام، لانه مش هيلاقى حليب كفاية يشبع منه فبيبدأ يزهق ويبعد عم الثدي بالتدريج.
********************************************
- رقم 3 ( الحنان )
دى ممكن نقول عليها خطوة ممتدة .. ونقدر نعتبرها توصية .. بس هنركز عليها اوى فى المرحلة دى .. ليه ؟ لان الرضاعة بالنسبة للطفل مش مجرد مصدر غذاء وبس .. جزء كبير من ارتباط الطفل بالرضاعة هو احساسه بأحتضان الأم ليه وقت الرضاعة والراحة فى شعوره ده .. ولو هنبدأ نقلل رضعات الطفل .. يبقى لازم فى نفس الوقت الأم تفضل محافظة على قربها من الطفل وتفضل تحضنه وتضمه لصدرها بشكل مستمر وتلعب معاه وتحسسه بحنانها عشان الطفل مايحسش انه افتقد الأم وحنانها وقت الفطام .. وعكس ما بعض الأمهات بتعمل .. لما مثلا تقرر انها تفطم الطفل بشكل مفاجئ بانها تبعده عن الثدى او تلبس ملابس مقفولة فبتبعد الطفل عن حضنهاعشان تبعد عن الحاحه فى طلب الثدى . الحنان فى المرحلة دى هيقلل الضغط النفسى اللى على الطفل وهيساعد ان المرحلة دى تمر بسلام .
******************************************
4- رقم 4 / أوعى تحاولى تغيرى طعم الثدى :
وده اللى اتكلمنا عليه فى أول الموضوع غير انه بيكون كتير تجربة شعورية ونفسية مؤلمة جدا للطفل تصل لوصفها بالتعذيب بالنسبة لرضيع ! .. فى احيانا اطفال بيفضلوا مستمرين فى الرضاعة بالرغم من الطعم المر لها وأحيانا بيتعودوا على الطعم الجديد وقتها الام هتضطر تختار طريقة اكثر قسوة للفطام .. ونزود الخطأ
كده تقريبا الموضوع خلص .. لكن لسه فى جزء مهم جدا للأمهات اللى محتاجه ترتب طريقة الفطام التدريجى للطفل .. هنزل لكم اكتر من برنامج تفصيلى بداية من الشهر الرابع حتى نهاية السنتين وطريقة فطام الطفل خلال الفترة دى شهر بشهر بالتفصيل الممل .. لو لسه فى الشهر الرابع ممكن تبدأى تمشى عليه تدريجيا ,, ولو عديتى الوقت ده هنرتب ازاى تضغطى البرنامج شوية وتمشى عليه بالتدريج بقدر المستطاع .
******************************************
. ملحوظة صغيرة .. انا بشكل عام بكتب بالفصحى .. والكتابة بالعامية بالنسبة لى أصعب لانى مش متعودة عليها وده السبب الأساسى ان الموضوع اخد وقت منى .. بس حاولت الموضوع يكون أسهل فى القراءة لكل الأمهات ومايكونش دمه تقيل بقدر المستطاع . هوعشان كده سامحونى لو تخلل الموضوع بعض التعبيرات الفصحى .. وكده كده نفس الموضوع هيتم اعادة صياغته وكتابته مرة تانية لكن بالفصحى
04/08/2023
08/05/2023
05/04/2023
15/02/2023
06/02/2023
25/08/2022
20/08/2022