08/05/2024
ونقول ونعيد ونكرر تاني بلاش فسيخ
تسمم الفسيخ او البوتيوليزم (Botulism)
هو اية البوتيولزم دا؟؟
ببساطة دا نوع من أكثر انواع التسمم فتكا وفي بعض العلماء صنفوه انه من أخطر خمس سموم موجودة
طيب دا بيحصل ازاي ولية في الفسيخ تحديدا؟؟
دا طبعا لية علاقة مباشرة بطريقة عمل الفسيخ انه لازم نغطيه ونلفه ونمنع عنه الهوا
وهذا هو بيت القصيد
في نوع من البكتريا اللاهوائية يعني بتزيد وبتكبر في عدم وجود الأكسجين اسمها (clostridium botulinum) دي في الظروف دي بتفرز سم من أخطر السموم وبيشتغل علي النواقل العصبية في الجسم وهو اللي بيعمل كل المشاكل اللي هنقولها بعد شوية
طيب هل دا مقتصر علي الفسيخ بس؟؟
لا ممكن يكون في اي نوع من الاكل أتعرض لنفس الظروف من عدم وجود الأكسجين ووجود بكتريا الكلوستريديم دي
طيب هل ممكن نعرف الفسيخ من شكله او ريحته انه ممكن يعمل تسمم؟؟
للأسف لأ مفيش حاجة ظاهرة بتقول الفسيخ دا في سم ولا لأ
طيب محنا أكلنا فسيخ قبل كدة كتير والحمد لله محصلش اي حاجة
دا نفس فرضية ان واحد دايما بيسوق العربية علي سرعة ١٨٠ علي طول وبيقول محصليش اي حاجة في ولا مرة . هل دا بينفي خطورة اللي بيعمله واحتمال حدوث كارثة لا قدر الله من القيادة بسرعة
البيتيوليزم ممكن يحصل من سوء التخزين وتلوث السمك بالبكتريا اللاهوائية
وانت مش ضامن ان كل مرة يكون السمك معمول بنضافة ومتخزن كويس
زائد ان خطورة التسمم واحتمال انه يؤدي الي الوفاة لا قدر الله يخلي الواحد يفكر ألف مرة قبل ما يأكله
طيب ماحنا بنعصر عليه ليمون ونحط خل
ولا ليها اي لازمة لأن المشكلة ان السم خلاص اتكون ومش هيتأثر بالليمون او الخل
طيب هي اية الأعراض وتظهر امتي؟؟
للأسف من اهم مشاكل botulism انه الأعراض ممكن تتأخر وتظهر بعد ١٨ او ٢٤ او حتي ٣٦ ساعة ودا هيخلي الشخص ميشكش ان الأعراض دي من الفسيخ وحتي لما يروح للدكتور مش هيجيب سيرة الفسيخ لان عدي عليه يوم او اكتر وخصوصا ان اعراض التسمم دي بتكون معظمها اعراض عصبية
طيب اي هي الأعراض؟؟
صعوبة في البلع
روؤية مزدوجة
عدم القدرة علي فتح العين
جفاف الحلق
ضعف عام في العضلات من اعلي لاسفل
ودا من أخطر الأعراض لأنه بتأثر علي عضلات التنفس ولو الشخص وصل المرحلة دي لازم يتحط علي جهاز تنفس صناعي ولو متلحقش يموت
نسبة الوفاة من هذه الحالات عالية جدا خصوصا لعدم توافر اللقاح في كافة المستشفيات والاحتياج لجهاز تنفس صناعي
طيب البوتيلوزم دا ليه علاج؟؟
في مصل بس للأسف غالي جدا جدا ممكن يوصل تكلفته ١٠٠ الف جنيه بتوفره وزارة الصحة ولكن بسبب ارتفاع سعره مش متواجد بكثرة غير في بعض مستشفيات وزارة الصحة وممكن الشخص يحتاج اكتر من مصل
طيب اعمل اية علشان الوقاية
متاكلش فسيخ 🤪🤪🤪
دمتم بخير ان شاء الله
