Montessori Unschooling Hub

في رأيكم مين أوضح؟
الصورة اللي على اليمين تعليم أكاديمي واللي على اليسار مونتيسوري .. اللي على اليمين صورة أو حتى لو ملصق على الورقة أول لما يحاول يلمسها الطفل ممكن تتخلع (ده لو المعلمة مكهربتوش ههههههه علشان الدرس لا يبوظ) .. إنما اللي على اليسار الحرف مجسم من خشب عالي الجودة والطفل يقدر يمسكه ويتحسسه براحته (علشان ينطبع في ذاكرة الجسد إحدى الحواس اللي بينميها المونتيسوري) .. وتمام كمثال لصوت حرف الهاء هنحط شكل صورة هدية (في الأكاديمي) وعلى اليسار قبل الصورة المجردة هنحط مجسم علبة مغلفة كهدية الطفل يمسكها ويحسها الأول وبعدين نقدمهاله مجردة كصورة.
بس سؤالي بغض النظر عن هنحط إيه جنب الحرف يدل على صوته: مين أوضح؟
إجابتي: اللي على اليمين تشتت وزغللة للعين واللي على الشمال وضوح وأكثر ثباتا في ذهن الطفل

الحمدلله الصفحة رجعت تتفاعل .. شكرا من كل قلبي لدعمكم الجميل .. دمتم أجمل صحبة .. أحبكم في الله

Good morning

Sensorial Activity: Red Rods

Montessori Red Rods There are ten Red Rods, all different sizes, ranging from 10cm to 1m in length. In this presentation, Mia watches how to build the Red Rod stair, from the sh...

تابع البوست السابق
في البوست ده هشرحلكم الاستراتيجيات الموجودة في الصور على موقف كتير مننا بل يمكن كلنا كوالدين بنمر بيه. ابني/بنتي بيرموا كل حاجة م البلكونة أو مغرمين بكب المية والأكل ووووو على الأرض. في الصور الاستراتيجيات كانت:

# بدلا من اغضاب مخ الطابق السفلي اشرك مخ الطابق العلوي:
أقولك على كلمة السر .. حضرتك كماما استحضري مخ الطابق العلوي لديكِ الأول علشان تقدري تستدعي نظيره عند طفلك .. يعني ايه؟ .. أكيد لما هشوف ابني بيرمي الحاجة م البلكونة هغضب واتعصب ولما بنتي كل شوية تكب المية ع الأرض كل شوية هتجنن .. طيب أنا كأم عرفت خلاص انهم بيتعلموا بالتكرار وطبقا لمستويات النمو عرفت انهم بيطوروا مهاراتهم .. يبقى افكر في ده قبل ما رد فعلي الغاضب ينفجر في وشهم. بدل ما أزعق وأقول غلط ومينفعش ممكن أقول لطفلي: ممكن نتكلم وهخليك تعمل اللي بتحبه .. واطلب منه يترك اللي في ايده .. فضل يرمي أقوله لحظة هنعمل حاجة أحلى وأفهمه انها لو حاجة تقيلة مثلا ممكن تقع على عمو اللي ماشي في الشارع تخبطه أو لعبته ممكن يفقدها (وأغير في نبرة صوتي) وأقوله أنا لو حد رمى عليا حاجة هعيط وأعمل اني ببكي فعلا .. ممكن لو هو مصر يرمي أقوله طيب تيجي نرمي ورق .. خفيف ومش هيعمل حاجة لحد ومرة تانية أفهمه نحافظ على نضافة الشارع.

# بدلا من مجرد اعطاء الحل مرن مخ الطابق العلوي:
ممكن أقوله تيجي نلعب لعبة أحلى .. أكيد هينتبه .. تفتكر ايه؟ ونروح عند ايد الكنبة ونقوله: ايه رأيك لو نعمل دي البلكونة وخلي يرمي اللي يعجبه واعملي نفسك مرة بتقع عليكي الحاجة وبتعيطي أو قولي له ايه رأيك أقف أنا في البلكونة وأنت تنزل تشتريلي فاكهة من عند عمو البياع ونشاور عند باب الشقة مثلا هنا البياع .. كنت بلعبها مع ابني وأعمل كأني واقفة في البلكونة وأقوله خلي بالك م العربيات يا يويو وأنت بتعدي الشارع وياخد كام كورة من لعبه في كيس ويرجع وقال اشترى الفاكهة .. كنت أشجعه وأقوله دي أحلى فاكهة علشان من ايديك ونقوم نغسل الكور ويتسلى شوية في المية ونعمل نفسنا بناكلهم .. والله لما كبر ساعات مش دايما هههههههه يقولي ده أحلى أكل علشان من ايديكي.

# بدلا من الأمر والطلب جرب حركه أو اخسره:
ممكن أقوله أنا هعمل كأني أنت وأنت ماما وهرمي من البلكونة (ايد الكنبة 😄) وأنت تجيب الحاجة وأرمي الأشياء على بعد ويروح ويجي لما يتسحل يلم اللي برميه. نقيس على كده حاجات كتير ممكن نحولها للعب بدل دخان الغضب اللي بيعكر صفو البيت كله. وبجد بكده بنبني قنوات تواصل بيننا وبينهم وهم صغيرين علشان يشاركونا هم كمان اللي بيحصلهم برة البيت لما يكبروا.
طيب هل ده بيحصل تلقائي كده وبشكل عفوي كل مرة اننا نسيطر على أعصابنا؟ .. أكيد لاااااااا 😁 .. بالتدريب حبيباتي .. وممكن لو عجبك البوست ده (لا مش هقولك شير) لخصيه في كام جملة واكتبيهم على ورقة حطيها ع التلاجة مثلا تفكرك فتهدي .. مرة تصيب ومرة تصيب برضه ان شاء الله متخيبش 😘😘

بعض الاستراتيجيات الصحيحة للوصول لطفل المخ الكامل:
فضلا افتحوا الصور واقرأوا بتمعن.
يتبع

تفاصيل الدراسة
في البوست ده هجاوب على السؤال الرهيب المكون من الكلمة المختصرة اللطيفة "تفاصيل". قبل ما أجاوب هسأل حضراتكم سؤال: هي كل التفاااااااصيل المكتوبة على الصفحة مش كافية؟ كل البوستس المثبتة عن أركان الدراسة وطريقة الشغل مع الطفل مش كافية؟ .. هل أنا مطلوب مني أعيد معظم اللي ع الصفحة في الخاص لكلٍ على حدى .. معنى "تفاصيل" العامة العايمة دي يعني حضرتك مكلفتش خاطرك تقرأ كلمتين على بعض في الصفحة. هو أنا لما أكتب المسميات الحقيقية للأشياء بدل عناوين 'النصب' الرنانة مش دي برضه تفاصيل!!! يعني لما أكتب أركان الدراسة وفيها بتكلم الطفل بيدرس ايه وازاي بمسميات المونتيسوري الحقيقية واضحة المضمون مش برضه بتعطي معنى: "تأسيس الطفل في العربي والانجليش والماث" ووووو .. ولا ايه؟ .. هقول شوية نقاط يمكن تجاوبكم على التفاصيل بالطريقة اللي بتحبوها وبتفهموها:

# مكان الدراسة: عندي في البيت لأن بكده أقدر اتحكم وأقلل التكلفة .. في أي مكان تاني في ايجار وعاملة بتنضف وتكاليف نقل أدوات المونتيسوري وووووو .. تكاليف أنا أعفيت حضراتكم منها .. من اني أحملها على تكلفة الكورس.

# عندنا تحفظ على موضوع البيت ده .. حقكم طبعا لا أنكر ذلك لكن ده المتاح حاليا .. واحتراما لحقكم دايما بقول على الخاص: اتفضلوا شرفونا قبلها واتعرفوا علينا أكتر واطمنوا على أولادكم هيدرسوا فين .. مقدرش أقدم أكتر من كده

# عدد الأطفال: هو فصل واحد فيه ٣ أطفال فقط .. ابني وطفلين كمان .. ملحوظة على هامش الذكر: لما كنا في الأكاديمية كان برضه فصل واحد من ٥ أطفال فقط .. على مستوى الجمهورية كلها أي فصل مونتيسوري ١٠ أطفال.

# الدراسة من الأحد للخميس من الساعة ٨:٣٠ص ل ٢م .. تقبل المواعيد التعديل لما يناسبنا جميعا. الجمعة والسبت اجازة.

# لو تكرمتم اقرأوا البوست جيدا وقرروا حضراتكم عاوزين ايه لأطفالكم .. وللجادين فقط تفضلوا بالتواصل على الخاص هجاوب بس على التكلفة.

# في نوعين من الدراسة: الطفل اللي هيكمل معانا أوك واللي هيروح المدرسة في أكتوبر القادم هنقدم له الكورس مكثف بشكل يتناسب معه مش متكروت ولا مختزل.

# تكلفة الدراسة سواء كورس أو هيكمل واحدة لأن التكلفة بالشهر .. يااااه اللي هياخد كورس زي اللي هيكمل مش حرام يدفعوا زي بعض .. لا والله حضراتكم مش حرام: اللي هيكمل هيستمر يدفع عن المحتوى اللي بيحصل عليه .. والكورس خلاص هيتوقف عن الدفع أول لما يلتحق بمدرسته.

# بالنسبة للثروات الطائلة والربح اللي هحققه من طفلين فقط وعدد ساعات دراسة ٥ أو ٦ ساعات يوميا فأحب أقول لحضراتكم انها متجيبش أداة حتى من الأدوات اللي هيشتغل بيها أطفالكم. ملحوظة: عدد ساعات الدراسة في فصول المونتيسوري بجد ٣ ساعات .. و ده مش تيسيرا على المعلم/ة لكن احتراما لتركيز الطفل والمراحل الحساسة عند الأطفال .. عدد الساعات اللي أنا بقدمه لحضراتكم ده تيسيرا على الوالدين.

على الخاص فقط هتكون اجابتي التكلفة كذا .. نتفق على موعد تشرفونا .. ارجعوا للبوستس المثبتة على الصفحة

تحياتي وتقديري

مستويات النمو تبعا لنهج المونتيسوري
زي ما قلنا قبل كده اننا علشان نعرف ونفهم ليه الطفل بيتصرف كده ونعمل ايه معاه لازم نعرف هو/هي بيكبروا ازاي ودماغهم بتنمو ازاي.
دكتور ماريا مونتيسوري قالت ان الأطفال بتتعلم في صورة موجات .. وأطلقت على ال waves دي مستويات النمو أو planes of development. وقالت ان المستوى الأول ٠ ل ٦ سنوات والتاني من سن ٦ ل ١٢ سنة والتالت من سن ١٢ ل ١٨ سنة. هنتكلم دالوقت عن المستوى الأول واللي د. مونتيسوري قسمته لمرحلتين: من ٠ ل ٣ ومن ٣ ل ٦ سنوات. قالت كمان ان فيه ٣ مستويات من الوعي والادراك بيبدأوا شغلهم منذ الطفولة وبيستمروا مدى حياة الانسان. المستويات دي هي unconscious و subconscious و conscious: اللاوعي، دون الوعي وأخيرا الوعي. من سن ٠ ل ٣ سنوات مستوى اللاوعي ودون الوعي بيشكلوا ادراك الطفل ومن سن ٣ ل ٦ سنوات بيزيد عليهم الوعي كمان.
خلينا نقول أمثلة عملية على الكلام العلمي ده. على سبيل المثال: طفل عمره سنة أو سنة ونص بلا وعي منه/منها بيدوس كوبس النور مرة يلاقيه بينور ومرة بيطفي فيبدأ يعيد ويكرر الموضوع ده مرات ومرات .. احنا كوالدين بدافع الخوف عليهم نمنعهم ونقول ده غلط ونتعصب من التكرار .. طيب هم بيعملوا كده ليه؟ الأطفال بتنمو كده وبتكبر واحنا بنقف في طريق النمو والتطور ده .. بيتعلموا ايه هي دي محتاجة تعليم ما أنا ماما الكبيرة وفهمته/ها الصح والغلط عاوزين يتكهربوا يعني!! تمام حضرتك الكبيرة اللي أكيد عملتي كده برضه بس ناسية لغاية لما اتعلمتي وعرفتي .. بدل ما تعوقي النمو ساعديه يحصل (بجد هتخلصي أسرع) أول لما الطفل يتقن المهارة هو من نفسه هيتركها .. خلاص اتعلمها ولازم يتعلمها بالتكرار مش بيعاندك والله. مثلا الكهربا: علميه تكون ايديه جافة ويضغط على الكوبس بهدوء مش يخبطه.
بنتي بتكب الأكل .. المية .. بترمي كل حاجة وأي حاجة وتكبها وتبوظها .. تمام: حضرتك عارفة ان لما الأكل بيتكب ع الأرض مينفعش ناكله تاني .. المية مش هينفع نلمها في الكوباية تاني ونشربها .. هي علشان توصل للمعرفة والادراك ده لازم لازم تجرب .. مينفعش تقولي لها صح وغلط وتقولك حاضر ومتكررش تاني .. لازم تكرر علشان تتعلم .. تساعديها ازاي: نلعب معاها ونمثل ونحكي حواديت ونغير نبرة صوتنا. مثلا: كبت المية ع السجادة .. نغير صوتنا ونقول ياخبر السجادة اتبلت وهتبل هدومنا لو قعدنا ع الأرض .. ياااه الكوباية فضيت ولو عطشنا لازم نقوم نملاها تاني .. ممممم طب نعمل ايه يا قلب ماما: نقوم نجيب اناءين ونملا واحد مية والتاني فاضي ونعلمها تكب من ده للتاني وتحاول متوقعش منهم حاجة ونعمل كده احنا الأول قدامها ولو اتكبت شوية نعلمها تمسحهم ازاي وتنضف .. ممكن نغطي السجادة بمشمع مثلا الأول .. وكده بقت بيئة محيطة صديقة للطفل ووقت لطيف للعب وتنمية مهارات وانشغلت شوية وأنا كأم مزعقتش .. الأطفال بتنمو وبتتعلم كده بالتكرااااار مش عند والله .. احنا الكبار اللي بنشوف من منظورنا ونطلق المسميات. وهمسة أخيرة: الطفل اللي مش بيعمل كده هو اللي مش طبيعي. احنا كأهل اللي لازم نقرأ ونبحث علشان نتعلم عنهم ونحتويهم.

تابع البوست السابق
ازاي نبني السلم أو الروابط بين الطابقين ده هنتكلم عنه في استراتيجيات التوجيه الصحيحة للحصول على طفل المخ الكامل؛ لكن قبل ما نبني الدرج لازم نعرف ونعرف أطفالنا ان فيه طابقين أصلا محتاجين نوصلهم ببعض .. و ده مهم جدا اننا نفهمه لأولادنا بشكل مبسط وهو نموذج قبضة اليد لتوضيح طابقي المخ. هنقول للطفل مثلا: هات ايدك الصغنونة الجميلة دي هحكيلك عليها حدوتة (وما أكثر حبهم للحواديت خصوصا لو بتشغل خياله): أشاور له على راسه وأقوله في حاجة هنا اسمها المخ و ده اللي بيخلي جسمنا يحس بكل حاجة .. بص علشان احنا مش هنقدر ندخل جوة راسنا هنمثله أو هنعتبره في ايدينا .. وهنعتبره دورين (ونقوله مثلا زي بيتنا نوصله يعني ايه دورين) وأعمل ايدي زي ما في الصورة وأقوله ده الدور الأرضي وده الدور اللي فوق .. وأنا قافلة ايدي وبنبرة صوت بتحكي حدوتة مشوقة .. وأقف وأقوله بكرة أكملك الحدوتة (لأن الطفل مينفعش نعطيه ٦٠ معلومة مرة واحدة ههههههههه). طيب زعل وعاوزني أكمل الحدوتة أضحك وأقوله هحكيهالك م الأول أو اطلبي منه هو يعيدها وساعديه .. أو ممكن هو يطلب منك تعيديها .. طبيعي الأطفال بتتعلم بالتكرار .. (هاتولي العيال انتو بس في MUH وأنا هعلمهم ههههههههه).
تاني يوم أكمل الحكيوة وأقوله وانا بفتح ايدي زي الصورة وبنبرة مشوقة: ها الحق الدورين بعدوا عن بعض .. يلا قوام نصالحهم على بعض ونخلي اللي فوق يطبطب على أخوه اللي تحت (اللي هو الأصابع الأربعة تلامس الابهام) زي الصورة. ونقوله لما بنزعل أو يحصل موقف كذا أو كذا الاخوات دول بيبعدوا عن بعض ولازم نصالحهم .. ونعطيه أمثلة بالمواقف .. وأثناء الموقف الحقيقي نوبة غضب مثلا نفكره يعمل بايده الحركة (والله هينشغل انتباهه بالحركة وينسى الزعل أو ع الأقل هينتهي الموقف بسرعة) .. نصالحهم دي هي بناء الدرج (الاستراتيجيات) ولما يكبر كام سنة نعطيه المعلومة بما يتناسب مع سنه.
البوست الجاي ان شاء الله نتكلم عن مستويات النمو زي ما شرحتها د. ماريا مونتيسوري علشان نفهم أكتر
الصور 👇

تابع البوست قبل السابق
شرح نموذج قبضة اليد للتعبير عن الطابق السفلي والعلوي للمخ:
لازلنا في البوست ده بنتكلم عن أو بنلخص الفصل ٣ من كتاب "طفل المخ الكامل". وضح كل من سيجل وبرايسون (مؤلفا الكتاب) ان زي ما فيه نصفين أيمن وأيسر للمخ فيه كمان طابق سفلي وعلوي والدمج ما بينهم هو اللي هيوصلنا لطفل المخ الكامل اللي كلنا بنتمناه .. الحلو المؤدب ده حلم كل أسرة ههههههههه .. هنا هما شبهو المخ ببيت مكون من طابقين .. السفلي فيه كل حاجات البيت الأساسية ومكتمل الأثاث ومفروش ومترتب والعلوي لازال تحت الانشاء .. لسة السقف بيتبني لسة فيه مواد بناء ملقاة على الأرض وكمان الدرج أو السلم اللي بنطلع عليه وبننزل منه وبيربط الطابقين ببعض مش مكتمل.
قالوا ان الطابق السفلي للمخ متحكم في المشاعر الضخمة والأساسية زي الخوف الغضب والتصرفات البدائية زي الكر والفر fight or flight (لتوضيح الكر والفر يعني لما بيخاف الطفل أو الانسان عموما من حاجة معينة بيفر منها والكر زي رد فعل الانسان بشكل بدائي لو مستشيط غضبا) .. على سبيل المثال (والمثال من عندي): لما حضرتك بتتعصبي على ابنك ويخاف من زعيقك فبشكل بدائي بيخاف ويفر منك بقولة "حاضر" وبيكرر الغلط تاني لأنه خاف ومخ الطابق السفلي هو اللي اتحكم فيه.
الطابق العلوي للمخ (كما شرحا سيجل وبرايسون) مسؤول عن اتخاذ القرار السليم والتخطيط .. السيطرة على العواطف والجسد .. فهم الذات .. التعاطف .. الفضيلة.
علشان نلاقي الطفل اللي كلنا بنتمناه لازم نفهم حاجتين مهمين جدا جدا:
# لازم نعرف ان مخ الطابق العلوي (القشرة المخية) لسة بتستكمل نموها وتمام تمام النمو بيكون في العشرينات من العمر وبشرط ان الطفل يكون عايش في بيئة بتساعد النمو ده وتدعمه .. بينما مخ الطابق السفلي (الواقع من أول نهاية الرأس حتى الحاجز الأنفي) بيتولد بيه الطفل مكتمل النمو .. و ده المسؤول عن المشاعر البدائية زي ما شرحولنا. يبقى الطفل اللي بتحصله نوبات غضب وبيتصرف تصرفات هوجاء أحيانا لا هو أناني ولا عدواني ولا غبي ولا معندوش دم ولا عنيد وبيكرر الخطأ وقاصد يفرسنا .. مسكين ومش قادر يتحكم في تصرفاته .. لسة بيكبر .. اعذروه وافهموه وطبطبوا عليه والاهتمام مبيطلبش 😅😅😅

# علشان نساعد الطفل يتحكم في تصرفات ومشاعره لازم نبني الدرج اللي يربط ما بين الطابقين .. وهنا نقطة مهمة جدا جدا .. الطابق العلوي بيستكمل نموه تلقائيا مع نمو الانسان وهو بيكبر لكن الدرج أو السلم اللي بيربط بين الطابقين ده حجر الأساس فيه التربية .. تن تن تن 😱😱 أيوة والله التربية .. هديكوا مثال موجود كتير وللأسف بناقبله في حياتنا: مش ساعات نلاقي شخص كبير وشحط كده ونقول ماله مخه ناقص كده .. ماله تصرفاته ميعملهاش عيل عنده ١٥ سنة .. ماله وماله ....... اهو الشخص ده لسة عايش بمخه البدائي هو اللي مسيطر عليه .. السلم الرابط بين الطابقين مدشدش 😪😪
يتبع

صور بعض الأدوات للي حابب يعرف أكتر الطفل بيتعلم ازاي عندنا .. وفضلا اقرأوا البوستس المثبتة لو عاوزين تعرفوا الأطفال بتدرس ايه في MUH .. واللي حابب يعرف أكتر يعني ايه مونتيسوري فالصفحة كلها مونتيسوري تفضلوا بالقراءة .. المونتيسوري أسلوب حياة وبيقدم تربية وتعليم