06/05/2025
نقلا عن جروب
لكل الطلبه اللى عندى رجاء اخذ الموضوع بجديه
تحذير مهم جدًا للطلبة في ألمانيا – خصوصًا الباحثين عن شغل أونلاين
بعد إذن الأدمنز، حابب أشارك تجربة مهمة جدًا أتمنى توصل لأكبر عدد من الطلبة قبل فوات الأوان. أنا حريص إن أي حاجة بنشرها تكون مبنية على تجارب حقيقية ومؤكدة، سواء من طلبة أعرفهم هنا في ألمانيا أو من داخل الجروب نفسه.
ملخص المشكلة:
فيه عدد كبير من الطلبة بيدور على شغل أونلاين، وبيلاقوا فرص ظاهرها سهل ومربح، وأشهرها إنك تشتغل في استلام وإعادة إرسال "باكيتات" أو طرود.
تفاصيل "الفرصة":
موقع يطلب منك عقد شغل بسيط.
توصلك طرود تحتوي على منتجات مختلفة.
كل المطلوب منك: تكتب عنوان معين على الطرد، وتدفع تكلفة الإرسال، وتبعت صورة الفاتورة.
المرتب بيتحول لك بعد أسبوع أو شهر، ومعه تكلفة الإرسال اللي دفعتها من جيبك.
لكن هنا تبدأ الكارثة:
المنتجات دي غالبًا بيتم شراؤها باستخدام بطاقات فيزا مسروقة.
بعد كده، أنت بتبعتها لعنوان معين، غالبًا خاص بالشخص اللي سرق البطاقة أو لحد بيشتري منه.
ووقتها، قانونًا، أنت اللي اشتريت الحاجة دي بالفيزا المسروقة وبقيت شريك في الجريمة.
تجارب حقيقية:
حصلت مع ناس كتير، وكنت دايمًا بنصحهم ينزلوا فورا على الشرطة، ومعاهم الطرود، ويبلغوا.
صحيح إن الجهل بالقانون مش بيعفيك من المسؤولية، لكن البوليس ممكن يقدّر الموقف حسب نيتك وحجم الجريمة.
فيه ناس الموضوع عدى عندهم بعد البلاغ، وفيه اللي اتفرضت عليه غرامة، وفيه اللي اتحولت قضيته لجناية، وفيه كمان اللي خد حكم بالترحيل، وكنت حاضر بنفسي على الحالة دي وكان طالب.
مثال إيجابي:
مبارح، حد كلمني وشك من البداية، ونصحته يروح يبلغ، وفعلاً عمل كده، وربنا ستر.
رسالتي ليك:
بلاش تدور على الفلوس السهلة اللي وراها مشاكل.
خلي بالك، لأن الموضوع ممكن يوصل للترحيل.
مش عايز اطول اكتر من كدة طبعا
بس الأكيد إني بحاول احذر الناس من أي مصيبه قبل فوات الأوان
والأكيد انى بتجيلى اسأله علي الخاص كتير جدا
و بحاول أرد واسأل دايره معارفي
وباخد خبره كبيره في نوعيه الاسأله إللي بتجيلي
ولو جاوبت علي حد
بيبقي أجابه واضحة و مفيهاش رأي شخصي
وبشكل محايد
وتأكد تماما إني عايز مصلحتك و ماليش أي مصلحة في وجودي في أي جروب
الموضوع بعمله لله بشكل كامل
في الختام:
ده تحذير صادق، ونيتي إن محدش يتورط أو يضيع مستقبله بسبب حاجة كان يفتكرها "فرصة كويسة". ربنا يوفق الجميع ويحفظكم.
