19/01/2024
أعجبتي أسلوب هذا الرجل في التربية حين قال:
فريدة بنتي (اولى ابتدائي) عندها امتحان النهاردة، اللي هو امتحان داخلي في المدرسة (عشان المدققين في التفاصيل بزيادة 😂😂) ولما روحت امبارح لقيتها مطفية وقاعدة شكلها عجيب.
يادوب بسألها مالك؟ اتفتحت في العياط.
بتقول إنها ناسية المنهج كله وأكيد مش هتعرف تحل في الامتحان… ودار بيننا الحوار الآتي:
انا: فهميني ليه بتعيطي.
فريدة: عشان ناسية كل حاجة ذاكرتها
انا: ولو ناسية ايه هيحصل؟
فريدة: اكيد مش هعرف احل، وهجيب درجة وحشة وحضرتك هتزعل.
انا: طيب انتي بقى ذاكرتي كويس بجد ولا لأ؟؟
فريدة: آه والله يا بابي ذاكرت كتير.
انا: يبقى نتفق، مادام انتي مذاكرة كويس يبقى الدرجة متهمنيش
انتي بتذاكري عشان تتعلمي وبس، النتيجة دي بتاعة ربنا.
انا هزعل لو لقيتك مش مذاكرة حتى لو جبتي درجة كويسة او لقيتك بتغشي في الامتحان.
ودلوقتي انتي ناسية عشان خايفة وقلقانة، خليكي في حضني شوية ونامي وبكرة لما تروحي المدرسة اكتبي اللي تفتكريه وخلاص… انا مبسوط منك عشان ذاكرتي.
وهي هديت واطمنت وصحيت من شوية نفسيتها زي الفل وفاكرة كل حاجة.
التحليل:
✅ اربط ابنك بالسعي مش بالنتيجة، علمه يرضي ضميره، لكن لما تحطه تحت ضغط النتايج هتطلعه غشاش ومتلاعب وطماع، لأنه هيدرك إن القيمة في النتيجة وبالتالي هيدور عليها بأي طريقة صح أو غلط.
✅ ابنك لما يتوتر طمنه، خفف الضغط مش تزوده.
✅ خلي ابنك دايماً يدرك إن حبك له أعلى وأهم من أي نتايج مرحلية، متخليش حبك له محل شك، عشان لما يكبر ميدورش على الحب دة في المكان الغلط.
ركز مع ولادك، ببساطة:
👨👧👨👧انت مش مجبر تخلف، بس لو خلفت… انت مجبر تربي 👨👧👨👧
#منقول
