AAST dokki campus vision team

True story

لو سنك بين الــ 20 : 30 سنه او قربت من الــ 20 =D
يبقى لازم تقرأ البوست ده ...

البوست دا من شخص اسمه " نادر سعد الله "

نصائح لسن 20 لـ 30 :

نظرا لأني أتممت انهاردة 30 سنة .. ايوه إنه 11 سبتمبر بالفعل
في حاجات حابب أقولها عشان أنا ندمت اني ماكنتش بعملها زمان ؟؟
فلعلك تستفيد وتلحق تعملها لانها حولتني لإنسان تاني تماما ولانها أياما معدودات يا صديق .

- فخلي بالك ، يعني من سن 21 ل 28 مش هتشعر تماما بالفترة دي في حياتك وهتتسرق منك سرقة التنين المجنح ، لأنها فترة تحديد مصيرك ومستقبلك إلى حد كبير ، ومن ثم شياطين الإنس والجن ؛ لن يكون هدفهم إلا انهم يضيعوك في الفترة دي فإحذر .

1- القراءة ، حاول ماتفوتش يوم إلا لما تقرأ من 5 ل 10 صفحات على الأقل ، لأني ماكنتش بحب القراءة تماما وقلما أقرأ ، فكل يوم فاتني عرفت قد ايه أنا جاهل جدا ومتأخر جدا ، حتى بطلت أقول سمعت أو كلمة بيقولوا ، لأني قرأت وعرفت المصدر ، فبقيت بقول أصل قرأت ، فبالتالي حجتك هتبقى أقوى ، ثم ثقتك هتبقى أقوى وأقوى .الكتب ال pdf سهلت الموضوع ده جدا، فاقرأ في وقت انتظارك لحد، لما الكهرباء تقطع، في المواصلات؛ لدرجة اني بقيت أركب مواصلات وأركن عربيتي ، عشان أخلص كتب وكده

2 -الرياضة ثم الرياضة ثم الرياضة ، لو مش بتمارس على الأقل سويدي مرة كل 3 أيام على الأقل فانت في طريقك للظهر المأتب والكرش المدلل والكسل والأمراض المبكرة ، يعني هتبقى نفس النسخة العربية المصرية العظيمة المكررة ، مع ان دينّا مش كده تماما تماما ، ومش عارف جيبنا القرف ده منين ، المهم ، احترس لو حابب تتغير . ومانصحكش بموضوع الجيم كرياضة دائمة ” إلا لو عايز تحقق بطولة وكده ” ، لأنه محتاج مواظبة ولإنه بطئ ، الاتجاه دلوقتي بره لل fitness exercises & cardio workouts وال calisthenics ، فالفكرة بقت في القوة والسرعة والجمال ، يعني حاول تجمع بين الجيم والرياضات اللي ذكرتها

3- التغذية ، طبعا دي حاجة ضايعة جدا عندنا ، ومعظمنا في مصر بيأكل غلط ، تخيل لما يبقى شعب بأكمله أو معظمه موروثه الغذائي غلط وبينقل موروثه لجيل ورا جيل ، أكيد النتيجة زي ما احنا شايفين دلوقتي ، 80 % من الشباب كرشه مدلدل أو شايلة ورا ظهره ، هديك أمثله وانت راجع ورايا : الفاكهة مفيدة جدا ، بس بعد الغدا مباشرة ” غلط ” ، وكذلك الشاي أو العصير ، بناكل ونام ” غلط ” ، بنشرب عصير ونام ” غلط ” ، الزيوت والسمن البلدي ” حسب الطريقة ، بس المعظم دهون والذي منه ” الأكل في الشارع ” معظمه غلط إلا لو بتنتقي ” ، الحاجة ساقعة ” غلط ” ، الحلويات والذي منه ” حسب امتى وازاي ” ، العيش االفينو كذلك. والأكل الصحي زي المشويات والمسلوق وزيت الزيتون والعيش الأسمر والسلطة والفاكهة ؛ لا نعرفه تماما وكأن اللي بياكل الأكل ده مريض مثلا والبقية معافا ، والحقيقة هي العكس تماما ، وعامة التغذية مرتبطة بالرياضة والنوم ، فلو ماظبطتش مثلث صحتك ، هنبقى زي ما احنا شايفين حالنا كده

4- الجواز حلو مافيش كلام واستقرار والذي منه ، بس مش عايزك تحطه هدف أساسي بعد ما تشتغل أو تتخرج ، ده اللي كنت فاكره زمان ، الموضوع مختلف تماما ، الحياة مليئة بالأهداف يا سيدي ويا سيدتي ، يعني في هدف علمي لو عايز تحققه ” دكتوراة ” ، فكر في مشروع متميز ، مشروع اجتماعي، فني ، طور من نفسك ، عايز اقولك ان الموضوع مش قرآن أنزل أو دايرة وانت مفروض تكمل مكانك فيها ، اتجوزت فتمام ، ربنا يسعدك ، ماتجوزتش وبتسعى ، فاسعى لتطوير نفسك برضو . وعندنا مثل “د/ عصام حجي ” لما سألوه ازاي وصلت لناسا وانت في السن الصغير ده ، فكان رده : الشباب في سن ال 21 كان مشغول بالجواز ؛ فانشغلت أنا بالعلم ، فكنت ”

5- التليفزيون المصري .. احرقه وابعد عنه الباتة ، عليك وعلى ناشيونال جيوجرافيك ، Discovery , الجزيرة الوثائقية وناشيونال جيوجرافيك أبوظبي ، صدقني هتستفيد تاريخ يمشيك لقدام وهتعرف ثقافة ورقي الأخرين بقى عامل ازاي وقد ايه احنا متخلفين ومنغلقين جدا جدا جدا , وكده كده أفضل من الهري في المهري ” ومش عارف هتعرف الأخبار منين في ظل الكذب اللي احنا فيه ”

6- النوم بدري والصحيان بدري وقلل قاعدة القهوة وال Play-stations ، هتلاقي نفسك صحيا وجسديا وذهنيا مختلف تماما

7- بما اننا في مصر؛وهتشتري عربية ، فماتشتريش عربية جديدة ، اشتريها ” كسر زيروا ” اللي هي استعمال من ألف كيلو ل 30 ألف كيلو ، كأنها جديدة يعني ، بس الفكرة إنك لما تشتري جديد ، إنك في مصر ، كده كده هتتخبط وانت ماشي ، يا هتنزل تلاقيها مخبوطة وانت راكن ” ولو حتى في الجراج ” فابالتالي حسرتك على العربية الجديدة هتبقى أكتر وكده من الاستعمال . وحاول تستغنى عنها في المشاوير القريبة أو مشاوير سهلة المواصلات ، لأن الطريق بقى زحمة جدا جدا ، ومافيش منهجية تخطيط طرق ولا منهيجة شراء سيارات طبقا للحالة المرورية وعدد الأسرة ، وكله في البزراميط ، فالشاهد من الأمر ، خليها للضرورة ان استطعت . انا راكنها بقالي 7 شهور راحة لأعصابي، واستغلال الوقت في القراءة، ومحبة في المشي

8– وأنت في مصر ، استعيذ بالله من ثلاث أو إنك تتعامل مع ثلاث ؛ المعاملات الحكومية ، المستشفيات والأطباء ، الأقسام

9- حاول تشتري لبسك دائما في وقت ال sale والخصومات ، مش هتفرق كتير لما تشتري هو هو الحذاء ب 350 جنبية بدلا من 650 جنية ، وربنا يخلي Outlet وغيرهم الصراحة

10 – اكتب دائما الأفكار اللي بتجيلك ، اللي ممكن تبقى أفكار مشاريع ناجحة ومش بتعرف تعملها وانت في سن ال 20 عشان مافيش فلوس ، هتحتاجها وانت معاك فلوس قدام شويه . واكتب حلمك واسعى إليه ، ولما تلاقي المثبطين اللي هيأسوك ” انت في مصر ، يا فاشل ، كان غيرك أشطر ” ، خد كلامهم كسبيل للنجاح والله ، وعايز أقولك انا اتقالي كلام كتير جدا في مجال التصوير ، الدراسة ، الرياضة ، حفظ القرآن ، هبقى أذكر الحكاوي دي بعدين بلاوي سودة والله بتتحدف علينا ، فلا تلتفت كما كان يفعل النبي أو كما كان يفعل إبراهام لينكولن لأن ببساطة مافيش وقت ، فخد الكلام وقول ” هنشوف ”
وخليك مرن ماستطعت مع تقلبات الحياة ومتطلباتها ، وطبعا المرونة مافيش أحسن منها حل ؛ عشان تتكيف مع بلد زي مصر

11- ابتسم وعذر اللي قدامك واصبر عليه ومش شرط تتفقوا تماما ، بس شرط تتصافوا وتتعايشوا ، وممكن والله تعيش مع بوذي عادي هو مقتنع بحاله وانت كذلك ، اه والله عادي ، مش مطلوب تكفره في كل مرة تشوفه ، بس مطلوب يسأل انت ازاي راقي كده

-أخيرا ..أبوس ايدك .. لا تحدث أحد عن الإسلام ولكن كن أنت الإسلام المراد . وثق أنه هو الذي سيألك عنه
وتقبلوا عذري لو مش بقول لحد كل سنة وهو طيب وبديله الاهتمام اللي يستحقه ..
آمل أن أكون قد أفدت

Good luck everybody :)

please share it.

Finals schedule good luck all

Important news for seniors

Happy Easter

AAST Dokki recruitment and interviews

لا دين لها 👎😭

Very important

اهروب يا ويلد