حضانة ماي كيدز

ده لينك صفحه حضانه ماي كيدز الصفحه الرئيسيه لو عايزين تتابعو اي حاجه عن الحضانه وعن يوميتها ادخلو https://www.facebook.com/mykids.11/ اللينك واعملو لايك للصفحه ..مستنينكو 😌😉😉💙

حضانه ماي كيدز "My Kids"
في ماي كيدز طفلك دايما مميز

مش معنى اننا نعرف أكتر من الأطفال، اننا نتجاهل آراءهم دايمًا؛ لأن دا بيضعف شخصيتهم.
ومن المفيد اننا نتفهم ونتقبل اعتراضات الأطفال أحيانًا، لأن دا بيساعد على بناء شخصيتهم وتعزيز الإستقلالية؛ وخصوصًا في مواقف زي دي...

1- "لأ" أنا مش جعان
قد ايه كنا بنتضايق واحنا صغيرين لما حد يجبرنا ناكل في وقت محدد أو نخلص الطبق لآخره، واحنا أصلا مش جعانين؛ وانهارده بنكرر نفس الموضوع مع أطفالنا.
لو سبناهم ياكلوا لما يجوعوا، وبالقدر اللى هما محتاجينله، هيزداد وعيهم تجاه أجسادهم وهيبقوا أقدر على فهم احتياجاتهم.

2- "لأ" مش محتاج مساعدة أثناء الأكل
من الطبيعي اننا نقطع لأطفالنا الأكل قطع صغيرة ونسيبه لما يبرد علشان يقدروا ياكلوه، لكن في وقت معين هيبقى الطفل عايز يقوم بالمهمة دي بنفسه وحاسس انه يقدر؛ الطبيعي هوا اننا نساعدهم ونشجعهم علشان ننمي عندهم الشعور بالاستقلالية.
لأننا لو أصرينا على انهم مش هيقدروا واننا لازم نساعدهم؛ هييجي اليوم اللي تلاقي طفل عنده 8 سنين بينادي على أمه علشان تقطعله حتة اللحمة لأنها كبيرة، ودا بالتأكيد مش شئ إيجابي.

3- "لأ" انا اقدر ألبس هدومي بنفسي
ونفس الشيء ينطبق على موضوع اللبس المزعج، الطفل في البداية مبيكونش قادر ولا عايز يلبس لوحده، لكن لما يعبر عن رغبته في انه يلبس لوحده؛ ساعتها المفروض اننا نستغل الفرصة ونسيبه يحاول، ومنتدخلش إلا بعد ما يعمل كل اللي يقدر عليه، ولو احتاج لمساعدتنا، هنساعده بالقدر اللي هوا محتاجه وبس.
تشجيع الطفل على انجاز احتياجاته الشخصية بنفسه مهم جدًا وبيساعد الطفل في انه يحس باستقلاليته ويبقى شخص مسؤول مستقبلًا، مش شخص حاسس بالعجز ومنتظر المساعدة دائمًا.

4- "لأ" بطل زغزغة
احيانا بيكون الفرق بسيط بين المتعة، والألم.
لما تيجي تلعب مع الطفل وتزغزغه، حاول تركز كويس هوا بيضحك ولا مضايق. وهل وصل للنقطة اللي بيطالبك فيها انك توقف؟ ساعتها المفروض توقف فورًا؛ ودا هيعلم الطفل الثقة وعدم تجاوز حدود الآخرين.

5- "لأ" بلاش أحضان دلوقتي
الأحضان والقُبلات واللعب البدني بشكل عام، أحيانًا الطفل بيكون مش حابب الموضوع دا، والمفروض منضغطش عليه، وافتكر دايمًا انه مش من الطبيعي ان انسان يتحضن أو يتباس طول الوقت؛ الموضوع أحيانًا بيكون سخيف فعلًا.
فلما الطفل يرفض يديلنا حضن أو قُبلة يا ريت ناخد الموضوع على محمل الجد من غير ما نزعل.

6- "لأ" مش عايز أجرب
"ياه بص، انت دلوقتى كبرت وممكن تركب لعبة قطر الموت"
كويس، بس لو الابن مش عايز، منغصبش عليه، ونفس الكلام ينطبق على لعب الكرة، وتعلم ركوب الخيل وحاجات تانية كتير.
مش المفروض اننا نجبرهم على تجربة شئ هما مش عايزينه؛ هييجي الوقت ويجربوا بنفسهم، ودا هيكون ممتع أكتر بالنسبالهم.

7- "لأ" أنا خايف من ده
لا تتعامل مع مخاوف الأطفال على انها مش مهمة، أو سخيفة.
لما نعرف ان في حاجة بتخوف الطفل، نتعامل مع الموضوع بجدية ونتناقش معاه ومنسخرش منه، وبلاش نضغط عليه بالمقارنات "صحابك كلهم مش خايفين" لأن دا ممكن يعقد الموضوع أكتر.

- - - - - - - - - - - - - - - - - - -
المقال مترجم من الألمانية وتمت صياغته بشكل مبسط
ترجمة/ أ. مجدي رمضان
Magdy Ramadan Sayed
- - - - - - - - - - - - - - - - - - -
رابط المقال الأصلي

https://goo.gl/gfiCDz