09/11/2025
Sawa Kids❤️
🎁 مشاكل سلوكيه لها حل - طفلي عنيد 🎁
ابنى مش بيسمع الكلام !! رأسه ناشفه
العناد انواع و درجات طفل بيرفض الأمر و طفل بيتاخر على تنفيذه و طفل ديما بيعمل الأمر بزن و عصبيه و طفل بيعند بعدوانيه
تعالو نتعرف على شويه معلومات
🔹العناد يبداء من سنتين و نص كده و يشتد في اربع سنين و لو تعاملنا صح مفروض يختفى عند السادسه من عمر الطفل
🔹في عناد بيكون إيجابى و دليل انه بداء يبنى شخصيه مستقله و ده بيكون في أقل صوره و غير مزعج لنا إلا في حاله الاباء المسيطرين و حنتكلم عنهم في بوست
🔹خلينا عارفين ان الطفل المطيع و حاضر طول الوقت بيكون في شك في تأخر نموه النفسي و العقلى !!
اى ام بتشوف العناد في الصور التاليه 👇
اغسل أسنانك قبل النوم ..الطفل يرفض
او يغسلها بس بعد ما طلبت الأم بفتره طويله علشان يعند شويه 🤓
يحاول يتصرف بطريقه غير مهذبه أو يكسر القواعد امام الآخرين
الغضب و نوبات غضب مثلا علشان اخوه مسك حاجه بتعته 😌 او يصر ياخذ العاب أخواته
طيب ايه ممكن يكون سبب العناد ؟؟؟
🔹كثره القيود أفعل و لا تفعل قيود حتى في المنزل ألعب هنا بس و متعلبش هنا متتنططش بلاش جرى و التوجيهات المثاليه و التعجيزية من الأم و الأب الساعين للكمال
على عكس طبيعه الطفل أن بيحتاج يتحرك و يتعرف على العالم و ينمو و فجاءه بيلاقى قيود
يبداء يتوتر و يحس ان في حاجات كثير متحكمه فيه غيره ف يبداء يعند علشان يسترد حقوقه و حريته👌
🔹القسوه و العنف في التربيه (الضرب)💣
بيولد العناد لو فاكرين الأطفال بعد كام ضربه بتبداء تقولك موجعتنيش !!
مع انه حزين نفسيا و عنده الم نفسي و جسدى بس بيحاول يسترد كرامته و نفسه
🔹الطفل لما يطلب حاجات نفسه فيها و نوعده و نرجع في كلامنا احساسه بالعوز الشديد بيسبب عناد لما تطلبي منه 👌
و طبعا زى ما قلتلكم الطفل في فتره من عمره (الدمغ و الانطباع ) حيعند معاكم زى ما بيلاقى بابا بيعند مع ماما او العكس او الاخوات او المقربين
طيب ايه الحل نتصرف ازاى👇
في مقالات و كتب كثير بتتكلم عن الموضوع ده
انا حاتكلم معاكم بالعاميه و الأحداث اليوميه الواقعيه زى ما تعودنا
خلينا عارفين ان العناد ده أسلوب مكتسب من البيت/ الاهل/أسلوب التربيه و البيئه الى عايش فيها الطفل و أننا لو اهملنا التربيه السويه الطفل يكبر على العناد و بيكون زوج أو زوجه متعبين جدا جدا و بسببهم بينهار علاقات
ف ياريت نستحضر النيه و نعمل البوست حفظ او شير عندنا و كل ما نفقد السيطره او ننسى نرجع نقرأ تانى
أول حاجه في كل علاقتنا طريقه أسلوبنا في طلب الأشياء سواء بقى مع اولادنا او ازوجنا و زوجتنا هو إلى حيخلى في عناد او حتجبره أنه يعملك طلبك بحب
أولها الطفل العنيد
🔹عايز قاعده كده بينكم و يتلزق على الحيطه جدول بالأعمال اليوميه
يعني عارف كل حاجه مفروض تمشى ازاى بالاتفاق بينكم يعني مش بتحطى القواعد من غير مشاوره لا عامليه بالمثل انتى و هو واحد اكيد مش حتقبلى حد يحطلك يومك يمشى ازاى من غير ما ياخد رايك صح و لا مش صح 😉
🔹 يا حبيبى و بحبك و انت جميل
كلام الحب مهم جدا لان الطفل العنيد حساس اوى
🔹 اشاركه و أخد رأيه و احط بدائل ايه رايك التلفزيون يكون ساعه في اليوم عايزها بليل و لا
الصبح ؟؟؟
طيب ايه رايك مصروفك تشترى لعب و لا حاجات معينه لأن ليك فلوس بالمبلغ ده طول الشهر
و هكذا
و افتكرى ان التسلط في الكلام حيجيب عند و عصبيه
🔹التواصل اليومي لكل طفل من أولادكم لوحده مع الأب و الأم حتى لو ربع ساعه كلام و سؤال و حب حيقلل من العناد لانه حيشعر بقيمته عندكم و مش حيحتاج يعمل اى تصرفات لاسترداد ذاته!
🔹لو سمحت و من فضلك و شكرا في اى طلب
🔹 العقاب /
العواقب زى معاد النوم الساعه 10 مثلا لو اتاخرت يبقي حنقلل من ساعات الكرتون او البلاى ستيشن بالمثل
اتاخرت نص ساعه يبقى الكرتون حيقل نص ساعه بدل ساعه و ده اتفاق بحب وود مسبق 👌 و حسم و حزم منك
🚫الضرب ممنوع لأنك كده حتولد عناد و عداونيه و لو طفل حركى حيقلب بلطجى 💣
🔹البدائل مهمه لما تكون عايز منه حاجه قوله تحب تأكل دلوقتى و لا كمان ربع ساعه ؟؟؟ انتى كده بتحسسيه انه له شخصيه مستقله و آراء
🔹المناقشات في القصص و دى حاجه فعاله جدا عن تجارب
تحكى قصه فيها السلوك إلى نفسك تعدليه و تتنقاشى معاه في القصه
🔹بما تتعصبي و ده فعال 80/100
اطلبى منه يهديكي انك محتاجه دعمه و ايه ممكن يعمله أو يقولك تعمليه علشان الغضب يروح
و لما يساعدك اهدى و اتعلمى تتنفسي نفس عميق امامه خمس مرات علشان تهدى فعلا و هو يكتسب الأسلوب 😁✋
لانه فعلا لما حتعملى كده معاه وقت غضبه حتشعرى بالفرق
🔹 اشرح له سبب كل حاجه مثال انا عايزاك تذاكر دلوقتى علشان بليل ممكن نجلس مع بعض و نتفرج على فيلم او عايزاك تنام بدرى علشان تصحى الصبح تلحق المدرسه
بالتالى هو عارف انه مش مجرد رأى و تحكم منك لكن في مصلحته
🔹المعامله بالمثل حستجيب له لما ينادى عليا مش يفضل يقول ماما ماما ماما و انا مثلا ماسكه الموبيل و لا بتفرج على التلفزيون و على فكره بيحصل و مش بنرد ✋
لكن لو ردت هو كمان حيتعلم يرد
🔹 عدم التدليل الزائد و لازم بنتجاهل بعض التصرفات و العناد و عدم تلبيه طلبات خارج الاتفاق او من الممنوعات لانه مثلا قال طب مش حاكل النهارده بيحاول يعند علشان تلبي طلباته
اتجاهل التصرف علشان يوصل له انه مش ده التصرف الصح!
حكلمكم الفتره الجايه عن اساليب كثير بره الصندوق بس عايزه أذكركم أن كل طفل متميز منفرد إلى نفع مع طفل ممكن مينفعش مع التانى
محتاجين الصبر و نيه صالحه و الدعاء سلاح تربوى ادعو أولادكم بالهداية
# سوا كيدز بيت ابنك التاني ❤️
العنوان
عدنان المالكي بجوار مسجد
01150655260
