03/12/2024
س/ ازاي أحبب ولادي في الصلاة وأدربهم عليها؟؟
**
ج/
1️⃣خلينا نتفق أن أهم خطوة هو إنك تحب الصلاة وتخليها أولوية مع الأذان وفي ترتيب يومك عليها ...الولاد هيشربوا حبها والاهتمام بيها منك
2️⃣ محتاجين نربط الولاد بربنا ونكلمهم عن كرمه وعن إجابة دعائه ونحببهم فيه وإياك تقول لابنك الصغير ربنا هيوديك النار عشان عملت كذا أو ماعملتش كذا ...مش وقته خالص هتكلمه دايما إن ده ربنا بيحبه
3️⃣ من أول 7 سنين تبدأ تعلمه الوضوء والصلاة خطوة خطوة وتقوله إننا بنصلي عشان احنا محتاجين نروح لربنا اللي خلقنا 5مرات في اليوم ولو ماروحناش احنا اللي هنخسر في الدنيا وكمان هنخسر الجنة
4️⃣ محتاج تعمل نظام مكافآت ع الصلاة يكون بسيط ومناسب للأطفال ومش شرط يكون مكافآة مادية ..ممكن مرة كدة ومرة لعبة عاوز يشتريها هتقوله هتبقى مكافأة الانتظام في الصلاة أسبوع أو أكتر
بالاضافة للتحفيز المعنوي بمدح الفعل ده
5️⃣ لو ولد خده معاك المسجد وممكن تعمله حفلة كمان أنه خلاص كبر وهيبدأ يحافظ ع الصلاة ولو استغليت فضول الطفل وأخدته كل فترة مسجد غير اللي متعود عليه هتبقى الصلاة عنده رحلة ممتعة
ولو بنت ماتحرميهاش من إنها تروح المسجد ولو صلاة جمعة كل فترة هيفرق جدا معاها
6️⃣ الصبر الصبر الصبر وطولة البال ..الأطفال بعد شويه ممكن يزهقوا وهنا دورك تفكره تاني بنصلي ليه وقولنا مافيش حاجة في السن ده اسمها عشان مانروحش النار واوعى تضرب أو تعنف طول ماهو سنه صغير لأن ربنا قالنا "وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا ۖ"
7️⃣ القصص ليها دور كبير في تغيير السلوك فاحكي له كتير قصص عن الصلاة وقصص أنبياء وحاجات تربطه بربنا
8️⃣ خلي فيه ارتباط شرطي بين الصلاة وكل حاجة حلوة هتصلي وتلعب معاه شوية،هنصلي ونشتري أي حاجة بيحبها
وخلي الربط ده بالكلام والأفعال
9️⃣ ماتحرمش نفسك وولادك من الدعاء يوميا بالذات رب اجعلني مقيم الصلاة ومن ذريتي
#يوصيكم
