مستر محمود عبدالنبي _ Mr.Mahmoud AbdEl_naby

التعليم للأسف بقى عند ناس كتير عبارة عن شوية جروبات واتساب وفيسبوك… وتطبيل وتضليل!

والمصيبة إن كل واحد شايف نفسه صح، ومقتنع إنه مفيش زيه اتنين… وعايش الدور!

يا ابني، الناس بتعيش وتموت ولسه بتتعلم.
واللي فاكر إنه وصل لمرحلة إنه مبيغلطش أو مبيحتاجش يراجع نفسه، فهو لسه في أول الطريق.

والأخطر إن الإنسان ممكن يبرر لنفسه أي حاجة؛ حتى الغلط الكبير، ويقنع نفسه إنه صح… ده تاجر المخدرات والقاتل واللي مش متربي بيقنع نفسه انه صح 🖐️
علشان كده مراجعة النفس ومراقبة ربنا في كل تصرف أهم من أي نجاح أو شهرة أو فلوس.

أنا مش ضد إن أي حد ينجح أو يعمل دعاية لنفسه، بالعكس… كل واحد من حقه يسعى ويكسب ويحقق نجاح.
لكن انجح بما يرضي الله، وخلّي عندك حدود ومبادئ.

لأن مش كل حاجة فلوس…
ومش كل وسيلة مباحة علشان نوصل لهدفنا.

وفي فرق كبير جدًا بين الدعاية وبين التضليل، وبين إنك تعرض شغلك باحترام، وإنك تحاول توهم الناس إنك الوحيد اللي فاهم والكل حواليك فاشل!

والناس في إسماعيلية عارفة بعضها كويس… وكل واحد عارف مين بيشتغل بضمير، ومين همه الأول والأخير الفلوس.

فبلاش نعيش دور الفضيلة… لأن الحقيقة في النهاية بتبان.

والأهم من كل ده:
يا أولياء الأمور، فوقوا لمصلحة ولادكم.
متخلوش شوية سماسرة أو صفحات وجروبات مجهولة يحددوا لكم مين الأفضل ومين الأحق بثقة أولادكم.

اسألوا… تابعوا… قارنوا… وشوفوا مستوى الطالب وتعامل المدرس وأسلوبه ونظامه، مش عدد الجروبات ولا حجم التطبيل.

الفلوس بتروح وتيجي… لكن أثر الإنسان وضميره وسيرته بيفضلوا.

وفي النهاية…
مش كل مشهور شاطر، ومش كل شاطر محتاج يصرخ علشان يثبت إنه شاطر. 🖐️

ربنا يهدينا ويرزقنا جميعا الأخلاص في القول والفعل والعمل 🤲

🎓 ألف مبروك لطلاب الثانوية العامة.. ❤️
في ناس النهارده فرحتها كبيرة، وفي ناس كانت بتتمنى نتيجة أحسن... وده طبيعي.

لو ربنا كرمك بمجموع كنت بتحلم بيه، افتكر إن النجاح الحقيقي مش في الرقم بس، النجاح الحقيقي إنك تفضل متواضع، وتجتهد في المرحلة اللي جاية بنفس الحماس.❤️
ولو النتيجة ماجتش زي ما كنت متوقع، متخليش رقم يحدد قيمتك أو مستقبلك. النتيجة محطة، لكنها مش نهاية الطريق. ناس كتير بدأت من نتائج عادية، ووصلت لأماكن عمرها ما كانت تتخيلها.
افتكر دائمًا: المجموع بيفتح باب... لكن الاجتهاد والأخلاق والإصرار هم اللي بيخلّوك تكمل المشوار.❤️

أتمنى لكل طالب وطالبة التوفيق في الخطوة القادمة، وربنا يجعل النجاح بداية لرحلة أجمل، ويعوض كل مجتهد خيرًا.
ألف مبروك لكل الناجحين... وربنا يكتب الخير للجميع. 🌹🤍

لما الرجولة تغلب الشهرة مهما كنت مشهور بتفضل الأصول هي الأساس ♥️

الراجل المحترم ده كان في لقاء تليفزيوني، والمذيعة سألته

إزاي الشهرة والسوشيال ميديا غيّروك؟

رد بكل تلقائية وقال إن الشهرة ما غيرتش فيه حاجة، وإنه لسه بيتعامل مع نفس مدرس الاحياء والعلوم اللي كان مع أولاده قبل ما يبقى مشهور.

وآخر مرة كنت عنده من يومين، بظبط مواعيد الأولاد وبحجز علوم متكاملة معاه لابنى ف اولي بكالوريا والتانى بحجزله احياء تالتة ثانوي قبل ظهوره في اللقاء ده 😎🔥

ولما اتسأل هو مين ، قال

أ. محمود عبدالنبي

مدرس الاحياء والعلوم المتكاملة

وقال على فكره ف خبر حلو هو لسه فاتح حجز في الإسماعيلية

ربنا يكرمك يا اسلام يا اخويا❤️❤️

أنا معنديش مشكلة أدي دروس ببلاش طول ما أنتوا شايفين إن المدرس المفروض يتصدق بالعلم ويعيش على البناء الضوئي 🖐️

بس إحنا بندي عيال كل المهن تقريبا
ممكن برده مياخدوش مننا فلوس ونعيش كلنا مرتاحين

الدكتور بروحله كشفه ٦٠٠ ج وبدفع
والسباك بيصلحلي الماسورة ب ٥٠٠ ج وبدفع
والنجار بياخد مني ٢٠٠ ج لما بيدق مسمارين
والسوبر ماركت والجزارة والمواصلات وغيره وغيره ..

لو بطلوا ياخدوا مننا فلوس هنفتح كل المراحل مجاني ♥️

📢 إلى أبطال دفعة ٣ ثانوي الجداد.. رسالة هامة جداً! 🩺🧬
عارفين الشعور اللي جواكم دلوقتي؟
"الأحياء في ثالثة ثانوي كبيرة"، "المادة مليانة تفاصيل"، "دي أول مرة ناخد أحياء ".. صح؟
خد نفس عميق.. وكوباية الشاي في إيدك.. وتعال أقولك كلمتين من الآخر:

الأحياء مش مادة بتتحفظ، الأحياء هي قصة جسمك أنت وكيفية عمله وكلمتى دايما والدفعات القديمة تشهد ( تركيب ووظيفة )😅

هي المادة الوحيدة اللي وأنت بتذاكرها هتبص لإيدك وتقول "سبحان الله، هي الحكاية ماشية كده ازاي؟!🤩

ليه الأحياء معانا هتكون أسهل وأمتع مادة؟ 💡
مش هتحتاج تبذل مجهود في الخيال: هنبسط كل تفصيلة وكأنك بتتفرج على فيلم وثائقي ممتع، مش درس ثقيل على قلبك.
من أول حصة هتحس بالفارق: أوعدك إنك هتحس إنك بتاخد أحياء من وأنت في ابتدائي، المادة هتدخل عقلك بسلاسة ومن غير كلكعة.
الفهم قبل أي حاجة: هنربط كل معلومة بالواقع، فالمعلومة هتلزق في مخك من غير ما تقعد تكررها ١٠٠ مرة.

📌 من الآخر كده:
مادة الأحياء مش جاية تعقدك، دي جاية تقفل بيها درجات وتحسن بيها مجموعك وأنت مستمتع.
جهز كشكولك، ورتب دماغك، وسيب الباقي علينا.. السنة دي الأحياء في جيبك! 💪✨
جاهز يبطل لنبدأ الرحلة؟😉🔥

قبل ما تحجز عند أي مدرس... اسأل نفسك سؤالًا واحدًا:
أنا باختار بعقلي... ولا باختار بسبب الضجة؟🤔

في كل موسم دراسي... بتبدأ نفس القصة للاسف🤏
أكونتات فيك تمدح مدرسًا وكأنه الحل الوحيد. وجروبات ظاهرها مساعدة الطلبة وحقيقتها توجيههم لمدرس معين لأن وراءها مصلحة 👌وتعليقات متكررة بنفس الأسلوب حتى أصبح من الصعب تمييز الرأي الحقيقي من الإعلان المقنع.
والأخطر من كل ده... فكرة أن "المدرس المشهور هو أفضل مدرس".
وده مش شرط يكون صحيح.
كثرة عدد الطلبة لا تعني دائمًا جودة الشرح. ومش معنى إن عند مدرس آلاف الطلاب يبقى هو الأنسب ليك.
أي مدرس عنده أعداد ضخمة طبيعي يطلع من عنده أوائل... لكن طبيعي أيضًا يطلع من عنده طلبة راسبة أو شايلة المادة.
فالنجاح هنا مش دليل كافٍ... زي ما الفشل برضه مش دليل كافٍ.
الطالب الشاطر غالبًا هيحقق نتيجة كويسة مع أي مدرس يعرف يستفيد منه. أما الطالب اللي محتاج متابعة وفهم ومحاسبة... فممكن يضيع وسط الزحام مهما كان اسم المدرس كبير.
علشان كده... اختيار المدرس ما يكونش بناءً على:
❌ عدد المتابعين.
❌ عدد الطلبة.
❌ التريند.
❌ كلام الجروبات.
لكن يكون بناءً على:
✔️ أسلوب الشرح.
✔️ نظام المتابعة.
✔️ اهتمام المدرس بكل طالب.
✔️ آراء طلاب حقيقيين تعرفهم وتثق فيهم.

اسم المدرس ممكن يجذبك... لكن اللي هيحدد مستواك في النهاية هو المكان اللي هتلاقي فيه فهم، واهتمام، ونظام يناسبك.
اختار المدرس اللي يناسبك أنت... مش المدرس اللي الناس كلها بتتكلم عنه.🖐️