Doaa Hani_Special Education

09/12/2023

متنسيش ي ماما واحنا بنذاكر للأولاد علشان ميزهقوش من المذاكرة نقسم المهمه لأجزاء بسيطة بمعني لو عندهم درس كبير لازم بنذاكر على مراحل مش مره واحده ولو كلمات انجليش كتير مينفعش بردو كلهم مع بعض لازم على مراحل و أجزاء صغيره و كل مرحله بوقت مقدار ٢٥ دقيقه مذاكره و ٥ دقائق بس بريك أو فاصل بين كل جزء و التاني و بعد ما يخلص خالص نديله مكافأة بريك فقط من ربع ساعة ل نص ساعة .. و بعدين نرجع نكمل مذاكرة تاني لمادة تانية أو تمارين أو غيره يكمل يومه عادي بقي بس بنفس النظام ...
و نقرأ اكتر عن pomodoro technique 🤚🍅🍅🍅

06/12/2023

فيه بوست انتشر أوي الفترة الأخيرة في مجالنا ميس أكاديمي منزلة شغلها و بتعلن عنه على أساس أنه صح و الدنيا قامت عليها تنمر و دعا عليها سبحان الله عكس م كانت متوقعة و عكس ما كانت عايزة ...
طب حضرتها عملت اي ؟ ... كانت بتكتب للولد نطق الكلمة الانجليزي بالعربي يعني
صباح الخير تكتبها كده جود مورنينج ❌ على أساس يحفظها و ده غلط جدا حتى لو جايب معاكي و شاطر بس تخيلي حضرتك الولد ده بقي يعتمد على طريقتك دي لغاية م بقي شاب ماشاء الله ربنا يحميه تبقي كارثه والله و عيب اوي في حق كل مدرس أصلا ...
طب اي الصح ؟؟
حضرتك لو خريجة تربية انجليش أو أداب انجليش بتشتغلي معاه phonetics و ده المفروض أنت درساه بتعرفيه الصوت ده ينطق كذا و الصوتين دول مع بعض يبقي كذا بتديله أساسيات حسب سنه و استيعابه مش هنتعمق اوي و لو حضرتك واعية اوي كده و كنت واخده بالك هتلاقي اصلا في الكتب الخارجية بيقولك الكلام ده و يقولك أن Ch تنطق ts تش و مديكي كلمات عليها يعني اصلا الكتاب موجهك ليه بنلف و ندور بقي و نتعب الطالب و ولي الأمر يدفع و خلاص الدنيا صعبه نراعي ربنا في ولاد الناس ...
طب حضرتك مش خريجه تربيه انجليش أصلا و خريجة اي حاجه و شغالة مفيش مشكلة اتعلمي بقي يوتيوب مليان طرق شرح مبتكرة وانتي و شطارتك بقي اتعلمي و بلاش مجادلة و استمرار في الغلط ...
اكتر طريقة معصباني مفتكرش خالص أن عملت كده والله و ياريت نهتم بالنطق اكتر من مجرد الكتابة لأن النطق هيسهل كتير والله على الطالب خاصة صعوبات تعلم و بطء تعلم و تأخر دراسي يعني نكتب كلام مش عارفين ننطقه طب ازاي ❌ ...


🙏🙏🙏

06/12/2023

🫰💙💙💙💙

02/12/2023

بعض الباحثين عملوا تجربة على أطفال و حطوا كل طفل في أوضه لوحده و اتفقوا معاهم أنهم هيحطوا أدامهم مارشميلو بس محدش ياكل منه وهم هيخرجوا بره شوية و هيرجعولهم تاني و اللي هيستحمل و مش هياكل المارشميلو هياخد شيكولاته كبيرة أوي هدية و كانوا حاطين كاميرات في الغرف كلها بيراقبوهم ... لقوا بعض الأطفال مقدرتش و كلت كل المارشميلو اللي أدامها و أطفال تانية استحملت و مكلتش لغايه م الباحثين م دخلوا عليهم الأوضة تاني ......
بعد سنين طويلة بيحاولوا يعرفوا مصير الأطفال دي اللي المفروض بقوا شباب بيعرفوا مستقبلهم عامل ازاي لقوا أن الأطفال اللي مستحملتش مجرد ناس عادية و مش ناجحين ولا متميزين في حياتهم على عكس الأطفال اللي استحملت و مكلتش المارشميلو لقولهم ناجحين و مشهورين جدا و متميزين في حياتهم ..
دي حاجة اسمها وظائف تنفيذية و الدراسات اختلفت على عددهم بالضبط بس قالوا إنها مهمة جدا لنجاح الشخص في حياته و اللي من غيرها ممكن تسبب كوارث لأنها عبارة عن عمليات معرفية عقلية عليا منها الإنتباه و الذاكرة و الكبح و غيرهم
في المثال ده التجربة كانت علي وظيفة الكبح و معناها أن الشخص يقدر يستحمل أي حاجة و يتحكم في نفسه زي أنه يتحكم في غضبه مثلاً و مشاعره و كلامه السيء اللي ممكن يطلع في بعض المواقف يستحمل التعب و السهر علشان يحقق ذاته يستحمل الابتلاء علشان نتيجة الآخرة و نعيم الجنة يستحمل أي حاجة في حياته ممكن تيجي في بالك حتي أذي الناس و الصبر علي أذاهم سبحان الله و ده اللي وصانا بيه ربنا و الرسول الكريم في آيات كتير من القرآن و احاديث
العلم بيلف و يرجع للقرآن و بيبحث و يثبت اللي موجود فيه ...
فالحمد لله على نعمة الرزق في العلم



🌹🌹🌹🙏🙏

15/05/2020

أعراض ال PKU او الفينيل كيتون يوريا ؛قولنا ف بوست فات ان الأعراض بتتباين ما بين أعراض شديده الي خفيفه علي حسب مستوي الآنين في جسم الطفل
لو الآنين مستواه عالي ده يؤدي لتلف في المخ شديد ويعرف ب"كيتون يوريا الكلاسيكي " وهو الشكل الأكثر حِدّه من الاضطراب ...لو مستوي الآنين قليل تبقي الأعراض طبعا اخف وكلاهما محتاجين لنظام غذائي معين ده هنتكلم عنه في بوست تاني _ان شاء الله _

اي هي الأعراض بقي !!؟
_حساسيه شديده من الضوء
_تاخر في النمو ؛ وبالتالي حجم جسمه اقل من الطبيعي بالنسبه للي في سنه
_تاخر أيضا في نمو المهارات العقليه والاجتماعية
_اعاقه ذهنيه شديده
_فرط حركه او نشاط زايد
_ضعف العظام
_اضطرابات سلوكيه ؛عاطفيه ؛اجتماعيه وأخري نفسيه
_حدوث تشنجات
_ارتعاش الأطراف
_كثره التعرق
_بشره شاحبه وعيون زرقاء وده لان الآنين مش بيتحول الي الميلانين "الصبغة المسؤوله عن لون الشعر والجلد "
_رائحه "عفن"غير مقبوله من نفَس وجلد وشعر وبول الطفل ناتج من تراكم الآنين في الجسم

11/05/2020

نتكلم عن حاجه مهمه جدا وبيتم تشخيصها غلط وهي الفينيل كيتون يوريا او PKU وهو مرض وراثي نادر ينتج عن خلل في الجين المسؤول عن تكوين الأنزيم اللازم لتحويل الحمض الأميني الفينيل الانين الي الحمض الأميني تايروسين.

28/10/2019

يعاني اغلب مصابي متلازمه داون من بعض المضاعفات او المشكلات اللي بتكون اكثر وضوحًا كل اما تقدموا في العمر ومنها :

-عيوب القلب :حوالي نصف مصابي المتلازمة عندهم مشاكل في القلب سواء في شكله او طريقه عمله ؛احيانا عدم انتظام في ضربات القلب اللي بتؤدي لاغماء ونوبات وألم بالصدر ؛فاغلبهم بيحتاج لجراحه في مرحله الطفوله حتي لا تصل الحاله للوفاه.
-مصابين بتشوهات في الأمعاء والمريء والقصبه الهوائية والشرج ويمكن تصل حد الاصابه الي أصابه الجهاز الهضمي او انسداده او قرحه معده .
-ضعف في الجهاز المناعي لذلك فهم اكثر عرضه للأصابه ببعض أنواع السرطان خاصه "سرطان الدم الحاد "لوكيميا"" بنسبه ١٠٪؜ ل ٢٠٪؜ وكذلك الأمراض المعدية مثل الالتهاب الرئوي ؛والعدوي الميكروبية ؛

10/10/2019

30/09/2019

علاج الشلل الدماغي ..
١-في علاج بالادويه :وده بيكون حسب الأعراض اللي بتظهر علي الطفل (يعني كل نوع وله دواء معين )ولكن فائدتها مؤقته ؛علاج للصرع وعلاج بيمده بالفيتامينات اللازمه والحديد لمنع نقصها في الجسم ؛مع اطعمه مناسبه لمنع مشكله سوء التغذيه اللي بيعاني منها .

٢-جراحه :لتحسين وظيفه العظام وإصلاح جذور الأعصاب والعضلات وتقليل التشنج وفي بعض الأحيان مش بيحتاج المريض لعمليات جراحيه لو تابع جلسات العلاج الطبيعي بشكل مكثف...
العلاج قائم علي فريق مختص من مختلف التخصصات بيقوموا بعده من الفحوصات اللازمه منها الاشعه المقطعيه ؛والرنين المغناطيسي ؛وتحليل دم علي سبيل المثال ؛وغيرها من الفحوصات لتقييم الطفل ومعرفه معلومات كامله عن حالته ومشاكله اللي بيعاني منها واحتياجاته وسبب المشكله من الأساس ؛ وبالتالي وضع خطه علاجيه واضحه وبرنامج علاجي تربوي نفسي واضح .
يتكون من "العلاج":
١-أطباء متخصصين بطب الأطفال التطوري والأعصاب والعظام والتأهيل
٢-معالجين متخصصين بالعلاج الطبيعي والوظيفي والنطق

26/09/2019

أنا وبنتي - لأول مره مها أحمد ومجدي كامل يتحدثون عن أبنهم.. والتحديات التي واجهتهم جزء من حلقة اليوم 14 مارس 2019 من برنامج يقدمها الفنان شريف من...

24/09/2019

أعراض الشلل الدماغي
١-بكاء شديد من غير سبب وعدم تقبله للرضاعه (قيء اثناء الرضاعه )
٢-توتر للعضلات (تيبس يعني "صلبه "او ليونه )يؤدي لتشوه في العظام والقدم والكف والأيدي وخلع المفاصل
٣-رعاش(حركه مستمره لا اراديه )في الأطراف بالتالي صعوبه في المشي
٤-عدم توازن وحركه غير منتظمه
٥-تاخر في المهارات الحركيه زي الجلوس ،القعود،الزحف مقارنه بالطفل العادي ....يتاخر تقريبا عن ١٨ شهر لاكتساب هذه المهارات
٦-يزحف بطريقه غير منتظمه
٧-عند ٣شهور لسه مش عارف يرفع رأسه
٨-يمشي علي أطراف أصابعه .وغيرها من الأعراض الغير طبيعية اللي ممكن ألاحظها علي الطفل

24/09/2019

الشلل الدماغي له أنواع كتيره منها ما يُعْرّف ب

١-الشلل الدماغي التصلبي :وده النوع الأكثر شيوعا يحدث بنسبه ٧٠ل ٨٠٪؜ بيكون مصحوبا لنوع تاني من الشلل بنسبه ٣٠٪؜ وممكن يكون رباعي (الأطراف الاربعه ) وده النوع الأكثر شيوعا وفي الغالب بيكون مصحوب بإعاقات تانيه بالأخص
الإعاقة الذهنيه ...ممكن يكون في النصف الأيمن او الأيسر من الجسم (شقي /فالج)...ممكن يكون في الأطراف الاربعه بس الأطراف السفليه الأكثر تاثيرا (شلل نصفي طرفي مزدوج ) والنوع ده الاقسي من أنواع الشلل ...شلل احادي (طرف واحد من الجسم )..او ثلاثي (٣اطراف )

٢-شلل دماغي ترنحي :يصاب به ١٠٪؜ من الأفراد وناتج عن اصابه المخيخ
٣-شلل دماغي كنعي:حديثي الولاده يصابوا به بشكل كبير
٤-شلل رخو
٥-شلل مختلط :مرضي هذا النوع من الشلل تظهر عليهم علامات لأكثر من نوع من الشلل لأصابه اجزاء كبيره من الدماغ )