11/07/2020
ايه ده 🤔 مش ده علم مصر ؟
💥اه دى الوان علم مصر صحيح ، لكن مقدرش اقول أن ده مقصود ، انت عارف دا صندوق صغير للملك الشاب توت عنخ امون من 3400 سنة .
🤔ايوه لكن حاجه تجنن أن هى نفس الالوان وبنفس الترتيب فوق احمر في النص ابيض وتحت اسود !
💥معاك طبعا ، لكن لازم نعرف أن الاحمر كان هو لون تاج الشمال والابيض تحته كان لون تاج الجنوب والأسود دائما كان بيرمز إلى أرض وادى النيل الخصبة كمت واللى احيانا تعني مصر .
🤔برده تبقي عبقرية رمزية ووضعهم كده في محله ، يبقي من حقي أجنن ...ممكن سؤال اخير
اتفضل طبعا
ممكن تقرأ اللى مكتوب مش انت بتاع اثار ؟
💥اه 😁 بيقولوا ، بص يا سيدى
على يمين العلامه اللى فيها الالوان دى علامة حكا زى العكاز ومعناها حاكم والعلامه اللى فيها الالوان هى أون وبجانبها على الشمال علامة سو وبتعني الجنوب ..يبقي السطر الاخير معناه ( حاكم اون الجنوبية والمقصود الاقصر العاصمة ) .
وفوق السطر الاخير دا اسم الملك توت عنخ امون
🤔طيب هو اسمه له معني زى اسامينا ؟
💥ايوه معناه الصورة الحية للمعبود امون . لاحظ أن اسم الملك مع لقبه حاكم العاصمة جوه شكل بيضاوى بنسميه الخرطوش ودا له قصة تانيه احكيهالك بعدين 🙂
تحيا مصر 🇪🇬
على باب مصر 🇪🇬
