21/03/2020
انا طفل توحدي يعني مصاب بااضطراب التوحد..
خد بالك انا قولت اضطراب مش مرض ..
يعني انا مش مريض وكمان مش متخلف عقليا ..
صحيح انا اسمي وحيد لكن أنا مش وحيد ..
داانا زيي كتير تقريبا من كل 100 طفل في طفل توحدي ..
في حاجات كل واحد مننا يتمني انكم تعرفوها ..
عاوزك تعرف أن التوحد ده جانب من جوانب شخصيتي مش كل شخصيتي ..
يعني متقولش عليا طفل توحدي قول طفل عنده توحد ..
يعني مثلا لو انت تخين تحب يتقال التخين راح التخين جه ...
اكيد لا فاانت انسان لكن وزنك زايد ..
وانا زيك انسان لكن عندي توحد ..
وكمان عندي مشكله في الحواس يعني ..
( المثيرات البصريه والسمعيه واللمس والشم والتذوق )
اللي بتكون بالنسبه ليكم عاديه بتكون بالنسبه لي مش عاديه ..
بحسها بطريقه مختلفه بتسبب لي ألم ..
يعني صوت عالي زي ده كأن حد بيخرم في وداني ..
أو تيجي تحضني فاانا ابعدك عني ..
مش لاني مش عايزك تحضني ..
لكن الاحساس باللمس بيالمني ...
ومش معني كده اني قليل الادب ..
لأن ده غصب عني ..
فأرجوك لو اكتشفت أن المثير بيالمني حاول تبعده عني ..
علي فكره لغتكم بالنسبة لي صعبه ..
لأنها كلام مش ملموس ..
وانا لغه تفكيري بالصور ..
فبدل ما تقولي بالكلام اعمل ايه ..
وريني بالصور أو عمليا اعمل ايه ..
علشان في حاجات في كلامكم تقصدوا بيها حاجه وهيه بالنسبة لي حاجه تانيه ..
زي لما بكون ماشي ببطء مع مامتي ..
فتقولي يلا بسرعه بقا انت ماشي علي قشر بيض ..
طب فين قشر البيض ..
في حاجات بتحس أنها بديهيه
واننا مش محتاجينها لكنها بالنسبة لنا اساسيه ..
فاانا ممكن أظهر قدامك أن امكانياتي ضعيفه ..
لكن لو دورت جوايا هتلاقي نقاط قوه كتير ..
بس انت دور ..
وكمان علمني ازاي اندمج معاكم ..
علشان ممكن أظهر اني رافضكم..
لكن الحقيقه أنا مش رافضكم ..
بس ببساطه مش عارف ازاي اتعامل معاكم ..
لو انت حد من عيلتي أو من جيراني أو من صحابي في المدرسة أو أي حد بيتعامل معايا ..
فياريت تحبني حب من غير شروط واقبلني زي مانا ..
علشان بيجرحني قوي لما اسمع حد بيقول لو كان يقدر يعمل كذا أو يقدر يقول كذا ..
ياجماعه التوحد ده مش اختياري ده اختيار ربنا ..
وانا رضيت بيه وانت كمان ارضي بيه ..
وبمساعدتك وصبرك هنوصل أن شاء الله ..
وانا بوعدك انك مش هتندم لاني استحق ده ا..
نا مش بغش ولا بكذب ولا بستهزا بالآخرين فاانت علمني ازاي اعيش الحياه وانا هعلمك ازاى تكون انسان ...
