28/07/2023
صديقي العزيز بما ان انا سهران وانت سهران ما تيجي احكيلك حكايه عن محمد علي باشا قهوتك بقي و ركز معايا في السطرين الجايين دول هكتبلك فيهم شوية معلومات هتعجبك يا غالي 🦅
القصه كلها حصلت في قلعة صلاح الدين الأيوبي والتي أمر ببنائها عام 1176م لتحصين القاهرة🕌
قصتنا بقي حصلت فعليًا عند «باب العزب» أحد أبواب القلعة ، وهو ممر صخريّ منحدر موجود صخور على الجانبين بتوعه ، حيث لا مخرج ولا مهرب ولا مفر شبه المصيدة كده يا غالي ⚔️
اللي بنى الباب ده بقي هو ( الأمير رضوان كتخدا الجلفي) قائد الجنود العزب في موضع باب قديم يرجع تاريخه إلى العصر المملوكي .... وهنبقي نحكي قصه القلعه دي في مقال تاني
المهم ان في الممر الضيق ده حصلت فيه قصتنا ( مدبحة القلعه )
والي مصر محمد علي باشا بطل قصتنا جاتله رسالة من الباب العالي يطالبه فيها بإرسال حملة عسكرية إلى الحجاز للقضاء على حركة محمد بن عبد الوهاب في نجد اللي بنقول عليها ( الحركة الوهابية ) ، فعيّن ابنه أحمد طوسون باشا قائدًا للحملة، وعمل مهرجان و حفله ضخمه ، وحدد له يوم الجمعة الأول من مارس سنة 1811م
بعض المؤرخين بقي بيقولوا أن مش محمد علي بس اللي خطط لمذبحه القلعة ده كان معاه وزيره محمد بك لاظ أوغلي الشهير بـ "لاظوغلي" اللي دعاه للتشاور والتفكير في الأمر ... و استغل الفرصة وبدأ يدعو المماليك بحجة التشاور معهم في الحرب على الوهابيين، وكلف لاظوغلي باشا بالتخطيط والإعداد لمذبحة القلعة
طب مين اللي هيحضر الحفله يا غالي .... اقولك أنا
محمد علي بعت الدعوات لكبار رجال الدولة وأعيانها وكبار الموظفين العسكريين والمدنيين وزعماء المماليك لشهود هذا الحفل، وقد لبى المماليك دعوته ولبسوا أفخر و أحلي الملابس الحته اللي علي الحبل يعني ، ويقال أنه كان عدد الحضور حوالي عشرة آلاف شخص من كبار القوم ومختلف الطوائف
وقبل ما الحفله تبدأ دخل البكوات المماليك على محمد علي فقابلهم بحفاوة وترحيب ، ودعاهم إلى تناول القهوة معه زي اللي انت بتشربها دلوقتي دي ☕، وشكرهم على إجابتهم دعوته ، وتجاذب معهم أطراف الحديث ولا كأن فيه حاجه هتحصل ومحدش فعلا شك في نوايا محمد علي باشا واللي كتب الكلام ده محمد عتيق واللي سرق البوست مش هياخد باله من السطر ده المهم يا غالي المماليك شربت اخر فنجان قهوه ليهم علي كوكب الارض 🌍 وخلصنا القعده الجميلة دي وبدأت بقي قصتنا الي انت مستنيها يا غالي
بدأ الموكب يتحرك في مقدمته الفرسان ويتبعهم والي الشرطة والآغا محافظ القاهرة والمحتسب، ويليهم الجنود الأرناؤوط وماشي ورائهم المماليك في منتهي الشياكة و الأناقة يتقدمهم سليمان بك البواب، ومن بعدهم بقية الجنود، ثم باقي المدعوين و كبار رجال الدوله يا غالي
وكان الموكب يسير بانحدار كده إلى باب العزب وجبتلك صور المكان علشان اسهل عليك التخيل ....ولما عدت طليعة الموكب ووالي الشرطة والمحافظ باب العزب، ارتج الباب الكبير وأتقفل من الخارج في وجه المماليك و بسرعه بدأ الجنود التحول عن الطريق وتسلقوا الصخور على جانبين الممر الضيق ، وبدأت العركه يا غالي بأن الجنود اطلقوا علي المماليك وابل من الرصاص...💣
حاول المماليك الفرار او الهرب ، لكن اتقتل أغلبهم بالرصاص حتى امتلأ فناء القلعة بالجثث ده مش كده بس لاااا .... دا اللي نجا منهم من الرصاص اتدبح على أيدي الجنود ويقال بقي يا غالي أن الحي المقابل لباب العزب امتلأ بالدم واستغرق فترة طويلة للتخلص من أثاره، فسماه المصريون حي الدرب الأحمر الشهير بالأسم ده لحد وقتنا الحالي طب مات كام حد في المذبحة دي يا غالي أقولك أنا يا عم الناس
راح ضحية المذبحة المعروفة بمذبحة القلعة كل من حضر من المماليك، وعددهم 470 مملوك تقريبا حسب أغلب المصادر، مش بس كده ده استمر قتل المماليك بعدها بثلاثة أيام خارج القلعة في أنحاء مختلفة من القاهرة، وقدر البعض أن عدد القتلى يصل إلى 1000 مملوك، في حين يقول عبد الرحمن الرافعي أن عدد الضحايا وصل إلى 1200 قتيل، وأتعلقت رؤوس كبار المماليك على باب مسجد الحسنين بالقاهرة علشان يشوفها الشعب بس خليني أقولك بردو يا غالي ان بعض المؤرخين ذكروا ان في واحد بس هرب من المدبحه يدعى «أمين بك» الذي كان في مؤخرة الصفوف وقدر أنه يقفز من فوق سور القلعة بالحصان بتاعه بعد كده هرب إلى الشام كمان بعض المؤرخين قالوا أن أمين بك الألفي لم يكن المملوك الوحيد الذي نجا من مذبحة القلعة، فقد نجا سليمان أغا بأعجوبة بسبب ذكائه وحيلته فقد تظاهر بأنه مات فاقتيد نحو جثث رفاقه حتى إذا ما أخرجوه من القلعة فر هاربا، وقد استطاع فيما بعد أخذ العفو من محمد على باشا ليصير كاتبه فيما بعد ...
كده قصتنا خلصت حاولت قدر المستطاع اشرحلك التفاصيل كامله بالتبسيط و اتمني تكون عجبتك يا غالي 😉
🦅
