مركز الدالي - Eldaly Center

الخايف بيطمن مش بيتعاقب

الاطفال الخجولة الي مش عارفة تكسر خوفها ..
براحة عليهم ..
واحدة واحدة
بالتدريج
مش مرة واحدة

مينفعش ارميهم وسط مخاوفهم واقولهم اتعاملوا
ولو معرفوش اعاقب !
دا هيعمل مشاكل كثير بعدين

⬅️اولهم الكذب
لانه عايز يثبت ليكم انه تخلص من خوفه
وبقى ولد شجاع زي ما انتم عايزين
عشان مش يتعاقب ‼️
لكن مش عشان هو فعلا تخلص من خوفه

الطفل الخجول الخايف محتاجين نمشي معاه بالتدريج
واحدة واحدة لحد ما يطلع من منطقة الخوف
لمنطقة اجرب وبعدين منطقة أنا قادر اعملها لوحدي بدون خوف او قلق
🧑‍🧑‍🧒‍🧒

ربنا يعلمنا ويقوينا على حسن تربية ولادنا
تربية سوية

معلومة سريعة:
- عمرك ما هتعرف تنطق الطفل كلمات وجمل وكده غير لما يبقي عنده مهارات ماقبل اللغة ( تواصل بصرى وتقليد واطاعة أوامر).

لما ابنك يشبط في لعبة في الشارع ويعيط تعملي ايه ؟
اولا مهم تعرفي ان دماغه لسه بيتكوّن… ومشاعره أكبر من قدرته على التحكم فيها

خليني أقولك علميًا إيه اللي بيحصل عشان مهم تكوني مستوعبه دماغه

الطفل في السن الصغير (خصوصًا من ٢ لـ ٦ سنين) بيكون الجزء المسؤول عن التحكم في المشاعر واتخاذ القرار في المخ (prefrontal cortex) لسه ما اكتملش
وفي نفس الوقت الجزء المسؤول عن المشاعر (amygdala) شغال بكفاءة عالية

يعني ببساطة
هو “حاسس جدًا و عنده فرط مشاعر”… بس “مش عارف يتصرف”

فلما يشوف لعبة ويشبط فيها

هو حرفيًا شايف إنه محتاجها حالًا… ومش قادر يستوعب فكرة الرفض أو التأجيل

وده اللي بيعمل نوبة الغضب

قبل ما ننزل من البيت
اتفقوا سوا بشكل واضح
يا إما مش هنشتري خالص النهارده ونكون اخدين بديل لعبه من البيت معاه
يا إما هنشتري حاجة واحدة بس

والأهم
لو ناوية تشتري
ابدئي اليوم بدخوله مكان يناسب قدرتك المادية
وخليه يختار منه لعبة واحدة
كده هو شبع جزء من رغبته من غير ما يتحط في مواقف ضغط بعد كده

طيب نتصرف إزاي في الموقف نفسه؟

أول حاجة
اثبتي واهدّي نفسك
لأن الجهاز العصبي للطفل بيتنظم من خلالك
لو عليتي صوتك… هو هيتصعد أكتر

تاني حاجة
انزلي لمستواه و بصي في عينه
وقولي له جملة فيها احتواء
“أنا عارفه إنك نفسك فيها أوي”

و اعمليله validation او اقرار بمشاعره
ودي أول خطوة لتهدئته

تالت حاجة
حطي حد واضح وثابت
“بس النهارده مش هينفع نشتري”

وبلاش لوم و نصايح وقت نوبة الغضب لأن مخه أصلًا مش مستعد يسمع منطق وقت نوبة الغضب بنكون جنبه لحد ما يهدي او بناخده في حضننا لو قابل ده و بعد كده بنقترح عليه الحلول دي

رابع حاجة
اقترحي بديل
“نصورها ونحطها في wish list ونجيبها بعدين” مثلا اخر الاسبوع
أو
“نختار لعبة واحدة بس كل أسبوع”

ده بيعلّمه مهارة تأجيل الإشباع
وهي من أهم مهارات النجاح في المستقبل

خامس حاجة
لو دخل في نوبة غضب
ما تعاقبيهوش ولا تكسفيه قدام الناس
خليه يهدى الأول
لأن المخ وقتها في وضع fight or flight

وأهم نقطة
لو استسلمتي مرة تحت الضغط
المخ بيربط إن الصريخ يعني تحقيق الطلب
فتتكرر بشكل أقوى كل مرة

وفي نفس الوقت
لو انتي أصلًا معندكش مشكلة تشتري له حاجة كل مرة
مفيش مشكلة
بس خليها حاجة بسيطة تناسب وضعك المادي
من غير ما تضغطي نفسك
ولا تحمّلي نفسك فوق طاقتك

مهم جدا لو الطفل مش هيستوعب خطوه اعملي غيرها من اللي مكتوب ♥️

وبجد أهم حاجة تبقي فاهمة إن كل الأطفال في السن ده بيعملوا نفس التصرف تقريبًا، لو نزلتي أي مول أو مكان فيه لعب هتلاقي عدد كبير جدًا من الأطفال عندهم نوبات غضب وعايزين كل حاجة يشوفوها، وده طبيعي جدًا ومش معناه إن ابنك صعب ولا إنك مقصّرة، فمتتكسفيش من نفسك ومتخليش المواقف دي تكرهك في الخروج، اعتبريه جزء طبيعي من المرحلة وغالبًا لازم يحصل، والمهم مش إننا نمنعه خالص قد ما المهم إزاي نتعامل معاه لما يحصل، بطريقة رحيمة وهادية وإنسانية تعلّم الطفل التعبير عن مشاعره من غير ما نضغط عليه

اوعوا يا جماعة تربوا ولادكم وانتم مش بتعلموهم
انهم لازم يبروكم !!
اوعوا تربوا ولادكم تحت بند
أنا بربي وخلاص ومش مستنيه ولادي
يسمعوني ولا يهتموا بيا

دا حقك الشرعي
وحقه عليكي انه يفهم زي ما ليه حقوق⬅️ عليه واجبات ،
وتربية الطفل انه مالوش اي مسئوليات بتطلع اطفال بتكبر بتكون انانية ! شايفه انها طول الوقت تاخد ومتديش …

✅علميهم يقولوا ليكي تسلم ايدك
✅علميهم يشيلوا معاكي
✅علميهم انتي ليكي طبق وهما ليهم طبق
علميهم انهم ليهم دور في البيت معاكي
مش قاعدين حطين رجل على رجل وانتي الي شايلة كل حاجة لوحدك

بس مهم جدا جدا جدا قبل ما تطلبي منهم الود والاحترام والبر
والتعاون وكل الي فوق دا

اديه انتي الاول عشان يتعلموا منك وتكوني فعلا اديتي الأمانة الي ربنا طلبها منك في حسن حبهم رعايتهم وتربيتهم 💙

كل عام وأنتم بخير
❤️

نصايح لتفادي مشكله. تاخر. الكلام. والحاجه. لجلسات تخاطب

١-هاتي قصص مصوره واحكيها ليه
٢-العاب والعبي معاه واتكلمي معاه
٣-قولي اسم الحاجه صح بلاش امبو و مممم قولي اشرب اكل
٤-قللي وقت التلفيزيون والشاشات بقدر الامكان
لو في اطفال خليه يلعب معاهم
٥-اتكلمي معاه واشركيه ف شغل البيت هات كذا وخد كذا
٦-باباه ياخده الشارع والمسجد
٧-من سن ٣ نزليه حضانه
٨-بتشتري شئ قولي ليه اعطي الفلوس لعمو
٩-طول مانتوا ف الشارع فهميه ايه ده وده مبني ايه بنعمل فيه ايه وده ايه .
١٠-اهتمي بيه وسيبي التليفون ابوس ايدك✋😊
مركز الدالي - Eldaly Center
للتواصل 012 81382164

⭕ ازاي تعرف ان ابنك محتاج جلسات تخاطب 👇
لما تلاقي الحروف بتطلع غلط
لما تلاقي الطفل مش عارف يعبر عن احتياجاته بجملة
لما ابنك يوصل لسن 3 سنوات ولسه مش بيتكلم
لما ابنك يقول كلام كتيير جدا وغير مفهوم
لما ابنك ميعرفش المفرد من الجمع
لما ابنك ميعرفش يسرد قصه او يسرد أحداث اليوم
لما ابنك ميعرفش يتكلم بطلاقة ( يتهته في الكلام)
لما ابنك يتكلم كلمات قليله جدا غير مناسبة لعمره
لما ابنك ميعرفش يستخدم الضمائر في جملة
لما ابنك ميعرفش يجاوب على الأسئلة التي تبدأ ب ( من/ أين / ماذا / لماذا )
___________________________

⭕ امتي الطفل يتكلم ؟؟؟؟؟👉
وامتي أعرف انه متأخر عن الكلام ؟؟؟؟؟👉

*** هبدأ اليوم بحاجه بسيطه .😉😉

1- من 8:6 شهور بيبدأ المناغاه .

2- من 10:9 شهور بيبدأ البأبأه و"هي بابابابا - ماماماما - داداداد" .

3- 12 شهر بيبدأ يقول أول كلمه ومثال: بابا.

4- من 1:1 يقول كلمه مفرده من " 15:10"كلمه.

5- من 2:2 يقول جمله من كلمتين " 250:200" كلمه.

6- من 3:3 يقول جمله من 3 كلمات "5000:3000" كلمه .
"ملحوظه اكيد مش هعقد كل مايقول كلمه لا

⭕نصحصح بقا عشان المقال ده مهم لكل أم 😃
ازاى تنمى مهارة الكلام عند طفلك من الولادة لحد سنتين !
⬅️اتكلمى مع طفلك كتير وابتسمى فى وشه.
⬅️امنعى طفلك عن التليفزيون أول سنتين.
⬅️تابعى حركاته ونظراته وأصواته واشاراته وشاركيه فيها.
⬅️غيرى دايما نبرة صوتك مع طفلك.
⬅️نشطي عنده مهارة لفت الانتباه بأنك تعملي أصوات حواليه وتقلدي أصوات ويسمع صوت اخواته أو صوت موبايل أو صوت حيوانات أو طيور.
⬅️قلدى حركاته وأصواته عشان تشجعيه يكررها.
⬅️خلى عندك روح كدا وانتى بتلعبى معاه وكاريزما عشان تجذبى تركيزه وانتباهه.
⬅️العبى معاه بألعاب وأشكال مختلفه فى الشكل والحجم.
⬅️كل كلمة جديده ينطقها افرحي بيها أوى وحفزيه وشجعيه عشان يكررها ويزود عليها.
⬅️اديله فرصة عشان التعبير اللفظى يزيد عنده متقاطعيش كلامه وتقوليله اسكت دوشتنا.
⬅️خلى دايما عيونك فى عيونه وهو بيتكلم معاكى.
مركز الدالي - Eldaly Center
#تخاطب
#تنميةمهارات

بمناسبة قضية التحرش الجديدة
ازاي تعرفي إن ابنك اتعرض او بيتعرض للتحرش بنفسك وبأسئلة سهلة

أكتر غلطة بتقع فيها الأمهات إنهم يسألوا الطفل بشكل مباشر
حد لمس جسمك؟ حد ضايقك؟
والطفل ساعتها يا اما يتخض يا اما يتكسف ومايعترفش لو كان لا قدر الله بيتعرض لحاجة فعلا

علشان كده المهم نسأل بطريقة آمنة مطمئنة وما فيهاش إيحاء

⸻

السؤال الأول
مين اكتر حد بتحب تلعب معاه ومين اقل حد بتحب تلعب معاه وليه؟

الهدف منه معرفة العلاقات اللي فيها راحة والعلاقات اللي فيها قلق أو تجنب
ليه السؤال ده يفتح قلبه؟
لانه بيحس إنه سؤال طبيعي عن يومه مش تحقيق فيتكلم تلقائيا

⸻

السؤال التاني
في حد ساعات بيعمل حاجات بتزعلك أو بتضايقك ومش بتعرف تقول؟

الهدف فتح باب الاعتراف بشكل عام قبل ما ندخل للتفاصيل
والسؤال هنا مش موجه لشخص محدد فالطفل بيحس إنه مش مضطر يحمي حد أو يخاف من عقاب

⸻

السؤال التالت
لو حد عمل حاجة انت مش بتحبها بتعمل ايه؟

الهدف تعرفي مهاراته في الحماية وهل اتعرض لحاجة قبل كده ورد فعله كان ضعيف ولا لاء

السؤال ده بيكشف لو حصل موقف وهو مقدرش يدافع وغالبا الطفل لو مر بتجربة تحرش فعلا فيا اما هيسكت أو هيعيط

⸻

السؤال الرابع
في حد بيطلب منك أسرار أو بيقولك ما تحكيش لماما؟

الهدف كشف أول علامة للتحرش وهي السرية والسيطرة

والسؤال ده مهم جدا لأنه سؤال عام يقدر الطفل يجاوب من غير ما يحس إن في مصيبة

⸻

السؤال الخامس
في حد بيحضنك أو بيلمّس جسمك بطريقة بتخليك متضايق؟

الهدف تسمية المشاعر بدل الكلمات الجنسية

ولازم هنا يكون فيه شعور بالأمان غالب على السؤال لإنه هيكون مبني على احساس الطفل مش على وصف الفعل والطفل بطبيعته صادق جدا في وصف الضيق لو في حاجة حصلت

⸻

السؤال السادس
لو انت متضايق من حد أو من موقف تحب تقولي ازاي بالكلام ولا بالرسم؟

الهدف فتح قناة تانية للتعبير ، الرسم بيكشف حاجات الطفل مش قادر ينطقها

ولما تختاري طريقة التعبير اللي هو مرتاح ليها امانه بيزيد ورفضه يقل وبيتطمن

⸻

السؤال السابع والأخير
في أي حاجة حصلت الأيام دي وخليتك مش فاهم أو حسستك إنك مكسوف؟

الهدف الوصول للمواقف اللي الطفل مش قادر يصنفها

وده سؤال قوي ومحتاج صبر واحتواء لان التحرش عند الطفل غالبا بيكون شعور بالخجل مش فهم للفعل

⸻

❤️‍🩹 ازاي تخلي الطفل يجاوب بصدق ومن غير خوف

اتكلمي بنبرة صوت هادية جدا الطفل بيجاوب على النبرة قبل السؤال
اقعدي على مستواه الركبة عند الركبة علشان يحس بالأمان أو نايمين ع السرير جمب بعض قبل النوم

ما تبينيش أي صدمة أو خوف حتى لو قال حاجة مفزعة لو اتخضيتي هيسكت
وابدئي بجمل طمأنة
أنا مفيش حاجة بتزعلني منك
لو في اي حاجة حصلت عمري ما هلومك
ممكن تسأليه وانتي في نشاط جانبي زي تلوين أو مكعبات ده بيخلي الحوار طبيعي والطفل يفتح قلبه بسهولة

ما تكرريش السؤال اكتر من مرة واختاري وقت يكون فيه هادي ومرتاح

التحرش بالأطفال بيحصل في الأماكن اللي مبنتوقعهاش
فمش دورك انك تحميه في كل مكان هيتواجد فيه
لكن مهم جدا توعيه إنه يتكلم ويعبر ويحاول يشرح اللي بيتعرضله بأمان عشان واثق إنك هتدعميه وإنك هتساعديه يحمي نفسه بنفسه