20/09/2026
بصراحة، إحنا عندنا مشكلة حقيقية في موضوع انتشار اسم جامعة دراية خارج الصعيد، والمشكلة دي مش مجرد مشكلة دعاية أو سوشيال ميديا، لكنها بدأت تنعكس بشكل مباشر على الطلبة والخريجين.
خريجين كتير اتكلموا عن إنهم بيواجهوا صعوبة بسبب إن اسم الجامعة مش معروف بالشكل الكافي خارج الصعيد أو حتي داخل الصعيد ، وده بيخلينا نسأل: إيه اللي الجامعة بتعمله علشان تبني اسمها وتوصل للناس؟
الأنشطة الترفيهية البسيطة اللي بتحصل في بداية السنة في معظم الجامعات — حفلات، ألعاب، مسابقات، فعاليات طلابية وأجواء مختلفة — مش مجرد رفاهية.
الفيديوهات اللي بتتصور في الفعاليات دي وبتنتشر على منصات زي تيك توك بتخلي ناس كتير تسأل "دي جامعة إيه؟"
ومن هنا اسم الجامعة بيبدأ يوصل لناس عمرهم ما سمعوا عنها
لكن للأسف، إحنا مش شايفين نفس الاهتمام بالتسويق والظهور الإعلامي لجامعة دراية.
عمرك مثلاً ما هتلاقي إعلان لدراية علي الطرق الصحراوية في حين انك لو عديت من بوابات السودان مثلًاهتلاقي إعلانات لجامعة النهضة! لدرجة إن في المنيا كلها وعلي بدايه طريق الشرفا هتلاقي إعلان لجامعة اللوتس في حين أنه مفيش ولا إعلان لجامعة دراية
وعلى مواقع الإنترنت والسوشيال ميديا هتلاقي إعلانات حتى لجامعات حديثة الإنشاء زي مثلاً إن كل سنه مواقع نتيجة الثانوية العامة بيكون كلها إعلانات لجامعات زي ميريت
وفي المقابل، من الصعب جدًا إنك تلاقي حضور إعلاني واضح لجامعة دراية بنفس القوة.
وده بيأثر على الطلبة والخريجين.
وصلتنا شكاوي كتير من طلبة بيقولوا إنهم اتعرضوا للرفض في تدريبات صيفية والـ Interviews بسبب عدم معرفة الناس بالجامعة.
والسؤال هنا:
ليه جامعة دراية مش بتسعى بشكل أكبر لبناء اسمها؟
هل الموضوع ميزانية؟
هل الموضوع تأخر في اتخاذ خطوات تسويقية؟
هل المشكلة في طريقة التفكير والتخطيط؟
أيًا كان السبب، النتيجة واحدة:
كل سنة بتعدي من غير بناء أقوى لاسم الجامعة هي سنة جديدة بيكون فيها الطلبة والخريجين محتاجين يشرحوا للناس "جامعة دراية دي فين؟"
والأصعب بالنسبة لنا إننا نشوف جامعات أحدث من دراية بسنين قليلة، ومع ذلك اسمها بقى معروف بشكل أكبر في أماكن مختلفة.
إحنا مش بنقول إن الجامعة وحشة، ولا بنقلل من مستواها الأكاديمي، بالعكس احنا من احسن الجامعات الخاصة في مصر إن مكناش أحسنهم
إحنا بنقول إن الجامعة محتاجة تستثمر في اسمها بنفس القدر اللي بتستثمر فيه في تعليم طلابها.
والحل مش مستحيل.
ممكن يكون فيه
- حملات إعلانية على الطرق الرئيسية.
- إعلانات موجهة لطلاب الثانوية في مختلف المحافظات.
- دعم الطلاب اللي بتقدم محتوى إعلانات احترافي ومستمر على TikTok
- فعاليات طلابية كبيرة ومفتوحة .
- التعاون مع صناع محتوى وشخصيات مؤثرة بشكل يناسب الجامعة
إحنا مش بنطلب المستحيل ومش بنطلب إن الجامعة تعمل دعاية لمجرد الدعاية.
إحنا عايزين بس لما حد يسألنا انت في جامعة ايه ونقوله "بدرس في دراية" مايبقاش الرد:
"جامعة إيه دي؟ وهي فين؟"
إحنا عايزين اسم الجامعة يكون معروف، لأن ده في النهاية مصلحه عامة تفيد الجامعة والطالب
