Super Lap

اصدقائنا متابعين سوبر لاب... لينا فترة واقفين بسبب الدراسة ومبدأناش كمان فى بداية الاجازة لأن اعداد الاصابات كانت متزايدة بشكل كبير... الامور افضل اليومين دول وكمان لسه فى فترة مناسبة قبل الامتحانات فأحنا بنفكر نعمل ورشة اخيرة !!!
ليه اخيرة ؟ لأن الامتحانات قربت وبعد الامتحانات هنبدأ فى الترم التانى علطول بالتالى مفيش وقت فى ايام الدراسة وبالتالى لحد نهاية الترم التانى معتقدش ان فريق سوبر لاب هيكون مستمر فى الورشة (التجنيد وتلبية نداء الوطن ❤️😁 )
بما انها ورشة اخيرة فأحنا حابين انها تكون مميزة! هنخليها 4 ايام مش 3... اليوم الزيادة هيكون بالكامل استخدام نظام لينكس وندي نظام التشغيل دا وقت اكبر
الورشة هتكون الاسبوع الجاى ان شاء الله
لو حابب تحضر ابعتلنا على الصفحة 🔥😁

عزيزى متابع سوبر لاب اهلا بيك وصباح النور عليك يا زوز... فى ليالى الشتاء الحزينة هناك بعض الامور الايجابية زى ان اللاب بيستحمل اللى انت بتعمله فيه زى انك تسد التهوية عنه لما تحطه على البطانية وانت بتتفرج على فيلم فى السرير (وسايب مذاكرة الفاينال ومستنى الابحاث ودا مش هيحصل) ولكن انت لازم فى كل الاحوال تاخد بالك من اداء الجهاز
امبارح سألنا تغير ال HDD ل SSD ولا تزود حجم الرامات لو الميزانية تكفى الاتنين... كان نفسنا تغير الاتنين مع بعض والله بس الفلوس كالعادة يا زوز !
طيب احنا فى سوبر لاب دايما بنقترح انك تبدأ ب ال SSD ... ليه ؟ عشان الفرق بينه وبين ال HDD كبير جدا جدا جدا وبيكون هو اكبر مشكلة فى الجهاز فلو حليت المشكلة دى بتظهر المشكلة اللى بعدها ودى على حسب جهازك... ممكن يكون كارت الشاشة او البروسيسور او الرامات على حسب امكانيات الجهاز واستخدامك!
فى الصورة هنا الفرق بين سرعة الهارد العادى ال HDD وسرعة ال SSD من النوع SATA وسرعة ال SSD من النوع M.2 وهو افضلهم و اسرعهم... لكن المسافة الكبيرة جدا جدا بين ال SSD وال HDD مش بين الانواع المختلفة لل SSD فانت تقدر تمشى حالك بأى نوع SSD وهيضاعف اداء الجهاز بصورة لا تتخيلها... للمزيد حول اسعار ال SSD ... انبوكس 💙😂
لو وصلت لهنا يا صديقى فشكرا ليك ... احب اقولك كمان تقدر تشوف الفرق بين اداء الجهازين من هنا يا زوز https://bit.ly/2ZF9mr2
وسيب كومنت ب "مهتم" لو عايز بوست عن ازاى تخلى الجهاز اسرع بال HDD (اه تقدر تحسن اداء الجهاز بال HDD )
متنساش الشير واللايك وانت معدى يا حُب 💙🙃

صباح الخير... مغيبين عنكم من فترة بس ناويين نرجع تانى وبقوة باذن الله 💙😁 ... سؤال ع الماشى كدا واحنا بنجهز لبوستات اليومين الجايين.. لو معاك ميزانية💶💵 تكفى تعمل update لحاجة من دول: يا اما تزود الرام يا اما ال HDD ل SSD... تختار ايه وليه ؟

هلا بالخميس وهلا بيكم يا متابعين سوبر لاب الاعزاء 💙🙂
قد يظن البعض لوهلة... ل ايه ؟ ل وهللللة 🤏 (وكان فى الشة بايخة هنا بس حذفناها) اننا موقفين شغل ! 😬🤔
فى الواقع هو موبايلى اللى بصور بيه الشغل اتكسر واللاب اللى كنت بعمل بيه فيديوهات سوبر لاب كارت الشاشة اتحرق... عموما فى المواقف دى بنقول قضاء الله كُله خير والحمد لله 💚🤗
اصدقائنا الاعزاء اللى لسه على تواصل معانا وبنعمل شغل حلو الحمد لله... لسه واصلنا من يومين الجهاز دا (زى دا مش دا هو يعنى عشان مش عارفين نصور زى ما اتفقنا... نركز.. نصحصح) و فنيين سوبر لاب حلو مشكلة الهارد وير... كمان صاحبة اللاب كان ذكية وكانت حابه تستثمر فى جهازها وتخليه "سوبر لاب" فعلا ... فضفنا ليه SSD وبقا صاروخ 💙😁 كمان رفعنا الرامات من 4 جيجا ل 8 جيجا والاداء فرق 180 درجة ( 180 مش 360 يا ساااااجط) كمان بالامكانيات الاولى ويندوز7 هيدى اداء افضل من ويندوز 10 لكن بعد التعديلات الجديدة اللاب بيشغل ويندوز 10 وبيستفيد بيها وامكانياتها بشكل كامل ! 🚀 دا غير انه اصلا زى ما اتكلمنا قبل كدا انه مينفعش تكون لحد دلوقتى شغال ب ويندوز7
ها مين تانى حابب يعمل upgrade للجهاز بتاعه ويحوله من لاب ل سوبر لاب ؟ 🚀💚😌

اعزائنا متابعين و اصدقاء سوبر لاب فى كل مكان اهلا بيكم مره تانيه 💙😌 مفتقديننا مش كدا ؟ 🤔😄
بعد انقطاع حوالى 20 يوم كان المفروض ننزل فيهم صور الورشة والحاجات اللى بنحققها بيكم ومعاكم... لكن وللأسف وبما ان معظم اللى بيحضرو كانو من طلاب حاسبات اسيوط وبعد بداية الترم والناس المغتربة كانو منتظرين الدراسة عشان يقدرو يحضرو الورشة الجدول اتوزع بطريقة سيئة جدا جدا ومكنش فى 3 ايام دراسة و 3 اونلاين زى ما كنا متوقعين وبننزل كل يوم عادى 💔🥺
عموما عموما عموما... مفيش بشمهندس بيعيط 💔🥺 خالص خالص يعنى 💔🥺
وبالتالى الورشة لفترة مؤقتة وقفت... هترجع امتى ؟ مش عارفين الصراحة 🙄🤷‍♂️😅 بس نحب نحيي كل الناس اللى بادرت وحضرت من البداية وخصوصا الناس اللى كانت بتيجى مواصلات كل يوم ولحقو يحضرو الورشة اللى كانت (على حسب ال feedback ) مفيدة جدا
___
طيب هنعمل ايه الفترة الجاية ؟ احنا بالفعل بدأنا نقدم خدمات تانية زى تصطيب الويندوز... بس ايه الجديد في كدا ؟
بص يا سيدى... كل اللى كنا بنعمله فى الورشة وكنت بتتعلمه انت تعمله بنفسك لحد ما الورشة ترجع احنا ممكن نعمله للناس سواء تصطيب ويندوز ( او لينكس ) ولو فى اى حاجه او مشكلة تانية فى الجهاز بننبهك ليها... وفى حاجات اضافية وتفاصيل كتير بنعملها من غير ما تتطلب بس عشان نوصل لمرتبة "الاحسان" فى شغلنا 💙🙏
فى الايام الجاية هننزل تفاصيل الشغل دا ولو جهازك محتاج تظبيط فى اى حاجه كلمنا ع الصفحة او اكونت سوبرلاب... ودا مؤقتا لحد ما ان شاء الله نتقابل تانى فى ايه ؟... فى الورشة 💙🤗🙂🍂🍂

خلصنا ورشة الاسبوع دا انهردة 💙🤗
كالعادة الناس بتجرب لينكس للمره الاولى ومش بيقدرو يقاومو جمالها وبيقوعو فى حبها ... طالب حاسبات لما يحب بقا ❤️😌
مين متحمس لورشة الاسبوع الجاى ؟
الورشة ان شاء الله هتبقا الجمعه+السبت+الاحد ( دى مواعيد افضل عشان الدراسة )
مين جاى ؟ 🤓

وخلصنا اليوم التانى من الورشة وبكرا الجمعة هيكون اليوم الاخير من الورشة مع الجروب المجتهد اللى حاول يوفق بين الورشة وبين مواعيد السكاشن والمحاضرات 💙😌 الورشة هتبدأ تضم يومي الجمعة والسبت لمواعيد الورشة عشان الناس الكتير اللى عايزة تحضر الورشة بس متأزمين من مواعيد الدراسة
قلبو فى الصور وشوفو بنعمل ايه فى الورشة 🤓😁
مين جاى الورشة الجاية ؟ 🤓🧐

عزيزى صديق سوبر لاب... اهلا بيك من تانى فى ال ايه ؟؟؟ الورشه... الورشة 💙😌
لاف كدا وانت معدى يا زوز ❤️

الورشة اليومين دول وصلت لمرحلة فى المحتوى والادوات الموجودة بفضل الله لمستوى كويس و مُرضى جدا جدا لكن وصلتنا شكاوى كتير بأن تكلفة الورشة كبيرة ومش كل الناس هتقدر تتحمل التكلفة دى، وفى نفس الوقت الورشة بشكلها الحالى مش هنقدر نقلل تكلفتها، فلو انت مهتم بالحضور وعندك نفس المشكلة مع تكلفة الورشة كمل البوست عشان تفهم السبب والحل اللى وصلنا ليه
-----
• الورشة المحتوى بتاعها بيعوض كل المعلومات اللى كان المفروض تتدرس عندنا فى كلية الحاسبات والمعلومات واللى يدوب بنقرأها من كتاب ال IT فى سنة اولى وبنحفظ تعريفاتها وخلاص بس مش فاهمين دا بشكل عملى + اننا بنشوف الكلام دا عملى من ناحية الهارد وير ودا اللى الكلية مش بتقدر توفره بسبب العدد

• الورشة فى اليوم الاول والتالت بيكون شرح على السبورة والاجهزة سواء الاجهزة بتاعت الورشة ( 3 اجهزة لابتوب ) او اجهزة الناس اللى حضرت الورشة
• العدد الاقصى للطلاب 8 اشخاص فقط... ممكن اقل بس مش اكتر، طيب ليه ؟ لأن اليوم التانى من الورشة ال 8 طلاب دول ( او اقل من8) فى ورشة الهارد وير بيكون كلنا متجمعين وبنفك بوردة جهاز لابتوب ونشوفها عن قرب ونشوف اجزاء الهارد وير اللى اتكلمنا عنها فى اليوم الاول وبنكمل كلامنا عنها فى اليوم التالت... لو العدد زاد عن كدا مش بنعرف نتجمع حوالين مكتب واحد واحنا بنفك الاجهزة!!!
• بناء على ما سبق... اولا : الورشة كلفتنا مبلغ كبير عشان نشترى الاجهزة وباقى الادوات اللى بنستعملها فى الورشة والناس اللى حضرت الورشة عارفه دا كويس(دا التكلفة الثابته فوق ال 10,000 و لسه فى تكلفة متغيرة بتتدفع فى كل ورشة) ... ثانيا : اليوم التانى بشكله الحالى مش بيسمح لينا اننا نقبل عدد كبير فى الورشة الواحده
------
الحل طيب ؟
لو فضلت الورشة بالوضع الحالى مش هنقدر نستمر بعدد قليل من الطلاب وفى نفس الوقت هيفوت فرصة كبيرة على الناس لأن المحتوى ( وبشهادة الناس اللى حضرت ) مفيد ومهم جدا لأى حد بيتعامل مع الكمبيوتر وخصوصا الطلبة اللى شغلهم الاساسى عليه ( زى حاسبات و هندسة) والعائق حاليا ( ال bottleneck للورشة ) هو اليوم التانى بتاع الهارد وير فأحننا قررنا الاتى :
• سعر الورشة ثابت - بمعنى انه كان عندنا عدد معين من الطلاب وكل واحد بيدفع مبلغ معين دا فى الايام الجاية هيكون زى ما هو
• العدد هيزيد بدل ما كنا بنقبل 6 طلاب هنقبل بحد اقصى من 12 ل 15 طالب... المبلغ القديم هيتقسم على عدد الطلاب دول... طيب اليوم بتاع الهارد وير هيمشى ازاى ؟
• طبعا مش هيتعمل زى الاول وان الطلبه تفك القطع بنفسها او تشوف الفك والتركيب عن قرب زى الاول بسبب العدد لكن هنعوض دا بأننا هنشترى قطع هارد وير كتير تانية بحيث كل طالب او اتنين معاهم قطع هارد وير يشوفوها بنفسهم ... دا هيكون مُكلف لينا جدا بس هنعمله عشان نستمر معاكم
• الجزء اللى اتعدل دا هو نص يوم من 3 ايام و مازال باقى المحتوى زى ما هو وكمان هنعمل قناة يوتيوب عليها ماتريال تساعدنا اننا نشرح المحتوى بتاع ال 3 ايام بكفاءه اعلى ان شاء الله
-----------
• النقطة دى مهمة : اى حد مكون مجموعة بعدد اقل من 12 يعنى مثلا 5 اشخاص وحابب يكونو لوحدهم ويدفعو تكلفة الورشة مع بعض هياخدو الورشة بنفس النظام القديم دا شئ مُرحب بيه جدا يجمعو بعض ويتواصلو معانا على الصفحة 🤓
-----------
لو انت وصلت لهنا فالتيم بتاع سوبر لاب بيشكرك على دعمك واهتمامك 💙🙏
شير عشان تساعد الناس اللى كانت عايزة تحضر انها تشوف البوست وتحضر معانا الورشة الجاية 💙🙏

ركز معايا كدا... معاك 500 جنية.. تمام ؟
قدامك تعمل بيهم حاجه من الاتنين للجهاز بتاعك...
- راماتك 4 جيجا وقدامك انك تزودها ل 8 جيجا
- تغير الهارد فى جهازك ( ال HDD ) وتركب SSD ( او تحتفظ بالاتنين فى جهازك)
ها هتختار ايه ؟ لو انت مش فاهم ايه هو ال SSD فانت اكيد هتختار انك تزود الرامات... اتكلمنا على الصفحة لمدة شهرين عن حاجات كتير فى الجهاز زى ال Disk و ال CPU وال GPU و RAM وبعد ما شرحنا حاجات كتير قررنا ننزل بالناس الورشة عشان نشرح الحاجات دى ونطبق بشكل عملى ودا اللى مش هنعرف نعمله فى بوست على الفيسبوك!
شوفنا ناس كتير عملت الحركة دى بس انت ممكن فعلا ترمى فلوسك فى الارض لو عملت upgrade غلط! فى الورشة بنشرحلك الاساس النظرى ونفهم كل حاجه بالتفصيل بعد كدا بنفك كل حاجه شوفناها نظرى ونتعامل معاها ك هارد وير، فى النهاية بنطبق دا كله من داخل نظام التشغيل ( ويندوز + لينكس )
الورشة الجاية هتكون من يوم التلات ولسه متاح اماكن فى الورشة... ابعتلنا على الصفحة عشان تعرف الاماكن المتاحه وباقى تفاصيل الورشة
وشوف البوست اللى اتكلمنا فيه عن ال SSD
https://bit.ly/2E15Yyk