Yassin Saad - German Trainer

من زمان مشيرتش ستوريز ناجحة بس دي مختلفة شويه وحابب أشاركها معاك لعلها تشجعك تكمل ألماني ولو مبدأتش تبدأ..

روان طالبة شاطرة جدًا من أول يوم دخلت فيه الأكاديمي عندي Linguaviva-Akademie
خلصت ليڤيل Offline وبعدها كملت أونلاين وبعدها دخلت كورس محادثة ودا أنا مسميه (ثلاثي خط النار) لأن البلان الصح دايمًا من وجهة نظري إن الطالب يخلص الليڤيل ويشيك عليه بكورس محادثة

دايمًا كانت مستعجله ع الشغل وكل شويه تقدم ف شركة واتنين والغريب إنها مكانتش بتيأس أبدًا وإمبارح فرحتني وجاي إنهارده أفرحها وأشارك فرحتها معاك هنا

روان إتقبلت الحمد لله ورايحه تمضي العقد خلاص ورحلة التعلم جت بنتيجة مرضية وحياتها هتتغير مليون درجة ♥️

دايمًا نتيجة السعي بتكون مرضية لو ليك هدف واضح وبالمناسبة روان لسه طالبك بتدرس وجنب دراستها كانت بتطور لغتها

الدور عليك ربنا يوفقك ♥️

مهنة التدريس دي جميلة حقيقي

معتقدش حد مش هيحبها لما يشوف فرحة الناس وهي بتوصل أو بيدعولك ودايمًا فاكرينك وبياخدوا نصايحك 🤍

بالإضافة لدا مهنة ال Hr أجمل بما فيها من كم مساعدات مرعبة لكل الأعمار من ١٨ ل ٦٣ سنة والله

ربنا كريم إنه حطني في المجالين سواء تدريس اللغة أو التوظيف وبحمد ربنا عليهم كل يوم لكم الدعوات اللي بتجيلي ورسايل الفرحة اللي بقرأها

الحمد لله

هير ياسين لو سمحت آخد كورس ألماني فين؟

=

أول هدايا العيد 🎁

نهاية المسابقة بكرة ١٠ ص 🫶🏻

عارف إيه وجه الشبه بين شهرزاد وبينك لما تدخل الـ Vorstellungsgespräch؟

هي كانت بتحكي حكاوي بس ليها هدف وعارفة توصل الفكرة بالطريقة اللي تخلي شهريار يسمعها للآخر، لكن أنت بتحكي كتير مع الـ HR من غير ما تعرف توصل له فكرة إنك أنسب شخص للوظيفة دي وإنك فاهم ومش حافظ.

بس الهدية من Linguaviva Akademie هتحل ليك المشاكل كلها اللي بتقابلك في الـ Vorstellungsgespräch، لو كنت صاحب النصيب إنك تكسب Session 1.1 مع Herr Yassin Saad.

Geschäftsinhaber لـ Linguaviva Akademie und HR bei Enpal Ägypten.

هتدخل معاه Session 1.1 زي الـ Vorstellungsgespräch بالظبط، وهتاخد Feedbackمفصل عن مستواك، وإيه نقاط ضعفك، وإزاي تشتغل على تحسينها.

كل دا هيكون هدية بمناسبة عيد الأضحى.

3 طلاب فقط هيكسبوا فرصة الـ Session 1.1، والاختيار هيكون من الـ Comments أوالتفاعل على الـ Post ف خليك حريص انك تتفاعل ع البوست وتسيب كومنت.

آخر موعد للمشاركة: بكرة الساعة 10 صباحًا.

مفتاح إنهارده 🔑

رحلة الـ 600 كلمة (الزتونة)

في دراسة بتقول إن 90% من الكلام اليومي في ألمانيا بيتم باستخدام حوالي 600 لـ 1000 كلمة بس. أنت متخيل؟ يعني أنت مش محتاج القاموس كله عشان "تسلك".

المشكلة مش في عدد الكلمات، المشكلة في "تصريف" الكلمات دي. كلمة واحدة زي "Stellen" ممكن يطلع منها (Aufstellen, Vorstellen, Bestellen, Einstellen) وكل واحدة في حتة تانية خالص!

ف سهلها ع نفسك وبدل ما تحفظ 100 كلمة جديدة كل يوم، خد كلمة واحدة وشوف الـ Prefixes بتاعتها بتغير معناها إزاي.

دي الطريقة اللي بتخلي دماغك "Matrix" ألماني.

قولولي، إيه أكتر فعل ألماني بتحسوا إنه "جوكر" وبيدخل في كل حاجة؟

وبلاش تقولي Machen 🤌🏻😂

Lg
Yassin Saad

مفتاح إنهارده 🔑

عقدة الـ "Vergangenheit" (الماضي مش واحد)

ليه عندنا Präteritum و Perfekt؟
وليه المدرسين بيصدعونا بيهم؟

بص يا حبيبي، لو بتكتب إيميل رسمي أو بتقرأ رواية، هتلاقي الـ Präteritum (زي Ich war, Ich hatte) منتشر.

لكن لو واقف في الشارع بتشتري "Döner" وبتحكي لصاحبك عملت إيه امبارح، استخدم الـ Perfekt وأنت مغمض (Ich habe gegessen).

أغلب الطلبة بيغلطوا غلطة "عمرهم" إنهم يحاولوا يتكلموا بالـ Präteritum في المحادثات العادية، بيبان شكلهم زي اللي بيتكلم "لغة عربية فصحى" في وسط وسط البلد. خف على نفسك، احفظ الـ Perfekt للمحاورة، والـ Präteritum خليه "للوجاهة" في الكتابة بس.

واللي يقولك ليه قوله "هذا ما وجدنا عليه آبائنا"

Lg
Yassin Saad

مفتاح إنهارده 🔑

اللي عاش ف ألمانيا أو إتعامل مع ألمان دايركت هيعرف إنهم "دوغري" زيادة عن اللزوم

لو سألت ألماني "تفتكر ممكن نبدأ الاجتماع كمان 5 دقايق؟" هيقولك "Nein" ببساطة 🤏🏼

بس إحنا كمصريين بنحسها "قفشة" أو قلة ذوق، بس الحقيقة دي "Directness". في اللغة الألمانية، جملة "Ich finde das nicht gut" مش شتيمة، دي صراحة بتوفر وقت.

عشان كدة وأنت بتتعلم، اتعلم الـ Cultural logic. الألماني بيحب الجملة القصيرة الواضحة اللي بتوصل المعنى. بطل لف ودوران واستخدام "Inshallah" و "عسى ولعل" في الترجمة.

لو عايز حاجة قول "Ich brauche..."، لو مش عاجبك حاجة قول "Das passt mir nicht". اتعلم لغة الشارع عشان تعيش وسطهم صح.

Lg
Yassin Saad

مفتاح إنهارده 🔑

"القاموس العربي هو الحل" (كلام فارغ)

أول ما بتقف قدامك كلمة بتروح تجري على Google Translate؟ مبروك، أنت بتقتل لغتك بالبطيء. القاموس (عربي-ألماني) ده للمبتدئين بس.

لو وصلت B1 ولسه بتستخدمه، فإنت بتفكر بالعربي وبترجم للألماني، وده بيطلع جمل "مشوهة".
الحل؟ ابدأ استخدم قاموس (ألماني-ألماني) زي Duden أو Langenscheidt.

ليه؟

عشان لما تدور على معنى كلمة هيشرحهالك بكلمات ألماني تانية بسيطة، فودنك تتعود على مرادفات أكتر وتفهم الكلمة في سياقها (Kontext).

أنت مش محتاج تعرف إن "Tisch" يعني ترابيزة، أنت محتاج تعرف إنها "Möbelstück zum Essen oder Arbeiten". ده اللي بيخليك "محترف".

Lg
Yassin Saad

سلام عليكم

بيجيلي أسئلة كتيرة في شكل "مشاكل لغوية" وبالفعل بدأت أحلها في جروب عملته على واتساب لكنه إكتمل ومش كل الناس بتوصلها المعلومات اللي بنزلها لذلك جتلي فكرة 💡

عشان أقدر أوصل المعلومات دي لأكبر عدد من الناس قررت أقدملك سلسلة مختصرة مفيدة عبارة عن "مفاتيح للمشاكل دي" هنا على البيدچ

السلسلة هتتقدملك في شكل بوستات ومش مطلوب منك غير إنك تشاركها

يجيلي سؤال وهو هل المحتوى هنا هو هو اللي هينزل على واتساب؟

الحقيقة لأ لكن اللغة كلها ماشيه في سياق واحد بإختلاف الترتيب مش أكتر وفي كل الأحوال هتستفيد إن شاءالله

هنبدأ ب "مفتاح إنهارده"

وهم الـ "Perfect Accent"

بشوف ناس حابسة نفسها في ليفل الـ A2 بقالها سنة لمجرد إنها خايفة تطلع "R" مش زي الألمان، أو خايفة من نطق الـ "ch".

بص يا حبيبي، ألمانيا فيها 16 ولاية، وكل ولاية فيها لهجة (Dialekt) تخليك تشك إنهم بيتكلموا ألماني أصلاً! الباڤاري غير بتاع برلين غير بتاع ساكسونيا.

الألماني مش محتاج منك تبقى "نسخة" من المذيع في قناة الـ DW، هو محتاج يفهمك.

لو نطقك "نضيف" ومخارج حروفك واضحة، ده كافي جداً. السرعة واللكنة بيجوا بالتعود مش بالضغط النفسي.

فكها واتكلم، "الخواجة" نفسه هيفرح إنك بتحاول تتكلم لغته الصعبة دي!

طيب إزاي أطور الأكسنت بتاعتي بقدر الإمكان خلال دراستي للغة؟

1. ركز على السمع من مصادر أصلية زي بودكاست أو فيديوهات أو قنوات تعليمية أو حتى مسلسلات ألماني. حاول تقلّد النطق مش بس تفهم اللي بتسمعه ✍🏻

2. الـ Shadowing
شغّل جملة بالألماني وكررها ورا المتكلم كأنك “ظلّه”. ده بيساعدك تاخد الإيقاع والنبرة الصح، مش مجرد الحروف.

3. ركّز على الأصوات الصعبة (المقاطع الصوتية)
في الألماني فيه أصوات مش موجودة في العربي زي:

* ch (زي “ich” و “ach”)
* r (بتتنطق من الحلق مش زي العربي)
* ü / ö
دول محتاجين تدريب مخصوص قدام المراية

4. سجل صوتك
سجّل نفسك وانت بتقرأ أو بتتكلم، وبعدين قارن نطقك مع متحدث أصلي. هتلاحظ الفرق بسرعة.

5. اقرأ بصوت عالي يوميًا
حتى لو 10 دقايق بس. ده بيعوّد لسانك على مخارج الحروف.

6. استخدم أدوات تساعدك
تطبيقات زي:

* Duolingo
* Babbel

7. لو تقد تتكلم مع native speakers تبقى جبت جول وإختصرت وقت طويل ودا كنت بعمله وأكتر حاجة ساعدتني ✍🏻

لو تعرف مصادر تساعد زميلك سيبها ف الكومنتات ولو عندك سؤال سيبه وهرد عليك

Lg
Yassin Saad