04/09/2022
مش هيكون إجازة للمدارس زي ما الناس فاهمة.. ولا هيكون موحد في كل المدارس في نفس اليوم.. ولا هيكون موحد لنفس الصفوف بالمدرسة في نفس اليوم.. ده هيكون كده يوم ترفيهي - لا دروس - ولا حصص - ولا فصول.. هيبقى يوم رياضي الأسبوع ده.. يوم ثقافي الأسبوع اللي بعده.. الطلبة تلعب كورة تلعب سلة تبع طايرة يدخلوا المكتبة يطلعوا من البيت الصبح على مركز الشباب والمدرسين يروحوا لهم على هناك.. هيكون فيه جدول في كل مدرسة لكل صف، متحدد في الجدول ده اليوم الرياضي أو الفني أو التثقيفي ده هيكون امتى وفين.. اليوم ده معمول علشان الطالب يفصل شوية.. علشان لو فيه موهبة فنية رياضية ثقافية.. يعني هيتعمل مسابقات رياضية بين المدارس، ويجيبوا فرق تحكيم، ووزارة الشباب والرياضة هتجيب ناس من عندها تكتشف مواهب رياضية وهكذا.. هتقولى طب والمنهج والحصص والمدرسين هيضغطوا الجدول، هقولك ده بيترتب دي الوقت وبيتحط خريطة للمنهج والجدول معمول فيها حساب اليوم الرياضي ده.. سيبوا الطلبة تفصل شوية.. وبعدين مهي أي مدرسة حضرتك نفسك تدخل ابنك فيها، بتعمل يوم زي ده ويكاد يكون اليوم اللي الطالب مستحيل يغيب فيه عن المدرسة.. آه لازم تعليم، بس لازم شوية الطالب ياخد نفسه ويشوف نفسه.. ما انت عندك متفوقين تعليميا ورياضيا في نفس الوقت.. هونوا على نفسكم وعلى ولادكم، التعليم مش حرب ولا معركة.. التعليم عمره ما كان لا بالضغط والترهيب.
