03/12/2025
منشور للتوعية للمدرسين والأهالي
"الطفل المتأخر دراسياً مش غبي ومش قليل… بالعكس، ممكن يكون عنده ديسلكسيا (صعوبات قراءة)، أو صعوبات تعلم، أو ADHD.
ده مش ذنبه ولا ذنب ولي الأمر.
من فضلكم… رفقاً بالأطفال، ورفقاً بأهاليهم.
كل طفل ليه طريقة تعلم مختلفة، ومحتاج صبر وتشجيع واحتواء.
بدل ما نعلّق على ضعفه… نساعده يتقدم.
التعليم رسالة، وأجمل ما فيها إننا نغيّر في حياة طفل ونفتح له باب أمل جديد."
إرشادات بسيطة ومهمة للمدرسين للتعامل مع الأطفال اللي عندهم صعوبات تعلم
1) ممنوع السخرية أو المقارنة
ابعد تماماً عن جمل زي:
— "انت مش فاهم ليه؟"
— "شوف أصحابك أحسن منك"
الكلام ده بيدمر نفسية الطفل وبيقلل ثقته بنفسه.
2) راقب السلوك قبل الحكم
لو الطفل:
بيقرأ ببطء
بيكتب بحروف ناقصة
بيغلط في قلب الحروف
بينسى بسرعة
بيتشتت بسهولة
يبقى لازم نشك إنه محتاج "تقييم" مش "توبيخ".
3) استخدم طرق شرح مختلفة وبسيطة
صور
تلوين
بطاقات كلمات
ألعاب تعليمية
تكرار هادي ومن غير عصبية
4) اختبارات قصيرة ومقسّمة
بدل امتحان كبير…
اعمل امتحان صغير على أجزاء عشان الطفل مايتوترش.
5) امدح المجهود مش النتيجة
قول للطفل:
"أنا شايفة إنك بتحاول… برافو عليك"
ده بيديه طاقة يكمل ويتحسن.
6) تواصل محترم مع ولي الأمر
بدل ما نقول:
"ابنك ضعيف"
نقول:
"ابنك محتاج دعم إضافي وهنشتغل سوا عليه".
7) لو شكينا في اضطراب أو صعوبات تعلم → نحول لتقييم
الأهالي ساعات مش فاهمين… دور المدرسة إنها تنبّه وتساعد.
