17/01/2025
من المؤكد ان كل ولي امر عاوز ابنه احسن واحد .. وعمرة ما يبخل عليه بحاجه ودايما بيدور علي كل حاجه عشان يكون احسن وافضل ومن هنا هقولك ازاي توصلي المعلومة لطفلك..
سواء عاوزة تفهمي طفلك بس أو حتى عاوز بعد ما يفهم يفتكر المعلومة.. ويحفظها لازم تعرفي ازاي توصليهاله وتفهميها له..
يعنى عشان طفلك يفتكر معلومة لازم يبقى فاهمها كويس جدا..
فعشان نعمل كدا دي بعض النقط اللي ممكن تساعدكم..
بس أولا لازم نعرف إن تطبيق النقط دي لازم يبقى بطرق جديدة علي الاقل للطفل او الطالب..كده ومش تقليديه..
احنا الكبار بنمل.. يبقى الأطفال مش هيملوا..
فعشان كده بقدر الإمكان نحاول نطبق النقط دي بشكل مسلي لطيف يخليهم يحبوا استقبال المعلومة..
يلا بينا..
. لازم يذاكر هو واخواته في وقت واحد في هدوء بدون مشتتات يعني ميجيش الاب او الام شغالين تلفزيون قاعدين قبالهم آل بيرقبوهم ويخدوا بالهم يعني.. لا كده غلط.. وميكنش واحد بيذاكر وواحد فيهم ماسك التليفون او بيلعب..
..استخدمي الصور والرسومات في توصيل المعلومة هو ده من طرق صعوبات التعلم واي كان هي..بنعلمه حاجه حاجه بطريقة الكروت.. والاجدد لو تعلميه بطريقه صور المنهج.. فيه صور كتير زيها زي الكروت.. او اقل شويه..
يعني لو هنعلمهم عن الحيوانات أو النباتات مش شرط نعلمهم بطريقة.. تقليدية وتلقين المعلومة..
ممكن نقدملهم حاجة فيها صور عنهم وكمان مسلية وفيها لعب..
. ولو المعلومة سبب ونتيجة يبقى احكيها بتسلسل منطقي السبب وبعدين النتيجة..
وكمثال على كده طريقة تقديم المعلومات في كتيبات اسألني يا عبقرينو او اي كتاب المدرسه فيه قصص وبألوان جميلة.. هتكون اقرب ليه وكمان مش هضيعي وقت علي الفاضي..
. لو المعلومة كذا نقطة متشابكة..اشرحي كل نقطة لوحدها وبعدين اربطيهم ببعض..
.حفزيه هو اللي يستنتج المعلومة..يعني أقوله تفتكر النقطة دى ليه..وجت ازاي..
ايووون...عارفين لما الطفل هو اللي يجيب المعلومة بنفسه عمره ماهينساها..
. لو أخد الدرس بالفعل في المدرسة..يبقى قبل بداية المذاكرة اسأليه.. احكيلي كدا بيتكلم عن ايه.. في دقيقتين من غير تفاصيل..دا هيساعده في تنشيط خلايا مخه قبل المذاكرة..
. لو بيذاكر مسائل رياضية..الأفضل يحل كتيير عليها بنفسه بعد ما يفهمها..والأحلى والأحلى بعد ما يخلص مذاكرة تطلبي منه يخترع هو مسألة زي اللي حلهم عشان أنتِ تحليها.. وممكن تعملوا مسابقة بينكم مين يحلها الأول.
. وبعد ما ذاكر وخلص كله تمام .. ممكن لو لسه عينه ماقفلتش من النوم.. خليه يشرح لك المعلومة تاني سريعا.. ويا سلام لو بقلم وسبورة وعاش الدور كأنك تلميذته..صدقينى عمره ما هينسى إن شاء الله..
وبكده تكون المعلومة وضحت وفهمناها..
12/12/2024
07/11/2024