SCITA for Juniors

08/02/2021

الفاضية ممكن !

الورقة ((الفاضية)) اللى قدامك في الصورة دى بحث علمى منشور في أفضل المجلات العالمية 😀

كان من الممكن أن تنشر بحث فاضي ولكنك اخترت يا عزيزي انك تعمل ماجستير 😂

القصة والحكاية إن باحث في علم النفس اسمه Dennis Upper عاوز يكتب ودماغه قافلة مفيش أي أفكار جديدة ومفيش أي كلمات جاية في دماغه.

بيعصر في دماغه يمين وشمال، مفيش حاجة خالص .. والمشكلة دي بتتسمي بـالـ Writer’s block

فـ Dennis قرر يعمل تجربة انه يكتب عن الـ Writer's block ويكتب عن ازاي هيعمل Self-treatment لنفسه ولكنه بردة فشل انه يكتب حاجة 😀 🤦🏻‍♂️ كانت مقفّلة معاه جداً 😀

المهم يمين شمال .. مفيش فايدة .. فتوّصل فالآخر انه يعمل ورقة بحثية بعنوان
(The unsuccessful self-treatment of a case of writer's block)

بمعني التجربة الفاشلة لمحاولة علاج حالة Writer’s block، وطبعا بما انه بيعمل بحث عن محاولة حل مشكلة الكتابة ومعرفش برده يحلها فده معناه انه بحث فاضي 😂، وبعت فعلا البحث كدة فاضى زى ما شايفين في الصورة لجريدة علمية مرموقة اسمها Journal of Applied Behavior Analysis وليها معامل تأثير Impact factor يساوي (1.088) تبع دار نشرWiley و قالهم بصوت منير (حد عاوز بحث فاضى، بحث ابيض بحث هادى) 💃💃

البحث كان عبارة عن "عنوان البحث" و اسم الباحث "Dennis Upper" ومكان عمله وهو مستشفي Veterans Administration بولاية ماساتشوستس في أمريكا، و بعد كده صفحة بيضا تماماً

لحد هنا تمام، وانت ممكن تتوقع إن الراجل بيهزر وأكيد في مراجعين هيراجعوا البحث ويرفضوه، ولكن الغريب إن بعد فتره جاله الرد من الـجورنال وهو:

" احنا درسنا ورقتك البحثية بعناية وملقناش اي غلطة في منهجية البحث 😂 او الكتابة و ان الـ Reviewer بيرشح ان الورقة البحثية تتنشر من غير اي تعديل و دي أكتر ورقة بحثية موجزة أو مختصرة شافها بالمقارنة بأبحاث دكتور Dennis اللي كان فيها تفاصيل معقدة واضاف أنه مبسوط انه راجع الورقة البحثيه دي و ان أكيد هنلاقي مكان للورقة البحثية دي في الجريدة فى اى حته فاضية من اى صفحة😂😂"

الورقة البحثية دي بالفعل اتنشرت و اتاخدت كاقتباس "Citation" في 60 بحث حسب موقع Google scholar معظمهم بيتكلموا عن مشكلة الـ Writer’s block

اندهشت ؟! .. طب شوف دى:
في 5 ابحاث عملوا نفس اللي عمله Dennis و حطوا المرجع بتاعهم الورقة البحثية بتاعت Dennis
واحد اتنشر في عام 1983م وبعته Geoffrey Molloy من كلية التربية جامعة Monash في استراليا و اتنشر في جريدة Perceptual and Motor Skills اللي تتبع دار نشر Sage والورقة البحثية بيضاء تماماً

و التاني اتنشر في عام 1984م و بعته دكتور الطب النفسي العصبي Bruce Hermann و اتنشر في نفس الجريدة Perceptual and Motor Skills وبرده الورقة البحثية بيضاء تماماً

و التالت بقي ده هاص في الهيصة .. و هو Kenneth Olson من جامعة Fort Hays State الامريكية و قالك انا هعمل Review paper عن الـ 3 ابحاث دول و في الورقة البحثية قال انا لقيت كذا بحث بيتكلم عن مشكلة الـ Writer’s block و كانت النتائج كالآتي .......... و ساب الصفحة فاضية 😧 و اتنشرت في عام 1984م في نفس الجريدة Perceptual and Motor Skills

و الرابع اتنشر في عام 1985م و عليه خمسة Authors و اتنشر في نفس الجريدة Perceptual and Motor Skills لتالت مره وبرررررده الورقة البحثية بيضاء تماماً

يعني كده جريدة Perceptual and Motor Skills ناشره 4 ابحاث فاضيين تماماً 🤣 (انت تروح تنشر فيها من بكره يا معلم) :D

والخامس اتنشر عام2007 وعليه 5 مؤلفين Authors واتنشر في نفس الجريدة اللي نشر فيها Dennis وهيJournal of Applied Behavior Analysis بس هنا الورقة البحثية مش فاضية كلها... ولكن كاتبين فيها حاجة مضحكة جدا ان "تم اعداد البحث ده بمنحة مالية قدرها 2 دولار ونص" 🤣

الشئ الغريب أكتر وأكتر إن فى Meta-analysis وهو نوع من أنواع Review papers منشور في 2014 في جريدة Psychological Reports و حاطط الـ 5 ابحاث اللي فاتوا دول (بحث Dennis و الـ 4 اللي عملوا زيه)

يعنى Meta-analysis طلعت لا شئ و اتعملت عن لا شئ 😱

ننهي القصة ان Dennis Upper اتوفي و هو عنده 78 سنة في شهر سبتمبر سنة 2018 بعد ما وقع من السلم، و هو كان باحث عظيم في علم النفس وشاعر و كاتب قصص قصيرة.

سهل ولكنكم مجربتوش تنشروا بحث فاضى :p

شوفوا اللينكات والمصادر فى أول كومنت :D

30/01/2021

باقي نص ساعة وأول سؤال فى مسابقة ينزل على صفحة SCITA 💙

اعملوا Like و Follow للصفحة وجاوبوا على السؤال وممكن تكسب جايزة بقيمة 500 جنية 😁

والسؤال هيكون كل أسبوع يعني لو مكسبتش أول مرة ممكن تكسب فى الأسابيع اللي بعد كدة 👌🏻😍

30/01/2021

اعملوا Like لصفحة SCITA واستنوا أول سؤال فى مسابقة كمان نص ساعة ⏱️ واللي هيجاوب صح ممكن يكسب جايزة بقيمة 500 جنية 😁

15/07/2018

أصدقائنا أبطال الثانوية العامة 💙

أولاً مبروك ليكم كلكم على النتيجة وربنا يوفقكم فى الجاى 👏 😄

من هنا مشواركم الفعلي هيبتدى ;) مرحلة جديدة بأحلام وطموحات أكبر بفرص أكتر بكتير 👌

الثانوية العامة كانت مجرد خطوة فى بداية الطريق 👣

فى ناس ربنا بيكرمهم وبيجيبوا مجموع بيساعدهم يدخلوا الكلية اللى كانوا بيحلموا بيها وبيكملوا طريقهم ولازم يكونوا عارفين كويس كل حاجة عن الطريق دة ولازم كمان يعرفوا إزاى هيكملوا فيه لنهايته وإزاى طول الوقت يتعلموا دروس من كل خطوة فى الطريق تأهلهم لحياتهم الجاية ويكونوا أقوى ، افرحوا بنتيجة تعبكم ومجهودكم وسيبكم من كلام المُحبطين حواليكم الطريق طريقك لوحدك ولازم تمشيه وتتعلم إزاى تنجح فيه ;)

وفى ناس ربنا بيكرمهم بس بشكل آخر ، دول مش بيجيبوا مجموع مناسب لطموحهم وأحلامهم ومبيقدروش يدخلوا الكلية اللى كانوا بيحلموا بيها ، وبيحسوا إن دى نهاية العالم وكدة كل أحلامهم ضاعت ، لكن فى الحقيقة كل اللى حصل إن مسار الحلم إختلف شوية صغيرين ولازم يدركوا دة بسرعة ويبدأوا ينفضوا عنهم الأفكار السلبية ويعيدوا تفكير فى المستقبل وكدة كدة مع الوقت هيدركوا إن اللى حصل دة كان أفضل سيناريو لحياتهم وإن ترتيبات ربنا أحسن بكتير من ترتيباتهم ، دول لازم يعيدوا صياغة أهدافهم ويشوفوا الطرق المتاحة قدامهم والمناسبة لقدراتهم ومهاراتهم ويدرسوها كويس وبعد كدة يستعدوا للمغامرة وبرضو ملهمش دعوة بكلام المحبطين حواليهم ، المهم تكونوا إتعلمتوا من مرحلة الثانوية اللى يساعدكم فى طريقكم الجاى 😍

-كبرنا؟

*آه كبرنا! 😌

كبرنا اللى يخلينا قادرين نحقق أحلامنا ونختار طريقنا ونتعلم مهارات جديدة ونكتسب خبرات كتير ونمارس حياتنا بشكل طبيعى (من غير ثانوية عامة 😁) مرحلة الجامعة من أهم المراحل فى حياتكم وهتكبروا فيها أكتر وأكتر وهتبقوا أقوى وأنجح وأكتر سيطرة على مستقبلكم من مجرد مجموع كبير فى ثانوية عامة أو تنسيق 😅

Happy new stage of life our dear Juniors ❤️🎓

02/06/2018

ربنا معاكم يا أبطال 🤲😍💙

بعد ما إتكلمنا عن مراجعة ليلة الإمتحان وإزاى متتوترش فى البوست دة:
https://goo.gl/xxDEGK

هنتكلم النهاردة عن يوم الإمتحان نفسه بقى :D دايماً وإنت رايح الإمتحان الصبح كدة وواثق من نفسك لازم تسمع الجملة الشهيرة اللى بتقول "يوم الإمتحان يكرم المرة أو يُهان" وبتبقى غالباً وراها ضحكة مشهورة :v

متسمعش الكلام دة خالص يوم الإمتحان دة هو اليوم اللى بتحصل فيه نتيجة مذاكرتك وتعبك طول السنة وربنا مش بيضيع تعب حد ;)

1-حاول تصحى قبل الإمتحان بوقت كافى وتقرأ سورة يس ومش هنقول تفطر فطار خفيف ولا تشرب فنجان قهوتك الصغير علشان هنكون فى رمضان بس ميمنعش إنك تتسحر كويس ;) وتنزل من البيت قبل وقت الإمتحان بوقت كافى تحسباً للطريق علشان متتوترش .

2-يُفضل متراجعش حاجة قبل الإمتحان على طول ولو قابلت صاحبك الدحيح متحاولش تسلم عليه :D ولو لازم تراجع حاجة علشان تطمن يبقى عناوين رئيسية بس من غير تفاصيل أو قانون إنت عارف إنك كل مرة بتنساه لكن بلاش مراجعة المنهج كله علشان كل ما هتراجع أكتر هتحس إنك مش فاكر حاجة وممكن تتوتر .

3-مع صاحبك الدحيح هتلاقى واقف صاحبك المتشائم اللى عمال يوتر الدحيح من صعوبة الإمتحان وإنه مش فاكر أى حاجة خالص وبيخلى الدحيح يراجعله المنهج كله قبل الإمتحان متسلمش عليه برضه 3:)

4-لو إنت صاحبنا الدحيح أو المتشائم دة فبنقولك قبل الإمتحانات ما تبدأ أهو خليك معتدل علشان الأفورة مش كويسة عليك ولا على اللى حواليك :P

5-بعد الإمتحان روح على البيت على طول ومتحاولش تراجع اللى حليته مراعاة لمشاعر المادة اللى بعدها O:) ومتسمعش رأى حد فى إن الإمتحان كان سهل أو صعب أو حتى مين إنتحر ومين إنهار علشان هما دول اللى بيجيبوا درجات عالية ويرفعوا التنسيق فى الآخر :v

6-حاول طول فترة إمتحانات الثانوية العامة تتجن وسائل الإعلام وبرامج الـ Talk Show اللى بتهول المواضيع وبتفضل تلقى الضوء على الثانوية العامة وكأن البلد مبقاش فيها غيركم O.o

7-بعد ما ترجع من إمتحان أى مادة إنسى خالص اللى عملته فيها وإبدأ شيل ورقها من على المكتب وإستعد للمادة اللى بعدها كأنها أول مادة خالص ;)

☺

02/06/2018

أصدقائنا أبطال الثانوية العامة

طبعاً أصعب وقت بيعدى علينا كلنا هو ليلة الإمتحان بكل اللى فيها من أكشن وتوتر ومذاكرة وبتكون أصعب من الإمتحان نفسه كمان :D

هنتكلم مع بعض النهاردة عن أهم الحاجات اللى المفروض نتجنبها ليلة الإمتحان وإزاى نقدر نعدى الليلة دى بهدوء وسلام ومننساش كل اللى ذاكرناه ;)

1-أول حاجة لازم تبقى عارف إنه طبيعى جداً إحساس إنك مش فاكر أى حاجة من اللى ذاكرته فى اليوم اللى قبل الإمتحان دة فمتخليش الإحساس دة يوترك علشان متنساش بجد !

2-حاول تتجنب مذاكرة أجزاء جديدة ليلة الإمتحان يعنى تخلص المذاكرة فى الأيام اللى قبلها واليوم دة يكون مراجعة شاملة على كل اللى ذاكرته علشان فى الوقت دة عقلك بيبقى بيرتب المعلومات اللى تلقاها طول الأيام اللى فاتت فمذاكرة جزء جديد هيربك عقلك وهيشتتك ( تخيل كأن عقلك مش لاقى مكان يحط فيه المعلومة الجديد :D )

3-اللى هتعمله فى اليوم دة اليوم هو إنك تحاول تراجع على المنهج ودة ممكن يكون بطريقتين:

-يا إما تكون مراجعة على المنهج كله بعينيك قرايه أو حتى تراجع على الدروس الصعبة اللى عارف إنك مش بتفتكرها كويس والقوانين المهمة وحاول متختبرش نفسك فاكر ولا لأ علشان متتوترش .

-أو تبدأ تشوف أسئلة بإجاباتها ومتتخضش لو حسيت إن الأسئلة غريبة أو مش فاكرها برضو عادى إعرفها وقول لنفسك كويس إنك شفتها النهاردة أحسن ما كنت تتفاجىء بيها بكرة فى الإمتحان :o

-وممكن الصبح فى بداية اليوم تحل إمتحان كامل كتابة وتحدد لنفسك وقت علشان تعود إيدك وعقلك على وقت الإمتحان وطريقة الإجابة وأجواء اللجنة.

4-راجع المواضيع من نفس المكان اللى كنت بتذاكر منه طول السنة يعنى لو متعود تذاكر من الكتاب أو ورق أو تلخيصات إنت عاملها لنفسك يبقى نفس المصدر يكون للمراجعة بلاش مصدر جديد علشان هتفتكر فى الإمتحان الحاجات بمكانها فى الورق (Y)

5-كل كويس وإشرب سوايل كتير على مدار اليوم وبلاش منبهات علشان تعرف تنام بليل كويس ( كدة كدة هنبقى صايمين فكلوا كويس على الفطار بس بلاش حلويات كتير :P )

6-حاول تذاكر وإنت هادى ومش متوتر علشان تركز فى اللى بتراجعه ويثبت فى دماغك وخلى عندك يقين إنك عملت كل اللى عليك والإمتحان دة حاجة فى إيد ربنا ومش هيضيع تعبك مادام ذاكرت ;)

7-بعد الساعة 8 لو قدرت تكون مخلص مراجعة وتفصل خالص هيبقى كويس جداً ممكن تقوم تلعب شوية مع إخواتك الصغيرين أو تتفرج على فيلم كارتون ^_^

8-الساعة 10 أو 11 بالكتير لازم تكون على السرير علشان تنام على الأقل 8 ساعات والوقت دة مهم جداً علشان عقلك بيبدأ يرتب معلومات المنهج كله وينظمها وبيساعدك تفتكرها فى الإمتحان تانى يوم وتسترجعها بسهوله وتركز وتواصل الـ 3 ساعات ومتنامش فى النص :v

يلا إحكولنا عن أكشن ليالى الإمتحانات وأيه طقوس اليوم دة عندكم ؟؟

;)

04/05/2018

Good Morning All Juniors 💙😄

21/04/2018

أبطال الثانوية العامة 💪 😅

نصيحة مهمة جداً بما إن الإمتحانات قربت ورمضان كمان قرب كل سنة وإنتوا طيبين ;) وبما إن هيكون فى مواد إمتحاناتها فى رمضان والشهر كله هيكون مذاكرة 📚 فحاولوا تستغلوا الفترة دى إنكم تتعودوا على نظام النوم والمذاكرة فى رمضان وخصوصاً الناس اللى متعودة على القهوة والنسكافية والمنبهات حاولوا تقللوها بالتدريج علشان تنبهوا جسمكم إنه لازم يفوق ويركز من غير منبهات ☕ 👌

إعمل منشن لصاحبك مدمن القهوة علشان ميبقاش زى الصورة كدة فى رمضان وهو بيذاكر 😵👀😃 وتابعونا هنتكلم معاكم عن طرق تنظيم الوقت والمذاكرة والنوم فى رمضان علشان نستغل اليوم صح ✌️

💙

19/04/2018

Good Morning Our Juniors 💙

Are You Ready For This Day ? 😉

Smile 😄 And Start 💪

03/04/2018

Re-Share 😄

👌😌

Keep Calm, It's Never Too Late ;) 💙

عندك ضغط ؟
========

-لأ يا عم بعد الشر عليا أنا صحتى كويسة والحمد لله

*لأ مش قصدى الضغط دة

-أمال تقصد أيه O.o ؟؟

*هقولك . . . إنت ثانوية عامة صح ؟؟
عندك كام مادة ؟؟ طيب نفسك تدخل كلية أيه ؟؟ متوقع التنسيق هيكون عالى ولا هتعرف تدخل الكلية اللى عايزها ؟؟ عارف تذاكر صح ولا لسه محتار ومش لاقى الطريقة المناسبة ؟؟ طيب فكرت بعد ما تذاكر وتنجح وتدخل الكلية اللى نفسك فيها وتتخرج هتلاقى شغل كويس ولاكل دة هيروح على الفاضى ؟؟؟

-أيه كل دة :o وترتنى :3

*هو دة بالظبط الضغط اللى أنا كنت أقصدة !!

الضغط : هو إن يكون وراك حاجات كتير جداً لازم تخلصها وحاجات بتفكر فيها وبتحاول تنظمها وتفكيرك فى المشاكل اللى حواليك واللى بتقابلك فى حياتك اليومية وهو مش حاجة وحشة عامة يعنى لو عرفت تخلى الضغط دة حافز ليك إنه يشجعك من غير ما تتوتر وقتها إحساسك بالمسؤولية هيزيد ومعدل شغلك وإنجازك هيكون أكتر (Y)

-إزاى بقى أعرف أسيطر على إحساس الضغط دة علشان ميجيليش السكر :D

*أقولك . . . إنسى كل ضغوطك كدة وركز معايا شوية ;)

1-أول وأهم حاجة إنك تحدد أيه هى أكتر الأمور اللى بتخليك مضغوط وبتأثر عليك بشكل سلبي وكمان تجمع الحاجات اللي خارج دايرة تأثيرك والتفكير فيها مش هيوصلك لأى نتيجة زى الإمتحانات والتصحيح والتنسيق علشان التفكير فى الحاجات دى هيضيع وقتك على الفاضى .

2-إفصل نفسك عن أى مشاكل وحدد هدفك وفكر بس إزاى توصله بلاش تشتت نفسك فى أمور جانبية :|

3-تخلص من وحش التأجيل الشرير 3:) !
لو وراك 3 حاجات المفروض تخلصهم فى اليوم وأجلتهم لليوم اللي بعده هيبقوا 6 يعني ضاعفت الضغط عليك من تأجيل يوم واحد ، ما باللك بتأجيل مذاكرة شهر مثلا !! حدد الأهم وذاكرة من غير تأجيل ودة هيديك دفعة حلوة إنك أنجزت شىء وتقدر تواصل وتكمل (Y)

4 لو مقتنع إن مفيش في حياتك غير المذاكرة يبقي خدعوك فقالو !!
خدها قاعدة محدش بيذاكر 24 ساعة و بيبقي كدة بيذاكر صح لازم تشيل الفكرة دي من دماغك عشان دي لوحدها مصدر ضغط كبير وهتحبطك على الفاضي عشان عمرك ما هتقدر تعمل كده لمدة سنة بحالها . . . المذاكرة مهمة بس لازم توازن بينها وبين حاجات تانية زي الرياضة أو أي هواية بتحبها أو حتي تقابل صحابك وتخرج معاهم تسمع موسيقى أو تنام :D

5-حاول تتجنب كل الأمور البسيطة والغير ضرورية اللى بتزود إحساسك بالضغط ، رتب أمورك حسب الأولوية والأهمية ، إعمل جدول وحاول تمشى عليه وإكتب كل الحاجات المهمة فى ورقة وخليها قدامك وكل ما تخلص منهم حاجة إكتب قدامها Done ^_^

6- حاول إنك تحسن من علاقاتك الشخصية مع الناس ويكون فى دايرة علاقاتك حد بتتكلم معاه وبيسمعك كويس وبيفكر معاك حد من أهلك أو صحابك ، الناس اللى بتحسسك بالأمان وجودهم فى حياتك بيقلل الضغط اللى عليك وبيخلى جهازك العصبى يتقبل الأوضاع المعقدة ويقدر يتعامل معاها بشكل سليم ;)

7-أهم حاجة ف الثانوية العامة إنك تتجنب التعامل مع الناس اللى بتوترك أو بتحسسك بالضغط النفسى ، عارف زميلك اللي كل ما يشوفك يقولك هنسقط أو إنه مش عارف يذاكر ؟؟ أيوة دة وحش ده إبعد عنه أو أقولك إعمله Invite لصفحتنا وإحنا هنتصرف معاه :D

8-آخر حاجة بقى خالص علشان كفاية كدة ولازم تروح تذاكر هى إنك تتعود على الضغط علشان متحسش بيه (دة اللى بيسموه التأقلم) :D يعنى إتعلم تتقبل الأمور اللى مش هتعرف تغيرها وتحاول تتعايش معاها ، شوف الصورة من بعيد وإعرف إن مفيش ثوابت وكل حاجة ممكن تتغير للأحسن ، تأكد إن إحساس الضغط مش هيفيدك بالعكس هيعطلك !

ها بقى مقولتلناش ؟ :P

02/04/2018

بتحلموا بأيه . . . ؟ 😌 💙

26/03/2018

It's MONDAY 💙😌

Good Morning All 😅