Sp/Soheir Al dabaa

اضطراب فرط الحركة وتشتت الانتباه (ADHD)
مش "دلع" أو "قلة تربية"، ده اختلاف طبيعي في كيمياء المخ بيخلي الطفل أو الشخص يواجه صعوبة في التركيز والتحكم في اندفاعه وطاقته الكبيرة. هو ببساطة "مخ نشيط زيادة" محتاج طرق تنظيم وخطوات محددة عشان يقدر يوجه طاقته وإبداعه بشكل صح.

1. المخ بيشتغل بطريقة مختلفة
علماء الأعصاب، ومنهم الدكتور راسل باركلي (Russell Barkley) -وهو من أشهر المتخصصين في المجال ده- بيشوفوا إن ADHD مش مجرد حركة زيادة، ده "اضطراب في الوظائف التنفيذية".
ببساطة، المخ عند الشخص اللي عنده ADHD بيواجه صعوبة في:
التحكم في الاندفاع: المخ بياخد القرار قبل ما يحلل العواقب.
تنظيم الوقت والمهام: الصعوبة في البدء بالمهمة أو الاستمرار فيها حتى النهاية.
الذاكرة العاملة: نسيان التعليمات أو التفاصيل بسرعة

2. مشكلة "كيمياء" مش "تربية"
العلماء بيأكدوا إن السبب الرئيسي هو خلل في كيمياء المخ، وبالتحديد في ناقلات عصبية زي الدوبامين والنورادرينالين. الدوبامين هو المسؤول عن الشعور بالمكافأة والتركيز. لما مستواه بيكون أقل من الطبيعي، الشخص بيحاول "يدور" على أي محفزات خارجية (حركة، كلام، تنطيط) عشان يعوض النقص ده في المخ.
(اضطراب فرط الحركه وتشتت الإنتباه هو ليس اضطراب في نقص الإنتباه هو اضطراب في تنظيم الإنتباه)
د. توماس براون.
يعني الشخص ممكن يركز جداً لو الحاجة اللي بيعملها ممتعة ومحفزة (حالة بنسميها التركيز المفرط أو Hyperfocus)، لكن بيعاني جداً في الحاجات الروتينية أو اللي محتاجة صبر.
3. منظور "التنوع العصبي" (Neurodiversity)
في السنوات الأخيرة، بدأ العلماء والخبراء يغيروا النظرة للموضوع. بدل ما يشوفوه "عطل" لازم يتصلح، بيشوفوه كـ "اختلاف في طريقة التفكير".
الناس اللي عندهم ADHD غالباً بيمتلكوا:
إبداع عالي: قدرة على ربط أفكار ببعض مبيشوفهاش غيرهم.
طاقة غير محدودة: لو اتحطت في المكان الصح، بتبقى قوة جبارة.
مرونة في الأزمات: تفكيرهم السريع بيخليهم يعرفوا يتصرفوا في المواقف الصعبة.
إزاي نتعامل؟
العلماء متفقين إن الحل مش في "الزعيق" أو "العقاب"، لأن ده بيزود التوتر وبيخلي المخ يفقد قدرته أكتر على التركيز. الحل بيعتمد على 3 محاور:
التفهم: إننا نعرف إن الشخص "مش قادر" مش "مش عايز".
التنظيم الخارجي: بما أنهم بيلاقوا صعوبة في التنظيم الداخلي، إحنا بنساعدهم بجداول، صور، ومؤقتات (Timers) تساعدهم يمشوا يومهم.
الدعم المهني: أحياناً بيكون فيه احتياج لتدخل سلوكي، أو دوائي (بأمر الطبيب) عشان يظبط كيمياء المخ ويخليهم يقدروا يمارسوا حياتهم.
ارشادات للأم في البيت !!
طفل الـ ADHD مخه بيعلق في "الزحمة" لو سمع أمر طويل.
بدل ما تقول: "قوم رتب أوضتك، ولم الهدوم اللي على الأرض، وحط الكتب في الشنطة، وبعدين تعالى كل."
قولي له يعمل إيه:أمر واحد بس في كل مرة. "يا حبيبي، لم الهدوم بس." ولما يخلص، شجعيه جداً، وبعدين "دلوقتي رتب الكتب." التجزئة هي سر النجاح.
2. "مؤقت الساعة" (The Timer) هو الصديق الوفي
الأطفال دول عندهم "عمى زمني"؛ يعني الوقت بيعدي منهم من غير ما يحسوا.
جيبي له(مؤقت مطبخ أو حتى الموبايل)، وقولي له:
"عندك 10 دقائق بس نلم فيهم الألعاب."
ده بيخلي المهمة تتحول لـ "تحدي" أو "لعبة" بدل ما تبقى "أمر ثقيل". لما الوقت يخلص، الـ Alarm اللي بيرن بيحسسهم بالإنجاز.
3. تقليل "المشتتات البصرية" في مكان المذاكرة
مخ الطفل ده بيشوف كل حاجة حواليه في نفس الوقت.
قولي لها: "مكتب المذاكرة لازم يكون عليه بس الحاجة اللي محتاجها للمادة دي."
شيل أي ألعاب أو صور أو حتى ألوان تانية قدام عينه وهو بيذاكر. كل ما كان المكان بسيط، كان تركيزه أعلى.
4. "حصة الحركة" قبل المذاكرة
دي نصيحة ذهبية: "فرغي الطاقة عشان تلاقي التركيز."
قبل ما يبدأ أي مهمة محتاجة تركيز، خليه يعمل نشاط حركي (ينط، يلف في الصالة، يعمل تمارين ضغط بسيطة). الحركة بتزود تدفق الدم للمخ وبتفرز مواد كيميائية بتخلي الطفل أهدى وأقدر على التركيز.
5. نظام "الاستراحة النشطة"
بما إنه بيتشتت بسرعة، بلاش نطلب منه يقعد ساعة.
خليه يذاكر 20 دقيقة، وبعدين ياخد 5 دقائق "راحة" يعمل فيهم أي حاجة يحبها، وبعدين يرجع يكمل 20 دقيقة تانيين. (طريقة البومودورو المعدلة).
6. للأم نفسها: "قاعدة الـ 5 دقائق لنفسك"
الأم اللي بتتعامل مع طفل ADHD معرضة للـ Burnout (الاحتراق النفسي).
"أنتِ محتاجة تشحني طاقتك." حتى لو 5 دقائق في اليوم بعيداً عن دوشة البيت، تشربي فيهم قهوة بهدوء أو تتنفسي بعمق. الأم الهادية = طفل أهدى. الطفل بيحس بتوتر أمه، فلو إنت مشدودة، هو كمان هيكون مشدود أكتر.
7. المكافأة (نظام النقاط)
بلاش تعتمدي على "الخناق" كطريقة للتقويم.
استخدمي "لوحة النجوم". كل ما يعمل حاجة صح (مثلاً: رتب سريره، سمع الكلام من أول مرة، ركز في الواجب)، ياخد نجمة. ولما يجمع عدد معين، ياخد مكافأة بسيطة (خروجة، لعبة صغيرة، وقت أكتر على التابلت). ده بيحفز الدوبامين في مخه ويخليه يكرر السلوك الصح.

نقطة أخيرة مهمة:
ADHD
مش بيختفي مع الوقت بنفس الطريقة عند كل الناس، لكن "الأعراض" بتختلف. الطفل اللي كان بيتنطط كتير، ممكن يبقى مراهق أو شخص بالغ بيعاني من "دوشة أفكار" وتشتت داخلي، وده بيبان في صورة صعوبة في إنجاز الشغل أو كثرة النسيان

التلعثم عند الأطفال.. ليه بيحصل وإيه الصح؟
عارفة إن "التلعثم" (أو التأتأة) ممكن يقلق أي أم، بس العلم بيقول إن الموضوع أبسط بكتير مما نتخيل لو اتعاملنا معاه صح.
1. يعني إيه أصلاً طفل بيتلعثم؟
ببساطة، ده مش معناه إن الطفل ذكاؤه قليل أو عنده مشكلة نفسية. العلماء دلوقتي متفقين إن ده "اضطراب في طلاقة الكلام" وسببه غالبًا عصبى وبيولوجي. يعني المخ بتاع الطفل بياخد وقت أطول شوية عشان ينسق بين الكلام اللي هو عايز يقوله وبين عضلات اللسان والشفايف اللي بتنفذ الكلام ده.
حاجة تانية مهمة: الوراثة ليها دور كبير؛ لو الأب أو الأم أو حد في العيلة كان بيتلعثم وهو صغير، احتمالية إن الطفل يمر بنفس التجربة بتكون أكبر.
2. ليه ده بيحصل؟ (كلام العلماء بالمختصر)
العلماء عندهم نظرية مشهورة اسمها "الضغط والقدرات":
تخيلي إن الطفل في مرحلة معينة (من 3سنوات لـ 6 سنين) مخه بيطور لغة بسرعة رهيبة، وعايز يقول جمل طويلة ومعقدة، بس قدراته الحركية في النطق لسه مش ملاحقة السرعة دي. فبيحصل "زحمة" في الكلام، والنتيجة بتكون تكرار في الحروف أو الكلمات.

3. إزاي تتعاملي مع طفلك في البيت؟ (نصايح المختصين)
العلماء وأخصائيين التخاطب دايماً بيقولوا إن "البيئة" اللي حوالين الطفل هي أهم علاج:
اسمعيه هو بيقول إيه، مش بيقوله إزاي: ركزي في محتوى الكلام. لو حاول يتكلم وتلعثم، استني خالص لحد ما يخلص، ولا كأن فيه حاجة حصلت. بلاش تقولي له "هدي نفسك" أو "خد نفس" لأن ده بيحسسه إنه بيعمل حاجة غلط.
سيبي له مساحة: بلاش تكملي الجملة مكانه، وبلاش تقاطعيه. سيبي له وقت كفاية يفكر ويطلع الكلمة براحته.
اتكلمي بالراحة: حاولي أنتِ وباقي أفراد الأسرة تتكلموا بهدوء وبالراحة قدامه. الطفل بطبعه بيقلد؛ لما يلاقيكِ بتتكلمي بهدوء، هو هيقلد طريقتك لا إرادياً.
بلاش ضغوط: بلاش تخليه يقرأ بصوت عالي قدام الضيوف أو يكرر جملة غلط قالها. خلي الكلام دايماً حاجة ممتعة مش امتحان.
إمتى الموضوع يحتاج أخصائي؟
مفيش داعي للقلق إلا في حالتين:
لو التلعثم استمر أكتر من 6 شهور ومفيش تحسن.
لو بدأ يظهر على الطفل إنه خايف يتكلم، أو بيتجنب إنه يفتح كلام مع أصحابه، أو باين عليه الضيق والتوتر.
في الحالات دي، زيارة أخصائي تخاطب شاطر هتكون خطوة ممتازة عشان يطمنك .

ايه السبب اللي بيخلي طفلي يعاندني ف كل تفاصيل اليوم؟؟

* بنتعامل معاه تعامل قاسي ..
* بابا وماما بيتدخلو ف كل حاجه للطفل ..
* مقيدين الطفل بالاوامر غير الضروريه ..
طب والحل اي ؟؟؟
💞الحل اننا نخليهم يعبروا عن نفسهم ومش كل حاجه نعترض عليها لازم يكون في سبب واضح ..

* نديهم حب واحضان علي قد مانقدر ...

* نقلل عصبيه عليهم..

* ودائما حطي نفسك مكان طفلك هل تقبلي أن حد يجبرك علي شئ؟

وراء كل اضطراب سلوكي أو لغوي… حالة نفسية محتاجة حضن واحتواء قبل ما تحتاج علاج!
احتوِ الطفل يحب قبل ما تصلّح سلوكه، واسمعه قبل ما تصحح كلامه 🗣️❤️

امتي أقول إن الطفل متأخر لغوياً ؟
بقلم / د.سهير الضبع
ماجستير التربيه الخاصة
دبلومه التربيه الخاصة والإرشاد النفسي والاسري.

ايه هو التأخر اللغوي ؟

التأخر اللغوي عند الأطفال هو عدم اكتساب الطفل للمهارات اللغوية في الوقت المناسب لعمره، سواء كانت هذه المهارات تتعلق بالفهم أو التعبير . ببساطة، الطفل المتأخر لغوياً قد يجد صعوبة في فهم ما يقال له، أو قد يجد صعوبة في التعبير عن نفسه باستخدام الكلمات والجمل.
بشكل أكثر تفصيلاً، يشمل التأخر اللغوي ما يلي:
تأخر في اكتساب اللغة:
قد لا يبدأ الطفل في الكلام في الوقت المتوقع، أو قد يتأخر في تعلم كلمات جديدة أو بناء جمل.
صعوبة في فهم اللغة:
قد يواجه الطفل صعوبة في فهم الأوامر أو الأسئلة أو حتى المحادثات العادية.
صعوبة في التعبير عن الذات:
قد يجد الطفل صعوبة في التعبير عن احتياجاته أو أفكاره أو مشاعره باستخدام الكلمات.
قد يأتي التأخر اللغوي مع مشكلات أخرى، مثل:
تأخر في النمو الحركي:
قد يتأخر الطفل في اكتساب مهارات حركية مثل المشي أو التسلق.
صعوبات في التعلم:
قد يواجه الطفل صعوبة في القراءة أو الكتابة أو الهجاء.
مشكلات في السمع أو الإدراك:
في بعض الحالات، قد يكون هناك سبب طبي وراء التأخر اللغوي، مثل مشكلات في السمع أو الإدراك.

ما هي علامات التأخر اللغوي عند الأطفال؟

الأعراض:

* الغمغمة بوتيرة أقل أو إصدار أصوات بدرجة أقل من المعتاد بين عمر 7 أشهر إلى 12 شهرًا.
* نطق بالكلمات الأولى متأخرًا، عادةً بعد عمر 12 شهرًا أو 18 شهرًا.
* استخدام عدد محدود من الحروف الساكنة والمتحركة.
* كثرة إغفال أصوات عند التحدث.
* استخدام كلام يصعب فهمه.

اسباب التأخر اللغوي:

*الضعف السمعي
*فقدان البصر
*اصابه دماغية
*اضطرابات نفسية
*حرمان بيئي

من المهم أن يتم تقييم الطفل من قبل متخصص في أقرب وقت ممكن لتحديد سبب التأخر اللغوي ووضع خطة علاج مناسبة.

إلارشادات العائلية:
المرحله قبل اللفظية :
اتكلم مع الطفل عن أشياء تلفت نظرة مما يدور حوله في البيئه المحيطة .
اتكلم عن الأحداث اليوميه مثل (تغيير ملابسه ـالاستحمام .....) في جمل واضحه وبسيطه .
اعرف الطفل علي الحيوانات واصواتهم لمعرفه صوت كل حيوان والربط بين الصوت و الحيوان .
اعرفه الاشكال والالوان المستخدمه في الحياه اليوميه .
تقليل الاسئله المباشره مثل (إيه ده ؟) أو الإصرار لحصول علي استجابه فورية .
اعطاءه التعزيز المناسب عند إبداء أي استجابه صحيحة مثل (الحلوي أو التصفيق ) .
المرحله اللفظية :
استخدم جمل واضحه وسهله مع الطفل عند الحديث عن الاشياء اليوميه مثل (الطعام -الاستحمام .....)
تكرار ما يقوله الطفل مع تصحيحه .
تكرار ما يقوله الطفل مع اطاله الجملة مثال :
لو قال الطفل (مية)
تقول الام : عاوز مية؟ .ماما عندها مية ...ماما عندها مية ساقعه .
اعرف الطفل اسماء اعضاء الجسم -ادوات المطبخ - اسماء الحيوانات -الملابس وغيرها ... مع توضيح استخدام كل منها .
مثل :معلقه ....اكل بيها عيني.....اشوف بيها .
إعطاء الطفل الثقه بأن كلامه مفهوم حتي لو كان غير ذلك .

امتي أقول إن الطفل متأخر لغوياً ؟ - الهرم المصرى نيوز الهرم المصرى نيوز موقع اخبارى - رياضى - سياسى - ثقافى - شامل يهتم بكل ماهو جديد وحصرى

افرق ازاى بين الطفل الشقي وطفل فرط الحركه وتشتت الإنتباه ؟

بقلم /د. سهير الضبع
ماجستير التربيه الخاصة
دبلومه في التربية الخاصة والإرشاد النفسي والاسري

عجز العلماء عن وضع أسباب جذرية لحدوث العديد من الاضطرابات .
في هذا المقال نتحدث عن اضطراب يضم فئة كبيرة من أطفالنا صغارًا بِالتحديد من سن ثلاث سنوات، وقد يظل مستمرًا معهم حتى مراحل المراهقة وما بعدها...

أن تشعر بِأنك خارق قادر على فعل خمسة أشياء في وقت واحد بِشكل متقن فَهذه سمة من سمات إنجاز العديد من الأعمال، ولكن إذا غاب الإتقان ومن ثم غاب معها التحكمات فَهذا ما يفعله اضطراب ADHD.

إذا فَما المقصود بِكلمة ADHD؟
هي اختصار لكلمة
attention-deficit/hyperactivity disorder
ضعف وقصور في الانتباه، أو نشاط مفرط في الحركة وإندفاعية غير مبررة.

ومن هنا تأتي أنواع الـADHD
- إما يكون الطفل يعاني من تشتت في الانتباه، ومن ثم ضعف في التواصل البصري، وبناء على ذلك تقل معدلات الاستجابة.

- أما أن يكون كثير التحرك بدون أسباب واضحة بدون أهداف محددة؛ حركات عشوائية لا أكثر.

- أما أن يُعاني الطفل من الإندفاعية في رد الفعل، أو ارتاكبه للأفعال ذاتها التي تُبني من خلالها اكتمال رؤية ADHD.

ومن هنا تأتي سمات تشتت الانتباه:-

1- صعوبة شديدة في تتبع التعليمات.
2- صعوبة بالغة في عملية التذكر، وذلك عند إعطاء الطفل بعض من الأوامر المتسلسلة والمركبة.
3- تجنب الأنشطة التي تحتاج إلى مجهود ذهني.
4- مشاكل واضحة في تنظيم أبسط أدواته.

فرط الحركة:-
1- الكرسي بالنسبة لِطفل فرط الحركة كَأنه شوك وهنا يجد صعوبة في الجلوس لفترات ولو مؤقتة؛ بِالتقدير الزمني لا يمكنه الجلوس ثابـتًا أكثر من دقيقتين.
2- التحدث المستمر.
3- مقاطعة المتحدث.
4- الأحاديث الجانبية المتكررة في نفس الموضوع.
5- لا يطيق الانتظار.
6- الفرك بيده واهتزاز قدميه والحركة الدائرية برأسه 360 درجة في الدقيقة الواحدة.

مهم جدا نعرف 👇
- تشخيص اضطراب فرط الحركة وتشتت الانتباه بيعتمد علي المراقبة أو الملاحظة السلوكية للطفلِ فَي كل ما ذكرناه وهذه الأشياء قد يفعلها الطفل الطبيعي، ولكن اللي بيفرق بينهم هي المدة الزمنية التي استمر حدوث السلوك فيها. وان الاول من ذوي الاضطراب يفعل السلوك من غير تفكير يعني يكسر ويجري ويهد الدنيا وهو مش مدرك .أما اطبيعي هو فاهم مدي الخطورة وبيخاف من العقاب .

- مدة الانتباه تعتمد على مدىٰ اهتمام الطفل بِالمثير المحيط.

اسباب اضطراب ADHD:

لا توجد أسباب جذرية لِهذا الاضطراب بِدليل قاطع لم يتوصل العلماء و أطباء المخ والأعصاب إلى علاج مخصص لِهذا الاضطراب، ولكن ما توصلنا إليه حتى الأن ما هي إلا اجتهادات شخصية من العديد من العلماء، ومن أهم هذه الأسباب...

1- ضعف في القشرة الدماغية التي تسبب زيادة في الحركة، ومن ثم يحتاج الطفل إلى ممارسة الألعاب الرياضية للتنفيس عن تلك الحركة الزائدة بِالأضافة إلى التغذية السليمة؛ لِذلك حتى نطمئن على سلامة القشرة الدماغية نتجه لأشعة MRI "أشعة الرنين المغناطيسي".
2- زيادة معدلات إفرازات الغدة الدرقية 'TSH" تؤدي إلى حركة زائدة، وحتى نطمئن على معدل الافرازات يمكننا بِإجراء تحليل TSH.
3- مستوى الرصاص في الدم يؤدي إلى حركة زائدة.
4- التاريخ الطبي للعائلة.
5- تناول الأم للسموم والكحوليات أثناء فترة الحمل.

العلاج:-
لا يوجد علاج مخصص لهذا الاضطراب غير أدوية المنشطات والفيتامينات في حالة تشتت الانتباه.
يمنع لِطفل تشتت الانتباه تناول منتجات الألبان؛ كَاللبن والزبادي، وذلك ِلحدوث خلل في القشرة الدماغية، وعليه تكون إشارة المخ إلى الجهاز الهضمي إشارة مشوشة ينتج عنها الفريمونات، ومن ثم يشعر الطفل بِالتخدير، وكأنه قد تناول بعض من السجائر الملغمة.

العلاج المعرفي السلوكي "CBT "، وذلك من خلال الاخصائي النفسي واخصائي التربية الخاصة يسعون مع الطفل نحو إتخاذ الاجراءات المناسبة حتى يدرك الطفل ما يفعله.

• اختبار الذكاء ودا مهم جدا في حالة نقص معدلات الذكاء عن المعدل المطلوب .يعني لو الطفل عنده مشكله في معدلات الإدراك والفهم ، لانه ينتج عن هذا حركة زائدة للِطفل، وبناء على ذلك يحتاج الطفل إلى اخصائي تنمية مهارات، ووضع برنامج مناسب له؛ لتطوير قدراته الذهنية.

• ارتفاع معدل الذكاء لِلطفل ودا عن طريق تفريغ مستمر لِطاقته الحركية، ويحتاج الطفل إلى ممارسة ألعاب مستويات التفكير العُليا؛ لتفريغ هذه الطاقة. ودا بيتم مع اخصائي .

اختبار اللغه .
يمنع من المواد الحافظة والحلويات .
اعطاءه مكسرات لأنها بتساعد علي التركيز .
تقليل المشروبات التي تحتوي علي الكافين .
لازم الطفل يأكل سمك علي الاقل مره في الاسبوع .
نظام غذائي سليم ( خضروات وبروتين ...)
تقليل المشتات في البيت .
تقليل الاشياء التي تنكسر لان كل ما الطفل يكسر حاجه هيعرض للتوبيخ من الأم .
طفل فرط الحركه روتيني لازم نغير الروتين ده لو بيفطر في ميعاد معين نغيره بميعاد تاني .

https://tinyurl.com/22ujdy5y.

افرق ازاى بين الطفل الشقي وطفل فرط الحركه وتشتت الإنتباه ؟ - الهرم المصرى نيوز الهرم المصرى نيوز موقع اخبارى - رياضى - سياسى - ثقافى - شامل يهتم بكل ماهو جديد وحصرى

"التعافي من علاقة مؤذية"

بقلم /د.سهير الضبع
ماجستير التربيه الخاصة
دبلومه التربيه الخاصة والإرشاد النفسي والاسري

التعافي من علاقه مؤذية مش حاجة سهلة، لكنه ممكن جدًا يكون في تعافي وبيبدأ بخطوات حقيقية ومدروسة. مش كلمه بنقولها ومع اول مكالمه من الشخص ده بننسي كل اللي حصل معانا لا .لازم تاخدي قرار وتكوني قويه وتمشي علي الخطوات دي 👇.

1. الاعتراف بالأذى

اعترفي إن العلاقة كانت مؤذية وإنك اتعرضتِ لأذى نفسي أو عاطفي أو حتى جسدي. ده أول خطوة حقيقية علشان تبدأي تتعاملي مع الواقع.

2. القطع التام (No Contact)
لو العلاقة انتهت، مهم جدًا تمنعي التواصل تمامًا مع الشخص المؤذي – لا مكالمات، ولا رسائل،و لا تتابعي أخباره. التواصل بيجدد الألم وبيوقف تعافيكي .
3. ارجعي لنفسك
4. ابدئي اهتمي بنفسك من تاني
5. كلي كويس ونامي كويس
6. مارسي رياضة بسيطة
7. اكتبي يومياتك
8. اكتشفي هوايات جديده فيكي
9. تقبّلي الألم بدون جلد الذات
10. حطي حدود قوية بعد كده
هلجا للعلاج النفسي اذا كانت التجربه سبب صدمه نفسيه وبتعطل حياتي .
بعد ما تتعافي، لازم تحطي لنفسك حدود نفسية واضحة علشان ما تكرريش نفس التجربة. اسألي نفسك دايمًا:
"هل الشخص ده بيحترمني؟ بيخليني أحس بالأمان ؟". حطي حدود قوية بعد كده عشان تقدري تختاري شريك حياتك صح .
المشكلة إن ناس كتير بتدخل علاقات بدافع الوحدة، أو الخوف من العنوسة، أو عشان "كويس ومش هيتعوض"، من غير ما يسألوا نفسهم: أنا مرتاحة معاه؟ بقدر أكون على طبيعتي قدامه؟ بيحترمني؟ بيقدرني؟ ولا دايمًا حاسة إني مش كفاية؟

شريك الحياة مش لازم يكون كامل، بس لازم يكون مناسب ليكي. يعني تفكيركم مش بعيد عن بعض، طريقة تعبيركم عن مشاعركم مفهومة، وفي مساحة للأمان... مش دايمًا في قلق ولا خوف من رد فعله.

خدي بالك من الحاجات الصغيرة اللي بتعدي عليكي وتقولي "مش مشكلة دلوقتي"، لإنها بعد الجواز بتكبر وتوجع. لو مش بيحترم رأيك، لو بيتريق على مشاعرك، لو بيكتمك أو بيحاول يغير فيكي كل حاجة... ده إنذار. الحب الحقيقي مش بيكسر، الحب الحقيقي بيداوي ويدّي مساحة.

والأهم، متخليش فكرة "أنا هغيره بعد الجواز" تضحك عليكي... اللي مش شايف إنه محتاج يتغير وهو بيحبك، عمره ما هيتغير وهو متطمن إنك خلاص بقيتي موجودة.

خدي وقتك، اسألي نفسك الأسئلة الصح، وما تخافيش تكوني لوحدك شوية، أحسن بكتير من إنك تعيشي عمرك مع حد مش حاسس بيكي.

"لو رجع بيكي الزمن، كنتِ هتختاري نفس الشخص شريك لحياتك؟
"إيه أهم صفة بالنسبالك لازم تكون موجودة في شريك الحياة؟ وإيه الصفة اللي لو لقيتيها بتكوني مش قادرة تكملي؟"

التعافي من علاقة مؤذية - الهرم المصري نيوز الهرم المصرى نيوز موقع اخبارى - رياضى - سياسى - ثقافى - شامل يهتم بكل ماهو جديد وحصرى

إزاى الطفل هيكون عنده إضطرابات نفسيه ؟

بقلم /د.سهير الضبع
ماجستير التربيه الخاصة
دبلومه التربيه الخاصة والإرشاد النفسي والاسري

هو الطفل اللي مش فاهم حاجه هيكون عنده اضطرابات نفسيه ازاى !!
دا كلام ناس كتير بتردده ومش مقدرين مدي الخطورة. والاجابه هي اه طبعا الاطفال بيكون عندها اضطرابات نفسيه لأنهم عرضه للاضطراب إذا كان وراثي أو بيئي زي اي حد كبير .

طيب احنا عارفين اولا ايه هي الاضطرابات النفسية ؟
هي حالات صحية بتأثر على تفكير الطفل، مشاعره، وسلوكه، وقد تؤثر على قدرته على التعلم والتفاعل مع الآخرين. و بتتراوح من مشاكل بسيطة إلى أكثر تعقيدًا زي الاكتئاب، اضطرابات القلق، اضطراب فرط الحركة ونقص الانتباه، اضطراب طيف التوحد، اضطرابات الأكل، وأعراض الذهان.

ايه هي أعراض الاضطرابات النفسية الشائعة؟
التغيرات في المزاج والسلوك:
الطفل بيحصله نوبات غضب متكررة، تقلبات مزاجية، العصبية المفرطة، والسلوكيات الخارجة عن السيطرة،سلوك التخريب في اي مكان في قواعد .
التغيرات في عادات الأكل والنوم:
زي فقدان الشهية أو العكس الشره المرضي، أو الأرق والكوابيس ، التبول في الفراش .
الصعوبات الأكاديمية:
ضعف الأداء في المدرسة، صعوبة في الإنتباه و التركيز، والانسحاب من الأنشطة المدرسية.
https://tinyurl.com/yos6pyvt

الانسحاب الاجتماعي:
يحب العزله ويبعد عن أصدقاءه ، عدم الرغبة في المشاركة في الأنشطة الاجتماعية.
القلق المفرط:
الخوف والتوتر المستمر، والعصبية الزائدة، ومشاكل النوم.
أعراض جسدية:
زي الصداع وآلام المعدة المتكررة، والتي قد تكون مرتبطة بمشاكل نفسية.
أفكار ومحاولات إيذاء النفس أو الانتحار:
هنا بقي بنوصل لمرحله و علامة تحذيرية خطيرة لازم نهتم ونتدخل فورآ .

أسباب الاضطرابات النفسية عند الأطفال:
الوراثة:
قد يكون الطفل عنده استعداد وراثي لبعض الاضطرابات النفسية.
العوامل البيئية:
طبعا المشاكل الأسرية، التعرض للعنف أو الإساءة، والتنمر.
العوامل الكيميائية:
تأثير بعض الأدوية أو المواد الكيميائية على الصحة النفسية للطفل.
اعالج ازاى الاضطرابات النفسيه عند طفلي ؟

العلاج النفسي: العلاج السلوكي المعرفي، العلاج الأسري، والعلاج بالأدوية.
العلاج الدوائي:هنا ضروري لازم نلجأ لطبيب نفسي لإعطاء الطفل أدوية لعلاج بعض الأعراض.
الدعم الاجتماعي والعاطفي: توفير بيئة داعمة للطفل في المنزل والمدرسة والمجتمع.

امتي اطلب مساعده الطبيب ؟

لو لاحظنا اي عرض من الأعراض التي ذكرت طبعا لازم طبيب نفسي فورا . العلاج المبكر بيساعد الاطفال علي تحسين صحتهم النفسية.

إزاى الطفل هيكون عنده إضطرابات نفسيه ؟ - الهرم المصرى نيوز الهرم المصرى نيوز موقع اخبارى - رياضى - سياسى - ثقافى - شامل يهتم بكل ماهو جديد وحصرى