25/12/2025
كنت حابه اعمل بوست عن ازاي اتعامل مع ابني الي عنده صعوبات تعلم في وقت الامتحانات
اولا حددي مستوي ابنك الحقيقي يعني لو مثلا مستواه ٣ من ١٠ او ٥ من ١٠
ياريت نشتغل بالتدريج يعني هايكون هدفي السنادي أنه يجيب ٥ من ١٠ او ٦ بس
ثانيا بلاش نذاكر المنهج كله لانه مستحيل يخلص وهايكون لا طولنا بلح الشام ولا عنب اليمن
نقصص من المنهج نختار المهم يعني حرفيا نركز علي أننا نجيب درجات النجاح
الدرس مثلا لو درس عربي وهو صعب عليه يحفظ المعاني والمفردات ومضاد والجمع وهكذا
نركز علي اسهل حاجتين بس يحفظهم وليكن المعني والجمع
لانه بدل ما يجاوبش خالص عليهم كلهم ممكن يجاوب كده علي سؤالين من ٥
لو حاسه أنه صعب يحل كل الاسئله بالذات الي مش مباشره
يبقي ندرب كويس علي حل الاسئله المباشره بس بس بس
ثالثا المذاكره تكون تلت ساعه بتلت ساعه يعني منعدش ماسكين راس الواد بالساعتين نحفظه مهيحفظش يا ست الكل انتباهه مش شغال كده
تلت ساعه ونفصل ببريك لو مش متاح الوقت أننا ندي بريك يبقي نتقل بين للمواد
من عربي لدراسات ومن دراسات الانجليزي كل تلت ساعه
وده مش هايشتتته ؟
لو انا مركزه في الثلث ساعه علي معلومه محدده هاينجزها وأنه يتنقل لماده تانيه ده بيني ليه انتباه جديد في حته تانيه فهينجزها
اهم حاجه نعتمد علي الجرعات الصغيره للمعلومات
مهم مهم مهم جدا
المذاكره لا تقتصر ابدا علي حفظ المنهج
لاااااازم يطبق ويحل اسئله نجيب من النماذج ونحلها والي ميعرفوش نروح ندور علي إجابته وتنقلها نقل كده ويقراها بصوت عالي
وبعدين يحلها تاني هي هي من دماغه كده تثبت اكتر ما يعد يحفظ من غير تطبيق
واخيرا يسروا ولا تعسروا
اصلا الاولاد بتعاني ومش قادرين وده مستواهم الحقيقي بلاش احنا نكون عائق اضافي
واخيرا لو جاب ٣ من ١٠ وده مستواه الحقيقي هاتولهم مكافئه لانه عمل الي عليه واشتغل علي قد مجهوده
واخيرا اخر مره لازم نتعامل مع ولادنا بقدراتهم الحقيقه الولاد مش مكن مش الات بنحركها فرفقا باولادنا ورفقا بنفسنا
💙💙💙💙💙💙
