Miss Nesma Mohamed

كراسي_الهمزة
كراسي الهمزة خمسة ( ألف_ واو_ ياء _نبرة _سطر)*(أ_ؤ_ئ_ئـ _ء)
حركة الفتح 👆بتحب الألف َ⬅ أ
حركة الضم👌بتحب الواو. ُ⬅ ؤ
حركة الكسر 👇بتحب النبرة. ِ⬅ ئـ والياء ِ⬅ ئ
حركة السكون ✋ بتحب السطر ْ⬅ ء

(تكتب عند الكسر على نبرة وسط الكلمة وعلى ياء أخر الكلمة)

*سهلة أوى أول الكلمة وآخر الكلمة

أول_الكلمة⏪ دايمًا دايمًا دايمًا تكتب مع الألف سواء

١_ مفتوحة أَ 👈أََحمد _أمل _ أسنان _أسد _أرنب
ُ ٢_مضمومة أ ُ 👈أُسامة_أُذن _أُم
٣_مكسورة إِ 👈إِيمان _إيناس _إِبرة _إِبراهيم

لاحظ كتبت تحت الألف عند الكسر

و آخر_الكلمة سهلة خالص خالص تتبع دائمًا حركة الحرف السابق لها بغض النظر عن حركتها مع كتابةحركة الهمزة نفسها بغض النظر عن كرسيها

على الف ⬅أ 👈 اذا كان ماقبلها مفتوح
(يقرَأُ_سبِأُ _ هدَأَ _بدَأَ _ملجَأُُُ _يبدَأُ _يهدَأُ _يلجَأُ _يبرَأُ)
على واو ⬅ؤ 👈اذا كان ماقبلها مضموم
(لؤلُؤُ _يجرُؤُ _ تباطُؤ _تكافُؤ )
على ياء ⬅ئ 👈اذا كان ماقبلها مكسور
( هادِئ _ شاطِئ_مكافِئ)
على السطر ⬅ ء👈 اذا كان ماقبلها ساكن او حرف مد (هدُوء_بُطْءُ_جرِىء_مسِىء_ إنشاءُ _سناء _هناء_ضوء)

#نلاحظ ان حرف المد تعامل معاملة السكون لان الحرف وحده مطلقا ليس له حركه

نيجى بقى للشغل كله فى الهمزة👇👇👇
وسط_الكلمة برضك سهلة إن شاءالله

هنا الهمزة هتقف محتارة لا هى أول الكلمة هتكتب على ألف ولا هى آخر الكلمة هتاخد حركة الحرف اللى قبلها
هتفضل الهمزة تتخانق مع حركة الحرف اللى قبلها والحركة الأقوى هى اللى هتحدد نوع الكرسي وتحط الكرسي بتاعها للهمزة عشان تقعد عليه

طب مين هى أقوى الحركات؟!
الكسرة وبعدها الضمة وبعدهم الفتحة وفى الاخر خالص السكون لإنه اساسًا مش حركة

🔴ترتيب_الحركات_من_الاقوى_للأضعف
١_الكسرة
٢_الضمة
٣_الفتحة
٤_السكون

وأحنا اتفقنا فوق ان
🔵كراسي_الهمزة
كرسي الكسرة⬅ النبرة وسط الكلمة والياء اخر الكلمة👈 ِ ئـ / ئ
كرسي الضمة ⬅الواو👈 ُ ؤ
كرسي الفتحة ⬅الالف👈 َ أ
كرسي السكون ⬅السطر👈ْ ء

طب كلمة مؤمن كتبت ليه ع الواو لإن الميم التى سبقت الهمزة مضمومة وحركة الهمزة السكون والضمة اقوى من السكون فهتحط للهمزة كرسيها الواو 💺👈ؤ
خلي الطفل يكتب الحروف بحركتها لحد مايوصل للهمزة يقف ع الهمزة ويشوف حركتها فى النطق ويكتب الحركة قبل مايكتب الكرسي ويبص ع الحركة اللى كتبها ويقارنها بالحركة اللى قبلها ويختار حركة

سر النجاح مش عدد الطلاب ال بيحضروا كل سنه ويغيروا الدرس
سر النجاح الطالب ال مكمل معاك اكتر من سنه لانه واثق ومطمن في شرحك وعارف ومقدر قيمه تعبك

⬅️ أي طفل في مرحلة التأسيس لازم يمر بهذه الخطوات 👇 :

1️⃣ حفظ الحروف الهجائية جيدا وتدريبات عليهم مثل ( اكتب الحرف التالي _ اكتب الحرف السابق _ وصل _ أكمل الحرف الناقص )

2️⃣ اكتب من أ إلي ( أي حرف )

3️⃣ املاء عشوائي من أ إلي ي

4️⃣ بعد ما يخلص حفظ الحروف ويتدرب عليهم كويس جدا هتبدئي تعلميه شكل الحروف في أول الكلمة ووسط الكلمة وآخر الكلمة وتدريبات عليهم

5️⃣ بعدين نبدأ نعرفه الحروف المفخمة وأقوله
هي حروف قوية لما انطقها اتخن فيها صوتي وهما ٧ حروف
( خ _ ط _ ظ _ ص _ ض _ غ _ ق )

6️⃣ وبعدين نبدأ نعرفه الحروف اللثوية وأقوله هما 3 حروف لما انطقهم اطلع طرف لساني
( ث_ ذ_ ظ )

7️⃣ وبعدين نبدأ نعرفه الحروف الرافسة (الشقية )
وأقوله هي حروف شقية تمسك اللي قبلها وترفس اللي بعدها
( أ _ و _ د _ ذ _ ر _ ز )

8️⃣ نبدأ بعد كده بالحركات القصيرة وهي 👇 :

✅ الفتحه + مقطع من حرفين + كلمات من ٣ حروف + كلمات من ٤ حروف + جملة من كلمتين + جملة من ٣ كلمات

✅ الكسرة + مقطع من حرفين + كلمات من ٣ حروف + كلمات من ٤ حروف + جملة من كلمتين + جملة من ٣ كلمات

✅ الضمة + مقطع من حرفين + كلمة من ٣ حروف + كلمة من ٤ حروف + جملة من كلمتين + جملة من ٣ كلمات

9️⃣ بعد لما تتأكدي ان الطفل اتمكن من قراءة وإملاء كلمات متنوعة بالحركات القصيرة الثلاثة جيدا ابدئي راجعي علي كل ما سبق واعملي أسئلة متنوعة

🔟 الحركات الطويلة ( المدود )
المد بالألف
المد بالياء
المد بالواو

1️⃣1️⃣ السكون هنقوله السكون بتقول علي نفسها انا دايرة صغننة مقدرش اكون لوحدي ولازم يجي قبلي يا فتحة يا كسرة يا ضمة واديله كلمات عليها

1️⃣2️⃣ التنوين

1️⃣3️⃣ الشدة

1️⃣4️⃣ ضمائر المتكلم

1️⃣5️⃣ ياء الملكية

1️⃣6️⃣ اسماء الاشارة

1️⃣7️⃣ المذكر والمؤنث

1️⃣8️⃣ المفرد والمثني والجمع

1️⃣9️⃣ ضمائر المخاطب

2️⃣0️⃣ ضمائر الغائب

2️⃣1️⃣ اللام الشمسية واللام القمرية

لو ابنك أو بنتك مش متمكن من القراءة ياترى المفروض تعملى إيه 🤔🤔 ؟؟؟
هبدأ معاه تأسيس 🤓
تمام صح هتبدئى معاه تأسيس ❤️
بس ازاي؟؟؟
هتبدأ معاه من البداية 🥴
وهتلغى كل اللى عارفه 😱😱
طيب أعمل ايه 🤔🤔
تعالى هقولك تعملى إيه المشكلة دى بتقابل اطفال كتير وديما الأم تدور على معلم أو معلمة تأسيس ويبدأ مع الطفل من البداية وللأسف مش بتحس بأى إنجاز وتحس انها بتحاول في الفاضى وده غلط 🤐 لأنك بتلغى كل معلومة عند الطفل فيحس بالعجز اكتر وياخد وقت اكتر من غير أى إنجاز 💔💔
المفروض أبدأ باختبار للطفل واوصل لنقط الضعف عنده وأبدأ اعالجها احط ايدى على المرحلة اللى فيها المشكله وادربه عليها بدون ماألغى معلوماته وبكده هزود ثقته بنفسه وهضيف له معلومة جديدة وهنجز في الوقت وإن شاء الله الطفل يتحسن في وقت أقل ولازم كمان نعرف إن القراءة ممارسه يعنى كل ما يقرأ اكتر كل ما هيتحسن اكتر واكتر ❤️💪💪

بالتوفيق للجميع يارب العالمين

معلومات هامة في التأسيس
1) إزاي أطلع حرف ساكن من جملة مفيهاش تشكيل
هنقوم ندور على كلمة فيها لام قمرية لأن حرف اللام فيها ساكن دايما وابدا
طب مفيش يبقى لام شمسية ....ايه؟؟؟
اه والله لأن الحرف اللى بعدها مشدد واى
شدة تنفك بساكن وحركة
2 ) طب ازاى اطلع شدة؟ ؟؟
ما انا لسه قائلة بعد اللام الشمسية لازم فى شدة
3 ) إزاى اعرف اللام دى شمسية ولا قمرية ؟؟؟
نحفظ حروف الشمسية بأغنية
احنا حروف أخوات أخوات ال ت ث / د ذ/ ر ز/ س ش /ص ض /ط ظ وننط نجيب ال ل و ال ن
يبقى باقى الحروق قمرية اللى متجمعين فى كلمة (جحا غبى فك مخه وقع )
4 )ازاى اعرف أن الكلمة نهايتها تاء مربوطة ة ولا هاء مربوطة ه فى الإملاء
طبعا معروف أن التاء المربوطة تنطق هاء وتكتب تاء علشان كده بتلخبط
سهل جدا تزود للكلمة ياء ملكية وانطقها هتظهر على طول فى النطق
مثال كلمة اله /وجه ......تصبح الهى/ وجهى اذا هى هاء
لكن حديقة /أسرة ......تصبح حديقتي /اسرتى اذا هى تاء مربوطة
5 )ازاى اعرف ان النون اللى فى آخر الكلمة أصلية ولا نون كدابة
اه فى نون كدابة اللى هى التنوين بالفتح لأننا بننطق نون وهى مش موجودة اصلًا
زى شكرًا. ... كتابًا...... قلمًا
نعمل إيه نضيف للكلمة ال لو اختفت النون تبقى كدابة علشان بتخاف من ال
لكن لو أصلية مبتخفش
وتفضل زى ما هى الشكر.....الكتاب.....القلم شوفتوا هربت بسرعة ازاى
لكن فى كلمة حنان.....ميدان.....زمان ...الحنان..... الميدان......الزمان ثبتت على موقفها تبقى أصلية
6 )ازاى اعرف لما اعمل تنوين بالفتح لكلمة امتى ازود آ التنوين و امتى لأ
كل الكلمات نزود معاها آ التنوين بالفتح ماعدا الكلمات المنتهية ب تاء مربوطة
و همزة على السطر
يسبقها مد الف لأنهم مش بيحبوا أ التنوين تقف وراهم لكن باقى الحروف بتحبه
تبقى كلمة زى سماء.... دواء ....حديقة.........سعيدة ....أسرة لما اجى انونها بالفتح مش هزود الف
ونحط التنوين فتحتين على اخر حرف فقط
لكن كلمات مثل باب كتاب قلم ......تصبح بابًا .....كتابًا......قلمًا نضيف الف وفتحتين
7) ازاى اعرف ان الكلمة دى فعل ولا اسم
عادى جدا ازودلها ال لو نفعت متبقاش فعل تبقى اسم لكن لو منفعتش تبقى فعل
اسرة....الأسرة تبقى اسم. أحب ...الأحب. مينفعش تبقى فعل

نصيحة لله💙
اشتغلوا مع أولادكم تأسيس من بدرى
من ٤ سنوات الطفل جاهز بإذن الله يكتب ويقرأ
متستنيش قبل دخول سنة أولى بكام شهر وتفكرى تدورى
المناهج مش تقيلة و مش صعبة

المناهج طويلة

الطفل محتاج مش اقل من سنة ونص تأسيس وبصفة مستمرة
عشان الصور اللي شايفينها لطلاب وطالبات وصلوا للمستوي ده بعد سنة أو سنة ونص من تأسيسهم في الأون لاين معايا.

فلازم كأم تبذلي مجهود مع الطفل عشان يدخل سنة اولى مرتاح
اللهم بلغت اللهم فاشهد⁦❤️⁩⁦❤️⁩

مينفعش طفل التأسيس ياخد اجازة مع اخواته لو هما كبار وخلصوا منهج لأن طفل التأسيس لازم نستمر معاه لانه بينسى للأسف ♥️♥️

لو مش قادرة تفهمي إن التأسيس مجهوده أصعب من المنهج
ذاكري حضرتك لابنك 😇

تعرفي إن الأهم من التأسيس الاستمرارية في التأسيس يعني لو ابنك قرب يخلص الحروف وقعد فترة إجازة هيرجع للصفر 🥲

ليه تقعدي شهر كامل أو أكتر في مواضع الحروف والطفل يتعقد الباء في أول الكلمة الباء في نص الكلمة الباء في أخر الكلمة لما ممكن تخلي الطفل هو الي يستنتجهم كلهم لوحده تعرفي إن مفيش طفل عندي خد مواضع الحروف كلهم بيتملوا ع طول وزي الفل من غير تعقيد ولا حفظ كله بالفهم 👌