10/09/2025
طبعا انتا مش دريان باللي عمله جيل زد في نيبال اللي هما مواليد مابين ١٩٩٧ ل٢٠١٢!!
يوم الخميس اللي فات الحكومة النيبالية - نيبال دولة في الهيمالايا مابين الهند والصين - قررت ان كل منصات التواصل الاجتماعي لازم تسجل في الحكومة والا هتتحظر كنوع من فرض الرقابة يعني ولما المنصات دي مسجلتش راحوا قافلينها خالص.
الحظر ده بسبب تريند عالمي اسمه "عيال نيبو" اللي هوا معناه عيال المشاهير والشخصيات العامة اللي بينزلوا صور من حياتهم الفارهة والثراء والدلع والسفر والبذخ بس عشان ابن حد مشهور او محظوظ في حياتك، والتريند ده سمع مع عيال نيبال اللي عايشين حياتهم وعربيات وفلوس وبتاع في مقابل الشباب النيبالي العادي بيشتغل بال١٧ ساعة مقابل ملاليم دا لو لقى شغل.
فخرج هاشتاج تحت اسم عيال نيبو في نيبال، وبدأت الفيديوهات تنتشر، فالحكومة النيبالية قررت ان منصات التواصل الاجتماعي يا تتسجل ويكون ليها مكتب في البلد يا تقفل، وطبعا جوجل وميتا رفضوا، فإتقفلت ٢٦ منصة.
جيل زد الفقراء بقا Gen Z صحي من النوم لقى المنصات اللي بيفرغ فيها طاقته وبيكسب منها فلوس في ظل البطالة اللي وصلت ل٢٠ في المية قفلت خالص، طب وبعدين هنعمل ايه هنسكت؟
جيل زد "الفقراء" فتحوا vpn واتجمعوا على منصة ديسكورد وقرروا ينزلوا ينددوا بالحظر ده في العاصمة كاتماندو، عيال صغيرة بلبس المدرسة نزلت تحتج احتجاج عادي بيطالبوا فيه ان المنصات تتفتح، افتحولنا النت، افتحولنا الفيسبوك زهقانين، لكن الشرطة قابلت ده بالضرب في المليان اسفر عن سقوط ١٩ طالب بشكل مباشر.
هنا بقا جيل زد اتهور وراح نازل ضرب في الكل، هجم عالبرلمان ساواه بالارض، ومبنى رئاسة الوزراء، وقصر الرئاسة، واغلب المباني الحكومية ومباني الاحزاب اللي خرجوا منها زعماء الاحزاب والوزراء وضربوهم، الامر اللي اضطر رئيس الوزراء نفسه "كي شارما اولي" انه يستقيل والمنصات فتحت تاني بس ده مهداش الموضوع لان القصة تطورت لمحاسبة الفاسدين، وانسحبت الشرطة ونزل الجيش النيبالي في الشوارع وفرض حظر تجوال لحد يوم الخميس الصبح اللي هوا بكرة يعني.
وفي ظل الفراغ السياسي اللي حصل بعد استقالة رئيس الوزراء ففيه محادثات دلوقتي بين جيل زد وبين ممثلي الحكومة للتوصل الى اتفاق ينهي اللي حاصل ده بعريضة طلبات ان عيال نيبو دول يتحاسبوا هما واهاليهم على الفساد،
وكل ده بدأ بسبب ان انستجرام وواتساب وفيسبوك قفلوا هناك.
