https://www.facebook.com/114037908436480/

Nursing awareness, Luxor (2026)

28/08/2023

Part1: 💔
خلينا نتعرف انهاردا عن مرض مشهور جدا وهو الذبحة
الصدرية اولا هي اي اصلا:👀
عبارة عن الم في منطقة الchest ناحية القلب ودا نتيجة لعدم وصول كمية كافية من الدم الغني بالاوكسجين لعضلة القلب وبالبلدي بيجي المريض بيقول انا حاسس "بنغزة" وقلبي وجعني ي دكتور🥺💔
طب اي هي انواعها 🗣️
📌unstable angina;,ودي اخطر انواع الذبحه الصدرية وممكن تدل علي خطر للاصابة بالازمه القلبية ،
بتحصل فجأه ومبتخفش بالراحه 🤷
ومن اعراضها
🔸الم شديد في وسط الصدر وبيستمر لاكتر من نص ساعه

📌الذبحه الصدرية الوعائية الدقيقه:
ودي تاني نوع وبتحصل في اوقات الضغوط النفسية كأول مره،او عند التعب واضطراب النوم وقلة الراحه

ومن اعراضها:
🔸الم في الصدر لأكثر من ١٠ دقايق
🔸الم شديد واكثر حده

نتمني الصحه والسلامه للجميع ✨
♥️✨
✨

10/08/2023

هنتكلم دلوقتي عن الضغط المرتفع....... 📌
** أولاً بنوصف الحاله إن عندها ضغط مرتفع لما تكون قراءة الضغط 130 / 80 ملم زئبقي أو أعلى.
مع العلم ان ضغط الدم الطبيعي 80/120 ملم زئبقي أو أقل.

**طيب إيه اللي ممكن يظهر على مريض الضغط المرتفع؟ 🤔
معظم المصابين مش بيظهر عليهم اي علامات او أعراض لكن البعض منهم ممكن يعاني من :
-صداع.
-ضيق في التنفس.
-نزيف في الأنف.
والاعراض دي بتحصل لما يرتفع ضغط الدم لمرحلة خطيره.

**طب ايه هي اسبابه بيجي من ايه يعني؟
السبب الرئيسي هو زياده حمل الشغل على القلب الأوعية الدموية ويخليها تشتغل باكبر جهد وأقل كفاءة وده يؤدي الي ارتفاع ضغط الدم.

🔷ايه المضاعفات اللي ممكن تحصل لمريض الضغط المرتفع لو مش اتعالج؟؟

🔹تمدد الأوعية الدموية.
🔹السكتة الدماغية.
🔹فشل القلب.
🔹الذبحة الصدرية.
🔹الفشل الكلوي.
🔹فقدان البصر (العمى).
🔹العجز الجنسي.
🔹مرض الشرايين الطرفية.
🔹مشاكل في الذاكرة والتركيز.

🔶طب نعالج ارتفاع ضغط الدم إزاي؟

لازم يكون للمريض نمط حياة صحي زي
🔸اتباع نظام غذائي صحي.
🔸ممارسة النشاط البدني.
🔸المحافظة على وزن صحي.
🔸السيطرة على القلق والتوتر.
🔸الامتناع عن التدخين وشرب الخمور.
🔸التقليل من تناول الكافيين.
🔸مع استخدام أدوية لعلاج ارتفاع ضغط الدم.

وبس كدا بنتمني الصحه والسلامه للجميع ✨
🗣️❤️
✨

05/08/2023

Part1:سلسلة أمراض #الضغط
كتير بنتعرض لحالات إغماء وتعب وإرهاق وغالبا بيكون السبب الضغط المنخفض فتعالو نشوف أي هو؟👀

أولا الطبيعي في قياس ضغط الدم 120/80
الضغط نقدر نقول عليه منخفض لما يكون90/60
الانقباضي (البسط)90والانبساطي (المقام)60

طب بيجي المريض ازاي ؟🤷
دوخه وتعب وإرهاق
رؤية مش واضحة النبض ضعيف بس سريع
وكمان صداع وشعور بالغثيان🔸

طب بيجي من اي؟🥺
ممكن من
🩸اتساع الأوعية الدموية
🩸الجفاف الناتج من القئ
🩸نقص حجم الدم
🩸نقص فيتامين B12
🩸 الإفراط في ممارسة الرياضة
🩸مشاكل في القلب او في الغدد الصماء....إلخ

من أنواع ضغط الدم المنخفض🔴

📌ضغط الدم الانتصابي
ثانية واحدة دا بسيط عارف لما تكون قاعد في وضعية وفجأة تقرر تغيرها فتحس بدوخه بس كدا هو دا🤝
لذلك بننصح بتغير الوضعيه علي مراحل افضل🔻

📌انخفاض ضغط الدم بعد الاكل
ودا بيكون شائع في كبار السن الي عندهم امراض في الجهاز العصبي اللإرادي بعد الاكل بساعه او اتنين🔻

🔸طب اي الحل؟
لو انت بالفعل مريض ضغط فمن الأفضل ترجع للدكتور علشان تغير الأدوية لحاجه تناسب حالتك✨

بس كمان من افضل طرق العلاج اتباع نمط حياة سليم
زي🙃
✅انك تشرب مياة كتير ودا علشان تحمي نفسك من ضغط الدم المنخفض الناتج عن الجفاف
✅انك تبدأ تقسم يومك بوجبات صغيرة ودا عشان متاكلش كمية كبيرة وضغك يوطي فجأه زي ما وضحنا
✅تتحكم في مشاعرك زي الخوف الشديد ومتبالغش
✅تحاول تغير وضعيتك ببطء
وبس كدا بنتمني الصحه والسلامه للجميع ✨
🗣️❤️
✨

03/08/2023

كتير سمعنا عن مقاومة الأنسولين لكن مبنكونش عارفين اي هي بالظبط وممكن تؤدي لاي؟🤷

بسم الله 🗣️
طيب خلينا عارفين انها حالة بيدخل فيها الجسم وبتكون مقدمات لامراض كتير مش السكر بس وهنا بتكون استجابة الجسم للانسولين اقل من الحد المطلوب ودا بقا ممكن يكون عيب في المستقبلات،، فالانسولين والسكر بيكونوا نسبتهم عاليه في الدم.🩸

اعرف ازاي ان عندي مقاومة الأنسولين ؟🙉
بالتحليل🤝
أو انك تلاحظ اعراض معينه زي👀
١_محيط الخصر كبير سواء عند الرجال او النساء
٢_قراءة الضغط 80/130 او اعلي
٣_مستوي جلوكوز الدم اثناء الصيام اكتر من 100mg/dl
٤_مستوي الدهون الثلاثيه أثناء الصيام يكون اعلي من 150mg/dl
٥_او بقع في الجلد من اللون الداكن ف منطقة الرقبة او بين الفخذين او الاندر ارم

طب هي بتيجي من اي عشان ناخد بالنا؟🤨
١_انك تاكل كميات عالية من السعرات الحراية او كمية كربوهيدرات كتير ،عيش وسكر ومكرونه😂
٢_المنشطات بتأثر طبعا
٣_لو عندك مرض تكيس المبايض
٤_تخزين الدهون في الكبد بشكل زايد
٥_زيادة مستوي الأنسولين في الدم
بس اي يعني هيجيني السكر مش مهم!🙂

لااا خد تعالي هناك مضاعفات جمه غير السكر عزيزي القارئ🥺
خد عندك
١_ذبحة صدرية
٢_احتشاء ف عضلة القلب
٣_مرض كلوي
٤_سكتة دماغية
٥_مشاكل في العين
٦_وزهايمر
٧_وسرطان

نيجي لاهم سؤال اعالج نفسي ازاي واحمي نفسي بأي؟

صلوا علي النبي كدا لو روحت لدكتور غالبا هيوصف حاجتين:
1-Thiazolidinediones:ودي ادوية عشان تحسن من حساسية الجسم للانسولين
2- Biguanides: بتحسن من مقاومة الجسم للانسولين

خد تعالي رايح تشتري اي مينفعش انا بقلك المشهور لكن طبيعة كل حد مختلفه والي بيحدد دا الدكتور اكيد✨

طب متيجي نشوف الطبيعة بتقول اي واحنا نقدر نعمل اى؟
1-انك تمارس الرياضة✅
2-وتحاول تخفف وزنك✅
3-وتهتم باكلك✅
4-واديني في الخضار والحبوب الكاملة والمكسرات والفاكهه بس متدوسش عشان فيها سكر،،
شوية سمك علي بروتينات خالية من الدهون كدا انت زي الفل وكمان اهتم بمضادات الاكسدة زي الثوم وخل التفاح وكفاية تدخين لحد هنا ✅
بنتمنى السلامة والصحة للجميع✨
🗣️❤️
✨

31/07/2023

Part1:طب ازاي؟ #عملي

لحد انهاردا وفي ناس بتشكي من قياس السكر وأجهزته المختلفه هنحاول نوضحه فتابعوا الصور دي :♥️

29/07/2023

Part4:من سلسلة أمراض #السكر
مضاعفات السكر احم🗣️
هنتكلم عن غيبوبة السكر....... 📌
**اولاً غيبوبة السكر دي هي اضطراب يؤدي الي الإغماء " يعني النقص الشديد او الزياده الشديده في سكر الدم عند مرضي السكر بيعمل غيبوبه سكر" سهله أهى 🙂

لو شخص اصيب بغيبوبة سكر بيبقي فاقد للوعي يعني مش قادر يستجيب للأصوات والمحفزات اللي حوليه ومش بيكون قادر يفوق حتي ولكنه علي قيد الحياه " عايش يعني الحمد لله" .....

**نيجي بقي للأعراض ⏳
احنا قولنا ان غيبوبة السكر بتحصل لو ارتفع او انخفض مستوي السكر في الدم بمقدار خطير 📌
🔹لو كان مرتفع للغايه ↗️↗️
- بيكون فيه عطش شديد
- كثرة التبول
- الرؤية مشوشه وتعب وصداع
- غثيان وقيء .......... إلخ🚶‍♀🚶‍♀

🔹لو كان منخفض للغايه ↙️↙️
- بيكون فيه ارتعاش
- قلق و تعب
- تعرق وجوع
- دوخة وصداع........... إلخ🚶‍♀🚶‍♀

نكمل في الكومنتات ♥️
بنتمنى الصحة والسلامة للجميع ✨
🗣️
✨

28/07/2023

Part3:من سلسلة أمراض #السكر
اعراضه احم🗣️
طب اي الأعراض المتعارف عليها حتي الان؟
المريض يشكي انه
١_عطشان
٢_تعبان
٣_كثرة التبول
٤_فقدان الوزن ف النوع التاني
٥_اكتسابه للوزن ف النوع الاولاني
٦_ممكن يحس بضعف ف الرؤية..إلخ

🩸وبم ان التقديرات بتشير إلى إصابة 422مليون شخص بالغ بالسكري على الصعيد العالمي في عام 2014
مقارنة بإصابة 108 مليون شخص في عام 1980 علينا ان نهتم بالامر عزيزي القارئ وندور علي الحماية الفعاله 🤷

طب ونحمي نفسنا ازاي ؟👀
اولا نهتم بالتغذية السليمه والي فيها خضروات وفاكهه ونبعد شوية من النشويات ✅
وكمان نهتم بالرياضة حتي لو بالمشي ربع ساعه كدا
وبس كدا بنتمني الصحه والسلامه للجميع✨
🗣️
✨

27/07/2023

Part2:من سلسلة #السكر
ومن هنا هنتعرف أي انواع السكر ؟

🩸أولا type 1 diabetes
ودا غالبا بيجي للأطفال وحتي في بعض الكتب متسمي علي اسمهم لأنه أكثر شيوعا عندهم ونسبة وجود السكر دا هي 10٪

طب أي الي بيحصل هنا ؟
الي بيحصل ان في مرض مناعي عند المريض بمعني ان الخلايا الي خلقهالنا ربنا عشان تدافع عننا اتقلبت ضدنا واصبحت بتهاجم خلايا البنكرياس الي المفروض بتطلع لينا الانسولين ودا هيؤدي إلي نقص الأنسولين بشكل حاد

وغالبا علاج النوع دا بأي ؟

بالظبط كدا بندي انسولين سهله✅

عشان تعرفوا باقي الانواع تابعوا الكومنتات ♥️
🗣️
✨

27/07/2023

Part 1:من سلسلة أمراض #السكر

مرض من أكثر الأمراض شيوعاً 👀
تعالوا نشوف هو أي مرض السكر بكل بساطه ونعرف شوية basics عنه ؟
احم🗣️
⬅️ أولاً هو ارتفاع نسبة السكر في الدم طب دا بيجي من اي؟
براحه كدا احنا عارفين ان هرمون الانسولين هو الي بيساعد في تنظيم السكر في الدم ودا عن طريق إما أنه يستخدم الجلوكوز (مصدر السكر )ويدخله الخلايا علشان يتحرق ونعرف نشتغل ونكتب كومنت لذيذ 🤝
أو أنه يتخزن
من الأخر مينفعش يبقا السكر موجود في الblood stream 🤷

** طيب أي المشكلة عند مريض السكري؟

🔹أولا إما أن يكون عنده نقص في نسبة الأنسولين
🔹أو إن في أنسولين بس الجسم مش عارف يستخدمه صح
وفي كلا الحالتين دا هيؤدي إلي تراكم الجلوكوز أو السكر يعني ف الدم 🌚

🩸بس كدا بنتمني الصحه والسلامه للجميع ❤️✨

🗣️♥️
✨

27/07/2023

🔻لحد انهاردا وناس كتير متعرفش أبسط المعلومات عن الأمراض والى لو في وعي كويس بيها احتمال كبير تقل أو متبقاش موجودة أصلا لذلك كان من الواجب علينا نعمل صفحة للوعى تخاطب كل الأجيال بإذن الله ودا على قدر العلم الي اخدناه والى هيمسكوا الصفحه دي طلبة تمريض جامعة جنوب الوادي ♥️
علا محمد وأيه محمد جزاهم الله خيرا وبارك لهما في المجهود♥️

🗣️♥️
✨

Nursing awareness

28/08/2023

10/08/2023

05/08/2023

03/08/2023

31/07/2023

29/07/2023

28/07/2023

27/07/2023

27/07/2023

27/07/2023

Address

Website

Alerts

Shortcuts

Share

Category

Listing takedown request