English House Gitex

01/01/2018

كل سنة وأنتم طيبين 🎄😍😀.. وبنتمنالكم إن 2018 تكون بالنسبالكم أفضل من 2017
وعلشان تكون 2018 أفضل لازم تخططلها من البداية .. لازم تعرف هتعمل إيه ومتضيعش وقت ويبقى عندك Time management لكل حاجة علشان تقدر تتعلم وتتطور وكمان تستمتع بحياتك .. لأن الشخص الخاسر هو اللي عايش طول حياتة بالطول والعرض وناسي شغلة وناسي تطوير نفسة وفي الأخر بيخسر ، والشخص التاني هو اللي مقضي أيامة كلها شغل وناسي نفسة وفي الأخر بيخسر كل اللي حوالية ومابيوصلش للي هو عاوزة .
التوازن والـ Time management iهو سر النجاح .

30/12/2017

10 حاجات بتساعدك فيها "مريم" علشان تعرف تذاكر 💃😱

1. ماتذاكرش الحاجات الضخمة المهمة الأول
إبدأ بحاجات بسيطة و ممكن تخلص بسرعة .. لأن شعورك إنك أنجزت حاجة ولو بسيطة هيخليك تدخل فالحالة العقلية بتاعت المذاكرة و تاخد إحساس الإنجاز اللي هيشجعك تدوس ف الصعب

2. مفيش ذكاء و غباء في موضوع الإستيعاب
أومال في ايه ؟
في طرق مختلفة تناسب الناس المختلفة .. في ناس لازم يتقالهم المعلومة بشكل مباشر و تتكرر كذا مرة علشان تثبت ...
مثال:
المعلومة .. "ذهبت مريم لتشتري بامية من السوق فوجدت الكيلو بـ ١٢ جنيه، فاشترت قرنبيطا بدلا من البامية" .. كرر 10 مرات .

و في ناس لازم المعلومة تتحط في سياق حوار علشان تدخل دماغهم و تثبت ...
مثال:
• إسكتي شوفتي البت مريم لما راحت السوق عملت إيه ؟!
• إيه .. عملت ايه ؟!
• لقت البامية بـ ١٢ جنيه و فضلت تتخانق مع الراجل علشان البامية غالية !!
• البامية ب ١٢جنيه .. لييييه !! *لفظ خارج*
• آه و الله !
• و بعدين ؟
• جوزها بيزعقلها جامد لو رجع لقى الأكل مش جاهز فجابت قرنبيط و خلاص !
وجود "سياق" للمعلومات تتحط جواه من أكتر الحاجات المحفزة للتذكر و سهولة إستدعاء المعلومة ...
طبعا لو كنت كمان فاهم المعلومات اللي جوة السياق تبقى كدة إنت برنس البرانيس 😎 والمعلومة دي مش هتطلع من راسك أبدا.

3. معظم الناس اللي بتشتكي من النسيان و قراءة الحاجة كذا مرة عشان تفهمها، بيكون مخهم مشتت و بؤرة الشعور اللي هي الـ (Working Memory) مشغولة .
مثال على التشتت:
إن واحد بيحب مريم (مع إنها متجوزه)، و كل ٥ دقايق يبص عالموبايل يشوف هى بعتت حاجة أو إتصلت ولا لأ.

4. النوم مهم جدا أثناء فترات الإمتحانات .. ليه ؟
علشان أي معلومات مكتسبة أثناء اليوم بيتم إنتقالها من الذاكرة المؤقتة للذاكرة الدائمة و تترتب و أثناء النوم .
المخ بيعيد تنظيم كل الدوشة اللي حصلت أثناء الإستيقاظ و يرمي الحاجات اللي مالهاش لازمة و يحتفظ بالحاجات المهمة (من وجهة نظر المخ طبعا) .

مخك مايعرفش و مش هيعرف إن المعلومات اللي بتذاكرها مهمة لمجرد إن حضرتك خايف تسقط .. مخك هيقتنع إن المعلومات دي مهمة لما تربطها و إنت بتذاكر بالواقع بتاعك .
معلش هو المفروض حتة "ربط" المعلومات بالواقع دي هي دور المعلم أو أستاذ الجامعة..
بس للاسف معظم المعلمين و أساتذة الجامعات مش بيراعوا أبداً حتة ربط المعلومات بالواقع التطبيقي، فحضرتك وقع عليك العبء و المسئولية دي .

لازم تفكر إزاي اللي إنت بتذاكره ده مفيد في حياتك أو حياة الناس..
يعني ليه إخترعوا العلم ده من أساسه ؟ محتاجينه فإيه ؟
مثال:
أيام ماكنت في ثانوي كنت مش عارف أفهم أي حاجة في التفاضل و التكامل .. ولا عارف أحل أي مسألة لأني مش فاهم العلم العظيم ده لازمته إيه في الحياة ...
الله يبارك فيه أستاذ رياضيات إسمه حمدي عبدالجواد قالي: تقدر تقولي إزاي تقدر تحسب مساحة سطح قلْة ؟ .. أه والله قلْة بتاعة المايه ، أو مسار صاروخ فضائي بيتحرك على شكل قطع ناقص ؟
الإجابة على رغم بساطتها و عدم عمقها أرضت مخي ساعتها و خلتني قادر أذاكر التفاضل و التكامل.

5. لو إنت من الناس الـ Neurotic اللي هما الفراكين اللي مش بيقدروا يقعدوا على الكرسي كتير من غير قلقلة و ململة و لف بدون هدف في الشقة ...
حضرتك ممنوع عليك الشاي و القهوة و البيبسي و مشروبات الطاقة و أي حاجة فيها كافيين .. ليه ؟
عشان هتخليك بتفرك أكتر .. أومال أعمل إيه ؟
روح لأقرب دكتور صيدلي لطيف 👨‍⚕️ و إسأل على حاجة تنشطلك تدفق الدم للمخ ، إسأل الدكتور الصيدلي اللطيف و اطلب منه يشرحلك بالظبط بتستخدم إزاي.

6. الذاكرة البشرية بتشتغل بالحواس أولاً.. يعني إيه ؟
يعني لازم المعلومة تدخل عن طريق واحدة من الحواس دول :
• البصر
• السمع
• الشم
• اللمس
• التّذوق
و كل ما المعلومة دخلت عن طريق أكتر من حاسة فنفس الوقت كان إحتمالية ثباتها أكتر
مثال:
مريم عملت لجوزها طبق محشي ورق عنب عليه قطع لحمة بلدي إستوت مع بخار المحشي و سلطانية ملوخية بالتقلية معمولة و متخرطة كويس و سخنة مولعة ...
جوزها هيشمها و هيشوفها و هيلمسها و هيتذوقها .. تفتكر ممكن ينساها تاني ؟ 😘😍

طب نطبق الجزئية دي إزاي ؟
حاول "ترسم" المعلومات اللي بتقرأها .. حاول تحطها في "سياق" زي قصة مريم و البامية كده ...
تعرفوا زمن الضرب الجميل ف الكُتّاب العيال مكانوش بينسوا ليه ؟
علشان المعلومة إرتبطت بالشعور بالألم و بالتالي أستدعاءها بقى أسهل .
طبعا دي مش دعوة لعودة الخرزانة و تعذيب الأطفال في المدارس .. الهدف من الكلام هو إنك تصنع لنفسك إرتباطات مع المعلومة .

في طريقة أعتقد ممكن تكون مفيدة:
روح لمحل العطور واختار عطر "برفيوم يعني" معين لكل مادة .. العطر ده يكون موجود حواليك و إنت بتذاكر المادة دي .. يوم الإمتحان بتاع كل مادة و قبل ما تدخل اللجنة حط العطر "البرفيوم يعني" بتاع المادة دي .
و غالباً بإذن الله هتفتكر كتير من اللي ذاكرته لمجرد إنك شامم نفس العطر اللي كنت بتشمه و إنت بتذاكر.. وإلا إنت مفقود الأمل منك 😂😂 (بهظر)

7. إختار واحد زميلك بترتاحله/ أو إختاري واحده زميلتك بترتاحيلها، و إتناقشوا مع بعض في المعلومات و في طرق حل الأسئلة...
مبدأ "النقاش" في حد ذاته عامل مهم جداً من عوامل تثبيت المعلومات في المخ.

8. الروحانيات مهمة جداً لتصفية المخ..
كل واحد له طريقة مختلفة في إعلاء روحانياته.. الإسترخاء الجسدي مع الإستماع الي النصوص الدينية السماوية - كلام الله - هي أفضل وسيلة للإرتقاء بالروحانيات.

9. لما تيجي تذاكر لازم الأول تاخد فكرة عامة عن الإطار بتاع المعلومات.. إزاي؟
إقرأ العناوين و العناوين الفرعية و بعدين إقرأ الموضوع و ركز على الكلمات المحورية في الموضوع .. يعني إيه ؟
مثلا في قصة مريم و البامية اللي قلناها فوق إيه هي المعلومات أو الكلمات المحورية في الموضوع؟ تفتكر الممتحن ممكن يسألك في إيه؟
إن البامية ب ١٢ جنيه، و إن مريم طبخت قرنبيط .

10. المخ بيكتسب المعلومات و يطبخها و يفهمها و هو في حالة إسترخاء مش في حالة توتر.

إتوضى أو بلل قدميك و خد أنفاس متوسطة العمق و بطيئة و إنت مغمض عينك وواقف حافي برجليك المبلولة على السيراميك أو البلاط .. ليه ؟
علشان تسترخي و تصرف أي شحنات سلبية في جسمك .. و بلاش تشنجات و إنت بتذاكر لأن مخك مش هيستوعب طول ما إنت متوتر.

طيب والناس اللي ماعرفوش يسيطروا على التوتر بالطرق السلمية المذكورة فوق دي؟👆
ممكن اللجوء للأدوية بتاعت التوتر - لازم تحت إشراف طبي - علشان تقدر تشيل التوتر ويعرفوا يذاكروا.

--------------
حاول تطبق على أد ماتقدر من الـ ١٠ نقاط دول وإن شاء الله هيساعدوا .. و طبعا موضوع مريم ده هزار يعني علشان توضيح المعنى بس، وأصلا هى لا إشترت بامية ولا قرنبيط ولا عملت أكل وجوزها طلقها 🤣🤣🤣.

24/10/2016

احصل علي منحة كامبردج البريطانية وادرس 6 مستويات عام في اللغة الانجليزية و 3 مستويات مخادثة و صوتيات ومهرات العمل الاساسية ( مهارات التواصل – المقابلة الشخصية – مهارات العرض ) في 3 اشهر فقط ب 850 جنيه بدلا من 1750 للحجز والاستفسار 01022211013 – 01022211014 – 0502210629
يحصل الطالب علي 6 شهادات معتمدة من جيتكس للتدريب
يحصل الطالب علي شهادات معتمدة من الخارجية المصرية ( مصاريف اضافية )
اخر يوم للحجز هو 15 /11/2016 ( فقط الحجز 100 جنيه والباقي تدفع عند بداية الكورس )
جيتكس للتدريب والتطوير | المنصورة
ش الترعة برج النور الدور الاول امام برج الشيماء اعلي اتيليه مدام عفت
0502210629 -01022211013 -01022211015 -01022211016

10/07/2016