25/05/2026
أوقات كتير الأهل بيشوفوا تقدم الطفل بعد فترة من الجلسات ويفرحوا جدًا ويشعروا إن “خلاص بقى كويس”، لكن الصورة الحقيقية بتكون مختلفة.
ممكن طفل عمره الزمني ٥ سنين ييجي وهو عنده مهارات لطفل عمره ٦ شهور فقط، وبعد ٦ شهور شغل مكثف جدًا يبدأ يوصل لمهارات طفل عمره سنة ونص. وفعلاً ده يعتبر تقدم كبير جدًا مقارنة بالمستوى اللي بدأ منه، لكن في نفس الوقت هو مازال متأخر بشكل واضح عن عمره الحقيقي ولسه محتاج استمرارية وشغل طويل.
علشان كده التوقف الطويل (٣ شهور) في مرحلة حساسة زي دي لمجرد السفر أو المصيف بيكون مؤذي جدًا، لأن الطفل بيكون يدوبك بدأ يكتسب المهارات الأساسية، والانقطاع ممكن يرجعنا خطوات لورا ، خاصة لو مافيش اى شغل حقيقي ومستمر بيحصل في البيت.
وعلشان كده، من حق المركز بشكل كامل إنه يعتذر عن إعادة استقبال الحالة بعد انقطاع طويل تم باختيار الأهل لاسباب غير طارئه رغم التوصية بعدم التوقف.
وده قرار مهني ومش تعنت والمركز بياخده حفاظًا على جودة الخدمة وعلى جدية الخطة العلاجية لانه بيكون مطالب إنه يبدأ من الصفر مرة أخرى، ويعيد بناء الروتين، والالتزام، والمهارات اللي اتأثرت بالانقطاع،
وطبعًا إحنا متفهمين جدًا إن أي أسرة ممكن تحتاج راحة أو break من ضغط الجلسات والروتين المستمر، وده شيء طبيعي جدًا.
لكن ده يقدر يحصل بشكل صحيح لما يكون فيه متابعة حقيقية وشغل مستمر مع الطفل في البيت، ولما تكون فترة التوقف مدروسة ومش هتأثر على الطفل بشكل سلبي أو تضيع التقدم اللي اتبنى.
لأن الهدف في النهاية مش مجرد تسجيل اطفال وزياده حالات، لكن الحفاظ على استمرارية تطور الطفل ومصلحته على المدى البعيد.
وعيد سعيد وكل سنة والجميع بصحة وسعاده وراحة بال :)
