16/08/2020
كتير مننا بيواجه مشكلة في انه ياخد قرار وساعات حتى في ابسط القرارات زي هلبس ايه النهارده، هتغدى ايه، ولما تبقى عمال تقلب في المنيو والناس مستنية تعمل اوردر بقى … وانت مش عارف تطلب بكل بساطة كدة ، وحتى سعات في قرار التخلص من الاشياء البسيطة زي الرسيت او فواتير قديمة ...
طبعا المشكلة دي بتبقى مش منطقية تماما وخصوصا للناس اللي حوالينا … يعني لما شريك حياتك بيسألك تاكل ايه انهاردة … ويبقى دايما في معاناة عشان يطلع بإجابة منك ... والمشكلة كمان انك بعد اما تضغط على نفسك وتاخد القرار بتبقى متعذب ومش مرتاح خالص ...
لو حابين نحلل المشكلة دي ومصدرها ايه، فالنقطة المحورية ان القرار بالنسبالك بيبقى اكنك بتخاطر … وفي حاجات بتبقى على المحك ...
النظام النفسي بيكون فيه حاجات مهمة مربوطة بالقرار … زي مثلا انك هتضيع عليك فرص تانية او اختيارات تانية افضل بمجرد ما تاخد قرار … زي مثلا انك هتاخد قرار سيئ لو قررت بسرعة لانك مفكرتش كفاية …
وكل ده مش المخاطرة الحقيقية … المخاطرة الحقيقية بتيجي من 4 انماط تفكير اساسية:
- النمط الاولاني اللي هو الـ Awfulizing أو التضخيم، بيكون هوا اللي بيضخم جدا مدى سوء القرار الخطأ وبيخليك تشوفه حاجة لا تطاق زي مثلا انك تشوف ان القرار ده معناه فشل.
- النمط التاني Pervasive ،إنك تاخدالفشل ده على انه داخل في كل جوانب حياتك سواء الشخصية والاسرية الشغل وغيره.
- النمط التالت هو الـ Personalizing، وهوا اللي بيخليك تاخد الفشل ده وتشخصنه على نفسك وتعرف نفسك بالفاشل.
- والنمط الاخير هو الـ Permanent … اللي هو ان الفشل ده خلاص … ممتد معاك لاخر الحياة … مش هيتغير ابدا.
تخيل بقى انك تاخد قرار في انك تطلب ايه من المينيو بقى قرار مصيري قد ايه ومش سهل خالص (طبعا ده بيختلف من شخصل للتاني ولو عندك بعض الانماط مش كلها)
طيب الحل؟
اولا: محتاج تقبل انك مش هتقدر ابدا تاخد كل الاختيارات … بالعكس كل ما كنت مش عايز تضيع اختيار … غالبا بتتأخر وممكن تضيع معظم الاختيارات الجيدة بسبب التأخير.
ثانيا: انك تبقى عارف ان التفكير كويس ولكن في حد بعديه بيبقى مضر مش مفيد خالص.
ثالثا: وكمان تبقى عارف ان تآجيل القرار ممكن يؤدي انك تاخد قرار متسرع بسبب انك اتخنقت من نفسك او ان في حد غيرك ياخده بالنيابة عنك … يعني التآجيل برده ليه اضراره.
رابعا: والاهم … انك تبقى عارف انك تاخد قرار خطأ مهما كان مش نهاية الدنيا خالص … وفكر انفسك في كل قرار … ايه مدى العواقب الحقيقية لو اخدت قرار خطا … يعني لو تطلب وجبة ومطلعتش حلوة … كل اللي هيحصل انك ممكن متكملهاش و مش هتطلبها تاني … مش اكتر من كدة … يعني اكيد مش معناها انك فاشل وهتفضل فاشل طول حياتك
وبكدة الموضوع هيبقى اسهل كتير في انك تاخد قرار ...
