11/10/2021
عملت تسويق صح؟
١٠ نصايح عشان تزود مبيعاتك في الوقت الصعب الي احنا فيه
عميلك اتغير .. بقى وقته أديق .. قوة المعلومات عنده أكبر .. الاختيارات قدامه أكتر .. وكل بديل قدامه بيتفنن إنه يقدمله أكتر وبالتالي توقعات العميل بقت في السما .. وبالتالي إرضاءه بقى أصعب .. ده غير قريب بقى مزاجه العام محبط وعشان كده بيتأخر أو بيأجل قراره الشرائي .. عشان يبعد عن أي قرار هو مش متأكد منه .. أو مش ضرورة قصوى بالنسباله.
1. ابدأ من عند العميل دايما .. اسأله عن الي هو محتاجه من الي انت بتبيعه .. ايه ظروفه .. وانت بتسأل حاول تسمعه كويس قوي .. عشان تقدر تحط ايدك على مفاتيح الشرا عنده .. وتقدر ترسم تصور حقيقي تقدر تبني عليه عرضك زي ما يناسبه مش زي ما انت شايف
2. اوعى تفترض .. اوعى تفترض .. اوعى تفترض .. افتراضاتك ممكن توفرلك وقت في وجهة نظرك .. لكنها في الحقيقة بتطول عليك السكة .. أو بتوديك في سكة الي بيروح ميرجعش .. دايما حلل الكلام عشان تفهم مش عشان تحط التتش بتاعك
3. اختصر كلامك على قد ما تقدر .. لازم عميلك يحس إنك حريص على وقته .. وعايزه يوصل للفايدة والقوة الي يقدر يعتمد عليها فيك .. وفي نفس الوقت هيفهم إنك بياع قوي وشغال طول الوقت .. مش انك مصدقت مسكت عميل عشان تقعد تهري معاه في الكلام
4. لما تعرض الي بتبيعه .. كلمه عنه من وجهة نظره هو .. مش من وجهة نظرك انت .. الصفات Features بتتكلم .. لكن الفوايد Benefits بتبيع .. استخدم الفوايد دايما .. عيشه جواه .. كلمه عن الي بيأثروا على قراره .. واد ايه الي بتبيعه هيفرق في حياتهم أو شغلهم
5. لما العميل يعترض .. متستخفش باعتراضاته .. ولا بإنه غالي .. ولا بإنه شايف إنه مش مناسبه .. متتأففش من الاعتراضات والنقاط الي مش عاجباه .. بالعكس خدها دخله عشان تقنعه منها .. هو بيقرب للشرا مش العكس .. افهم اعتراضه كويس وحلله عشان تقدر تحله .. ويا سلام بقى لما تحلل الاعتراض بتاع العميل معاه .. عن طريق الأسئلة .. لما تخليه يفكر معاك في طبيعة الاعتراض الي رماهولك .. وتخليه يعرف الفرق في القيمة الي انت جي تقدمها .. وايه الي هيحصل لما يمشي في منتج تاني غير الي انت بتبيعه والي هيحصل في كل حالة من الاتنين .. عشان يلاقي الإجابة واضحة .. إن اختيارك انت هو الأفضل بالنسباله
6. الكلام بيبقى صح بالنسبة للعميل لما بيبقى من جواه .. مش من براه .. عشان كده انت محتاج دايما تناقش العميل في أفكاره بطريقة سلسة .. تسأله وتستنى يجاوب .. تسيبه يفكر .. قدرتك على إقناع عميلك ترتبط بقدرتك على إنك تقدر تمسك لسانك عن إنك تتكلم .. وتشغل ودانك عشان تقدر تفهمه أكتر.
7. اوعى تقفل البيعة بدري .. ولا تضغط عليه عشان يشتري .. بالعكس حاول محاولات بسيطة صغيرة .. واحدة ورا التانية عشان يقفل ويشتري .. وشوف رد فعله .. لو مش جاهز مش هتقفل مهما عملت .. هو ده عميل دلوقتي .. لو قفلت وهو لسه مش جاهز .. شكرا .. انت كده فقدت عميل كان مستعد إنه يتقفل .. لإن أسهل قرار إنه ميشتريش ويأجل القرار كله لبعدين .. بعدين دي امتى .. الله أعلم .. ممكن يقعد يفكر لوحده .. ويوصل لقرار .. وده أسوأ حاجة عند البياع .. المعادلة بسيطة .. يتكلم معاك > يفكر معاك > يشتري منك .. لو متكلمش معاك مش هيفكر معاك .. ولو مفكرش معاك هيفكر لوحده .. وبالتالي احتمالية انه يشتري منك هتقل جدا جدا
8. كل ما تكون سريع أكتر في عرضك .. ومركز في كل حاجة بتعملها مع عميلك .. هتقدر تكسب وقت تبيع فيه أكتر .. وللعميل الي فعلا مهتم بالي انت بتبيعه .. كونك سريع مش معناه إنك مستعجل .. لكن معناه إنك بتعمل كل حاجة صح بس بسرعة .. مبتضيعش وقت .. لإن الوقت بالنسبالنا كبياعين هو المبيعات
9. امشي كل خطوة عشان توصل للبيعة .. متفتكرش إن البيعة هتيجي في خبطة حظ .. ده ممكن يحصل .. بس احتماليته اد ايه .. خد الطريق واحدة واحدة .. لو كان تواصلك بيوصله انطباع احترافي عنك ده كفاية في البداية .. التواصل الي بعده هتكون الدنيا أحسن
10. اقتناع العميل بالي بتبيعه بيبدأ من عندك انت .. في بحث اتعمل على ٧٠ ألف عميل .. قالوا إن ٣٩٪ من أسباب شراءهم من شركة معينة هو بسبب كفاءة البياع .. النسبة دي كانت أهم من المنتج نفسه والخدمات الي بتتقدم معاه وسعره .. انت أهم سبب للشراء في الوقت الي احنا فيه دلوقتي .. لازم تكون الشخص الي يقدر يثق فيه .. لإنك متحمس للمنتج الي بتبيعه متحمس للشركة بتاعتك متحمس لمصلحة العميل متحمس لنجاحك .. محدد في كل كلمة بتقولها وفي كل وعد بتقوله مركز على هدفك .. دايما بتضيف ليه وبتسيب انطباع احترافي .. قوي في منتجك وفاهمه كويس ليك معرفة في السوق والي بيحصل فيه وفاهم كويس المنافسين بتوعك والفرق بينك وبينهم وفاهم الي هيستفيده عميلك من الي انت بتبيعه.
