18/10/2022
اغلب الناس بيحصل عندها خلط ولبس ما بين التعليم والتهيئة واللعب
فبيظنوا اني لما اقول ان بدايات تعليم القراءة عند ست سنوات معناها انى ابعد عن الطفل الكتب والصور واى حاجة فيها كلمات لحد ما يتم ست سنوات
ودا مش صح
عشان كده لازم نفهم الاول الفرق بين الكلمات التلاته (اللعب، التهيئة، التعلم) عشان ميحصلش لخبطه
اللعب : هو نشاط حر بيمارسه الطفل بكامل رغبته وملوش اى هدف بالنسبة له الا المتعة
الطفل بيشد كتاب من اخوه وبيمسكه يقلب فيه يتفرج على الصور والكلمات
بيشوف بابا بيقرا في مصحف بيشده منه ويقلده ويفتح المصحف ويبص فيه ويطلع اصوات شبه اللي بيقولها بابا وهو بيقرا في المصحف
لما بيمسك كتاب ويقول لماما اقريلي حدوته
كل دا لعب ، نشاط بيمارسه برغبته والهدف منه المتعة
واحنا لما بنضحك وبنشجعه وبنشاركه في لعبه ، بندعمه
فبيبتدي يفهم ان الكتاب ده شيء مهم وانه فيه رموز واشكال لما بيشوفها بابا بيطلع اصوات والاصوات دي مهمه، وان الكتاب اللي بتقراله منه ماما الحدوته فيه رموز واشكال بيسموها كلام ليها علاقة بالحدوته والصور
ودا بيتأكد عنده لما بيشوف اخواته الكبار اللي بيذاكروا وبيحاول يقلدهم
دي اول مرحلة في تعرف الطفل على اللغة المكتوبة اللي هي حروف وكلمات
وبتتم بشكل تلقائي وعن طريق اللعب، وثبت فعليا ان البيوت اللي بتهتم بالكتب والقراءة المستمرة من الكبار بيطلع اطفالهم مهتمين بالقراءة وشطار في المدرسة اذا تم تعليمهم بطريقة صحيحة وفي سنهم المناسب ومكنش عندهم مشاكل صحيه او نفسية
ندخل على التهيئة ودي بردوا ليها سن مناسب ليها :
ودي مجموعة انشطة والعاب موجهة ومقصودة بنقدمها للطفل عشان نعمله تهيئة لاكتساب مهارة لسه هييجي وقتها ونعلمهاله
وافضل سن للبدء بتهيئة الطفل لتعلم القراءة هي بعد اربع سنوات( تهيئة مش تعليم)
وكلامي عن الطفل الطبيعي العادي اللي مستواه متوسط
ودي بنقول عليها مرحلة الروضة والمرح واللعب واللي مع الاسف انقلبت بقدرة قادر لمرحلة تعليم وتدريس مناهج مش تهيئة ابدا، وسلب الطفل حقه في اللعب والحياة الطبيعية المناسبة لسنه
مرحلة الروضة هي مرحلة تهيئة الطفل للانتقال بسلام من مرحلة عدم النظام والفوضى والتمركز حول الذات (الانانية)
الى مرحلة النظام واتباع القواعد والانشطة الجماعية والاختلاط بالمجتمع والاستعداد لتقبل التعليم والدراسه بعد كده
لكن كل دا مع الاسف حولوه لدروس وواجبات وطحن للطفل في حاجات المفروض ميبتديش يتعلمها الا في اولى ابتدائي
التهيئة مش تعليم ممنهج والزامي للطفل ،، لا خالص
لكنها بتبقى انشطة ممتعة بتخلى الطفل سعيد وفرحان وهو بيعملها
واذا معملهاش او رفض او امتنع عن تنفيذ النشاط او معملش الواجبات او متجاوبش مع المعلمة او محفظش ، او حتى مدخلش الروضة خالص ولا خد الانشطه دي فهو لا يطالب بيها وليست الزامية له ولا يحاسب عليها بأي شكل من الاشكال ومنبصلوش و كأنه طفل متخلف عقليا ومبيعرفش وهيفشل في حياته زي ما بيحصل دلوقتى في كل المدارس، انهم بيقولوا للأم ابنك عنده تشتت انتباه ولا كهربا ولا فرط حركه دا غلط جدا
لأن الناس بقى عندها خلط فظيع بين التهيئة والانشطة والالعاب وبين التعليم الموجه المنظم الممنهج الالزامي
والتعليم المنظم الممنهج مبنبتديهوش بأي حال من الاحوال قبل ست سنوات، وبنبتدي فيه من اول تعليم الحروف والكلمات من البداية خالص
مش زي الافترا اللي بيحصل في المدارس دلوقتى جمل كاملة واملا ونسخ صفحات من كتب وقراءة عشرين سطر
كل دا غلط ومش في مستوى الطالب العادي المتوسط خالص
والعلماء حددوا سن الست السنوات كسن الطفل المتوسط العادي الطبيعي لبداية تعلم الحروف والقراءة
وهتلاقوا دا في اغلب الدول المحترمة اللي واخده ترتيب في جودة التعليم
نظام الدوله عندهم في التعليم الاكاديمي الالزامي انه بيبتدي من ست سنوات سواء الطفل دخل روضه او مدخلش اى حاجة خالص قبل ابتدائي
هنا يبدأ يبتدي تعليم ممنهج منظم ويلتزم بنظام الصف الدراسي
يبتدي يقرا ويحفظ وياخد واجب ويتحاسب عالتقصير على قد سنه وبالتدريج
لان طبيعة مرحلته العمرية تسمح بكده ووصل لدرجة من النضج تخليه فاهم وواعي وبيحب الدراسة وشغوف بالتعلم وبيندمج اجتماعيا بسهولة مع اللي في سنه وبيستجيب للمعلم وفاهم النظام
ليه مهم جدا نفهم الفرق بين المراحل دي والمفاهيم؟؟
ليه لازم نعرف الفرق بين اللعب والتهيئة والتعليم؟؟
عشان منعاملش الطفل اكبر من سنه ونشيله فوق طاقته واستيعابه
بسمع من امهات كلام زي
ابنى سنه سنه اعلمه ايه؟؟ ابنى سنه تلات سنين مقضيها لعب ومبيستفيدش بوقته!!
ابنى اربع سنين مش بيعرف يميز بين الحروف ومش راضي يعمل الواجب!!
كده بقى نقول الصح ايه:
قبل اربع سنين مرحلة لعب
لعب لعب لعب، يعنى متعة ، يعنى نشاط بيقوم بيه الطفل برغبته الحرة بهدف المتعه بس
متجيش الام في مرحلة اللعب تتكلم عن تعليم واستفادة
لان كده كده الطفل بيتعلم وهو بيلعب
بيقلد بابا وماما واخواته وبيكتسب من تقليدهم كل المهارات اللي محتاجلها
واحنا بندعمه بأننا بنحط قدامه العاب وعرايس ومكعبات وبنكلمه ونغنيله ونخرجه نفسحه وبيلعب في الحديقة والنادي
لوسمع قرأن وردده يبقى حلو اوى، لو لاقيتيه حفظ لوحده اغنيه الحروف من قناة اطفال براحته ، هو كده بيلعب برغبته وسعيد ومبسوط
هو دا المطلوب في المرحلة دي، ومش مطلوب ولا فرض من الطفل انه يحفظ ولا يتعلم تعليم مقصود خالص،
مش مطلوب منه يحفظ شكل حيوان الباندا والكوالا ولا يعرف الخفاش بيولد ولا بيبيض ولا الحوت بيتنفس تحت المية برئتين ولا مطلوب منه يعد من واحد لعشره عربي وانجليزي عشان يجتاز اختبار المدرسه الانترناشيونال
مش مطلوب منه اى حاجة خااااالص
كل ده كلام فارغ ومدارس مش بتراعي الاطفال ولا فاهمين مراحلهم العمرية
بعد اربع سنين ندخل على سن الروضة والتهيئة
التهيئة عبارة عن انشطة والعاب موجههة وليها هدف بتحضرها المعلمة
زي الانشطة اللي بتتعمل على الحروف كده، ترسم عالرمل او ورق الصنفره
تلون حرف ، تغنى اغنيه الحروف والاطفال يرددوا وراها حفظ كام حرف ورددهم حلو اوى وزي الفل لو محفظش بعد شهر يحفظ
مفيش الزام للطفل، لو تجاوب مع المعلمه تمام ، لو متجاوبش نصبر عليه شهر شهرين، في التهيئة الطفل مببيتحاسبش على انه محفظش ولا بيعمل واجبات
فياريت لما نلاقي طفل اربع سنين رافض يقعد في الفصل ومش فاهم الاوامر اللي بيقولها المعلم وعاوز يجري بره الفصل ومش عاوز يدي حاجاته لغيره وبيتنطط وصوته عالي ومش عاوز يسكت وبياكل وسط الحصة ورافض يكتب او يقرأ او يعمل الواجب
ياريت نفهم ان دي طبيعة سنه ومنبصلوش على انه عبيط او متدلع او متخلف
او عنده تشتت انتباه او فرط حركه
لان ده اصلا طبيعه سنه كدة ، الحركة واللعب
ولسه قدامه سنتين تهيئة لحد ما يوصل لسن التعليم الالزامي ويقعد في الفصل ويركز مع المدرس
18/10/2022
القراءة للاطفال الرضع
مقاومة المظاهر الكدابة بالعلم الحقيقي
عشان الدوشه اللي عملها السيد زوكربيرج وكتاب الفيزيا الكمية للرضع
ودا بالنسبة للى فاهمين خصائص نمو الاطفال مظاهر كدابة ملهاش علاقة لا بتربية ولا بتعليم
ايه الكتب المناسبة اللي نقراها للطفل الرضيع؟؟
وهو ينفع نقرا للطفل الرضيع كتب؟؟
ايوه طبعا وضروري كمان وبيساعد على ربط الطفل بحب الكتب والقراءة
طيب ممكن ده يعلم الطفل الحروف والكلمات والقراءة؟؟
لا يافندم
الهدف من القراءة للطفل الرضيع مش تعليمه القراءة ولا حتى نموه العقلي في المرحلة دي يقدر يستوعب او يفهم رموز زي الحروف والكلمات
لكن الفكرة هي اننا بنعمل ارتباط بين الطفل بالكتب والكلمات والقراءة عشان يحبها طول العمر
لأن البيت اللي اهله بيحبوا القراءة وبيحترموا الكتب وبيشربوا ولادهم حب الكتب من صغرهم ولادهم بيتعلموا القراءة والكتابة بسهولة جدا أول مبيوصلوا للنضج العقلى المناسب للتعلم
ونحط تحت الجملة دي ١٠٠ خط
لان تعلم الطفل اى مهارة في الدنيا لازم الاول يسبقها نضج كافي في عقله وجسمه وحواسه يساعده انه يقدر يتعلم
القراءة للرضيع بتحببه في الكتاب، وكمان بتقوي العلاقة بينه وبين اللي بيقراله، وبتخليه سعيد ، وبتساعده على فهم البيئة اللي حواليه وبتساعد انه يحس بالامان والثقه في الدنيا اللي حواليه
وممكن كمان تساعد انها تخفف من اسباب التوتر اللي بتسببها الغيرة او بعض المخاوف اللي بتواجه الاطفال وتخفف من القلق والتوتر النفس
طيب ايه الكتب المناسبة للقراءة للرضع؟؟
وهل فيه كتب للرضع بالعربي؟
سؤال مؤلم الصراحة
انا هعرض مواصفات الكتب المناسبة للرضع
وانتوا دوروا عليها في المكتبات وفي معرض الكتاب
هتلاقوا اكيد كتب بالانجليزي والفرنساوى وكل اللغات
بس بالعربي
دوروا في دور النشر والمكتبات الخليجية المشهورة
ابتدوا يهتموا كتير بكتب الاطفال
مهم اوى اوى نقرا للرضع بلغتهم الام عشان تتكون صح وتبقى قوية عنده
مواصفات الكتب اللي نقراها للرضع
لازم تكون مناسبة للمرحلة العمرية اللي بيمر بيها الطفل
مناسبة لنموه العقلي
مناسبة لاحتياجاته النفسية والاجتماعية
عشان نشترى كتاب لطفل رضيع مهم جدا نفهم انه كتاب بدون تفاعل اجتماعي مع ماما وبابا فهو هيتحول للعبة زيها زي الكورة زي عربية زي مكعبات او اي حاجة من لعب الطفل هيحطها في فمه ويشوطها ويحدفها
لكن قيمة الكتاب بالنسبة لطفل رضيع بتكون في قرائتنا الكتاب معاه مش نديهوله عشان يتلهي فيه ونروح نعمل شغلنا!!
دا خطأ كبير
الصح اننا بنقعد مع الطفل الرضيع ونحطه على رجلنا في جلسه مريحة وانا وهو ماسكين الكتاب سوا وانا بحكيله بصوتى ايه اللي في كل صفحة وانا بشاور على الصورة اللي بنطق اسمها وبحكي الحكاية بصوت جميل ومنطولش القراءة اكتر من خمس دقايق عشان الطفل ميزهقش الا لو هو اللي عاوز يكمل
ولو الطفل رفض يقعد او يتجاوب معايا اسيبه فورا ومضغطش عليه
واجمل الكتب هي اللي كلماتها فيها سجع او جمل ينفع تتغنى بصوت الام
او قصه تخلى اللي بيقرا يغير نبرات صوته ويتفاعل مع احداث القصة
حد قرا لطفله اشعار واغاني اطفال قبل كده؟؟ ولا كله مبهور بالفيزيا!!
الالحقيقة ان قراءة شعر الاطفال للطفل بتنمي عنده الحس الفنى وتذوق الجمال دا غير المتعه اللي بيحسها مع السجع والقافيه
طبعا ناس كتير ميهمهاش الكلام ده المهم الطفل يحب العلوم والرياضيات وبس 😕
الطفل قبل ست شهور بتكون لسه عضلات عينيه بتنمو وتنضج ونظره بيتحسن بالتدريج
فبنختارله كتاب صوره تكون كبيره وواضحة والوانها زاهية
وتكون في الصفحة صورة شيء واحد بس، متكونش الصفحة فيها عناصر وحاجات كتير عشان الطفل يقدر يركز
نبعد خالص عن الكتب اللي فيها صور خيالية زي الساحرات والتنانين او بشر بجناحات او ديناصورات او حيوانات بتلبس لبس بنى ادمين او اى صور غير منطقية او بعيده عن مشاهدات الطفل
لان الطفل قبل سنتين بيكون تفكيره حسي والحاجات اللي بيشوفها قدامه هي اللي موجوده، واللي مبيشوفهاش مش موجودة في هذا العالم
فلازم الكتب يبقى فيها صور مألوفه له ومن العالم بتاعه
زي صور أطفال وصور ناس تشبه في هيئتهم ماما وبابا وبيلبسوا زيهم
وكلب وقط لو هو بيشوف الكلاب والقطط وحافظهم وبلاش الحيوانات اللي مبيشوفهاش عالطبيعه زي الاسد والنمر نأجلها شوية
كتاب الطفل الرضيع
من الافضل يكون من مواد متينة مبتتقطعش بسهولة زي القماش والجلد والفوم والبلاستيك عشان اكيد هيتبهدل وكمان هيحطه في بقه
والافضل يكون من مواد بتتغسل ومتروحش الوانها
ودي موجودة في المكتبات الكبيرة زي جرير وكده
بس عيبها انها غالية جدا
فأنا عن نفسي بقضيها مع عيالي كتب وقصص ورق عادية 😄 وبتمشي الحال وتقضي الغرض الحمد لله،
وبتتقطع 😄
وبنجيب غيرها عادي
فيه نوع من الكتب لذيذ جدا ومناسب لسن سنة وما بعدها
بيبقى في الصفحة صورة وجه مثلا وكل حاجة فيه بتتفك والطفل يركبها
يعنى نشيل العين والودان والحواجب والشعر والانف والفم، وبيبقى الوش دايره فاضية
والطفل يمسك كل حاجة منهم ويركبها في مكانها الصحيح
وبردوا اجزاء الجسم زي الايدين والرجلين وكده
النوعية دي من الكتب او الصور بتنمي جدا مهارات الطفل العقلية والحسية والتآذر البصري الحركي وكمان بتعرفه اسماء اجزاء جسمه
بس بسبب غلو سعرها كنا بنعملها على ايدينا بمواد من البيئة
(الكشافة بتقولك اتصرف 😄)
بس بيقطعهم بعد مرة مرتين، يالله بقى الله يرحمهم
كتاب الطفل الرضيع بعد ست او سبع شهور لازم يلبي احتياجات الطفل النفسية والعاطفية والاجتماعية
يعنى ايه؟؟
يعنى كدة زي منقول يبقى على زوقه، وعلى حسب اهتماماته ويبقى ممتع وبيشرح الحاجات اللي تهمه، وبيجاوب عالاسئلة اللي بتحيره
اللي هي ايه اهتماماته دي؟؟
انه يعرف نفسه واجزاء جسمه ويسمع اسمها
وفيه صوره لكتاب زي ده جبتهالكوا
الطفل لسه مبيتكلمش، بس لازم يسمع اسم كل جزء في جسمه ونكرره قدامه كتير واحنا بنشاور على الصوره
لانه بيخزن الكلمات اللي بيسمعها وبيحفظها في الذاكرة
لحد ما ينضج عنده جهاز الكلام زي ما قلت قبل كدة ويقدر يتكلم ويخرج كل الكلمات اللي حفظها
وياسلاااام لو كانت على شكل شعر ولا سجع ونغنيها للطفل واحنا بنسقف
تبقى حاجة هايلة جدا
الطفل كمان محتاج يفهم البيئة اللي حواليه ويتعرف عليها ويحس بالثقة والامان فيها
ودي بتتحقق لما نحكي للطفل حكايات عن طفل زيه وعايش في بيت زيه، وبيعمل نفس اللي بيعمله، ودا هنلاقيه في كتاب زي babys hous ودا صورته موجوده في الصور اللي تحت
الكتاب ده بيعرف الطفل على البيت واسامي كل حاجة فيه واحنا بنحكيله الكتاب بنكرر الكلمات اللي فيه اكتر من مرة
لو لقيتي حاجة شبهه بالعربي يبقى افضل اكيد
لو ملقتيش استعيني بكتاب بلغه تانيه واحكيله انت بالعربي بصوتك
زي ما قلنا اهم شيء يكتسب اللغه الام ونقويها عنده
كمان الطفل محتاج كتاب بيحكي عن الحاجات اللي متعود يعملها كل يوم زي انه بيصحى من النوم ، ياكل، يلعب مع القطة، يتفرج على التليفزيون، يلعب مع بابا وماما
كل دا موجود في قصص موجهه للرضع
وكمان يوم الفسحة اللي بيخرج فيه للحديقة يتمرجح ويتزحلق
او يروح اماكن مألوفة
ودا بنلاقيه في كتاب زي babys day out
كمان الطفل الرضيع على سنة ونص
بيحب كتاب يكلمه عن المواقف الجديدة اللي بتواجهه وممكن تسببله مشكلة او مشاعر جديده عليه
زي مثلا طفل جديد بينضم للعيلة، وازاي يتعامل معاه ويتقبله، او نقل الى بيت جديد، او وجود فرد جديد في العيله زي ضيف هيقعد كام يوم مع العيله
هنلاقي بردوا مثال في الصور
واجمل كتاب فعلا ممكن نقراه مع الطفل
هو البوم صور العيلة
صورته وصورة ماما وبابا وجدو وتيته وعمو وعمتو وخالو وخالتو واولادهم
ومهم جدا نحكي لاطفالنا عن العيله وهمه بيشوفوا الذكريات الجميله والمواقف اللطيفه في الصور وبيعرفوا كل فرد في العيلة بأسماءهم
كم المشاعر اللي بتخرج مع حكاياتنا للطفل عن عيلتنا الكبيرة ويوم فرح بابا وماما
وصور جدو وتيته وهمه شايلينه وبيبوسوه ورحلات النادي والمصيف والحفلات واعياد الميلاد والتجمعات العائلية
دا الكنز اللي هيفضل معاه طووووول العمر ويملا قلبه بالمحبه لكل البشر
لانه بيكتسب حبه للانسانية كلها من مشاعره الاولى نحو عيلته الكبيرة
