26/07/2020
حارب لإبنك ... ولا تحارب إبنك ... 🌹
كلنا عايزين عيالنا يطلعوا احسن مننا ، لكن كتير اوي للاسف بيدمروا ولادهُم بدافع حمايتهم .
ابنك بعد ال ١٠ سنين بيواجه حاجات كتير اوي يمكن انت مش واخد بالك منها . ومهما كنت عنيك عليه ، ف هو دون ان تشعر انت ممكن يشوف ويتعرض لكل ما هو ممنوع ومخالف وغير اخلاقي مهما كنت انت فاهم انك محّلق عليه .
دورك مش ان انت تراقبه بزيادة عشان يخاف فميعملش الغلط .
ولا دورك انك تحّلق عليه بزيادة عشان ميروحش اي سكة من دول ...
وتحمي ضهرهُ وتعلمهُ نزاهة الاختيار
انك تسندهُ بوجودك جنبهُ وتدعم الصح جواه .
انك تعرفهُ يختار الصح من نفسهُ ويعارض فيه اي حد
ابنك محتاج دعمك اكتر من احتياجهُ لمراقبتك .
محتاج يحس انه اللي وراه في صفهُ مش في واقف بالعصاية ومستنيلهُ على غلطة .
عشان كدا دول عشر حاجات مهمين جداً تجاه ابنك او بنتك بعد ما يتموا العشر سنين ...
١-ابنك اذكى بكتير مما انت تتصور . ومركز في طريقتك معاه وبيفهم ما بين السطور . تعامل معاه على هذا الاساس .
٢-ادي ابنك فرصه يرفض الغلط عشان هوا مش عايز يعملهُ مش علشان انه خايف منك تحاسبهُ . اديلهُ فرصه يختار صح علشان انت مش قاعدله علطول يختار بيك . لا . انت بتدربهُ عشان يعرف يختار لوحده ويقود مش ينقاد .
٣-اديلهُ فرصه يفضفض معاك ويعرفك اللي نفسهُ يقولهولك بس مرعوب من رد فعلك .
٤-انزل لمستوى تفكيره ومتستناش يعلا هوا لمستواك . متصعبش الامور عليه
٥-فتّح دماغك وتقبل الخلل اللي ما بين جيلك وجيلهُ ومتاخدهوش على صدرك اوي وتتحمق ، سيبهُ يحكيلك عن صحابهُ اللي بيعملوا الغلط وكأنك واحد منهم .
٦-سيبهُ يطّمن من رد فعلك ويعرّفك الحاجات اللي هوا خايف يقولك انه بيشوفها حواليه وعنده تساؤلات كتير عليها محتاج حد يفسرهالهُ .
٧-اتفق انت وامهُ او انتي وابوه على اسلوب التربية حتى لو كنتوا منفصلين . دي مصلحة الاطفال اللي لازم تتفقوا عليها مهما اختلفتوا . لان سوء اختياركم مش مسئوليتهُ .
٨-اياك تغلط في الطرف التاني قدامهُ مهما كنتوا مختلفين . ابوه احسن اب ، وامهُ احسن ام . لأن لا دا ينفع يتغير ولا دي ينفع تتغير ...
٩-اقولك منغير زعل - معظم الاهالي بيقولوا "احنا مصاحبين عيالنا وبيقولولنا كل حاجه" ، والحقيقة ان اكتر من ٧٠٪ من الاولاد والبنات في السن دا بياخدوا اهلهم على قد عقلهم وبيقولولهم اللي الاهل عايزين يسمعوه عشان العيال يريحوا دماغهم . ودا مرتاح ودول مرتاحين ..
١٠-اوعى تحاسب ابنك على ما جنيتهُ انت فيه ، اذا دلعت زيادة متزعلش لما يطلع متدلع ، ولو شديت زيادة متزعلش انه طالع جاف ... الطفل جايلك ورقة بيضه ... الكتابة اللي عليها تخصك انت متخصوش هوا .
واخيراً
ارفع من قدر ابنك بينك وبينه وقدام الناس ، انفخ فيه براحتك ، لكن اياك تعينهُ على الافترا على حد او المنظره على حد ، لان هوا اكتر واحد هيتعب من دا قدام ...
ارجوك إخرج للعالم انسان سوي ، اصلح ما فسد فيك فيه ، واهديه نَفساً سويةً واهدينا منك نسخة افضل ...
عني وليس منقول
جزء من كتابي
ملحوظة : هذه المقالة لوجه الله تعالى علشان نخّرج جيل سوي مرتاح نفسياً يقود هذه الامة للافضل ويقودها مرة اخرى للمقدمة . ولعل دعوه شاب او شابة اصلحنا تربيتهُ تصلح بها دنيانا واخرانا ...🌹🌹🌹
تعديل : دا مش ابني . دا بودي ابن اختى 🥰
01/03/2020
01/03/2020
01/03/2020
20/12/2019
01/12/2019
01/12/2019
30/11/2019
29/11/2019
29/11/2019
29/11/2019
22/11/2019