Mohamed selim

اتجاهك اتجاهي شئ غريب ✨✨

فاضل ايه تاني ...
بين سؤال وجواب وزحمة سكوت وعذاب حواديت بتتقري من تاني مش مكتوبه ف كتاب عن قشه قسمت ظهر البعير وحضن خالي مش لاقي ليه حبيب وحزن قاسي وسط الفرح بيطل كان نفسي تكوني ليا وابقي ليكي لأخر يوم ف العمر استحملت الف حاجه الا انك متشوفينيش حاولت كتير اعاتب واصالح بس فالأغلب مشفتنيش وكأن محاولاتي دايمآ حواليها ضباب وسحاب بتعاقبيني بسكوتك تملي مليت من خبط الباب جوايا اتنين بيتكلمو عن جنه جواها عذاب وكأن سيف الرضا عن النفس مبيقتلش غير احباب عايم ف بحر الدنيا مش لاقي لقلبي بر وكأني هويت الترحال والعمر اصبح مر يا مُهره بتجري من فارس خايف يشد اللجام لا قادر يقرب ولا حتي يبعد وقابل برد الباب كان نفسي اقدر اوصف كلامي مش قد المقام و القلب شايل صورتك بحضنها واحاول انام وتهاجمني كوابيس مريبه عن بعدك كما الاحلام القرب مفهوش امل وانا تايه من غير سبب ولسه ماشي ف سكتي بزرع ورود واحلام يا هل تري هوصل للبر قبل ما اموت يحضني الطريق وبرضا يمسك ايدي ويعود تصبح دنيتي جنه قبل الاوان مايفوت

عيزاني اقولك بحبك .. طب ازاي
ازاي وكلهم باصين ..عارفين الحقيقه اللي جوايا وجواكي ومخبيين ..نص المشهد كانت نظرة وابتسامه .. رغي كتير عالواتساب وكام مره احب وكام مره اتساب .. طب نحكي عن الاغاني ونقيم ف ذوق بعض .. نستهبل ف شوية مشاعر وندعي ربنا يديمنا لبعض .. نص المشهد باقيته حلم بنور .. الخوف جوايا وجواكي عارفينه ومش بنقول .. بنتعاتب ونتخانق والغيره تاخدنا ساعات .. فنتصافي ونتصالح ونقول ادينا اصحاب .. خدتنا الحياه لفه كما الدروايش .. عيزاني اقول بحبك ليه وكلهم باصين .. مستعجبين ازاي خدتني نظرة عيون .. يا قشه ف عرض البحر مكتوبلها تنقذني .. من وسط اسامي البشر تنطق ب اسمي .. ببني الحدوته فخيالي واحواطها بسور .. فيا ليلي انا عاشق وبيكي انا مجنون .. شايل الكلام جوايا ومستحيل اني اقول .

هبدأ كلامي بسلام .. ويلا نحيي العلم ..رمونا عالصبح ف طوابير .. علمونا نحب الوطن ..مراهق تحت العشرين .. بتحلم مين تكمل معاك .. وتبص هنا تدور هناك .. تعتكف مع اسامه منير .. وتبلغ مباحث التريندات .. عندي ليكو سر خطير .. ومع كامل احترامي .. للفن يا بهوات .. دي بطانة رانيا يوسف ..ومقاطع خالد يوسف ..وفنانين الشوارع،..ملايين الكباري..وعربيات الاتاري ..احلام الامان .. ترحيلات علي اللومان ..بيروقراطيه موضه .. كليوباترا سوده ..حواديتنا دايمآ غير .. حواديت ملتوته .. هنهي كلامي بعباره .. مش عبارة السلام .. ولا مشروع النهضه ولا بكره تكونو فين .. جواز الفعل من الفعل نفسه .. مش جواز السفر ولا حتي جواز صالونات .. عروسه شابه وعجوز شايب .. ومحكمة الاسره تضحك .. كلامي عايم لكن عاجبني .. جني عاشق لكن سايبني .. وده اول سر .. من اسرار الثلاثينات .. لو كانو سألوني قبل ما اجي .. كنت هقول سيبوني هناك .. بدفع ثمن وجودي .. فنهاية العالم بتاعكم .. ذنب وجودنا كبير .. دخولنا الجنه يشفعكم .

للناس اللي كانت بتسألني عن الروايه
واللي مش لاقيينها
الروايه هتكون موجوده ف معرض ساقية الصاوي في جناح رقم ٥
وانا هكون هناك بأذن الله معظم الايام ❤️❤️

مش عايز استيقظ علي الم العضلات تاني ف لو حد يبعتلي رسايل حب مزيفه هبقي شاكر جدآ 🤍🤍

عمرك فكرت قبل كده فالقمر ..
يعني من بعيد كده يبان صخره طايره بفعل الجاذبيه والكلام الكبير ده .. بينور ف الضلمه او بيعكس اشعه جايه عليه او او او. . مش ده المغزي ولا ده المقصود
النقطه البيضا اللي ف السما دي قادره تنورلك ليله ضلمه .. ولو لوحدك تقدر تسهر بليل تتفرج عليها وتحكيلها .. عارف انتا ممكن تبعت منها رسايل حتي لو مش هتوصل لحد .. كفايه عليك ساعتها انك قولت
القمر ليه سحر عجيب ميفهموش غير اللي خياله مسوحه .. يعني لما رجلك تاخدك وتروح ف نص الليل لمكان مفهوش حد وتحس انك توهت .. هوا الوحيد اللي هيدلك عالطريق
لو حبيت تشبهه حد جميل هتقوله انه زي القمر .. ولو وشه منور هتقوله انه بدر .. المهم انه واخد من القمر حته
ودي شوية هرطقه بمناسبه اني باصصله دلوقتي 😅

‏أنا لو وقفت اموت ‏بتطاردني الذكريات
‏عن أقرب ناس ليا اتكتب علينا الفراق ..
‏

ده ميت ومات فحضن الحياه
وشحات ينادي فتسمع نداه
ان من قدم شئ بيداه التقاه
.............................
مسحراتي واقف فعرض الطريق
ومسجون ينادي يقولك برئ
وصاحبه بيحلف مكنتش معاه
...................................
قصه ودايره زي الكئوس
والبكر بكره تبقي عروس
محفوظه زي درس النصوص
ان اللي ميت ناسي الحياه
.......................................
اسمك كتبته جوا قلبي اللعين
وصوتك حفظته بلحنه الحزين
مشيت وراكي بطريقك لفين
دي جنه عشقك جوه نار الجحيم
.................................
ناس كتير واقفه فشباك التذاكر
عيل صغير قاعد يذاكر
موظف افندي يراجع دفاتر
ميت فاكر نفسه فحضن الحياه

ايوه كبرت ..
مبقتش كل حاجه بتتحل بتراك.. قللت اوقات الشكوي وحب الامتلاك .. اتغيرت كل المفاهيم ف وقت قصير .. مبقتش قادر اروح مشاوير .. بقي نفسي قصير .. عرفت ان كل حاجه سهل تروح .. مش دايمآ بنعرف نقاوم .. احنا بس بنحقق انجازات عبيطه كحلاوة روح ..كل اللي فاتني مكنش بتاعي .. كل اللي جنيته جبته بدراعي ..مش خايف من اللي جي ففاتح صدري دايمآ .. ممتلكتش شئ لسه فخلقي ضيق .. الصوره من بره منوره .. جوه الكتاب السر مستخبي .. خناقات الليل بين كام واحد كلهم انا ..نفسي وبنفسي كل حاجه متدغدغه .. انا عندي حلم فاكره ومش ناسيه .. وهعدي البر التاني وحدي ومعنديش بديل .. يمكن احيانآ بتزورني اعراض الاختفاء .. والنفس يتقل واشوف كل حاجه متغلفه ب سواد .. كل اللي عارف عني عارف بس نبذه .. اللي جوه القلب محدش يعرفه غيري .. راجع من تاني للدنيا مانا اصلي مش هموت دلوقت .. مبقتش بقدر قيمة اي حاجه الا الوقت .. سحرتني عنيكي ب نظره ف مشيت كما المجذوب .. جذبني الموج فعومت واديني ف ثانيه بموت .. عرفت غلطي قاومت وجعي ورجعت تاني اعيش .. لو ايه تاني يفوتني احلامي متفوتنيش .
#حواديت

فتحت عينك خلاص .. ازيك .. انا عارف انك بتقرا الرساله دي من علي الحيطه اللي قدامك .. بس انا كاتب كل حاجه بخط كبير وواضح .. وياريت تكون بتعرف تقرا بسرعه

بص الجنزير اللي حوالين ايديك ورجليك ورقبتك تقيل .. متخسرش كل مجهودك علشان تكسره لأنك مش هتقدر .. كل اللي كانو قابلك كانو اغبيا وبيضيعو طاقتهم زيك كده .. ف اهدا وفكر صح

اييوه برافو عليك انتا دلوقتي بتلف بدماغك علشان تشوف حاجه تنقذك .. تفكير سليم جدا بس بص شمال كده .. في Timer بيعد فوقت ومقداموش وقت طويل .. متخفش قوي كده لما الوقت يخلص انا مش هقتلك .. انا مبقتلش حد .. هوا بس لو بصيت يمينك هتشوف اكتر اتنين بتحبهم وهما .. ياعم متخفش قولتلك مماتوش .. او مماتوش لسه

مراتك والكلب بتاعك متخدرين ومتوصل ف إديهم سم يقدر يقتلهم ف دقيقه ونص .. والتايمر كمان مديك دقيقه ونص .. انا سخي معاك علي غير العاده ومديك 3 دقايق تحاول تنقذهم فيهم ..

علي مستوي ايدك اليمين في خزنه .. تقدر توصلها وانتا مربوط بالمناسبه .. بس المشكله انك لو كتبت كلمة السر غلط كل مره هتبعد عنك شويه .. الخزنه فيها اول مفتاح يفك ايدك او رجلك او رقبتك .. وعلشان عنصر التشويق يزيد في ريموت كنترول يوقف السم .. بس ياتري الباسورد إييه ؟؟

تقدر تفتكر اول مره قابلت مراتك فيها كان يوم كام .. سامحني ملقتش سؤال اسهل من ده .. اللي اقدر اساعدك فيه ان الجو كان ربيع .. والشهر كان ٣٠ يوم .. اول رقم ف الباسورد هوا اول ديت بينك وبينها .. تاني وتالت رقم هوا اليوم اللي اتجوزتو فيه .. رابع رقم هوا اليوم اللي اشتريت فيه الكلب

اللعبه صعبه انا عارف والله .. بس انتا لو ضيعت وقت اكتر من كده مش هيبقي قدامك غير ايدك الشمال .. ايدك الشمال تحتها مسدس وانا برضه بنفس السخاء بتاعي مديك فرصه انك تنفذ اسهل حل .. تضرب نفسك طلقه واحده بس بين عينيك.. سامحني بس ده الحل الوحيد .. اصلك مش هتستحمل تشوف اكتر اتنين بتحبهم بيموتو قدام عينيك .. ومتحاولش تضرب الجنزير علشان لو باظ انا هدايق قوي .. وانتا برضه هتموت .. ومراتك هيا والكلب هيموتو ب السم البشع ده

ودي كانت اخر خدعه .. سامحني يا صديقي انتا بطئ ف القرايه قوي .. اصل دلوقتي ال 3 دقايق خلاص خلصو ودي كانت فرصتك الاخيره .. اتفضل بقي خد المسدس علشان الاتنين بيتخنقو دلوقتي اهو خليني اروح للي بعدك

طاااخ

#حواديت

-- أنتا عاااارف حتي تعشق حد غيرهاااا !!!
-- اوباااا 😉😉