يلا نذاكر لغة عربية مع مستر حسام الغنام

توكلنا علي الله 🤲
هنبدأ الكورسات الصيفية ابتداء من ١٥ / ٧ الحجز والتفاصيل في الاعلان 👌
الكورس لأهل مدينة بورسعيد فقط💚💚
باقي المحافظات متاح مجموعات اون لاين باذن الله💚💚
بالتوفيق للجميع ❤️❤️

تدريبات متنوعة الصف الخامس

اختبار شامل واسئلة متنوعة للصف الرابع نسألكم الدعاء

اولا السلام عليكم
ثانيا اسف جدا علي الانقطاع بس مشغول والله
ثالثا والاهم لازم تبقي عارف وفاهم ان كل طفل ليه قدرات غير التاني والاستيعاب درجاته مختلفه في طفل بيفهم ويحفظ من اول مرة وطفل تاني محتاج شرح مرتين وتالت محتاج يفهم ويحفظ ويذاكر ويراجع عشر مرات يبقي شطارتك كولي امر انك تعرف قدرات ابنك و تعرف ابنك متميز في ايه وتشجعه عليه وازاي تنمي مهاراته وضعيف في ايه وتحاول تحسنه مش لازم يبقي ممتاز في كل حاجة في حياته بس لازم يتعلم انه ممكن يتطور ويبقي احسن ولازم تشجعه وتفهمه ان مفيش حاجة اسمها حد خايب او غبي لكن في حد بيعرف يستخدم عقله وحد مبيعرفش عشان من كتر النقد اطبع في عقله انه خايب او مبيفهمش وده غلطنا مش غلطته
الكلام الجاي ده منقول بس عجبني ويارب يساعدنا في تغيير معاملتنا لاولادنا

أهم 8 حاجات تعملهم عشان تدمر شخصية ولادك تماما 🤔

1- المقارنة comparison

هما أحسن منك في أيه .. ناقص عنهم أيد ولا رجل .. ابن خالتك عمل أحسن منك.

المقارنة مدمرة لو حبينا نحفز أولادنا يبقى نقارنهم بنفسهم ونحفزهم يعملوا أحسن "أنت خلصت الدرس امبارح في ساعة بس أنت تقدر تخلصه في نص ساعة وأنا معاك وهساعدك"

ولما نيجي نشاور له نشاور على مثل أعلى حقيقي مش على أخواته أو قرايبه.

2- الانتقاد criticism

أنت شكلك كده ليه .. دخل لبسك .. غسلت سنانك .. أقف عدل .. اتكلم كويس .. كل ما تكلمه تنتقد فيه شيء

ممكن بدل الانتقاد نخليها مساعدة ونقولها بين شكرين.

"ما شاء الله دايما مهتم بشكلك عارف لو لبست التيشرت ده كان هيبقى أحلى عشان دايما اختيارك للألوان بيبقى حلو"

3- الحكم judgement

أنت دايما يضحكوا عليك كده وياخدوا فلوسك ويخلوك تعزمهم.

ممكن يبقى مش مضحوك عليه ولا حاجة ويبقى الكرم صفة فيه ممكن ساعتها نساعده يظبطها بحيث ميبقاش بييجي على نفسه بدل ما نلغيها فيه ونحوله لبخيل وخد ده وعممه على كل الصفات.

4- اللوم blaming

شوفت أديك خسرت لما مسمعتش كلامي - ما أنت لو بتمسك عدل مكنتش وقعت منك.

اللوم كثير بيبقى على حاجات معلمناش ولادنا ازاي يعملوها أصلا فبدل ما ألومه ممكن أحلل معاه اللي حصل وأساعده في اللي جي إنه ميعيدش نفس الغلطة.

5- النعت labeling

أنت كسول .. أنت غبي .. أنت مبتفهمش وغيرها من الصفات اللي مع تكرارها بتتحول لقناعة عند ولادنا بيتعاملوا بيها فتطلع نفس النتيجة فتتأكد قناعتهم أكتر وتلزق الصفة فيهم.

بدل ما نلزق عليهم صفات سيئة تعالوا نساعدهم يتغلبوا عليها بالتشجيع والتعليم والمساعدة

6- التوقعات expectations

يا أما بنحط توقعات مش مناسبة لإمكانيات ولادنا أو بنتوقع حاجات من غير ما نستعدلها
شير وانفع غيرك ومتنسناش في الدعاء 👍

💀التعبيرررررر💀
ركز واسمع الموضوع سهل 💯💯
مبدئيا حطي في دماغك إن ابنك مش نجيب محفوظ ولا بنتك عائشة عبد الرحمن☺.
ده طفل بيتعلم
هو يعني ايه تعبير ؟؟
تعبير ببساطة يعني بتعبر عن أفكار ومعلومات في دماغك عن موضوع معين .😎
خد بالك التعبير مبيتحفظش ولا بيتسمع وده أكبر غلط انك تحفظي ابنك او بنتك موضوع للتعبير انت بتقتل قدرته علي التفكير والابداع
المهههههههم
هنكتب ازاي موضوع التعبير ؟؟؟
مبدئيا اي حاجة تصلح انها تكون موضوع تعبير طب نجرب كده...
هاتي الولد او البنت ادامك وقوليله هنعمل موضوع تعبير عن القلم مثلاااا
أساليه القلم ده شكله ايه
هيجاوبك لونه كذا طويل تخين المهم هيوصفهولك
أساليه القلم ده بنستخدمه في أيه
هيقولك في كتابة كذا وكذا وكذا
أساليه لو معاك قلم تحب تكتب بيه عن أيه
وهكذااااااا
بعد ما تخلصي الحوار والمناقشة دى
هتقوليله اكتب بقي اللي أنت قولته بس كل إجابة في فقرة لوحدها
هتلاقي إجابته دي كونت موضوع تعبير عن القلم 😉👌💪
هكذا في أي موضوع احنا هنرتبله أفكاره وهو مرة في مرة هتلاقيه لوحده بقي بيفكر ويحدد عناصر يتكلم بيها عن أي موضوع ومع التدريب الموضوع هيبقي سهل عليه
طيب لو موضوع معندوش عنه معلومات عادي جدااا خليه يبحث بنفسه ويقرأ في كتاب أو الانترنت وبعدها يعبر بأسلوبه عن الموضوع
علي فكرة التعبير ده حاجة مفيدة جداا للطفل بس نعلمه صح .
بيتعلم ازاي يعبر عن أفكاره بطريقة صحيحة .
يبقي الخلاصة موضوع التعبير
مقدمة
عناصر (بنستخلصها من المناقشة )
خاتمة
المقدمة والخاتمة هنتكلم عنها في بوست تاني 👌
لو عايز تفيد غيرك اعمل شير من الصفحة وبلاش كوبي وبيست ودوس👍 ده مجهود ناس وفي رقبتك.😇💯💯
أ/حسام الغنام

عرفنا البوست اللي فات اقسام الكلمة👌
دلوقتي هنتكلم عن الجملة
اي جملة لازم يكون لها [معني]
يعني مش اي كلمتين جنب بعض تبقي جملة .
طب ايه انواع الجملة ؟؟؟؟
١...الجملة الاسمية : وهي اللي بتبدأ باسم أو ضمير زي
(النحو سهل )_(التلميذ ذكي) _
(هو سعيد)_(نحن مجتهدون)
طب ايه اركانها ؟
الجملة الاسمية بتتكون من ركنين اساسين ✌ هما
المبتدأ والخبر
المبتدأ ده الاسم اللي يتبدأ بيه الجملة
الخبر ده هو اللي بيتتم معني الجملة يعني بيقولي خبر عن المبتدأ
مثلااااا
المعلم ماهر
المعلم هنا هو المبتدأ لأنه الاسم اللي بدأت بيه الجملة او هو الموضوع اللي بنتكلم عنه
ماهر بقي هي الخبر لانها كملت المعني وقلتلي خبر عن المبتدأ
يعني بساطة انا عرفت ان المعلم ده ماهر
ملحوظة الخبر ليس له مكان ثابت في الجملة يعني بحدده من معني الجملة
مثلااااا
(الناس الذين يقرأون البوست محترمون)😍
الخبر هنا كلمة محترمون لان ده الخبر اللي انا عرفته عن الناس (المبتدأ)
ولو حذفت محترمون من الكلمة تحس ان معني الجملة ناقص.
اااااخر حاجة الاعرااااب
المبتدأ والخبر دائما مرفوعان
يعني مثلااااا (المعلم ماهر )☺
المعلم :مبتدأ مرفوع وعلامة رفعه الضمة
ماهر:خبر مرفوع وعلامة رفعه الضمة
طبعا في علامات اعراب اخري غير الضمة هنبقي نتكلم عنها بعدين
ان شاء الله البوست الجاي هنتكلم عن النوع التاني من الجملة (الجملة الفعلية)
يااارب يكون الموضوع سهل ونكون استفدنا
اي استفسار أسال أستشير متتحرجش
بالتوفيق للجميع مستر حسام الغنام

نقول بسم الله
الموضوع سهل وبسيط ومش معقد زي ما انت متخيل✌ لو ابنك او بنتك او انت شخصيا ضعيف في النحو متقلقش هنبدأ خطوة خطوة من اول درس لغاية ما تبقي شطور 😀👍
ركز وكله هيبقي تمام ولو عندك اي استفسار متتحرجش أسال عادي💪
أي لغة عبارة عن حروف والحروف بتكون كلمات وأول حاجة عشان تفهم لازم تعرف نوع الكلمة
الكلمة في اللغة العربية ثلاث اقسام
اسم وفعل وحرف
١_الاسم : ببساطة كلمة من غير زمن وبتدل علي شئ معين. مثلااا
كلمة📖( كتاب) هي اسم الشئ اللي في صفحات وغلاف وفي نفس الوقت بدون زمن معين .
٢_الفعل : حدث+زمن
يعني بيدل علي شئ بيحصل وليه زمن محدد . مثلااا
(يأكل) 🍕كلمة بتدل علي حدث الجري وليها زمن
يعني لو سألت نفسك متي يأكل؟ هتجاوب يأكل الان دلوقتي يعني ....فاهمين ؟😀😀
طب انواع الفعل
# ماض يعني خلاص حصل (سمع ) .
# مضارع يعني بيحصل في الحاضر (يسمع، تسمع.....)
# أمر بيفيد الطلب (اسمع).
٣_الحرف : الحرف ليس له معني الا مع غيره .
يعني ...في لوحدها ليس لها معني لكن لو قولنا
(القلم في الحقيبة ) بقي ليها معني ان القلم داخل الحقيبة .
اشهر الحروف هي طبعا حروف الجر
(في ، إلي ، من ، علي ، عن ، ب ،ك،ل ) احفظها بالمرة..
وحروف العطف (و ،أو، ثم ، ف ).
ملحوظة أخيرة لو مش عارف تفرق الاسم من الفعل ضيف (ال) لو الكلمة لم تتأثر تبقي اسم ...شجرة الشجرة 👍
لو تغير معنهاها او اصبحت غير مفهومة تبقي فعل ..يلعب اليلعب 👎
⏳طبعا يا جماعه ده اختصار للشرح وفي معلومات تانية كتير بس انا تعبت وانتوا بتصيفوا فاختصرت الموضوع علي أد ما قدرت بالتوفيق للجميع
مستر حسام

طبعا اللغة العربية مادة أساسية مقررة علي كل الصفوف احنا عاملين الصفحة دي ببساطة عشان نحل أكبر مشكلتين بيقبلوا التلاميذ في اللغة العربية في المرحلة الابتدائية والإعدادية وهما النحو والتعبير ودول اللي هنركز عليهم في الاجازة الصيفية ان شاء الله .
وطبعا في مشكلة تانية وخاصة في المرحلة الابتدائية وهي ضعف القراءة والكتابة وهنعمل اللي علينا ونساعد الجميع إن شاء الله .
طيب هنعمل ايه .... هنزل كل فترة درس نحو بالشرح المفصل وكمان أسس كتابة موضوع التعبير .
وبالنسبة لضعاف القراءة والكتابة هنعمل منشورات خاصة بالخطوات الاساسية لتعليم الطفل . 👍💪💚
بالتوفيق للجميع مستر / حسام