Reham Radwan Character Building

30/04/2025

🤍

29/11/2024

لكل مامي جميلة
تخيلي معايا كده لو ان ربنا لم يشرع لنا الاستغفار أو أن العبد كان له عدد مرات خطأ معينة بعدها خلاص لا تقبل توبته 🙆🏼‍♀️

كان الإنسان هيكرر الخطأ وبفقدان الأمل هيستمر ف البغي والطغيان ماهو كده كده ضايع مكنش حد فينا هينجو

ده بالظبط احساس طفلك لما بيغلط وانتي بتعنفيه في كل مرة يغلط ، ده بالظبط إحساسه لو أن لسه بيتعلم يواجه أخطاءه ونفسه وانتي تسمعيه كلام زي مفيش فايدة منك ،انا حاولت معاك كتير ، انت مش نافع

صدقيني مش هيوقف الخطأ بل هيطغي فيه بعد شوية لانه هيفقد الامل

طب نعمل ايه نتعلم من كيف يعاملنا الله ...
أذنب العبد فليستغفر ويصلح ويعمل صالحا
اخطأ الطفل فليعتذر ويصلح ويبدل الخطأ بسلوك صحيح

ونفضل وراه كده ونعينه ع نفسه وع شيطانه إن كان مكلف
لكن اوعي تخاصميه بخصامك ليه تركتيه لنفسه ولشيطانه لوحده

24/07/2024

01/07/2023

القاعدة الذهبية في التربية الإيجابية
" لا تفعل ما يستطيع الطفل فعله بنفسه"

من كورس الاعتماد علي النفس

30/06/2023

كورس الاعتماد علي النفس
من مجموعات Dream kids

07/06/2023

مجموعات جديدة بدأت في حضانة دريم كيدز Dream Kids nursery

٤-٦ سنوات " برنامج الاعتماد على النفس"( ٩ محاضرات)

٧ -١٢ " برنامج المهارات الاجتماعية " ( ٩ محاضرات)

مع كل مستوي ابنك بيحضره بنهديكي انتي وباباه محاضرتين تربية إيجابية مجانية

للحجز والاستفسار من خلال الحضانة أو رسائل الصفحة

21/03/2023

كل سنة وإحنا كلنا طيبين ..رمضان كريم .. عسي أن ندخله ونخرج منه فى أحسن الأحوال🤍❤️
بمناسبة الشهر الكريم بتيجي أسئلة كتير فى ذهن الأمهات💭

س1: امتي ابني يصوم ؟🤔
فى الشرع الطفل مكلف بالصيام من وقت البلوغ ..ما قبل ذلك له قاعدة جميلة " التمرين لا الاجبار ولا النهي " يعني احنا بنتمرن لا اجبره يصوم ... ولا انهاه لو عايز يصوم وعنده قدرة جسدية على ذلك😍

ازاى اشجع ابني يصوم ؟🙄
ست الكل انتي تقريبا الطريق ممهد ليكي بشكل كبير جدا اصلا لان الاطفال بتحب تتشبه بالكبار فهو كده كده هيبقي عايز يقلدك ويصوم من باب انه انا كبير بقا وهصوم .. فاحنا كل المطلوب مننا ان منركزش مع الطفل لأ.. نركز مع الشهر .. ان الطفل يشوف بعينه فرحتنا بالشهر الكريم الشهر اللى بنعطي فيه اكتر ونحس بالغير اكتر الشهر اللى روتين يومنا بيتغير فيه.. المصاحف تتفتح اكتر التلفزيون اقل التلفزيون اقللللللل.. الصلاة ف المسجد ..الأولى أن الأب ياخد الاولاد .. لو غير متاح خديهم انتي وديهم .... طبعا طبعا اول ما ياذن المغرب نجري ندعو🤲🏻 الدعوة الحلوة بتاعتنا الاول قبل ما افكرهم بالاكل افكرهم بالدعوة واعلمهم من صغرهم لما بنعوز حاجة بندعي ربنا بيها .. كل الجمال ده لما يتعمل قدام الطفل هو هيكبر حابب الصيام من نفسه ومش هتعاني تعوديه عليه .. العكس تماما طبعا لو سمع تذمر وكلام كتير عن الحر وصعوبة الصيام والي اخره🤷🏼‍♀️

طيب لو احد الوالدين فى البيت بيتذمر من الصيام قدام الطفل؟🤦🏻‍♀️
نهون على انفسنا .. ما لا يدرك كله لا يترك كله .. أي حد فى البيت يهتم بالحاجات الجميلة عن الشهر قدام الطفل هيكون مؤثر برضو متقلقيش

يا ماما هو ليه اصلا ربنا عمل الصوم ؟🧐
بالراحة كده حبايبي يعني ايه اصلا كلمة يصوم .. يعني يمسك عن الشىء ..طيب احنا بنمسك عن ايه .. عن الاكل والشرب ونحاول نمسك عن اى حاجة مش صح .... طيب ياماما وهنستفيد ايه لما نتعلم كده ... هنتعلم القدرة على ان تقول لنفسك لا .. تخيل لما تقدر تقول لا للاكل والشرب طول النهار فى رمضان .. هنقدر نقول لا للعب وقت ما يكون لازم نذاكر علشان الامتحان فهننجح ونفرح بنجاحنا ... تخيل لما نقدر نقول لا ومنصرفش كل مصروفنا ونحوش منه جزء هنقدر فى الاخر نجمع مبلغ كبير ونشتري الحاجة اللى بنحبها ...وهكذا اعملي امثلة لحاجات ابنك بيحبها ونفسه فيها ....يبقي الصيام بيعلمنا نكون اقوي ولما نكون اقوي هننجح اكتر ونفرح اكتر .. وكمان بنتعلم نقول لربنا حاضر هو امرنا نصوم واحنا لاننا بنحبه بنسمع كلامه ❤️.. طبعا الكلام الجميل ده لطفل في سن المدرسة لو اصغر من كده نفتكر القاعدة.. كلام أقل علمي اكتر.. يعني هنكلمه اكتر عن ازاي بنصوم ...مش ليه بنصوم .. قاعدة اهي جميلة طفل أقل من سن المدرسة بنجاوبه ع سؤال ازاي؟ .. طفل في سن المدرسة بنجاوب علي سؤال ليه؟

طيب ابني يصوم كام ساعة ؟
كل طفل له قدرة جسدية مختلفة انتي ادري بيها لكن نصيحتي الوحيدة ليكي ان تجعلي فترة الصيام دي قبل المغرب علشان يفطر معانا وطبعا لازم نشجعه بكلام لطيف مع كل تقدم بيعمله 🥳🥳
ودمتم سعداء 🤍

17/03/2023

تقدر تكسب أي طفل ف اول دقيقة ليك ف المكان اللي هو متواجد فيه ... ازاي؟! 🤔

سلم عليه .🤝

بس كده 😉.. لما تروح تزور حد سلم ع الكبار وسلم علي الصغيرين بنفس الطريقة ..

لو قابلتي صاحبتك أو قريبتك صدفة سلمي عليها وسلمي علي الاطفال بترتيب العمر من الكبير للصغير ..

حتي لو انت مدرس ..جرب ف أول حصة تسلم علي كل الطلبة يدا بيد كده ..

الفعل البسيط ده بيكسبه ثقة في نفسه .. اللي هو انا كمان شخص موجود ومتشاف والناس بتسلم عليا 😍

10/03/2023

رسائل كتييير عن ابني كبر وانا مش عارفة اسيطر عليه وتصرفاته مش عجباني وزهقت من كتر ما هو مش بيسمع كلامي وعياااااط للصبح ! 😭

اولا هوني ع نفسك .. انتي مش لوحدك ف الموقف ده معظم الآباء والأمهات كده .🫂

ثانيا .. ف قاعدة أساسية بتقول 📢 أن معظم اللي بيتعلمه الإنسان ومعظم شخصيته بتتكون قبل ٧ سنين ... 📢

فبالله عليكي لو عندك طفل ف السن ده ركزي معاه .. السن ده الطفل مش بيفهم الأفكار المجردة يعني مش هيفهم فكرة أهمية المشاركة أو الكرم أو حتي الرحمة فبلاش محاضرات وكلام كتير .. طيب اومال أعلمه الحاجات دي ازاي
By default
بيشوف بيقلد .. مثلا .. هل واحنا بنعلمه المشي بنفهمه أهمية المشي لصحة الإنسان .. لأ بيشوفنا بنمشي فبيعوز يقلدنا وبنساعده .. كل حاجة بقا هتبقي كده هيشوفني بشارك أو برحم أو بتعاون فهيعمل زيي تلقائي من غير ما يفكر وبيكبر ع أن ده الأصل ف الأمور .. فبالله ركزوا ..👌

طيب كبر ابني الحمد لله وعدي ال٧ سنين بكتير وانا مكنتش اعرف كتير عن التربية وعكيت عك السنين والتنين 🤦🏼‍♀️🤭 اعمل ايه .. الواد كده خلاص باظ ارميه😳

أكيد لأ 😀.. كل انسان قابل للتغيير حتي لو وصل لسن ٨٠ اللي بيختلف بس صعوبة وسهولة تقبل القيم وتغيرها ..

فأنتي لو عندك طفل كده وانتي شايفة أن الأمور خارجة عن السيطرة .. الحل من رأيي ومن تجارب ناس حواليا .. متحاوليش تسيطري. إطلاقا ده مش السن اللي هيتعلم فيه By default خلاص احنا دخلنا مرحلة جديدة بنفهم فيها الأفكار المجردة وبنكون عايزين نتناقش ونعرف اسباب ونتائج كل الأفعال .. فنصيحتي ليكي متشتغليش علي سلوك الطفل الاول ابدأي انك تنشغلي علي علاقتك بيه .. حطي كل مجهودك انك تكوني علاقة قوية سوية بينك وبين طفلك ولما ده يحصل نبدأ وقتها نشتغل ع السلوك..

يعني ايه اسيب بنتي أو ابني قليل الادب واحضنه بقا وكلام التربية الإيجابية الصايص ده؟!😏

لأ طبعا 🤌... انا بقولك تعديل سلوك طفل عدي ال٧ سنين هيحتاج خطوتين .. ☝️اولا اقوي علاقتي بيه واخليه يحس بالأمان ناحيتي ..✌️ الخطوة التانية ابدأ اشتغل ع السلوك وتعديله
طيب لو معملتش كده ودخلت ع تعديل السلوك ع طول .. وهو سلوكه زفت وبينا خناقات وزعيق .. بمنتهي البساطة هينفر منك فهل في حد بيتعلم من حد هو نافر منه 🤷🏼‍♀️
هسيبلكم انتم الإجابة😉
دمتم في سعادة 🤍

04/03/2023

النوع الثاني .. الأسئلة التحفيزية ..

احنا قولنا قبل كده أن أسلوب الأوامر بيحفز عند الطفل المقاومة والعند.. وعند الكبار برضو والله 😌..
المهم ..طيب انا عايزة اقول لابني يذاكر أو يعمل حاجة معينة اعمل ايه ؟!🤔
حضرتك هتاخدي دقيقة بس تفكير قبل ما تقولي الأمر وهتعدلي الصيغة شوية فهتسأليه اسئلة بديلة كالتالي ..

بدل ما تقوليله قوم خلص الواجب ..
هتقولي .. انت جهزت حاجتك اللي هتحتاجتها وانت بتعمل الواجب ؟ .. أو انت عملت الplan بتاعة المذاكرة وحددت هتخلص س كام ؟

بدل ما تقوليله متضربش اخوك تاني واتفضل ع اوضتك ..
هتقولي .. ياتري ازاي نقدر نحل المشكلة. بينك وبين اخوك بحيث تبقوا انتوا الاتنين مرتاحين ؟

بدل الأمر الشهير رتب اوضتك..
بتقولي ..هتحتاج حاجة علشان ترتيب الاوضة ، فوطة أو ملمع أو حاجة ؟

وهكذا .. احنا بنعتبر الأمر شيء مسلم بيه وكده كده هيتعمل بس بنسألهم حاجات تحفزهم يفكروا هيعملوه ازاي .

دمتم مبسوطين بأطفالكم .. نعمة ربنا التي رزقكم إياها 🤍


هو بوست الجمعة بس نزل السبت عادي .. ان تأتي متأخرا افضل من ألا تأتي 🤭