28/02/2026
اخ شالوم يا بتاع التطبيع والتعايش بص هنا ..
امبارح في نفس الوقت اللي كنا بنجيب العلم بإزاز العربية عالارض، اللجنة المصرية لاغاثة اهلنا جابت مقطورة وفتحتها من الجنب وحطت ستارة حمرا وحولتها لمسرح، ودخلت بالمسرح ده عملت احلى عرض مديح لسيدنا النبي وعرض مولوية وابتهالات لاهالينا احتفالا بشهر رمضان، والناس فرحت واتبسطت ربنا يديم عليهم الفرحة، في نفس الوقت اللي كانوا بيلطموا في جرايدهم على حوار العلم.
عارف دا حصل ليه وده حصل ليه يا بتاع التعايش؟
عشان دول اهلنا اللي بجد اللي شبهنا، اللي كان فيه بينا وبينهم زمان قطار، كنا بنعتبرها امتداد لمحافظة الشرقية، عشان دي ناس بينا وبينهم مصاهرة، عشان فيهم الاهلاوي والزملكاوي، لسان واحد ودين واحد، عشان شبهنا فعلا، اخوات بجد.
مش واحد جايلي من بولندا ولا بيلاروسيا مبيعرفش حتى ينطق حرف الحاء بيقولها خاء ويقولي سلام خبيبي وارضنا وعايزنا نتقبل وجوده، ياخي احنا شعبنا ده اكتر شعب مبيطيقش سيرتهم تلاقيه يتقبل الانجليزي والامريكي مهما عملوا بس ييجي ده والوش يقلب ويكشر والضغط يترفع والعيون تبرق.
هيا دي الحقيقة مهما صرفوا عليها مليارات وحاولوا يمرروها، شعوبنا مبتطبعش، هوا ده تمامهم وسطنا، حبايينا بنعملهم مسرح، والتانيين تمامهم يتجابوا عالارض.
شكرا ✌
