Mr. Eslam Shokr

اغرب عذر سمعته لطالب متاخر عن الحصة 👇
اصل كنت بحلق 😂😂

- السلام عليكم حضرتك مستر إسلام
= عليكم السلام ايوه
- بسمع حضرتك على اليوتيوب وما شاء الله بفهم من حضرتك اوي وطلب مني شرح حاجه معينة في فيديو

مكالمة بسيطة مكملتش دقيقة بس لا تتخيل أسعدتني ازاي لدرجة إني نزلت البوست ده بعدها علطول

من بداية السنة حاسس بجودة الشغل الي بقدمه بفضل ربنا عز وجل مع طلاب تالته ثانوي وتانيه ثانوي ومبسوط جداً جداً بيه وبخاصة مع تالته اكتر

بصدق مش شايف خالص ان جودة الشغل الي طالعة تقل عن افضل مدرس بيدرس رياضيات في مصر كلها

بس الغريب إني مش شايف انعكاس ده على عدد الطلاب عندي ( وقسماً بالله أنا راضي عن العدد مش زعلان بس لما الشغل يكون حلو فالعدد يزيد بيزيد ثقتك في نفسك وبيحسسك بقيمة منتجك فعلاً )

لحد ما ربنا منّ عليا ونزلت بعض المحتوى على اليوتيوب ويكون ده جزء من ردود الطلاب على الفيديوهات الي تحسسك فعلاً انك في المسار الصحيح

ثقة في الله ثم في اداء طلابي العدد البسيط الي معايا هيطلع منه ناس كتير بمجاميع حلوة جداً
وقريباً بإذن الله يبقى معايا طلاب تقدر المنتج الي بقدمه ليها ❤️❤️

نهاية ترم هو الأثقل عليّ من بداية شغلي في التدريس
الوضع صعب وتحول من كون الواحد بيعمل حاجه بيحبها لسباق مع الزمن علشان تلحق تخلص وتراجع 🤨
وفي ظل ده انت مطلوب منك انك توصل منك انك متكروتش وكل معلومة تاخد حقها 🤝
بس هتاخد حقها ازاي مع طلاب اغلبهم طلاب تيك واي عاوز المعلومة على السريع في ريل 😒

فيإما تشتغل بما يرضي وتطحن نفسك وتطحن الطلاب معاك وهم يكونوا قادرين يستحملوا النظام وإرهاقه

يإما تكروت وتدي القشور وتركز على الي بيجي في الامتحان وخلاص كده كده محدش هياخد باله

المناهج مش صعبة … المناهج طويلة ، دسمة ، محتاجه تاخد حقها في الشرح
علشان نطلع طالب فاهم مش مبصمج

أنا عارف ان أم خديجة هتزعل 😂
بس الكلمة الي احسن من بحبك 👈 يا مستر الديناميكا بقيت حلوة بعد المراجعة النهائية

في أول سنة بدأت ادي فيها ثانوي
مجموعة تانيه ثانوي كانت طالبتين بالعدد ( كان منهم اختي 😅🤝 )
بدأنا شغل وسبحان الله واحدة منهم تتعب وتنقطع عن كل الدروس لمدة شهر بس جت واحدة تانيه مكانها
مكملناش كام حصة وأختي قررت تحول ادبي فبقت طالبة واحدة الي بتحضر
وانا كنت وقتها راجل مخلص هندسة يعني أصلاً في تحدي صعب اني اخد الريسك واسيب الهندسة وابدأ في التدريس الي أصلاً معنديش فيه طلاب ولا بيجيلي منه عائد ( ما هو أصلاً مجموعة اولى ثانوي مكنتش تختلف عن تانيه كتير 😂 )
المهم تعدي يا أيام وتيجي يا أيام وانا عمال أنحر في نفسي حرفياً في شرح كل حصة على السبورة وتخطيط وألوان وحركات كل ده لطالبة واحدة
الغريب ان أصلاً الشارع بتاعي كان فيه ٦ او ٧ طلاب في تانيه ثانوي محدش فيهم جه
مرت الأيام وجت طالبة منهم وكانت طالبة شاطرة بأمانه
وانا كنت معاهم حرفياً بشرح وأحل المعاصر كله بالحرف
المهم جه أصحابي في خلال الترم كد قالوا هنروح إسكندرية
واتفقوا هيطلعوا الساعة ٥ مساءً على ما أذكر ( الوقت الي كان في نفس توقيت حصة تانيه ثانوي إلي أصلا عبارة عن طالبتين )
بس أنا قولت لا مش هلغي الحصة روحوا انتم وانا هاجي وراكم بالقطر ( وقد كان فعلاً )
الغريب ان عادي حصة قبل ما الدراسة أصلا ما تبدا ( دخول المدارس اقصد ) وهم طالبتين كنت أقدر ألغي الحصة خالص أو أحط الحصة في معاد تاني بس معملتش كده مش عارف ليه

بدأت الحصة عادي اول ما دخلت لقيت فيه بنتين جداد حاضرين ( يا سلام يا سلام )
مفيش بدأنا ومعداش ٥ دقايق لقيت اتنين جداد داخلين عليا ( ابعت يا الي بتبعت 😂)
والله وفضلنا على الحال ده كل شوية اتنين في اتنين في اتنين
وانا واقف بقول فيه ايه
ايه الي بيحصل ده ايه الي أنا شايفه ده ايييييييييييه
لحد ما المجموعة وصلت لـ ١٢ او ١٥ طالبة
في حصة أصلا أنا كنت هلغيها علشان اروح أصيف

دلوقتي وانا بفكر في الموقف
بقول في نفسي ياريت الواحد يبقى فعلاً صادق وفعلا بيدور على مصلحة الطالب ونفعه قبل مصلحته الشخصية ومنفعته هو الفردية
ووقتها هيجيلك كل الي انت عاوزه رضا ربنا عنك وهيحبب فيك خلقه وهيضع ليك القبول في الأرض